Nkonko ya babadi

Bua tshinyi Yezu uvua mua kuambila mukaji uvua mumanyike muvuaye muena mibi ne: mibi yebe yakujimijibua?​—Luka 7:37, 48.

Pavua Yezu musombe ku mêsa mu nzubu mua Mufalese mukuabu diende Simona, mukaji mukuabu ‘wakimana ku makasa ende.’ Uvua uabolesha ne binsonji ne ubikupula ne nsuki yende. Pashishe uvua uatua mishiku ne uela manananshi. Bible udi wamba ne: mukaji au uvua mumanyike ‘mu musoko muvuaye mukaji mubi.’ Bushuwa, muntu yonso mupange bupuangane mmuena bubi, kadi Bible utu misangu ya bungi ukuata mudimu ne muaku eu bua kuleja muntu udi mumanyike bikole bua malu mabi adiye wenza anyi bua buenzavi buende. Bidi bimueneka ne: mukaji au uvua muendi wa masandi. Kadi yeye eu ke uvua Yezu muambile ne: ‘Mibi yebe yakujimijibua.’ (Luka 7:36-38, 48) Ntshinyi tshivua Yezu musue kuamba? Bu muvuabu kabayi banji kufila mulambu wa kupikula nawu bantu, mmushindu kayi uvua mibi ya mukaji au mua kujimijibua?

Panyima pa mukaji mumane kubolesha makasa a Yezu, muakupule ne muele manananshi, Yezu wakapesha Simona uvua mumuakidile kuende tshilejilu tshivua tshiumvuija bualu bua mushinga mukole. Pashishe, kujimijilaye mukaji au mibi yende. Yezu wakafuanyikija bubi ne dibanza dinene didi muntu ne bua kufuta ne kuambila Simona ne: ‘Musombeshanganyi wakadiku, wakadi ne bena mabanza ende babidi; mukuabu wakadi ne dibanza dia ndenalio nkama itanu, mukuabu wakadi ne dibanza dia ndenalio makumi atanu. Pakapangilabu bintu bia kumufuta, yeye wakabalekelela mabanza bubidi buabu. Bubidi buabu watamba kumusua nganyi?’ Simona wakamuandamuna ne: ‘Ndi ngela meji ne: Muena dibanza dinene wakalekelelaye.’ Yezu wakamuambila ne: ‘Wakujingulula bimpe.’ (Luka 7:41-43) Tuetu bonso tudi ne bua kutumikila Nzambi. Nunku, patudi tubenga kumutumikila ne tuenza bubi, tudi tupangila bua kumufuta dibanza diende ditudi nadi. Dîba adi, tudi tutentakaja dibanza pa dikuabu. Kadi Yehowa udi anu bu musombeshanganyi udi musue kulekelelangana mabanza. Ke bualu kayi Yezu wakambila bayidi bende bua kulomba Nzambi ne: ‘Utulekelele mabanza a malu mabi etu bu mutuakumana kulekelela kabidi badi netu mabanza a malu mabi.’ (Mat. 6:12) Luka 11:4 udi uleja ne: mabanza a malu mabi aa mmibi.

Mmalu kayi avua Yehowa ulomba bantu bua kubabuikidilaye mibi yabu ku kale? Bilondeshile buakane buende bua tshishiki, tshibawu tshia bubi ndufu. Ke bualu kayi Adama wakafua bua bubi buende. Kadi bilondeshile mikenji ivua Nzambi mupeshe tshisamba tshia Isalele, Yehowa uvua ubuikidila muntu uvua muenze bubi anu pavuaye ufila mulambu wa nyama. Mupostolo Paulo wakafunda ne: ‘Bintu bionso bidi bilengejibua ne mashi bu mudi mikenji yamba. Bikalaku kakuyi kumatshisha kua mashi panshi, kakuena kubuikidila kua mibi nansha.’ (Eb. 9:22) Bena Yuda kabavua bamanye bualu bukuabu buvuabu mua kuenza bua Nzambi kubabuikidilaye mibi yabu to. Nunku, kabiena bitukemesha bua muvua bantu bavua bumvue tshivua Yezu muambile mukaji au babenge mêyi ende to. Bantu bavua basombe ku mêsa ne Yezu bakakonkangana ne: ‘Eu udi ujimijilangana mibi nnganyi?’ (Luka 7:49) Kadi nku diambuluisha dia tshinyi kuvua mibi ya mukaji mubi au ne bua kujimijibua?

