Badisangishe mu dinanga—Luapolo lua tshisangilu tshia ku tshidimu
Badisangishe mu dinanga—Luapolo lua tshisangilu tshia ku tshidimu
BANTU bavua badisangishe mu Nzubu wa Mpuilu wa Bantemu ba Yehowa mu tshimenga tshia Jersey mu tshitupa tshia New Jersey mu ditunga dia États-Unis bavua ne disanka dia bungi. Mu dinda dia mu dia 3/10/2009 adi, bantu bapite pa 5 000 bavua badisangishe bua tshisangilu tshia 125 tshia ku tshidimu tshia Watch Tower Bible and Tract Society of Pennsylvania. Bantu bakuabu binunu ne binunu bavua batelejila programe eu ku bisanji ne ku televizion mu Betele mikuabu isatu mu États-Unis ne ku Betele wa mu ditunga dia Canada. Bantu bonso 13 235 bavua badisangishe mu dinanga diabu dia Yehowa bua kuteleja tshisangilu tshivua tshienze mêba asatu atshi ne disanka dionso.
Geoffrey Jackson wa mu Kasumbu Kaludiki ke uvua mulombole tshisangilu atshi. Kumpala kua kutuadijabu, wakalomba kasumbu ka bena ku Betele bavua badilongolole bua kuimbabu misambu miangatshila mu mukanda wetu mupiamupia wa misambu. David Splane udi pende wa mu Kasumbu Kaludiki ke uvua ulombola kasumbu ka bimbi abu, ne wakumvuija mu tshikoso mushinga udi nawu misambu mu ntendelelu mulelela. Bakalomba bantu bavua muaba au bua kuimba misambu mipiamipia isatu ivuabu balongolole bua tshisangilu atshi. Bena mu kasumbu ka bimbi ke bavua banji kuyimba ne pashishe bantu bakuabu balua kuyimba pamue nabu. Bavua benze kasumbu ka bimbi aku anu bua tshisangilu atshi, ki mbualu budibu mua kuenza mu bisangilu bia tshisumbu, mu mpuilu ya bijengu ne mpungilu ya distrike to.
Luapolo lua Betele mikuabu
Bena mu Komite ya filiale bavua mu tshisangilu atshi bakafila luapolo lua Betele itanu. Kenneth Little wakamba ne: Betele wa mu Canada neatuadije kupatula mu matuku makese emu bibejibeji bua États-Unis mujima ne bua ditunga dia Canada. Bualu ebu nebuenze bua Betele wa Canada kutuadija kupatula mikanda misangu dikumi kupita muvuaye uyipatula kumpala. Bua bualu ebu kukumbanabu, biamu bia dipatula nabi mikanda bidibu bafuma ku disumba nebikale bienza mudimu mêba 16 ku dituku.
Reiner Thompson wakaleja mudi mudimu wa kuyisha wenzeka mu ditunga dia République Dominicaine, ne Albert Olih wakumvuija pende mudi mudimu wa buambi wenzeka mu ditunga dia Nigéria. Emile Kritzinger wa mu ditunga dia Mozambique wakumvuija ne: panyima pa Bantemu ba Yehowa bamane kukenga munkatshi mua bidimu bia bungi mu ditunga edi, mbulamatadi wakabitabila bua kuenza midimu yabu mu 1992. Bungi bua bambi ba lumu luimpe mbuvule bikole mu matunga asatu aa matuku mashale aa. Viv Mouritz wa ku Betele wa mu ditunga dia Australie wakakula bua mushindu udi mudimu muenzeke bimpe ku Est kua Timor udibu balombola kudi bana betu ba mu Australie.
Tusumbu tua Kasumbu Kaludiki
Mu 1976 bavua balombola midimu yonso ya Bantemu ba Yehowa kudi tusumbu tusambombo tua Kasumbu Kaludiki. Pashishe bakasungula bena mu mikoko mikuabu bua kuikalabu babambuluisha. Lelu eu, kudi bana betu 23 badi babambuluisha mu mudimu eu. Bakela basambombo ba kudibu nkonko. Bidimu bionso bikavua bana betu basambombo aba benze mu mudimu wa ku dîba ne ku dîba bivua 341, tuambe ne: muayene wa 57 pa muntu.
Don Adams uvua mulue ku Betele mu 1943 wakumvuija ne: Kasumbu ka Balombodi nkenza ne balombodi ba Tusumbu tukuabu tutanu tudi tudienzeja bua kuenza mudimu bimpe mu buobumue. Kasumbu aka kadi katangila malu a njiwu, a Bantemu badibu bakengesha, a bilumbu bia ku tubadi, a bipupu ne makuabu adi akuata Bantemu ba Yehowa pa buloba bujima.
