Udi muvuluke anyi?

Dibala dia bejibeji bia Tshibumba tshia Nsentedi bishale ebi divua dikusankishe anyi? Nanku, anji tangila ni udi mua kuandamuna nkonko idi ilonda eyi:

• Bua tshinyi kunua maluvu a bungi nkubi nansha muntu yeye kayi mukuatshike?

Bible udi utudimuija patoke ne: kunua maluvu a bungi kudi mua kutunyangila malanda etu ne Yehowa. (Nsu. 23:20; Yesh. 5:11, 12) Yezu wakamba ne: kunua maluvu a bungi kudi mua kupangisha muntu bua kumanya mutudi mu matuku makole. (Luka 21:34, 35)​—1/7, dibeji 6.

• Bua tshinyi Nzambi kavua munyoke Alona bua muvuaye muenze lupingu lua kana ka ngombe lua or?

Alona uvua mushipe mukenji wa Nzambi uvua ukandika ditendelela dia mpingu. (Ekes. 20:3-5) Kadi Mose wakalombela Alona luse kudi Nzambi ne disambila diende divua ne ‘bukole bua bungi.’ (Yak. 5:16) Alona ukavua mushale ne lulamatu kudi Yehowa munkatshi mua bidimu bia bungi. Nansha muvua bantu bafike ku dimuitabijija bua kuenza lupingu lua or lua kana ka ngombe, wakaleje pashishe ne: kavua musue tshivuabu benze atshi to, bualu wakadisangisha ne bana ba Lewi bua kuikala ku luseke lua Yehowa. (Ekes. 32:25-29)​—15/5, dibeji 21.

• Nsumuinu 6:30 udiku wanyishila bantu bua kuiba anyi?

Nansha kakese, bualu mvese udi ulonda udi uleja ne: Nzambi udi ubadila muivi wa nunku tshilema tshiende. Nansha mudi muntu udi wiba bua nzala kayi diatshimue ne udi wiba bua lukuka anyi bua kuenzela mukuende bibi, kadi udi anu ne bua ‘kupingaja’ anyi kufuta bintu bia bende. Bantu badi basue bua Nzambi abanyishe badi ne bua kuepuka buivi mu mishindu yonso. (Nsu. 6:31)​—1/7, dibeji dia 13.

• Kumanya ne: Yehowa udi “utangila mu mutshima” kudi kutuambuluisha ku tshinyi? (1 Sam. 16:7)

Patudi tumanya ne: Yehowa utu utangila yeye muoyo, mbuena kuamba ne: tshitu tshitusaka bua kuela meji, kuenza malu ne kudimvua mushindu kampanda, bidi bitusaka bua kuikala ne ngikadilu mimpe idi mua kutuvuija bantu bimpe ku mêsu kuende.​—1/7, dibeji dia 17.

• Ntshinyi tshidi mua kuambuluisha muena Kristo bua kutantamena padi bayende anyi mukajende muende masandi?

Bikala mulume anyi mukaji udibu benzele bibi uditatshisha bua kutumikila mikenji ya mu Bible, kena ne bua kudipisha bua mudi bayende anyi mukajende mumuele mâyi ku makasa to. Nzambi mmumanye ne: udi dijinga ne diambuluisha ne dikankamija. Udi mua kukukolesha ku muoyo ku diambuluisha dia bena Kristo nebe.​—15/6, dibeji dia 30-31.

• Ntshinyi tshivua mukaji muimpe muena Yuda wenza mu njila pavuabu baya anyi bafuma mu tshisalu ne bana bende?

Mamu muimpe uvua wenda ulongesha bana bende mikenji ya Nzambi mu njila pavuabu baya anyi bafuma mu tshisalu. (Dut. 6:6, 7) Uvua kabidi mua kuyukila ne bana bende malu avua mua kubambuluisha bua kutula makuta bimpe. (Nsu. 31:14, 18)​—1/7, dibeji dia 19.

• Ngimue mikenji kayi ya mu Bible idi mua kuambuluisha mulume ne mukaji mu nsombelu wabu ne baku babu?

Bible udi wamba bua mulume ne: ‘Neashiye tatuende ne mamuende, nealamate mukajende, bubidi buabu nebikale mubidi umue.’ (Gen. 2:24) Udi wamba kabidi ne: ‘Mutu wa mukaji udi mulume,’ mbuena kuamba ne: bayende. (1 Kol. 11:3)​—1/7, dibeji dia 28.

• Mmushindu kayi uudi mua kuambuluisha bana bebe bua kunangabu kulonga ne kubala

Dinanga dia baledi ne tshilejilu tshiabu bidi biambuluisha bana bua kunanga kulonga ne kubala. Bakebele mikanda ya kuikalabu babala. Ikalayi nubala ne dîyi dikole. Ikalayi nubala nabu ne nuyukila malu anudi nubala. Ambila bana bebe bua bikala bakubadila ne bakuela nkonko.​—15/7, dibeji dia 26.

• Bafue badiku mua kuambuluisha badi ne muoyo anyi?

Bible udi umvuija mu mêyi makese atudi mua kumvua bimpe ne: bafue kabena mua kuambuluisha badi ne muoyo bualu ‘kabena bamanye bualu nansha bumue.’ Eyowa, ki mbamanye bualu nansha bumue, kabena ne bukole bua kuambuluisha muntu to. (Muam. 9:5, 6, 10)​—1/7, dibeji dia 21.

• Mmubelu kayi udi Bible upesha muntu udi mufuishe bayende anyi mukajende pa bidi bitangila didisombela dia nkayende?

Nansha mudibi imue misangu bimpe bua kusomba nkayebe, Nsumuinu 18:1 udi utudimuija ne: ‘Udi uditapulula kudi banga bantu udi ukeba anu bualu budiye musue.’ Nunku mbimpe bua muntu udi mufuishe bayende anyi mukajende kukeba diambuluisha kudi balela ne balunda bende badi mua kuditeka pa muaba wende. Mu bualu ebu, tshisumbu tshia bena Kristo tshidi mua kubambuluisha bikole. (Yesh. 32:1, 2)​—1/7, dibeji dia 30.