Malu alua dituku dia Yehowa kusokolola

‘Dituku dia Mukalenge dilualua bu mudi muivi; ne buloba ne bintu bidimu nebipie [anyi nebiedibue patoke, NW].’​—2 PET. 3:10.

1, 2. (a) Mmushindu kayi washikila bulongolodi bubi bua malu ebu? (b) Nkonko kayi ituandamuna?

BULONGOLODI bubi bua malu ebu mbushindamene pa dishima dia ne: muntu udi mua kukokesha buloba bimpe kayi mulombola kudi Yehowa. (Mus. 2:2, 3) Kudiku tshintu tshidi tshiashila pa dishima tshidi mua kushalaku kashidi anyi? Nansha kakese! Tshidibi, katuena mua kutekemena bua bulongolodi bua Satana kushikilabu nkayabu to. Kadi Nzambi ke wabubutula tshikondo tshidiye yeye mulongolole mu wende mushindu. Mushindu walua Nzambi kubutula bulongolodi bubi bua malu ebu neuleje buakane buende ne dinanga diende mu mushindu muimpe menemene.​—Mus. 92:7; Nsu. 2:21, 22.

² Mupostolo Petelo wakafunda ne: ‘Dituku dia Mukalenge dilualua bu mudi muivi; mu dituku adi diulu nedijimine ne diyoyo dinene, ne bintu bia mu diulu nebivingutuke ne kapia kakole, ne buloba ne bintu bidimu nebipie’ anyi nebiedibue patoke. (2 Pet. 3:10) “Diulu” ne “buloba” bidibu batele mu mvese eu mbinganyi? “Bintu” bikala ne bua kuvingutuka mbinganyi? Kadi ntshinyi tshivua Petelo musue kuamba pakambaye ne: ‘Buloba ne bintu bidimu nebiedibue patoke’? Tuetu bamanye mandamuna a nkonko eyi nebituambuluishe bua kuikala badilongolole bua malu adi akuatshisha buôwa enzeka matuku makese kumpala eku.

Diulu ne buloba biajimina

3. “Diulu” didibu batele mu 2 Petelo 3:10 ntshinyi? Mmushindu kayi wajiminadi?

3 Misangu mivule itu Bible wakula bua “diulu” utu udifuanyikija ne mamfumu adi akokesha adi ku mutu kua bantu bawu. (Yesh. 14:13, 14; Buak. 21:1, 2) ‘Diulu dikala ne bua kujimina’ didi diumvuija makalenge a bantu adi akokesha bantu badi kabayi ba Nzambi. Kujimina kuadi ne “diyoyo dinene” bikole, anyi “bu dikubakuba” bu mudi Bible mukuabu wamba, kudi pamuapa mua kuleja dibutuka dia pa lukasa dia diulu adi.

4. “Buloba” ntshinyi? Mmushindu kayi wabutukabu?

4 “Buloba” budi bumvuija bantu badi babenge Nzambi. Bantu ba mushindu eu bakavuaku mu tshikondo tshia Noa, kadi bobu kujimina ku Mvula wa kabutu ku dîyi dia Nzambi. ‘Kadi bua dîyi diodimue diulu didiku katataka ne buloba kabidi biakabutshidibua bua kupia ne kapia, bilamibue too ne ku dituku dia dilumbulula ne dia dibutuka dia bantu badi babenga Nzambi.’ (2 Pet. 3:7) Nansha muvua Mvula wa kabutu mubutule bantu babi bonso musangu umue, kabutu kalualua koko nekakuate bantu mu bitupa mu bitupa tshikondo tshia “dikenga dinene.” (Buak. 7:14) Mu tshitupa tshia kumpala tshia dikenga dinene adi, Nzambi neasake bamfumu ba tshididi ba panu bua kubutula “Babulona munene” bua kuleja mudiye mukine ntendelelu udi bu mukaji wa masandi eu. (Buak. 17:5, 16; 18:8) Pashishe, mu mvita ya Armagedone yenzeka mu tshitupa tshia ndekelu tshia dikenga dinene, Yehowa nkayende neakombe kantu konso kikala kashale ka mu bulongolodi bua Satana.​—Buak. 16:14, 16; 19:19-21.