Dan Molchan wakumvuija ne: Kasumbu kadi katangila bena ku Betele kadi ne mudimu wa *
kulongesha bena ku Betele 19 851 pa buloba bujima ne kukumbaja majinga abu makuabu. David Sinclair wakakula bua Kasumbu kadi katangila dipatula dia mikanda ne kuleja ne: kadi ne mudimu wa kusumba bintu bionso bidi Betele ya pa buloba bujima nabi dijinga. Pashishe Robert Wallen ukadi muenze bidimu bitue ku 60 ku Betele wakaleja mudi Kasumbu kadi katangila mudimu wetu wa kuyisha pa buloba bujima ne mu bisumbu kenza mudimu waku. William Malenfant wakaleja mudimu mukole udi Kasumbu kadi katangila dilongesha kenza bua kulongolola malu a mpungilu. Pashishe John Wischuk wakumvuija mudi Kasumbu kadi katangila difunda kalombola bimpe mudimu wa dilongolola dia malu adi ne bua kupatuka mu mikanda yetu.Mvese wa tshidimu tshia 2010 udi wakula bua dinanga
Miyuki mikuabu isatu yakalonda ivua mienza kudi bena mu Kasumbu Kaludiki. Muanetu Gerrit Lösch wakatuadija ne lukonko lua ne: “Udiku musue bua bantu bakuabu bakunange anyi?” Wakumvuija ne: dinanga ke dijinga dia kumpala ditu nadi bantu ne tuetu bonso tutu tudienzeja bua batunange. Bu Yehowa kayi ne dinanga, kavua mua kutufuka to. Tudi tuyisha bantu ne tubalongesha nangananga bualu tudi banange Yehowa.
Dinanga didi dimanyine pa mikenji ya Nzambi kadiena ditusaka bua kunanga anu bantu badi batunange to, kadi didi ditusaka bua kunanga too ne bena lukuna betu. (Mat. 5:43-45) Wakakankamija bateleji bua kuela meji muvua Yezu muitabe bua kumuelabu mfimbu, kumusekabu, kumutuila mate ne kumutua difuma mu lubadi. Nansha nanku, wakalombela basalayi bavua bamukengeshe ne bamupopele ku mutshi Nzambi. Bualu ebu kabuenaku ne bua kutusaka bua kumunanga bikole anyi? Pashishe muanetu Lösch wakamanyisha mvese wa tshidimu tshia 2010 udibu bangatshile mu 1 Kolinto 13:7, 8 udi wamba ne: ‘Dinanga didi didikankamika mu malu onso. Dinanga kadiena dipanga tshiendelele.’ Tudi ne ditekemena dia kuikala ne muoyo bua kashidi ne dia kunanga bantu ne kunangibua bua kashidi.
Udi bu udi wendesha mashinyi kaayi ne kasolonyi anyi?
Samuel Herd wakatuadija muyuki wende ne tshilejilu wamba ne: Fuanyikijabi ne: mulunda webe udi ukuangata bua nuenza nende luendu lua kilometre 50. Paudi ubuela mu mashinyi, udi umona ne: kasolonyi nkashale kakese menemene. Paudi umanyisha mulunda webe, udi ukuambila ne: kutshinyi to, mutshidi litre mitue ku inayi. Panudi nuya katupa kakese, kasolonyi kadi kajika. Bidiku bia meji bua ‘kuendesha mashinyi ne kasolonyi kakese menemene’ eku mumanye ne: kadi mua kukujikila mu njila anyi? Mbimpe kuikala ukumbaja kasolonyi misangu yonso. Mu mushindu kampanda, tudi ne bua kutungunuka ne kuvudija dimanya dietu dia Yehowa didi dienza bu kasolonyi.
Bua kuikala ne dimanya dia bungi dia Yehowa, tudi ne bua kuikala tuenza malu anayi adi alonda aa. Bua kumpala, tudi ne bua kudilongela Bible, kumubala dituku dionso bua kuibidilangana nende. Musambu wa 143:5 udi wamba ne: ‘Ndi mvuluka matuku a diambedi, ndi ngelangana meji a bienzedi biebe bionso.’
Pamutu pa kubala anu mêyi adimu patupu, tudi ne bua kukeba mua kumvua malu atudi tubala. Buibidi, tuikale tuenza Ntendelelu wa mu Dîku ku dilolo dionso dia dituku dituvua basungule. Tutuku tuenza Ntendelelu wa mu Dîku lumingu luonso bua kuvudija dimanya dietu anyi? Peshi tutu tutupisha ne tushala anu ne dimanya dikese menemene anyi? Buisatu, tudi ne bua kuikala tubuela bisangilu bionso bia tshisumbu bua kulonga Bible. Buinayi, tudi ne bua kuikala tuela meji mu lutulu pa mikenji ya Yehowa.“Bantu bakane nebakenke”
John Barr wakenza muyuki muisatu uvua wa ndekelu uvua umvuija mufuanu wa Yezu wa mponda ne lupela. (Mat. 13:24-30, 38, 43) Mufuanu eu uvua wakula bua tshikondo tshia “kunowa” tshidibu basangisha ‘bana ba mu bukalenge bua Nzambi’ ne basuika lupela pa nkayalu bua kulosha.
