Mudi mulambu wa Yezu utusungila

‘Udi witabuja Muana udi ne muoyo wa tshiendelele; kadi udi upidia Muana kena umona muoyo, tshiji tshia Nzambi tshidi tshishala nende.’​—YONE 3:36.

1, 2. Mbumue bua ku malu kayi buvuabu bapatuile Tshibumba tshia Nsentedi tshia Siona bua musangu wa kumpala?

PAKATUADIJABU kupatula Tshibumba tshia Nsentedi mu 1879, nimero muinayi wakapatuka mu ngondo wa 10 wakamba ne: “Muntu yonso udi ulonga Bible ne muoyo mujima neamone mushinga udi nawu lufu lua Kristo.” Mêyi a ndekelu a tshiena-bualu atshi avua amba ne: “Tudi ne bua kubenga malongesha onso adi aleja ne: lufu lua Kristo kaluvua mulambu uvuaye mufile bua mibi yetu to.”​—Bala 1 Yone 2:1, 2.

² Bumue bua ku malu avuabu bapatuile Tshibumba tshia Nsentedi tshia Siona mu ngondo wa 7/1879 buvua bua kumvuija bimpe tshidi Bible ulongesha bua mulambu wa Kristo. Malongesha avuamu avua anu bu ‘biakudia pa dituku diabi’ bualu ku ndekelu kua 1800, bantu ba bungi bavua badiamba muvuabu bena Kristo bakatuadija kudiebeja muvua lufu lua Yezu mua kuikala mulambu uvuaye mufile bua mibi yetu. (Mat. 24:45) Tshikondo atshi, bantu ba bungi bavua bitaba dilongesha dia ne: bintu mbidienze, didi dibengangana ne dia ne: Nzambi uvua mufuke muntu mupuangane. Bena dilongesha dia ne: bintu mbidienze batu bamba ne: bu mudi muntu mudienze, kena dijinga ne mulambu wa kumupikula nawu to. Nunku, mbimpe tuetu kutumikila mubelu uvua mupostolo Paulo mupeshe Timote wa ne: ‘Ulame tshiakakupabu; epuka ku biakulakula bia patupu ne ku mpata ya bantu badi ne lungenyi ludibu batupakana ne: “Ndulelela;” bakuabu pakitabujabu lungenyi elu, bakapambuka bualu bua ditabuja.’​—1 Tim. 6:20, 21.

3. Nnkonko kayi ituandamune?

³ Kakuyi mpata udi mudisuike bua kubenga  ‘kupambuka mu ditabuja.’ Bua wewe kulama ditabuja diebe, mbimpe ukonkonone nkonko eyi: Bua tshinyi ndi dijinga ne mulambu wa Yezu? Ntshinyi tshivua Yehowa ne Yezu badipangishe bua kutupikula? Ntshinyi tshindi mua kuenza bua mulambu eu kungambuluishawu ne kunsungila ku tshiji tshia Nzambi?

Tudi mua kupanduka ku tshiji tshia Nzambi

4, 5. Ntshinyi tshidi tshileja ne: Nzambi utshidi mufikile bulongolodi bua Satana tshiji?

⁴ Bible ne malu adi menzekele bantu bidi bileja ne: katshia anu Adama wenza bubi, ‘tshiji tshia Nzambi tshidi tshishala’ kudi bantu bonso. (Yone 3:36) Bidi nanku bualu kakuena muntu nansha umue udi mua kuepuka lufu. Bukokeshi bubi bua Satana mbupangile bua kukuba bantu ku makenga adi atungunuka ne kubakuata, ne kakuena bukalenge bua ditunga nansha dimue budi bukokeshe bua kukumbajila benamu majinga abu manene to. (1 Yone 5:19) Ke bualu kayi mvita, tshikisu ne bulanda mbitungunuke ne kusubisha bantu.

⁵ Bidi bimueneka patoke ne: Yehowa kena ubenesha makokeshi adiku lelu mu bulongolodi bua Satana to. Paulo wakamba ne: ‘Tshiji tshia Nzambi tshidi tshibuluibua mu diulu pa malu onso adi kaayi a Nzambi.’ (Lomo 1:18-20) Nunku, bantu bonso badi benza malu mabi kabayi banyingalala nebapete makenga bua bienzedi biabu. Lelu, tshiji tshia Nzambi tshidi tshimanyishibua ku diambuluisha dia mikenji ya dilumbuluisha idi bu bipupu bidibu bapumuna pa bulongolodi bua Satana. Malu aa atu asanganyibua mu mikanda yetu itu yumvuija malu a mu Bible.​—Buak. 16:1.

