Difila ne muoyo mujima mu mudimu munene wa dinowa

‘Nukumbaje [bivule, NW] mu mudimu wa Mukalenge.’​—1 KOL. 15:58.

1. Ndibikila kayi divua Yezu muele bayidi bende?

PAVUA Yezu mu luendu upitshila mu Samalea pabuipi ne tshidimu tshia 30, wakikishila pabuipi ne tshimenga tshia Suka. Yeye kuambila bayidi bende ne: ‘Bandulukayi, numone madimi, adi matoke katataka bua kunowabu.’ (Yone 4:35) Yezu kavua wakula bua dinowa dietu dilelela edi to, kadi uvua wakula bua dinowa dia disangisha bantu bimpe bavua mua kulua bayidi bende. Mêyi avuaye muambe aa avua ndibikila bayidi bende bua kuenza mudimu. Kuvua mudimu wa bungi wa kuenza, kadi dîba dia kuwenza divua dikese.

2, 3. (a) Ntshinyi tshidi tshileja ne: tudi mu tshikondo tshia kunowa? (b) Mmalu kayi atualonga mu tshiena-bualu etshi?

² Mêyi avua Yezu muakule bua dinowa adi ne diumvuija dia pa buadi mu matuku etu aa. Tudi mu tshikondo tshidi bantu badi pa buloba benze bu budimu budi ‘butoke bua kunowa.’ Ku tshidimu tshionso etshi, miliyo ya bantu badi bitaba dibikila dia kulonga bulelela budi bufikisha ku muoyo ne binunu bia bayidi bapiabapia bidi bitambula. Tudi ne diakalenga dia kuenza petu mudimu wa dinowa eu ku bulombodi bua Mukalenge wa dinowa Yehowa Nzambi. Utuku ne ‘bivule’ bia kuenza mu mudimu wa dinowa anyi?​—1 Kol. 15:58.

³ Mu mudimu uvua Yezu muenze pa buloba mu bidimu bisatu ne tshitupa, wakalongolola bayidi bende bua kukumbajabu mudimu wabu wa banowi. Mu tshiena-bualu etshi netuakule bua malongesha asatu a mushinga a ku malongesha a bungi avua Yezu mulongeshe bayidi bende. Dilongesha dionso didi dileja ngikadilu udi ne mushinga wa bungi buetu tuetu patudi tudienzeja lelu mu mudimu wa kusangisha bayidi. Tukonkononayi ngikadilu eyi umue ku umue.

Didipuekesha didi ne mushinga

4. Mmushindu kayi uvua Yezu muleje mushinga wa didipuekesha?

⁴ Tetabi kumona bualu ebu mu lungenyi: Balongi ba Yezu badi bafuma ku dikokangana bua kumanya udi munene kupita bakuabu. Mbamueneke bu batshidi bafikilangane munda bua tshivua tshienzeke atshi, kakuyi udi weyemena mukuabu. Ke Yezu kubikila muana mukese, kumuimanyika munkatshi muabu. Kushalaye mumutangile mutantshi, e kubambilaye ne: ‘Wadipuekesha bu muana eu mukese, yeye udi mutambe bakuabu mu bukalenge bua mu diulu.’ (Bala Matayo 18:1-4.) Pamutu pa kuela meji bu mutu bena panu baela, a mutubu bapesha muntu lumu bilondeshile bumfumu, bubanji, anyi muanzu udiye nawu, bayidi ba Yezu bavua ne bua kumvua ne: bua bobu kuikala bantu banene bavua ne bua kudivuija bu bantu ‘bakese’ kumpala kua bakuabu. Yehowa uvua mua kubabenesha ne kuenza nabu mudimu anu pavuabu baleja didipuekesha dia bushuwa.

5, 6. Bua tshinyi udi ne bua kudipuekesha bua wewe kuenza mudimu wa dinowa bikole? Fila tshilejilu.

⁵ Kubangila ku kale, bantu ba bungi mbadifile ku dikeba dia bumfumu, bubanji ne mianzu. Bua didifila diabu adi, badi ne dîba anu dikese dia kulonga malu a Nzambi ne kumuenzela mudimu anyi kabena nansha nadi mene to. (Mat. 13:22) Kadi bantu ba Yehowa bobu badi ne disanka dia kudivuija bu ‘bana bakese’ kumpala kua bakuabu bua kupetabu dibenesha ne dianyisha dia kudi Mukalenge wa dinowa.​—Mat. 6:24; 2 Kol. 11:7; Filip. 3:8.

