Batendeledi balelela badi mu buobumue

‘Nembasangishe popamue bu mikoko mivule mu lupangu.’​—MIKA 2:12.

1. Mmunyi mudi bintu bidi Nzambi mufuke bileja mudiye ne meji?

MUFUNDI wa Musambu wa 104 wakamba ne: ‘Yehowa, mona mudi bungi bua mishindu ya midimu yebe! Wewe wakenza buonso buayi ne lungenyi luebe; buloba budi buule tente ne bintu biwakufuka.’ (Mus. 104:24) Meji a Nzambi adi amuenekela ku dikumbajangana didi pankatshi pa mitshi ya mishindu mishilangane, bishi, nyama ne mikrobe bidi pa buloba. Mubidi webe kabidi udi ne bintu bia bungi bishilangane bu mudi bitupa binene bia mubidi ne tuselile tukese bidi bienza mudimu pamue bua wikale tshiudi ne wikale ne makanda a mubidi.

2. Anu mudibi bileja mu dibeji dia 13, bua tshinyi buobumue bua bena Kristo buvua bu tshishima?

² Yehowa wakafuka bantu bua bikale bakumbajangana. Bantu mbashilangane ku tshimuenekelu tshiabu, ngikadilu yabu ne ku malu adibu bamanye. Nzambi uvua mupeshe kabidi bantu ba kumpala ngikadilu bu yende ivua mua kubambuluisha bua kuenza mudimu pamue ne kukumbajangana. (Gen. 1:27; 2:18) Kadi lelu bantu mu kabujima badi kule ne Nzambi ne kabena benza malu mu buobumue to. (1 Yone 5:19) Ke bualu kayi buobumue bua bena Kristo ba kumpala buvua bumueneka bu tshishima bualu bavua bafumine miaba mishilangane. Kuvua bapika bena Efeso, bakaji bende lumu ba mu Grèce, bena Yuda bavua balonge tulasa tua bungi ne bantu bavua batendelela mpingu kale.​—Bien. 13:1; 17:4; 1 Tes. 1:9; 1 Tim. 6:1.

3. Mmushindu kayi udi Bible umvuija buobumue bua bena Kristo? Ntshinyi tshituakonkonona mu tshiena-bualu etshi?

³ Ntendelelu mulelela udi wambuluisha bantu bua kuenza mudimu mu diumvuangana anu bu bitupa bia mubidi umue. (Bala 1 Kolinto 12:12, 13.) Nunku, mu tshiena-bualu etshi netuandamune nkonko eyi: Mmunyi mudi ntendelelu mulelela usangisha bantu? Bua tshinyi anu Yehowa ke udi mua kusangisha bantu binunu ne binunu ba mu bisamba bionso? Mmalu kayi adi apangisha buobumue adi Yehowa utuambuluisha bua kulekela? Pa bidi bitangila buobume, bena Kristo balelela mbashilangane ne ba dishima ku tshinyi?

Mudi ntendelelu mulelela usangisha bantu

4. Mmunyi mudi ntendelelu mulelela usangisha bantu?

⁴ Bantu badi mu ntendelelu mulelela badi bitaba ne: bu mudi Yehowa ke udi mufuke bintu bionso, mmukumbane bua kuikala mfumu wa diulu ne buloba. (Buak. 4:11) Nunku nansha mudi bena Kristo balelela basombele miaba mishilangane ne bikale ne nsombelu mishilangane, badi batumikila mikenji ya muomumue ya kudi Nzambi ne mibelu idi mu Bible. Batendeledi balelela bonso badi babikila Yehowa ne: “Tatu.” (Yesh. 64:8; Mat. 6:9) Nunku, mbana ba muntu ne badi mu buobumue bua buena budibu bambe mu Musambu wa 133:1 ne: ‘Monayi, bidi bitamba buimpe ne bia disanka bua bukua bantu badikunguije pamue ne mutshima umue!’