6, 7. Mmudimu kayi udibu balombola kudi bena Kristo bela manyi? Ndiakalenga kayi ditshidiku bua bantu batshidi mu bulongolodi bua Satana?

⁶ Bualu ebu budiku bumvuija ne: kakuena kabidi mushindu wa bantu kumbukabu ku bukokeshi bua Satana ne kulengejangana ne Nzambi anyi? Tòo, bualu Yehowa utshidi anu utungunuka ne kuakidila bantu bonso badi basue kulengejangana nende. Bena Kristo bela manyi badi bikale ‘milopo bua bualu bua Kristo’ badi balombola mudimu wa kuyisha udi wambuluisha bantu ba bisamba bionso bua ‘kulengejangana ne Nzambi.’​—2 Kol. 5:20, 21.

⁷ Mupostolo Paulo wakamba ne: Yezu ‘udi utupandisha ku tshiji tshilualua.’ (1 Tes. 1:10) Bua kujikija tshiji tshiende, Yehowa neabutule bua kashidi bantu bonso badi benza malu mabi kabayi banyingalala. (2 Tes. 1:6-9) Nganyi wapanduka? Bible udi wamba ne: ‘Udi witabuja Muana udi ne muoyo wa tshiendelele; kadi udi upidia Muana kena umona muoyo, tshiji tshia Nzambi tshidi tshishala nende.’ (Yone 3:36) Bulelela, bantu bonso badi ne muoyo ne bitabuja Yezu ne mulambu wende, nebapanduke pabutulabu bulongolodi bubi bua malu ebu mu dituku dia tshiji tshinene tshia Nzambi.

Masanka adi mulambu wa Yezu utupetesha

8. (a) Ndiakalenga kayi divua nadi Adama ne Eva? (b) Mmushindu kayi udi Yehowa muleje mudiye Nzambi wa kulumbulula kuakane tshishiki?

⁸ Nzambi uvua mufuke Adama ne Eva bapuangane. Bu bobu batungunuke ne kumutumikila, nunku buloba mbuule tente ne ndelanganyi yabu ivuabu mua kusomba nayi mu mparadizu mu disanka. Kadi diakabi, baledi betu ba kumpala bakashipa mukenji wa Nzambi ku bukole. Ke bualu kayi wakabafundila tshibawu tshia lufu lua tshiendelele ne kubipata mu mparadizu. Pakalela Adama ne Eva bana, bubi buakambulukila  bantu bonso ne ndekelu wa bionso bakakulakaja ne bakafua. Bualu ebu buakaleja ne: Yehowa katu udinga. Nunku, udi Nzambi udi ukosa bilumbu mu mushindu muakane tshishiki. Yehowa uvua mudimuije Adama ne: yeye mudie tshimuma tshia mutshi mukandika uvua ne bua kufua, ne ke tshiakenzeka.

9, 10. (a) Bua tshinyi ndelanganyi ya Adama idi ifua? (b) Mmunyi mutudi mua kupanduka ku lufu lua tshiendelele?

⁹ Bu mutudi ndelanganyi ya Adama, tudi bapiane mubidi wa bubi udi utusaka ku dienza malu mabi ne ndekelu wa bionso tudi tufua. Pakenza Adama bubi, tuetu tuvua munda muende. Nunku tshibawu tshia lufu tshidi tshitukuata petu. Bu Yehowa muenze bua katukulakaji ne katufu kabiyi ku diambuluisha dia mulambu wa Yezu, dîyi diende kadivua mua kukumbana to. Ke bualu kayi Paulo wakamba buetu tuetu bonso ne: ‘Tudi bamanye ne: Mikenji idi ya nyuma, kadi meme ndi ne mutshima wa kulonda malu mabi a mubidi, ndi mupanyibue ku bubi. Meme muena majiya! Wansulula ku mubidi wa lufu elu nnganyi?’​—Lomo 7:14, 24.