Mulayi wa kumpala uvua Yehowa muambe panyima pa Adama ne Eva bamane kuenza bubi wakaleja muvua Nzambi mulongolole bua kupatula “muana” uvuabu ne bua kusuma ku tshikankanyi kudi Satana ne “bana” bende. (Gen. 3:15) Bakasuma Yezu pakamushipabu kudi baluishi ba Nzambi. (Gal. 3:13, 16) Mashi a Yezu akelaye panshi adi ambuluisha bua kupikula bantu ku bubi ne lufu. Kakuena tshintu nansha tshimue tshidi mua kupangisha Yehowa bua kukumbaja malu adiye mulongolole to. Nunku, bilondeshile mêyi adi mu Genese 3:15, diakamue pavua Nzambi mupatule mêyi aa, buende yeye mulambu wa kupikula nawu bantu uvua anu bu ne: ukavua mufidibue. Nunku uvua mua kubuikidila bantu bavua bitabuja milayi yende mibi yabu.

 Kumpala kua Yezu kuluaye pa buloba, Yehowa wakabala bantu ba bungi bu bantu bakane ku mêsu kuende. Munkatshi muabu mudi Hanoka, Noa, Abalahama, Lahaba ne Yobo. Bua ditabuja diabu, bavua bindile ne muoyo mujima bua kumona dikumbana dia milayi ya Nzambi. Muyidi Yakobo wakafunda ne: ‘Abalahama wakitabuja Nzambi ne bakamubadila ditabuja diende bu buakane buende.’ Yakobo udi wamba bua Lahaba ne: ‘Muomumue kabidi, Lahaba mukaji wa masandi, kakabingishibua ku kuenza kuende anyi?’​—Yak. 2:21-25.

Davidi mukalenge wa Isalele wakenza mibi minene ya bungi, kadi uvua ne ditabuja dikole kudi Nzambi mulelela ne wakanyingalala ne muoyo mujima misangu yonso ivuaye wenza bubi. Bible udi wamba kabidi ne: ‘Nzambi wakajadika Yezu ku mêsu kua bantu bua kuikalaye mulambu wa kubuikila nawu malu mabi a bantu, ku ditabuja dia mashi ende bua kuleja buakane buende mu dipita diende dia malu mabi akenzabu diambedi bua lutulu lua Nzambi. Wakenza nunku bua kuleja buakane buende mu tshikondo etshi bua yeye kuikala muakane ne mubingishi wa muntu yonso udi witabuja Yezu.’ (Lomo 3:25, 26) Ku diambuluisha dia mulambu wa Yezu uvuaye ne bua kulua kufila, Yehowa uvua mua kubuikidila Davidi mibi yende kadi kayi ushipa mikenji yende ya buakane to.

Bidi bimueneka ne: ke muvuabi kabidi bua mukaji uvua mukupule makasa a Yezu ne muele manananshi. Uvua ne nsombelu mubi, kadi uvua munyingalale. Uvua mujadike ne: bivua bikengela bua bamupikule ku bubi ne bienzedi biende biakaleja ne: uvua witaba muntu uvua Yehowa musungule bua kupikula bantu. Nansha muvua mulambu au kauyi muanji kufidibua, mushinga wawu ukavua mutuadije kuambuluisha bantu bu mudi mukaji au bualu kakuvua tshintu tshivua mua kupangisha bua kuufilabu to. Ke bualu kayi Yezu wakamuambila ne: ‘Mibi yebe yakujimijibua.’

Yezu kavua ubenga kusomba ne bena mibi to. Uvua ubenzela malu mimpe. Pashishe Yehowa mmusue kubuikidila benji ba mibi badi banyingalala. Bualu ebu budi butukolesha tuetu bena mapanga ku muoyo bikole.

[Tshimfuanyi mu dibeji 7]

Bakababala bakane bua ditabuja diabu