5. Nngikadilu kayi udi wambuluisha batendeledi balelela bua kuikala mu buobumue?

⁵ Nansha mudi bena Kristo balelela ne mapanga, badi batendelela mu buobumue bualu mbalonge bua kunangangana. Yehowa udi ubalongesha bua kunangangana mu mushindu udi muntu mukuabu kayi mua kubalongesha to. (Bala 1 Yone 4:7, 8.) Dîyi diende didi diamba ne: ‘Luatayi mutshima wa luse, ne wa  dikuatshisha, ne wa kudipuekesha, ne wa kalolo, ne wa lutulu. Nulejangane lutulu, nulekelelangane mibi yenu, bikala muntu ne mukuabu tshilumbu; bu muakanubuikidila Mukalenge mibi yenu, nuenu nuenze muomumue kabidi. Pa mutu pa malu aa onso nuluate dinanga, didi tshisuikidi tshia malu onso a buakane buonso.’ (Kolos. 3:12-14) Tshisuikidi tshia malu onso anyi dinanga ke ngikadilu munene wa bena Kristo balelela. Wewe pebe, kuenaku mudimuene mudi batendeledi balelela bamanyike bua buobumue budi munkatshi muabu anyi?​—Yone 13:35.

6. Mmunyi mudi ditekemena dia Bukalenge bua Nzambi dituambuluisha bua kuikala mu buobumue?

⁶ Batendeledi balelela badi kabidi mu buobumue bualu mbatekemene ne: anu Bukalenge bua Nzambi ke bualua kumbusha ntatu ya bantu. Mbamanye ne: Bukalenge bua Nzambi bukadi pa kupingana pa muaba wa makalenge a bantu ne kupetesha bantu badi batumikila Nzambi ditalala dilelela ne dia kashidi. (Yesh. 11:4-9; Dan. 2:44) Nunku, bena Kristo balelela badi batumikila tshivua Yezu muambe bua bayidi bende ne: ‘Bobu kabena ba pa buloba, bu mundi meme tshiyi wa pa buloba.’ (Yone 17:16) Kabena babuelakana mu mvita to. Ke bualu kayi badi mu buobumue nansha padi bantu bakuabu mu mvita.

Malongesha etu adi afuma kaba kamue

7, 8. Mmunyi mudi malongesha a mu Bible atusangisha?

⁷ Bena Kristo ba kumpala bavua mu buobumue bualu bavua bapeta mibelu ivua ifumina muaba umue. Bavua bamanye ne: Yezu uvua ulongesha tshisumbu ne utshilombola ku diambuluisha dia kasumbu kaludiki kavua kenza ne bapostolo ne bakulu ba mu Yelushalema. Bantu abu bavua bangatshila mapangadika abu mu Dîyi dia Nzambi ne bavua batuma batangidi bena ngendu bua kumanyisha bisumbu bia mu matunga a bungi mapangadika abu. Bible udi wamba bua bamue ba ku batangidi aba ne: ‘Pakadibu bendakana mu misoko, bakafila mikenji yakelabu kudi bapostolo ne bakulu ba mu Yelushalema bua kuyitumikilabu.’​—Bien. 15:6, 19-22; 16:4.

⁸ Bia muomumue lelu, Kasumbu Kaludiki kadi kenza ne bena Kristo bela manyi kadi kambuluisha bua bisumbu bia pa buloba bujima bikale mu buobumue. Kadi kapatula mikanda idi itukankamija mu miakulu ya bungi. Malu adi mu mikanda eyi mmangatshila mu Dîyi dia Nzambi. Nunku, malu adibu balongesha ki nga kudi bantu to, kadi nga kudi Yehowa.​—Yesh. 54:13.