¹⁰ Anu Yehowa nkayende ke uvua mua kuenza tshivua tshikengela bilondeshile mikenji yende bua kutubuikidila mibi yetu ne kutumushila tshibawu tshia lufu lua tshiendelele. Wakenza nunku pakatumaye Muanende munanga bua kuledibuaye muntu mupuangane ne kulambula muoyo wende bua kutupikula. Yezu uvua mushilangane ne Adama bualu yeye wakashala mupuangane, mbuena kuamba ne: “Yeye kakenza bualu bubi.” (1 Pet. 2:22) Nunku Yezu uvua ne mushindu wa kulela bana bapuangane. Kadi pamutu pa kuenza nanku, wakalekela baluishi ba Nzambi bamushipa bua kumonaye mua kupiana ndelanganyi ya Adama mipange bupuangane ne kupesha bantu badi bamuitabuja muoyo wa tshiendelele. Bible udi wamba ne: ‘Nzambi udi umue, ne mutuangaji umue udiku pankatshi pa Nzambi ne bantu, nyeye muntu mene Kristo Yezu; wakadifila bu tshintu tshia kupikula natshi bantu bonso.’​—1 Tim. 2:5, 6.

11. (a) Fila tshilejilu tshidi tshileja mudi mulambu wa Yezu utuambuluisha. (b) Mmasanka kayi adi bantu badi ne muoyo ne bafue bapetela ku mulambu wa Yezu?

¹¹ Bua tuetu kumvua bimpe mudi mulambu wa Yezu utuambuluisha, tuangatayi tshilejilu tshia muntu uvua mutekeshe makuta ende kudi mukuabu, kadi au muadie ne nunku mubuele dibanza. Muntu uvua mudie makuta au udi ne bua kubuela buloko bua bidimu bia bungi. Netuambe tshinyi bua muena makuta adiye mudie? Bu mudiye mushale bianza bitupu, kena ne tshikuabu tshia kuenza to, anu bobu balue kumuambuluisha kudi muntu mubanji wa muoyo muimpe ne mumupingajile makuta ende onso bua kufuta dibanza adi. Bia muomumue, Yehowa Nzambi ne Muanende munanga mbapikule ndelanganyi ya Adama ku dibanza dia bubi ku diambuluisha dia mashi avua Yezu muele panshi. Ke bualu kayi Yone Mubatiji udi wamba bua Yezu ne: ‘Tangilayi, Muana wa mukoko wa Nzambi udi umusha bubi bua ba pa buloba.’ (Yone 1:29) Ba pa buloba badibu bumushila mibi kabena anu badi ne muoyo to, kadi nansha ne bakadi bafue.

Muvua Yehowa ne Yezu bakenge bua kutupikula

12, 13. Ntshinyi tshitudi mua kulongela ku mushindu uvua Abalahama muitabe bua kulambula Isaka?

¹² Mbikole bua tuetu kumvua bimpe dikenga divua Nzambi ne Muanende bumvue bua kutupikula. Kadi Bible udi ne miyuki idi mua kutuambuluisha bua kuela meji pa bualu ebu. Tshilejilu, ela meji muvua Abalahama mua kuikala mumvue pakenzaye luendu lua matuku asatu mutangile ku Moliya bua kutumikila dîyi divua Nzambi mumuambile dia ne: ‘Wangate muanebe mulume, muana umuepele uudi munange, Isaka mene, uye mu buloba bua Moliya; umufileku bu mulambu wa kuosha pa kapia, pa mutu pa mukuna undualua kukuleja.’​—Gen. 22:2-4.

¹³ Ndekelu wa bionso Abalahama wakafika pa muaba uvua Yehowa mumuambile. Ela meji muvuabi mua kuikala bimusama ku muoyo pavuaye usuika bianza ne makasa a Isaka ne umuladika pa tshioshelu tshivua Abalahama nkayende mudienzele. Abalahama uvua ne bua kuikala mumvue kanyinganyinga kakole pakelaye kela muulu bua kushipa muanende. Ela meji mushindu uvua Isaka mua kuikala mumvue pavuaye mulale pa tshioshelu muindile bua bamukose mutu yeye muteleje. Muanjelu wa Yehowa wakakanda  Abalahama kumpala kua dîba. Tshivua Abalahama ne Isaka benze dituku adi tshidi tshituambuluisha bua kumvua dikenga divua nadi Yehowa pavuaye mulekele bena mudimu ba Satana bashipa Muanende. Mushindu uvua Isaka mutumikile tatuende udi uleja muvua Yezu muitabe bua kukenga ne kutufuila.​—Eb. 11:17-19.