⁶ Tuangata tshilejilu tshia muanetu Francisco udi mukulu ku Amerike wa ku Sud. Pavuaye nsonga, wakalekela tulasa tua iniversite kuluaye mpanda-njila. Udi wamba ne: “Pangakalua kusela panyima pa bidimu, mvua mua kupeta mudimu muimpe uvua mua kutupetesha makuta  a bungi menemene. Kadi tuakapangadija bua kubenga kuikala ne nsombelu mukutakaja kudi bintu bia bungi ne kudifila mu mudimu wa bumpanda-njila. Panyima pa matuku, ntatu yakavula patuvua balele bana. Kadi Yehowa wakatuambuluisha bua kushala balamate anu ku dipangadika dietu.” Francisco udi ujikaja wamba ne: “Ndi ne disanka dia kuenza mudimu wa bukulu mu bidimu bipite pa 30, ne kuenza kabidi midimu mikuabu ya pa buayi. Katutu banji kunyingalala nansha musangu umue bua dikala ne nsombelu utuvua basungule au to.”

7. Mmushindu kayi uuvua mutete bua kutumikila mubelu udi mu Lomo 12:16?

⁷ Wewe mubenge kukeba ‘malu mapite’ bunene a pa buloba ebu ne muanyishe bua ‘kudipuekesha ku malu adi mapuekele,’ udi pebe mua kutekemena masanka makuabu a bungi ne midimu mivule mu mudimu wa kunowa.​—Lomo 12:16; Mat. 4:19, 20; Luka 18:28-30.

Tshisumi tshidi tshifuta

8, 9. (a) Umvuija mufuanu wa Yezu wa ntalanta mu mêyi makese. (b) Mbanganyi badi mufuanu eu mua kutamba kukolesha?

⁸ Ngikadilu mukuabu utudi nende dijinga bua kuenza bivule mu mudimu wa dinowa ntshisumi. Yezu wakumvuija bualu ebu mu mufuanu wa ntalanta. * Mufuanu au udi wakula bua muntu kampanda uvua kumpala kua kuyaye ku luendu lule, mupeshe bapika bende basatu bintu. Kupeshaye mupika wa kumpala ntalanta 5, muibidi 2 ne muisatu ntalanta umue. Mfumuabu mumane kubashiya, mupika wa kumpala ne muibidi kuenzabu mudimu ne tshisumi ne kudituabu diakamue mu ‘dienda dia mushinga’ ne ntalanta ivuabu nayi. Kadi mupika muisatu yeye uvua mupika “mufuba.” Uvua mujike ntalanta wende mu buloba. Pakapingana mfumuabu, wakafuta mupika wa kumpala ne muibidi kubatekaye ‘pa mutu pa bintu bia bungi.’ Wakanyenga ntalanta uvuaye mupeshe mupika muisatu ne kumuipataye mu nzubu muende.​—Mat. 25:14-30.

⁹ Kakuyi mpata, udi musue kuidikija bapika ba tshisumi badi mu mufuanu wa Yezu ne kuenza mudimu wa divuija bantu bayidi ne muebe muonso. Kadi newenze tshinyi bikala nsombelu webe ukupangisha bua kuenza malu audi mua kukokesha kuenza mpindieu? Bidi mua kuikala pamuapa bua dipangila dia makuta didi dikusaka bua kuenza mudimu mêba a bungi bua kudisha dîku diebe. Anyi udi mua kuikala ukadi mukulakaje kutshiyi ne makanda a mubidi. Bikalabi nanku, mufuanu wa ntalanta udi ne malu adi mua kukukolesha.