Muanetu Barr wakumvuija patoke ne: disangisha edi kadiakutungunuka bua kashidi to. Wakatela mukanda wa Matayo 24:34 udi wamba ne: ‘Bantu ba tshikondo etshi kabena bajika too ne pajika malu aa onso.’ Wakabala diumvuija didi dilonda edi misangu ibidi wamba ne: “Bidi bimueneka ne: Yezu uvua musue kuamba ne: bela manyi bavua bamone pavua tshimanyinu tshituadije mu 1914 kabavua ne bua kufua bonso kumpala kua kupetangana ne bela manyi bakuabu badi ne bua kumona ntuadijilu wa dikenga dinene to.” Katuena bamanye bule bua “tshikondo etshi” to, kadi tshidi tshikongoloja bena mu bisumbu bibidi badi bapetangana aba. Nansha mudi bela manyi bonso kabayi ba mulongo umue, bena mu bisumbu bibidi ebi badi ne muoyo mu tshikondo tshimue tshia mu matuku a ku nshikidilu. Bidi bitukolesha ku muoyo patudi tumanya ne: bela manyi batshivua ne bidimu bishadile mu tshikondo tshimue ne bakavua ne bidimu bia bungi bavua bajingulule pavua tshimanyinu tshituadije kumueneka mu 1914 kabakufua bonso kumpala kua dikenga dinene kutuadijadi to.
‘Bana ba mu bukalenge bua Nzambi’ mbindile ne muoyo mujima difutu diabu dia mu diulu, kadi tuetu bonso tudi ne bua kushala balamate Yehowa ne kukenkesha butoke buetu too ne ku nshikidilu. Tudi ne disanka dia kumona mudibu basangisha “mponda” mu tshikondo tshietu etshi.
Panyima pa musambu wa ndekelu, muanetu Theodore Jaracz wa mu Kasumbu Kaludiki wakenza disambila dia ndekelu. Tshisangilu tshia ku tshidimu etshi tshiakakolesha bantu bikole bia dikema.
[Mêyi adi kuinshi]
^ tshik. 10 Bua kumanya mudi tusumbu tusambombo tua Kasumbu Kaludiki tuenza mudimu watu, tangila Tshibumba tshia Nsentedi tshia mu dia 15/5/2008, dibeji dia 29.
[Kazubu mu dibeji 5]
KALASA KA BAKULU
Mu tshisangilu atshi, muanetu Anthony Morris wa mu Kasumbu Kaludiki wakamanyisha ne: kalasa ka bakulu nekatungunuke bua kulongesha bakulu ba bisumbu. Kalasa ka bakulu ba mu États-Unis kakatuadija ku ntuadijilu kua 2008 mu tshilongelu tshinene tshia ku Patterson mu New York. Bavua bafuma ku dijikija kalasa ka 72 ne katshia kalasa aka katuadija bakulu 6 720 ke bakadi babuelamu. Kutshidi malu a bungi a kuenza bualu mu États-Unis nkayamu mudi bakulu bapite pa 86 000. Ke bualu kayi Kasumbu Kaludiki nkitabe bua kuenza kalasa kakuabu ku Brooklyn mu New York kutuadijila mu dia 7/12/2009.
Bavua ne bua kulongesha batangidi bena ngendu banayi ku Patterson munkatshi mua ngondo ibidi bua kuluabu balongeshi. Batangidi banayi abu bavua ne bua kuya ku Brooklyn bua kulongesha bakuabu banayi bua kuluabu balongeshi. Bavuabu balongesha ku Brooklyn abu badi bashala bua kulongeshamu, kadi banayi ba kumpala bavua ne bua kulongesha tulasa tua bakulu mu Nzubu ya Mpungilu ne ya Bukalenge. Bivua ne bua kutungunuka nunku too ne pavua balongeshi bakumbana 12 bua kulongesha mu tulasa tusambombo ku lumingu luonso mu Anglais mu États-Unis. Pashishe bavua ne bua kulongesha balongeshi banayi bua kutuadijabu kulongesha mu tshiena Espagne. Kalasa aka kakena kapingana pa muaba wa Kalasa ka Mudimu wa Bukalenge to, bualu koku kadi ne tshipatshila tshia kuambuluisha bakulu bua batungunuke ne kuvudija dimanya diabu. Betele mikuabu ya pa buloba bujima neyituadije kuenza tulasa etu mu Nzubu ya Mpungilu ne ya Bukalenge kutuadijila mu tshidimu tshia mudimu tshia 2011.
[Tshimfuanyi mu dibeji 4]
Bakatuadija tshisangilu tshia ku tshidimu ne musambu muangatshila mu mukanda wetu mupiamupia wa misambu wa “Tuimbilayi Yehowa misambu”