Tshia kuenza padi bayebe anyi mukajebe mukuele mâyi ku makasa

MARGARITA ne bayende Raúl mbenzele Yehowa mudimu wa ku dîba ne ku dîba munkatshi mua bidimu bia bungi. * Kadi matuku makese panyima pa diledibua dia muanabu wa kumpala, Raúl wakatuadija kulekela Yehowa ku kakese ku kakese. Ndekelu wa bionso, wakaditua mu tshiendenda ne kumuipatabu mu tshisumbu tshia bena Kristo. Margarita udi wamba ne: “Pavua malu onso aa enzeka, ngakumvua anu bu ne: mvua mutangile ku lufu. Bivua binsama ku muoyo bikole ne tshivua mumanye tshia kuenza to.”

Matuku makese panyima pa Jane mumane kusedibua, bayende wakamuela pende mâyi ku makasa mu mushindu kampanda. Wakatuadija kumukuma. Jane udi wamba ne: “Musangu wa kumpala wakankumaye dinkomo, ngakumvua bibi bitambe ne kudimona mupuekeshibue milongo. Wakapeta tshibidilu tshia kunkuma ne kundomba luse. Mvua ngela meji ne: bu mundi muena Kristo, mvua muenzejibue bua  kumubuikidila ne kupua malu au muoyo. Mvua ngela kabidi meji ne: kabivua bimpe bua kuambila muntu mukuabu bualu abu nansha bakulu ba mu tshisumbu to. Uvua anu unkuma ne mvua mmufuile luse munkatshi mua bidimu bia bungi. Mu matuku onso au, mvua ngela meji ne: ke tshimvua mua kuenza bua bayanyi kunnangaye. Kadi ndekelu wa bionso pakambengaye ne kunshiya ne muana utuvua balele nende, ngakamona ne: ndi mupangile bionso ne tshivua mua kuikala mulame malu au munda to.”

Anu bu Margarita ne Jane, udi mua kuikala utata bikole bualu bayebe mmukuele mâyi ku makasa. Peshi udi mua kuikala ne kanyinganyinga bualu mukajebe kena ne lulamatu to. Anu mukavua Bible muambe, tudi mu ‘matuku a malu makole.’ Mulayi eu udi uleja ne: mu ‘matuku a ku nshikidilu,’ nebikale bikole bua mulume ne mukaji kushalabu mu buobumue ne kuenzelangana malu ne dinanga mu malu a bungi. Bamue nebikale bena mpala ibidi badingidija mudibu batendelela Nzambi. (2 Tim. 3:1-5) Malu aa adi akuata too ne bena Kristo balelela. Nunku, ntshinyi tshidi mua kukuambuluisha bua kutantamena padi bayebe anyi mukajebe mukuele mâyi ku makasa?

Dimona bu mudi Yehowa ukumona

Tshia kumpala bidi mua kukukolela bua kuitaba ne: muntu uudi munange udi mua kukutapa ku muoyo bibi bitambe. Udi pamuapa mua kutuadija kudilumbuluisha bua bubi budiye muenze.

Vuluka ne: nansha Yezu muntu uvua mupuangane wakedibua mâyi ku makasa kudi muntu uvuaye weyemena ne munange bikole. Kumpala kua yeye kusungula bapostolo bende, wakanji kusambila ne kuela meji bikole. Bapostolo bonso 12 bavua batendeledi ba Yehowa ba kueyemena. Kakuyi mpata, Yezu wakanyingalala bikole pavua Yudasa ‘mulue mumutungidi.’ (Luka 6:12-16) Kadi Yehowa kakela Yezu tshilumbu pambidi bua bienzedi bibi bia Yudasa to.

Kakuena mulume anyi mukaji udi mupuangane lelu eu to. Bonso batu benza anu bilema. Mufundi wa Musambu wa 130 wakafunda ku bukole bua nyuma muimpe ne: ‘Yehowa, bu wewe mubale dipambuka dia bantu, mmuntu kayi wakadi mua kuimana, Mukalenge?’ (Mus. 130:3) Anu bu Yehowa, mulume ne mukaji badi ne bua kuikala babuikidilangana bilema.​—1 Pet. 4:8.

Kadi, tumanye ne: ‘Buonso buetu, muntu ne muntu, neabadile Nzambi malu.’ (Lomo 14:12) Padi umue wa ku bantu badi baselangana utuadija kuamba mukuende mêyi mabi anyi umuenzela malu mabi, yeye ke udi ne tshilumbu kumpala kua Yehowa. Bu mudi Yehowa mukine tshikisu ne mêyi adi atapangana ku muoyo, mulume anyi mukaji kena ne bua kuenzela mukuende malu adi aleja mudiye kayi mumunange anyi kayi umunemeka to. (Mus. 11:5; Ef. 5:33; Kolos. 3:6-8) Nunku, muena Kristo yeye ne tshibidilu tshia kuenza malu ne tshikisu kayi unyingalala ne ushintuluka badi ne bua kumuipata mu tshisumbu tshia bena Kristo. (Gal. 5:19-21; 2 Yone 9, 10) Mulume anyi mukaji kena ne bua kudipisha bua mudiye muambile bakulu bienzedi bibi bia mukuende to. Tumanye ne: Yehowa utu umvuila bantu badibu bakengesha mushindu eu luse lua bungi.