‘Bintu bia mu diulu nebivingutuke’

5. Bintu bia mu diulu ebi mbinganyi?

⁵ ‘Bintu bia mu diulu biavingutuka’ mbinganyi? “Bintu bia mu diulu” bidi Petelo mutele ebi bidi bileja malu manene adi avuija bena  panu bantu badi ne bikadilu, ne ngikadilu, ne nsombelu ne bipatshila bidi kabiyi bisankisha Nzambi. Mu “bintu bia mu diulu” ebi mudi ‘nyuma wa pa buloba’ udi ‘wenzeja munkatshi mua bana ba bupidia.’ (1 Kol. 2:12; bala Efeso 2:1-3.) Nyuma anyi ‘lupepele’ elu ludi luwule ntente panu mu bulongolodi bua Satana. Nyuma au ngudi usaka bantu bua kuela meji, kupangadija malu, kuakula anyi kuenza malu mu mishindu idi ileja anu lungenyi lua Satana muena tshishiku udi ‘mukalenge wa bukokeshi bua mu lupepele’ muena lutambishi.

6. Nku tshinyi kudi nyuma wa pa buloba umuenekela?

⁶ Nunku, bantu badi ne nyuma wa pa buloba badi balekela Satana unyanga meji abu ne muoyo wabu nansha padibu bamanye anyi kabayi bamanye, babanga kulonda meji ende ne bienzedi biende. Bua bualu abu, badi babanga kuenza tshidi muoyo wabu musue kabayi bakonka tshidi Nzambi musue. Patu bilumbu bijuka, batu benza malu ne kudisua anyi bua kudisankisha nkayabu, batombokela bakokeshi, balonda anu ‘lukuka lua mubidi ne lukuka lua mêsu.’​—Bala 1 Yone 2:15-17. *

7. Bua tshinyi tudi ne bua ‘kulama mutshima’ wetu?

⁷ Nanku, bidi bimueneka ne: bua tuetu ‘kulama mutshima’ wetu, tudi ne bua kusungula balunda, ne malu atudi tubala, ne manaya ne bitudi tubala anyi tubandila ku Enternete bilondeshile disua dia Nzambi. (Nsu. 4:23) Mupostolo Paulo wakafunda ne: ‘Nudimuke bua muntu kikadiku udi mua kununyanga ne nkindi yende ne lubombo lua patupu, bu mudi bilele biamba kudi bantu, bu mudi mayisha a kumudilu a pa buloba, ne ki mbu mudi Kristo mutuyishe.’ (Kolos. 2:8) Tshivuaye muambe etshi tshidi tshienda tshipeta mushinga watshi padi dituku dia Yehowa dienda disemena pabuipi, bualu ‘kapia’ kakole nekengulule “bintu bia mu diulu” bionso bia mu bulongolodi bua Satana, kaleja mudibi kabiyi mua kukandamana kumpala kua mudilu. Bualu ebu budi butuvuluija mêyi adi mu Malaki 4:1 a ne: ‘Dituku nedilue didi diosha bu kapia ka mu tshikutu, ne bonso badi badisua ne benji ba malu mabi bonso nebikale bu bisonsa; ne dituku adi didi dilua nedibashidishe.’

‘Buloba ne bintu bidimu nebiedibue patoke’

8. Buloba ne bintu bidimu ‘nebiedibue patoke’ mushindu kayi?

⁸ Ntshinyi tshivua Petelo usua kuamba pakafundaye ne: ‘Buloba ne bintu bidimu nebipie’ anyi nebiedibue patoke? Muaku udibu bakudimune apa ne: ‘nebipie’ anyi nebiedibue patoke badi kabidi mua kuwukudimuna ne: ‘nebisokolodibue’ anyi ‘nebibuluibue.’ Nunku, Petelo uvua usua kuamba ne: mu tshikondo tshia dikenga dinene, Yehowa neele bulongolodi bua Satana patoke, ubusokolola uleja mudibu bumutombokele Yeye ne Bukalenge buende, ne mudibu bukumbanyine kubutudibua bua bualu abu. Yeshaya 26:21 udi wakula bua tshikondo atshi mu mêyi a buprofete wamba ne: ‘Yehowa udi ulopoka mu muaba wende bua kukengesha ba pa buloba bua bubi buabu; buloba kabidi nebusokolole mashi akanuabu, kabuena busokoka kabidi bakadi bashipibuamu.’