10. Mmushindu kayi uvua mfumu wa mu mufuanu mudileje kayi muena malu makole? Bualu ebu budi bukukolesha ku tshinyi?

¹⁰ Tangila ne: mfumu wa mu mufuanu uvua mumanye ne: bapika bende kabavua mua kukokesha bua kuenza malu mu mushindu wa muomumue to. Uvua muleje  nanku pavuaye mupeshe muntu yonso ntalanta ‘bu mu lungenyi luende, muntu ne muntu bu mu lungenyi luende.’ (Mat. 25:15) Anu muvuabi bitekemena, mupika wa kumpala wakavudija bintu biende kupita bia muibidi. Kadi, mfumu au wakaleja dianyisha bua mudimu mukole wa bapika babidi abu pavuaye muambile yonso wa kudibu ne: ‘Mbimpe, muananyi muimpe ne muntumikidi,’ ne kubapeshaye bonso difutu dia muomumue. (Mat. 25:21, 23) Bia muomumue, Mukalenge wa dinowa Yehowa Nzambi, mmumanye mudi nsombelu webe ulenga biwudi mua kukokesha mua kuenza mu mudimu wende. Kakupanga dianyisha bua mudimu uudi umuenzela ne bukole buebe buonso, ne neakufute bua biudi wenza.​—Mâko 14:3-9; bala Luka 21:1-4.

11. Fila tshilejilu tshidi tshileja mudi tshisumi tshia mudimu nansha mu nsombelu mikole mua kupatula bipeta bimpe.

¹¹ Tshilejilu tshia muanetu wa bakaji Selmira wa mu ditunga dia Brésil tshidi tshileja mudi tshisumi mu mudimu wa Nzambi katshiyi tshilonda anu malu atudi tupeta mu nsombelu wetu to. Bavua bashipe bayende wa Selmira ku tshingoma kukadi bidimu 20 kudi bena mutshima, kumushiyaye ne bana basatu ba kukolesha. Bu muvuaye wenza mudimu wa buboyi, uvua ne bua kuenza mudimu mêba a bungi ne uvua utshioka ne dibanda dipueka ne mashinyi a mu bimenga avua mapate ne bantu. Nansha muvuaye ne ntatu eyi, wakalongolola malu ende bua kulua mpanda-njila wa pa tshibidilu. Bana bende babidi bakalua pabu bampanda-njila. Udi wamba ne: “Mu bidimu bidi bipite ebi, ndi mulongeshe bantu bapite pa 20 Bible ne mbalue anu bu bena mu dîku dianyi. Mbannange too ne ku lelu, ne tudi balunda bimpe. Mbubanji bundi tshiyi mua kusumba ku makuta.” Bushuwa, Mukalenge wa dinowa uvua mufute muanetu Selmira bua didienzeja diende dia tshisumi.

12. Mmunyi mutudi mua kuleja tshisumi mu buambi?

¹² Bikala nsombelu uudi nende mpindieu ukupangisha bua kupeta dîba dia bungi dia kuyisha, udi mua kuteta bua kulengeja mudimu webe wa dinowa pa kupatula bipeta bia bungi. Wewe utumikila bimpe ngenyi milenga itubu bafila mu Tshisangilu tshia Mudimu tshia ku lumingu luonso, neukoleshe dimanya diebe dia kuyisha ne neutete mishindu mipiamipia ya diyisha. (2 Tim. 2:15) Kabidi kuoku mushindu, udi mua kushintulula programe webe anyi kumusha malu auvua wenza avua kaayi ne mushinga bua kupeta dîba dia kuikala kuyisha pamue ne tshisumbu tshienu.​—Kolos. 4:5.

13. Ntshinyi tshidi mua kutuambuluisha bua kuikala ne tshisumi ne kutshilama?

¹³ Tuikale bamanye ne: tshisumi tshidi tshifumina mu muoyo wa muntu udi ne dianyisha. (Mus. 40:8) Mupika muisatu uvua Yezu mutele mu mufuanu wende uvua utshina mfumuende, uvua umumona bu muenzejanganyi wa mudimu ne muena malu makole. Ke yeye kujika ntalanta wende pamutu pa kuenza nende mudimu bua kuvudija bintu bia mfumuende. Bua tuetu kuepuka lulengu lua mushindu eu, tudi ne bua kudia malanda mimpe ne Yehowa Mukalenge wa dinowa ne kualama. Tuditekele dîba dia kulonga ne kuelangana meji pa ngikadilu yende mimpe bu mudi: dinanga, lutulu ne luse. Wewe muenze nanku, muoyo webe neukusake bua kumuenzela mudimu ne bukole buebe buonso.​—Luka 6:45; Filip. 1:9-11.