14. Mbualu kayi buvua bufikile Yakoba budi butuambuluisha bua kumvua tshivua Yehowa muenze bua kutupikula?

¹⁴ Tshilejilu tshia Yakoba tshidi kabidi mua kutuambuluisha bua kumvua dikenga divua Yehowa ne Muanende bumvue bua kutupikula. Ku bana bende bonso, Yosefe ke uvuaye mutambe kunanga. Diakabi bana babu ne Yosefe bavua bamumvuila mukawu ne bakamukina. Kadi Yosefe wakitaba bua tatuende kumutuma bua aye kutangila bana babu bua kumanya mudibu. Dîba adi bana ba Yakoba bavua badisha mikoko mutantshi wa kilometre 100 ne muaba uvuabu basombele ku Nord wa Ebelone. Ela meji tshivua Yakoba mumvue pakapingana bana bende ne tshikowelu tshia Yosefe tshikunze kunzuu ne mashi. Wakapapuka wamba ne: ‘Etshi ntshikowelu tshia muananyi, nyama mubi wakamudia; bulelela, Yosefe mmupandibue bipesa bipesa kudi nyama.’ Malu onso aa akanyingalaja Yakoba bikole ne wakadila Yosefe munkatshi mua matuku a bungi. (Gen. 37:33, 34) Yehowa katu wenza malu bu bantu bapange bupuangane padibu mu ntatu to. Kadi kuela meji pa bualu buvua bufikile Yakoba kudi mua kutuambuluisha bua kumvua mu mushindu kampanda muvua Yehowa mua kuikala mumvue pakakengeshabu Muanende munanga ne kumushipabu ne tshikisu pa buloba.

Mudi mulambu wa Yezu utuambuluisha

15, 16. (a) Mmushindu kayi uvua Yehowa muleje ne: uvua muitabe mulambu wa Yezu? (b) Mulambu wa Yezu udi ukuambuluisha ku tshinyi?

¹⁵ Yehowa Nzambi wakabisha Muanende wa lulamatu ne mubidi wa butumbi udi kauyi umueneka. (1 Pet. 3:18) Munkatshi mua matuku 40 panyima pa dibika dia Yezu ku lufu, uvua umuenekela bayidi bende, ukolesha ditabuja diabu ne ubalongolola bua kuenza mudimu munene wa buambi uvua mubindile. Pashishe wakabanda mu diulu ne kupesha Nzambi  mushinga wa mashi avuaye muele panshi uvua ne bua kuambuluisha bayidi bende balelela badi baleja ditabuja mu mulambu wende. Yehowa Nzambi wakaleja muvuaye muitabe mulambu wa Kristo pavuaye mumupeshe bukokeshi bua kupuekeshila bayidi bende nyuma muimpe pavuabu badisangishe mu Yelushalema mu dituku dia Pentekoste wa mu 33.​—Bien. 2:33.

¹⁶ Bayidi ba Kristo bela manyi abu bakatuadija diakamue kuambila bantu bua batambule mu dîna dia Yezu Kristo bua bababuikidile mibi yabu ne bapanduke ku tshiji tshia Nzambi. (Bala Bienzedi 2:38-40.) Kutuadijila anu ku dituku adi too ne lelu, bantu binunu ne binunu ba mu bisamba bionso badi balengejangana ne Nzambi ku diambuluisha dia ditabuja diabu mu mulambu wa Yezu. (Yone 6:44) Mpindieu bidi bikengela tuetu kuandamuna nkonko mikuabu ibidi eyi: kudiku muntu udi mupete ditekemena dia muoyo wa tshiendelele bua malu mimpe adiye wenza anyi? Bu mutukadi bapete ditekemena edi dia mushinga, kudiku mushindu wa kudijimija anyi?