9. (a) Mbinganyi bitudi ne bua kuepuka? Mbua tshinyi? (b) Ndimuma kayi ditudi ne bua kukuama? Mbua tshinyi?

⁹ Mu dituku dia Yehowa, badi banyanguke ne malu a pa buloba ebu ne nyuma wa pa buloba nebadileje tshidibu menemene, babanga mene ne kushipangana. Nnganyi udi mumanye bikala mishindu ya bungi ya manaya a tshikisu adi matumbe lelu ni idi yenda ilongolola ngenyi ya ba bungi bua tshikondo tshikala tshianza tshia muntu yonso mua ‘kukuata tshianza tshia munga bua kumuluisha’! (Zek. 14:13) Nunku bidi bikengela menemene bua tuetu kuepuka bintu bionso bibi, bu mudi filme, mikanda, manaya a ku ordinatere, ne bikuabu bidi mua kutupesha ngikadilu idi Nzambi mukine, bu mudi lutambishi ne dinanga dia malu a tshikisu. (2 Sam. 22:28; Mus. 11:5) Tukuame tuetu dimuma dia nyuma muimpe wa Nzambi, bualu ngikadilu ya dimuma edi  neyituambuluishe bua kupanduka ku kapia ka dituku dia tshiji tshia Yehowa.​—Gal. 5:22, 23.

‘Diulu dipiadipia ne buloba bupiabupia’

10, 11. ‘Diulu dipiadipia ne buloba bupiabupia’ ntshinyi?

¹⁰ Bala 2 Petelo 3:13. ‘Diulu dipiadipia’ didi Bukalenge bua Nzambi bua mu diulu buakatuadija kukokesha mu 1914 pavua “tshikondo tshia bantu ba bisamba bia bende” tshijike. (Luka 21:24) Bukalenge ebu mbuenza kudi Yezu Kristo ne bakokeshi nende 144 000 badi ba bungi ba kudibu bamane kupeta difutu diabu dia muoyo mu diulu. Mukanda wa Buakabuluibua udi ubikila bantu basungula aba bu ‘musoko wa tshijila, Yelushalema mupiamupia, upueka mulopoke mu diulu kudi Nzambi, muikale mulongolola bimpe bu mukaji mulengejila mulume wende.’ (Buak. 21:1, 2, 22-24) Anu muvua Yelushalema wa pa buloba muikale muaba uvua bukalenge bua mu Isalele wa pa kale, Yelushalema Mupiamupia ne Bayende ke badi benza bukalenge bua mu bulongolodi bupiabupia bua malu. Musoko wa mu diulu eu ‘newupueke, ulopoka mu diulu,’ mu mushindu wa se: Bukalenge abu nebubange kutangila malu pa buloba.

¹¹ ‘Buloba bupiabupia’ buobu budi buleja nsangilu mupiamupia wa bantu bikala pa buloba bikala bamane kuleja muvuabu bakokela Bukalenge bua Nzambi. Nansha nsombelu udi nende bantu ba Nzambi mpindieu udi bu wa mu mparadizu neikale ndekelu wa bionso mu “buloba [bulengele] bua bantu bulualua” abu anu mushindu uvuaye ne bua kuikala. (Eb. 2:5) Kadi tuenze tshinyi bua tuetu kubuela petu mu bulongolodi bupiabupia bua malu?