“Nuikale bantu ba tshijila”

14. Mbualu kayi bua mushinga budi badi basue kulua bena mudimu wa dinowa ne bua kukumbaja?

¹⁴ Mupostolo Petelo mmutele mêyi a mu mikanda ya mu Bible yakafundabu mu tshiena Ebelu bua kuleja bualu busunguluke budi Nzambi musue kudi bantu bende ba pa buloba, wamba ne: ‘Bu mudi yeye wakanubikila udi wa tshijila, nunku nuenu kabidi nulue ba tshijila mu malu onso a muoyo wenu; bualu bua dîyi didi difundibue ne: Nuenu nenuikale ba tshijila, bualu bua meme ndi wa tshijila.’ (1 Pet. 1:15, 16; Lew. 19:2; Dut. 18:13) Mêyi aa adi aleja ne: bena mudimu wa dinowa badi ne bua kuikala bantu bakezuke mu bikadilu ne mu kutendelela kuabu. Tudi mua kufika ku dikumbaja bualu bua mushinga ebu pa kuenza malu adi atuambuluisha bua kuenda kukezudibua ne mâyi a mu nyuma. Kadi netufikilaku mushindu kayi? Anu ku diambuluisha dia Dîyi dia Nzambi dia bulelela.

15. Bulelela bua mu dîyi dia Nzambi budi ne bukole bua kutuenzela tshinyi?

 ¹⁵ Badi bafuanyikija dîyi dia Nzambi ne mâyi adi akezula. Tshilejilu, mupostolo Paulo wakafunda mudi tshisumbu tshia bena Kristo bela manyi tshikale tshikezuke ku mêsu kua Nzambi bu mukaji wa Kristo uvuaye mukezule ‘ne kuvuwa kua mâyi ne dîyi, bua tshikale tshia tshijila ne katshiyi tshibipishibue.’ (Ef. 5:25-27) Kumpalampala, Yezu pende ukavua muakule bua bukole bua kulengeja anyi kukezula budi nabu dîyi dia Nzambi diakayishaye. Wakambila bayidi bende ne: ‘Katataka nudi balengejibue bualu bua dîyi dingakunuambila.’ (Yone 15:3) Nanku, bulelela bua mu dîyi dia Nzambi budi ne bukole bua kukezulangana mu nyuma ne mu bikadilu. Anu patudi tuitaba bua bulelela bua Nzambi kutulengeja anyi kutukezulabu mushindu eu ke padiye pende ushisha kuanyisha dimutendelela dietu.

16. Mmushindu kayi utudi mua kudilama bakezuke mu nyuma ne mu bikadilu?

¹⁶ Nanku, bua tuetu kulua banowi mu kunowa kua Nzambi, tshia kumpala tudi ne bua kulekela bienzedi bionso bibi mu nyuma ne mu bikadilu. Bua tuetu kutungunuka ne kuikala mu mudimu eu wa dinowa, tudi ne bua kuikala bantu ba tshitembu badi batumikila mikenji ya Yehowa ya bikadilu bimpe ne ya malu a mu nyuma. (Bala 1 Petelo 1:14-16.) Anu bu mututu tudienzeja bua kuikala ne mankenda a mubidi misangu yonso, ke mutudi kabidi ne bua kuitaba bua dîyi dia Nzambi dia bulelela dikale ditusukula ku musangu ne ku musangu. Bualu ebu budi bulomba kuikala kudibadila Bible ne kubuela mu bisangilu bia bena Kristo. Kudi kumvuija kabidi kudienzeja ne muoyo mujima bua kutumikila mikenji ya Nzambi mu nsombelu wetu. Tuetu benze nanku, netupete bukole bua kuluisha meji a kuenza malu mabi ne kukandamena malu mabi atu bena panu basaka bantu bua kuenza. (Mus. 119:9; Yak. 1:21-25) Bushuwa, bidi bitukolesha patudi tumanya ne: ku diambuluisha dia dîyi dia Nzambi dia bulelela tudi mua ‘kuvuwibua’ nansha ku mpekatu mipite bubi!​—1 Kol. 6:9-11.

