Kubabidila bikondo kutu kupatuisha bipeta bilenga

UTUKU ubabidila bikondo bidi bimueneka mu mpukampuka bua kuyisha mu teritware wa tshisumbu tshienu anyi? Bana betu bena Kristo ba mu tshimenga tshia kale tshia Turku mu ditunga dia Finlande muvua tshitudilu tshia mazuwa a mâyi bakenza nanku, bobu kupatula bipeta bimpe.

Bidimu ndambu kumpala, bana betu ba ku Turku bakamona tshisumbu tshia bantu ba ku Asia bafika mu tshimenga atshi bua kujikija mudimu wa dienza mazuwa manene a pa mâyi a lubilu lukole akenzelabu muaba wa dienzela mazuwa. Pashishe, muanetu wa balume mukuabu wakalua kumanya nzubu ya tshilala benyi ivua benyi abu basombele. Wakamanya kabidi ne: bise ivua ilua pa dinda menemene bua kuambula bena mudimu abu ku nzubu ya tshilala benyi ivua mu mpala mua tshimenga, iya nabu luseke luvua dibungu. Ke kuyaye musangu umue kuambila bana betu ba mu tshisumbu tshia muakulu wa Anglais tshia mu Turku.

Bakulu ba mu tshisumbu atshi bakamona ne: difika dia benyi ba bungi mu tshimenga tshiabu divua dibapetesha mpunga uvuabu kabayi batekemene wa kubayisha mukenji wa Bukalenge. Ke kulongololabu mudimu wa pa buawu wa buambi ne lukasa luonso. Lumingu alu mu Dia lumingu mu dinda, bamanyishi dikumi bakadisangisha pabuipi ne muaba uvua bise imanyina pa dîba dia 7 jajaja. Tshia kumpala, muena mudimu nansha umue kakanji kumueneka to. Ke bana betu kubanga kudikonka ne: ‘Tudi bafike panyima pa dîba anyi? Bobu mbamane kuya anyi?’ Kadi anu pinapu, kumonabu muena mudimu umue upatukila kantanta muvuale bisalapeta. Katupa, muena mudimu mukuabu kumulonda, katupa ba bungi bakuabu kuluabu. Mutantshi eu, tshisumbu tshinene tshia bena mudimu e kulua kutuilangana anu pabuipi ne muaba uvua bise imanyina au. Bamanyishi kutuadija kubayisha, babapesha mikanda ya mu Anglais. Diakalenga, biakangata pabuipi ne dîba dijima bua bena mudimu bonso kupeta muaba wa kusomba mu bise, ke bana betu kupeta dîba divule dia kuyukila ne ba bungi ba kudibu. Pakasa bise ayi luendu, bena mudimu abu bakaya ne tukanda tukese 126 ne bibejibeji 329.

Bipeta bimpe abi biakasaka bana betu bua kuenzulula kabidi mudimu wa pa buawu wa diyisha lumingu luakalonda luvuabu ne dikumbula dia mutangidi wa tshijengu. Dituku dikuabu pa dîba 6 wa mu dinda, nansha muvua mvula uloka mutangidi wa tshijengu wakalombola tshisangilu tshia mudimu wa buambi, bamanyishi 24 kuasabu luendu batangile muaba uvua bise imanyina. Musangu au, bavua baye ne mikanda ya mu muakulu wa Tagalog, bualu bavua basangane ne: ba bungi ba ku benyi abu bavua bafumine mu Philippines. Mu dinda amu, pakaya bise ku dibungu, bena mudimu abu bakaya ne mikanda 7, tukanda tukese 69, ne bibejibeji 479. Bana betu abu bonso bakasanka bikole bua mudimu uvuabu benze au.

Kumpala kua bena mudimu abu kupinganabu mu matunga abu, bana betu bakabapinganyina misangu mivule ku nzubu ya tshilala benyi ivuabu basombele bua kubumvuija malu a bungi a mukenji wa Bukalenge. Bamue bena mudimu bakamba ne: bakavua babayishe kumpala mu matunga makuabu kudi Bantemu ba Yehowa. Bena mudimu abu bakela bana betu tuasakidila bua muvuabu badienzeje bua kubakeba ne kubayisha matuku avuabu mu Finlande au.

Utuku ubabidila mpunga ya kuyisha idi mua kumueneka mu mpukampuka mu teritware wa tshisumbu tshienu anyi? Utuku udienzeja bua kukeba bantu badi bafumine kukuabu bua kubayisha anyi? Wewe wenza nanku, udi pebe mufuane kupatula bipeta bia buena biakapeta bana betu ba ku Turku.

[Karte/​Tshimfuanyi mu dibeji 32]

(Bua kumona malu malongolola bimpe, tangila mu mukanda)

FINLANDE

HELSINKI

Turku

[Mêyi a dianyisha]

STX Europe