Tudilongolole bua dituku dinene dia Yehowa

12. Bua tshinyi dituku dia Yehowa nedilue kudi ba panu bu bualu buabapapula?

¹² Paulo ne Petelo bakadianjila kumanyisha ne: dituku dia Yehowa divua mua kulua ‘bu mudi muivi ulua,’ mu musokoko kabayi baditekemene. (Bala 1 Tesalonike 5:1, 2.) Nansha bena Kristo batu batekemena dituku adi kabakumanya paluadi, bualu nedilue mu tshimpitshimpi. (Mat. 24:44) Kadi bua bena panu bobu, nedibapapule bibi menemene. Paulo wakafunda ne: ‘Patshidibu bamba ne: tudi ne ditalala, katuyi ne bualu; apu dibutuka dia tshintuluntulu dilualua kudibu bu mudi kanyinganyinga kalua kudi mukaji udi ne difu; ne bobu kabena bapanduka nansha kakese.’​—1 Tes. 5:3.

13. Mmunyi mutudi mua kuepuka bua lubila lua ‘ditalala, lua mudiku kakuyi bualu’ kalutudingi?

¹³ Lubila lua ne: “Tudi ne ditalala, katuyi ne bualu” neluikale anu mafi makuabu patupu a kudi bademon, kadi kaluakudinga bantu ba Yehowa to. Paulo wakafunda ne: ‘Kanuena mu mîdima bua dituku adi dinukuate bu muivi; bua buonso buenu nudi bana ba munya ne bana ba dituku.’ (1 Tes. 5:4, 5) Nanku, tushalayi mu munya, kule menemene ne mîdima ya mu bulongodi bua Satana. Petelo wakafunda ne: “Balunda banyi, nuakubedibua [anyi nuakudianjila kumanya malu aa] mpindiewu. Dimukayi, bua kanupambuki ku mapanga a bantu babi [anyi balongeshi ba dishima badi mu tshisumbu] ne kanujimiji muaba wenu mushindame.”​—2 Pet. 3:17, Muanda Mulenga Lelu.

14, 15. (a) Mmushindu kayi udi Yehowa utuambika buneme? (b) Mmêyi kayi a mu Bible atudi ne bua kuikala tutamba kuvuluka?

 ¹⁴ Tangila ne: Yehowa kena utuambila anu bua ‘kudimuka’ patupu kujika to. Kadi udi utuambika kabidi buneme padiye ‘udianjila kutupesha dimanya’ dia malu manene a tshikala ne bua kuenzeka mu matuku atshilualua.

¹⁵ Diakabi, bamue kabatshiena nadi bualu anyi bakadi bela malu adibu batuvuluija bua kushala badimuke mpata. Badi mua kuamba ne: ‘Mubelu umue umue au tukadi bawumvumvue bidimu bia bungi.’ Kadi bantu ba nunku badi ne bua kuvuluka ne: padibu bamba mêyi a mushindu eu, udibu bela mpata n’Yehowa ne Muanende, kadi ki mmupika wa lulamatu to. Yehowa wakamba ne: ‘Windile.’ (Hab. 2:3) Yezu wakamba muomumue ne: ‘Dimukayi, bualu bua kanuena bamanye dituku dialua Mukalenge wenu.’ (Mat. 24:42) Petelo pende wakafunda ne: ‘Bunudi nabu mbua kuikala bantu ba mushindu kayi mu bienzedi bia tshijila ne bia Nzambi, panudi nutekemena ne panudi nuendesha lukasa dilua dia dituku dia Nzambi’! (2 Pet. 3:11, 12) Mupika wa lulamatu ne kasumbu kende kaludiki kabakulengululaku mêyi a mushinga aa nansha kakese!