Padi mulume anyi mukaji wenda masandi, udi wenzela mukuende bibi ne wenzela kabidi Yehowa bibi. (Mat. 19:4-9; Eb. 13:4) Bikala udibu benzele bibi udienzeja bua kutumikila mikenji ya mu Bible, kena ne bua kudipisha bua bubi budi udi muende masandi muenze to.

Vuluka ne: Yehowa mmumanye muudi udiumvua. Udi udiamba yeye muine mudiye bayende wa tshisamba tshia Isalele, ne mu Dîyi diende mudi mvese ya bungi idi ileja kanyinganyinga kavuaye umvua pavua tshisamba tshiende tshimulekela bua kutendelela nzambi mikuabu. (Yesh. 54:5, 6; Yel. 3:1, 6-10) Ikala mujadike ne: Yehowa mmumone binsonji bionso biudi upuekesha bualu mbakuele mâyi ku makasa kudi bayebe anyi mukajebe mu mushindu kampanda anyi kansanga. (Mal. 2:13, 14) Mmumanye ne: udi dijinga ne dikoleshibua ne dikankamija.

Mudi Yehowa utukankamija

Yehowa udi utukankamija ku diambuluisha dia tshisumbu tshia bena Kristo. Jane wakapeta dikankamija dia mushindu eu. Udi uvuluka  ne: “Mutangidi wa tshijengu wakalua kuntangila pamvua mutekete mu maboko bikole. Uvua mumanye kanyinganyinga kamvua naku bua muvua bayanyi mushipe dibaka. Wakashala nanyi ntanta mule bua kunkolesha ku diambuluisha dia mvese bu mudi wa 1 Kolinto 7:15. Mvese ivuaye mumpeshe ne mêyi ende mimpe biakangambuluisha bua kulekela kudipisha ne kupeta ndambu wa ditalala dia mu lungenyi.” *

Margarita utudi batela kulu eku, wakamona kabidi mudi Yehowa utukolesha ku diambuluisha dia tshisumbu tshia bena Kristo. Udi wamba ne: “Pangakatuishibua ne: bayanyi kavua unyingalala bua malu avuaye wenza, ngakangata bana banyi ba balume babidi ne kuya kusombela mu tshimenga tshikuabu. Pangakafikamu, ngakapeta kazubu ka kufutshila kavua ne nzubu ibidi munda. Dituku diakalonda, pamvua ngenda mpatula bintu mu bibuta muikale ne dibungama, ngakumvua bakokola ku tshiibi. Meme kuela meji ne: mmamu wa lupangu uvua ku mushiku mukuabu. Bualu bua dikema, uvua mmuanetu wa bakaji uvua mulongeshe mamu Bible ne muambuluishe bena mu dîku dietu bua kumanya bulelela. Kavua mumanye ne: uvua mua kunsangana kumbelu aku to, kadi uvua mulue ku nzubu aku bualu uvua ulonga Bible ne mamu wa lupangu. Ngakumvua disulakana ne tshiakadikanda to. Ngakamumvuija tshivua tshingenzekele ne tuetu bonso kutuadija kudila. Wakenza muende muonso bua tuetu kuya nende mu bisangilu dituku adi. Bana betu ba mu tshisumbu kutuakidilabu bimpe ne bakulu bakangambuluisha bua meme kumona bua kulongesha bana banyi malu a Yehowa.”

Mudi bakuabu mua kuambuluisha

Bena mu tshisumbu badi mua kuambuluisha muntu udi mu lutatu. Tshilejilu, Margarita uvua mpindieu ne bua kukeba mudimu. Dîku kampanda dia mu tshisumbu tshiabu diakitaba bua kumulamina bana pavuabu bafuma mu kalasa.

Udi wamba ne: “Patu bana betu ba balume ne ba bakaji baye kumfila meme ne bana banyi mu mudimu wa kuyisha, bitu binsankisha bikole be!” Padi bena mu tshisumbu bambuluishangana nunku, badi ‘bambuishangana majitu’ ne badi batumikila ‘mikenji ya Kristo.’​—Gal. 6:2.

Bantu badi bakenga bua bilema bia bakuabu batu ne dianyisha dia bungi padibu babambuluisha mushindu eu. Tshilejilu, bayende wa Monique wakamubenga ne kumushiya ne dibanza dia dolare 15 000 ne bana banayi bajima. Udi wamba ne: “Bena Kristo nanyi balume ne bakaji bavua bannange bikole. Tshiena mumanye tshivua mua kungenzekela bu bobu kabayi bangambuluishe to. Ngakamona ne: Yehowa uvua musake bana betu ba bungi bua kudifilabu bua kuambuluisha bana banyi. Ngakasanka bikole  bua kumona ne: diambuluisha diabu adi diakasaka bana banyi bua kuya kumpala mu mudimu wa Nzambi. Pamvua dijinga ne mibelu, bakulu bavua bayimpesha. Pamvua nkeba muntu wa kukuatshila bualu, bavua banteleja.”​—Mâko 10:29, 30.