17. Mmushindu kayi uudi ne bua kumona diakalenga dinene dia kuikala mulunda wa Nzambi diudi nadi?

¹⁷ Yehowa mmufile mulambu wa kutupikula nawu anu bua luse luende. Kadi lelu eu patudi tuwitabuja, tudi tulua balunda bende ne tupeta ditekemena dia kupeta muoyo wa tshiendelele mu mparadizu pa buloba. Kadi patudi tulua balunda ba Yehowa, kabiena biumvuija ne: malanda atudi badie nende kaena mua kufua nansha bia munyi to. Bua tuetu kupanduka mu dituku dia tshiji tshia Nzambi didi kumpala eku, tudi ne bua kutungunuka ne kuleja dianyisha dia bungi bua ‘dipikula didi mu Kristo Yezu.’​—Lomo 3:24; bala Filipoi 2:12.

Tutungunuke ne kuleja dianyisha bua mulambu wa Yezu

18. Kuitabuja mulambu wa Yezu kudi kabidi kumvuija tshinyi?

¹⁸ Mvese wa nshindamenu wa tshiena-bualu etshi wa Yone 3:36 udi uleja ne: kuleja ditabuja mu mulambu wa Mukalenge Yezu Kristo kudi kumvuija kabidi kumutumikila. Dianyisha ditudi nadi bua mulambu eu didi ne bua kutusaka bua kuikala ne nsombelu udi umvuangana ne malongesha a Yezu bu mudi avuaye mulongeshe bua bikadilu bitudi ne bua kuikala nabi. (Mâko 7:21-23) ‘Tshiji tshia Nzambi tshilualua’ kudi bantu bonso badi baditue mu dienza dia malu mabi bu mudi kuenda kua masandi, mineku mibi ne “malu a bundu” a mishindu yonso bu mudi kuikala ne tshibidilu tshia kutangila malu a bantu butaka kabayi banyingalala.​—Ef. 5:3-6.

19. Mmalu kayi atudi ne bua kuenza bua kuleja ne: tudi tuitabuja mulambu wa Yezu?

¹⁹ Dianyisha ditudi nadi bua mulambu wa Yezu didi ne bua kutusaka bua kutungunuka ne kudifila bikole mu “bienzedi bia tshijila ne bia Nzambi.” (2 Pet. 3:11) Nunku tudisumbilayi tshikondo tshia kuikala ne tshibidilu tshia kusambila ne muoyo mujima, kudilongela Bible, kubuela mu bisangilu, kuenza Ntendelelu wa mu Dîku ne kuyisha Bukalenge bua Nzambi ne tshisumi. Pashishe ‘katupu muoyo bua kuenzelangana bimpe ne bua kukuatshishangana; bualu Nzambi udi usanka ne milambu ya nunku.’​—Eb. 13:15, 16.

20. Mmasanka kayi apeta bantu bonso badi batungunuka ne kuleja ditabuja mu mulambu wa Yezu?

²⁰ Palua Yehowa kujikijila bena panu tshiji tshiende, netuikale ne disanka dia bungi bua mutudi baleje ditabuja mu mulambu wa Yezu ne batungunuke ne kuikala ne dianyisha bua bualu buawu. Pashishe mu bulongolodi bupiabupia budi Nzambi mutulaye, netuikale ne dianyisha dia bungi bua kashidi, bua mulambu eu udi mutusungile ku tshiji tshia Nzambi.​—Bala Yone 3:16; Buakabuluibua 7:9, 10, 13, 14.

Newandamune munyi?

• Bua tshinyi bivua bikengela bua bafile mulambu bua kutupikula?

• Ndikenga kayi divua Yehowa ne Yezu bakenge bua kutupikula?

• Mulambu wa Yezu udi utupetesha masanka kayi?

• Mmalu kayi atudi ne bua kuenza bua kuleja mutudi tuitabuja mulambu wa Yezu?

[Nkonko ya dilonga]

[Tshimfuanyi mu dibeji 13]

Yehowa utshidi utungunuka ne kuakidila bantu bonso badi balua bua kulengejangana nende

[Bimfuanyi mu dibeji 15]

Kuela meji pa bualu buvua buenzekele Abalahama ne Isaka ne buvua buenzekele Yakoba kudi mua kutuambuluisha bua kumvua bimpe muvua Yehowa ne Muanende bakenge bua kutupikula