16. Ndungenyi kayi lutudi ne bua kuepuka? Mbua tshinyi?

¹⁶ Bushuwa, ‘mupika mubi’ ke udi wamba ne: Mfumu kena ulua mpindieu. (Mat. 24:48) Mupika mubi au udi pende mu tshisumbu tshia bantu badibu bambe mu 2 Petelo 3:3, 4. Petelo wakafunda ne: ‘Palua ku nshikidilu kua matuku, baseki nebalue benda bu mudi nkuka yabu mene,’ baseka bantu badi bindile dilua dia dituku dia Yehowa bikale bamutumikila. Pamutu pa bena tuseku aba kuteka meji abu ku malu a Bukalenge, badi baateka anu kudibu bobu bine ne ku malu adi abasankisha bobu nkayabu. Tuetu katupetshi tshishiku ne meji mabi bia mushindu eu nansha! Mbimpe tuetu tuangate ‘lutulu lua Mukalenge wetu bu lupandu’ luetu pa kuenza mudimu wa bungi wa diyisha Bukalenge ne divuija bantu bayidi, ne pa kubenga kutamba kusumpakana bua dîba dienzeka malu a Yehowa Nzambi.​—2 Pet. 3:15; bala Bienzedi 1:6, 7.

Eyemena Nzambi wa lupandu

17. Ntshinyi tshivua bena Kristo ba lulamatu benze bua didimuija dia Yezu dia kupatuka Yelushalema? Mbua tshinyi?

¹⁷ Pavua biluilu bia bena Lomo bibuele mu Yudaya mu 66 panyima pa diledibua dia Yezu, bena Kristo ba lulamatu bakatumikila didimuija dia Yezu dia kupatuka mu tshimenga tshia Yelushalema anu musangu wa kumpala uvua mpunga mumueneke. (Luka 21:20-23) Bua tshinyi bavua baditumikile diakamue kabayi belakana? Tudi bashindike ne: bavua balame didimuija dia Yezu adi mu meji abu. Bulelela, bavua bajadike ne: ditumikila diabu adi divua mua kubakebela ntatu anu mukavua Yezu mubadimuije. Kadi bavua kabidi bamanye  ne: Yehowa kavua mua kulekela bantu bende bavua bamulamate nansha kakese.​—Mus. 55:22.

18. Mmushindu kayi udi mêyi a Yezu adi mu Luka 21:25-28 akulongolola bua dikenga dinene ditshilualua?

¹⁸ Tuetu petu tudi ne bua kueyemena Yehowa ne muoyo wetu mujima, bualu yeye nkayende ke watupandisha pikala dikenga dipite bunene ditu kadiyi dianji kuenzeka dikuate bulongolodi ebu. Pikala dikenga dinene dimane kutuadija kadi kumpala kua Yehowa kubutula bantu bakuabu bonso bikala bashale ne muoyo, bantu ‘nebafue tshipuka bua buôwa ne bua ditekemena dia malu alua pa buloba.’ Tshidibi, pikala baluishi ba Nzambi bazakala ne buôwa, bantu badi balamate Yehowa kabakukanka nansha. Kadi bobu nebasanke, bualu nebikale bamanye ne: lupandu luabu ludi pabuipi.​—Bala Luka 21:25-28.

19. Tshitualonga mu tshiena-bualu tshidi tshilonda ntshinyi?

¹⁹ Bushuwa, masanka a dikema mmindile bonso badi bashala kabayi mu ba pa buloba ne “bintu bidimu”! Kadi anu mudi tshiena-bualu tshidi tshilua tshiumvuija, tuetu basue kupeta muoyo tudi ne bia bungi bitudi ne bua kuenza kupita diepuka dia malu mabi patupu. Mbimpe tuikale ne ngikadilu idi isankisha Yehowa ne bienzedi bidiye wanyisha.​—2 Pet. 3:11.

[Mêyi adi kuinshi]

Udi mua kumvuija anyi?

• Bintu ebi bidi bileja tshinyi?

‘Diulu ne buloba’ bidiku lelu

“Bintu bia mu diulu”

‘Diulu dipiadipia ne buloba bupiabupia’

• Bua tshinyi tudi ne bua kueyemena Nzambi ne muoyo mujima?

[Nkonko ya dilonga]

[Tshimfuanyi mu dibeji 5]

Mmushindu kayi uudi mua ‘kulama mutshima webe’ ne kushala kuyi mu ba pa buloba?

[Tshimfuanyi mu dibeji 6]

Mmushindu kayi utudi mua kuleja ne: ‘lutulu lua Mukalenge wetu ndupandu’ luetu?