Bushuwa, balunda bimpe badi bajingulula dîba didibu kabayi ne bua kuakula bua ntatu idi nayi bakuabu. (Muam. 3:7) Margarita udi wamba ne: “Misangu ya bungi mvua musue kuyukila ne bana betu ba bakaji ba mu tshisumbu tshianyi tshipiatshipia bua malu a buambi, bua bantu batuvua tulongesha Bible ne bua bana betu balela, kadi katuvua tuakula bua ntatu yanyi to. Mvua ne disanka dia bungi bua muvuabu bangambuluisha bua kupua malu avua mangenzekele muoyo ne kutuadija kuenza malu makuabu.”

Kukebi bua kudisombuela

Imue misangu, nansha wewe kuyi udipisha bua bubi budi bayebe anyi mukajebe mukuenzele, udi mua kumona ne: udi ukenga bikole bua bilema bidiye muenze. Wewe mulekele kanyinganyinga kebe kavula, kadi mua kukupangisha bua kushala mulamate Yehowa. Tshilejilu, udi mua kutuadija kukeba mishindu ya kudisombuela kudi muinebe au.

Wewe mumone ne: dijinga dibi edi didi dienda dikola munda muebe, udi mua kuela meji pa tshilejilu tshia Yoshua ne Kaleba. Bantu babidi ba lulamatu aba bakateka mioyo yabu mu njiwu bua kutentekela buloba bulaya. Batentekedi bakuabu bavua kabayi ne ditabuja bakasaka bantu bua kubenga kutumikila Yehowa. Bamue bena Isalele bakakeba too ne bua kushipa Yoshua ne Kaleba ne mabue bualu bavua bateta bua kukankamija bantu bua kushala balamate Yehowa. (Nom. 13:25–14:10) Bua bienzedi bia bena Isalele abi, Yoshuwa ne Kaleba bakadimona pabu benzejibue bua kuenda mu tshipela bidimu 40 kabiyi bua tshilema tshiabu to, kadi bua tshilema tshia bantu bakuabu.

Nansha muvua Yoshua ne Kaleba banyingalale, kabakashala balamine bana babu munda bua bilema bivuabu benze to. Bakadienzeja bua kutungunuka anu ne kuenzela Yehowa mudimu. Ku ndekelu kua bidimu 40 mu tshipela, bobu ne bena Lewi bakapeta difutu bualu bakapanduka munkatshi mua bena tshikondo atshi ne kubuela mu buloba bulaya.​—Nom. 14:28-30; Yosh. 14:6-12.

Bienzedi bibi bia bayebe anyi bia mukajebe bidi mua kukukengeshisha munkatshi mua matuku a bungi. Dibaka didi mua kufua, kadi udi mua kushala unyingalala ne kupeta lutatu lua makuta. Pamutu pa kulekela malu aa akunyanga lungenyi, vuluka ne: anu muvua Yehowa muenzele bena Isalele bavua bamulekele, mmumanye bimpe tshia kuenza ne bantu badi bashipa mikenji yende ku bukole.​—Eb. 10:30, 31; 13:4.

Udi mua kutantamena lutatu luebe

Pamutu pa kulekela meji mabi akutekesha mu mikolo, uuja lungenyi luebe ne meji a Yehowa. Jane udi wamba ne: “Ngakamona ne: kuteleja Tshibumba tshia Nsentedi ne Réveillez-vous! bidibu bakuate mu bande kuakangambuluisha bua kutantamena lutatu luanyi. Bisangilu bia bena Kristo biakangambuluisha kabidi bikole. Kuenza midimu mu bisangilu ne kuandamunamu kuakangambuluisha bua kupua ntatu yanyi muoyo. Mudimu wa kuyisha wakangambuluisha pawu. Pamvua ngambuluisha bantu bakuabu bua kulamata Yehowa, mvua nkolesha ditabuja dianyi. Kutabalela bantu bamvua ndongesha Bible kuvua kumvuluija malu mimpe a bungi.”

Monique utudi batele kulu eku udi wamba ne: “Kubuela mu bisangilu bionso ne kuyisha bikole nkungambuluishe bua kutantamena. Bena mu dîku dianyi mbafike ku dinangangana bikole ne mbanange kabidi bena mu tshisumbu. Ntatu yanyi mmingambuluishe bua kumanya mateketa anyi. Mvua mupete diteta kadi Yehowa mmungambuluishe bua kuditantamena.”

Wewe pebe udi mua kutantamena ntatu ya muomumue. Nansha muudi mua kunyingalala bikole bua mudibu bakuele mâyi ku makasa kudi bayebe anyi kudi mukajebe, dienzeje bua kutumikila mubelu wa Paulo wa ne: ‘Katupangi mu kuenza kua malu mimpe; bualu bua palua tshikondo tshia kuapola netuapole bituikala katuyi tupanga.’​—Gal. 6:9.

[Mêyi adi kuinshi]

[Tshimfuanyi mu dibeji 31]

Mulume anyi mukaji udibu balekele kudi muinende utu ne dianyisha dia bungi kudi bantu badi bamuambuluisha mu buambi