17. Bua tuetu kushala bakezuke, mmubelu kayi wa mu Bible utudi ne bua kuteleja?

¹⁷ Utu witaba bua dîyi dia Nzambi dia bulelela kukukezuladi mu nsombelu webe anyi? Tshilejilu, utu umvua bishi padibu bakudimuija bua njiwu kampanda idi mu dijikija dia lutetuku dibi dia bena panu? (Mus. 101:3) Utuku wepuka bua kudia bilundalunda ne balongi benu anyi ne bena mudimu nebe badi kabayi Bantemu anyi? (1 Kol. 15:33) Utuku udienzeja ne muoyo mujime bua kujikija butekete buudi nabu budi mua kukuvuija muntu udi kayi mukezuke kumpala kua Yehowa anyi? (Kolos. 3:5) Utuku ubenga kubuelakana mu makokangana a malu a tshididi ne mu lungenyi lua kulamata kuetu ludi lutampakane lelu mu malu a manaya anyi?​—Yak. 4:4.

18. Mmushindu kayi udi kuikala bakezuke mu nyuma ne mu bikadilu mua kutuambuluisha bua kuikala banowi badi bapatula bipeta bimpe?

¹⁸ Ditumikila diebe ne lulamatu mu malu a nunku nedikuambuluishe bua kupatula bipeta bimpe. Pavua Yezu ufuanyikija balongi bende ne matamba a muonji wa mamuma a mvinyo, wakamba ne: ‘Ditamba dianyi dionso didi kadiyi dikuama mamuma, [Tatu wanyi] neadiumushe, kadi ditamba dionso didi dikuama mamuma yeye neadilengeje bua kukuamadi mamuma makuabu.’ (Yone 15:2) Paudi witaba bua mâyi a bulelela bua mu Bible akusukule, neupatule bipeta bimpe bia bungi.

Mabenesha a lelu ne atshilualua

19. Mmushindu kayi uvuabu babeneshe bayidi ba Yezu pavuabu badienzeje bua kuikala banowi?

¹⁹ Mu dia Pentekoste wa mu 33, nyuma muimpe wakapesha bayidi ba lulamatu bavua bitabe bivua Yezu mubalongeshe bukole bua  kuyisha too ne ‘ku mfudilu kua buloba.’ (Bien. 1:8) Bakatungunuka ne kuenza mudimu, aba bu bena mu kasumbu kaludiki, bakuabu bamisionere, banga batangidi bena ngendu, ne bakenza mudimu munene wa diyisha dia lumu luimpe “munkatshi mua bifukibua bionso munshi mua diulu.” (Kolos. 1:23) Bakapeta mabenesha a bungi, kusankishabi bantu bakuabu.

20. (a) Mmabenesha kayi aukadi mupete bua didifila diebe ne muoyo mujima mu mudimu wa dinowa? (b) Udi mudisuike bua kuenza tshinyi?

²⁰ Bushuwa, tuetu badipuekeshe, tuenza mudimu ne tshisumi, ne tutumikila mikenji ya mu Dîyi dia Nzambi, netutungunuke ne kuenza mudimu wetu mutambe bunene wa dinowa udi munkatshi mua dienzeka ne muoyo mujima mu mushindu udi upatula bipeta bimpe. Padi bantu ba bungi bakenga ne tunyinganyinga tudi tukuata bena panu bua didikebela bubanji ne masanka abu nkayabu, tuetu tudi ne disanka dilelela. (Mus. 126:6) Bualu bua mushinga mukole budi ne: ‘Mudimu utudi tuenza mu Mukalenge kawena patupu.’ (1 Kol. 15:58) Yehowa Mukalenge wa dinowa neatufute bua kashidi bua ‘mudimu wetu ne bua dinanga dituakaleja bua dîna diende.’​—Eb. 6:10-12.

[Mêyi adi kuinshi]

Utshidi muvuluke anyi?

Paudi udienzeja bua kudifila mu mudimu dinowa ne muoyo mujime . . .

• bua tshinyi mbimpe kuikala ne didipuekesha?

• mmushindu kayi uudi mua kupeta tshisumi ne kutshilama?

• bua tshinyi mbimpe kudilama bakezuke mu nyuma ne mu bikadilu?

[Nkonko ya dilonga]

[Tshimfuanyi mu dibeji 17]

Didipuekesha didi mua kutuambuluisha bua kuikala ne nsombelu udi kayi mukutakaja kudi bintu wa dienzela Nzambi mudimu wa Bukalenge