9. Mmunyi mudi mudimu udi Nzambi mutupeshe utuambuluisha bua kuikala mu buobumue?

⁹ Bakulu bena Kristo badi pabu bambuluisha bua tshisumbu tshikale mu buobumue padibu ba kumpala mu mudimu wa diyisha lumu luimpe. Malanda adi pankatshi pa bantu badi benzela Nzambi mudimu pamue mmakole kupita adi pankatshi pa bantu bakuabu ba pa buloba badi benza midimu yabu pamue. Tshisumbu tshia bena Kristo katshivua tshienza bua kuikala muaba wa kumanyangana ne bantu ne kudia nabu bulunda to, kadi tshivua tshienza bua kutumbisha Yehowa ne kuenza mudimu wa kuyisha lumu luimpe, kuvuija  bantu bayidi ne kukolesha benamu. (Lomo 1:11, 12; 1 Tes. 5:11; Eb. 10:24, 25) Ke bualu kayi, mupostolo Paulo wakamba bua bena Kristo ne: ‘Badi bajalama mu nyuma umue, ne badi batshinta popamue ne mutshima umue bua ditabuja dia lumu luimpe.’​—Filip. 1:27.

10. Ngamue malu kayi adi atusangisha tuetu batendeledi ba Nzambi?

¹⁰ Nunku, tuetu Bantemu ba Yehowa tudi mu buobumue bualu tudi tuitaba bumfumu bua Yehowa, tudi banange bana betu, tudi bindile Bukalenge bua Nzambi ne tudi tunemeka bantu badi Nzambi muteke bua kutulombola. Yehowa udi utuambuluisha bua kulekela amue malu adi mua kunyanga buobumue buetu bualu tudi bena mapanga.​—Lomo 12:2.

Tulekele lutambishi ne mukawu

11. Bua tshinyi lutambishi lutu lutapulula bantu? Mmunyi mudi Yehowa utuambuluisha bua kululekela?

¹¹ Lutambishi lutu lutapulula bantu. Muntu muena lutambishi mmusue kudimona yeye bu mupite bakuabu ne udi usanka padiye uditumbisha. Kadi lutambishi lutu lupangisha bantu bua kuikala mu buobumue, bualu bantu badi bumvua muntu uditambisha badi mua kumvua mukawu. Yakobo muyidi wa Yezu udi wamba patoke ne: “Kuditumbisha kuonso kua nunku kudi kubi.” (Yak. 4:16) Kumona bakuabu bu bapuekele kakuena kuleja mutudi babanange to. Ke bualu kayi Yehowa udi tshilejilu tshia muntu udi udipuekesha bualu udi ukuata netu mudimu tuetu bantu bena mapanga. Davidi wakafunda bua Nzambi ne: ‘Didipuekesha diebe didi dimvuija munene.’ (2 Sam. 22:36, NW) Dîyi dia Nzambi didi dituambuluisha bua kulekela lutambishi bualu didi ditulongesha bua kuikala ne meji mimpe. Nyuma wa Nzambi wakenzeja Paulo bua kuebeja ne: ‘Udi ukutapulula kudi bakuabu nganyi? Udi ne tshintu kayi tshiudi kuyi muangate kudi mukuabu? Biwikala mutshiangate kudi mukuabu, munyi muudi uditumbisha bu muudi kuyi mutshiangate?’​—1 Kol. 4:7.

12, 13. (a) Bua tshinyi bitu bipepele bua kumvua mukawu? (b) Tuetu tumona bakuabu mudi Yehowa ubamona, ntshinyi tshienzeka?

¹² Mukawu utu pawu upangisha bantu bua kuikala mu buobumue. Bua bubi butuakapiana, tuetu bonso tutu ‘tujinga too ne ku mukawu’ ne nansha bena Kristo bakadi benze bidimu bia bungi badi mua kumvuila bakuabu mukawu bua nsombelu wabu, bintu biabu, majitu abu anyi malu adibu bamanye. (Yak. 4:5) Tshilejilu, muanetu udi ne bana udi mua kumvuila muanetu mukuabu udi mu mudimu wa ku dîba ne ku dîba mukawu bua majitu adiye nawu, kayi mumanye ne: yeye pende udi mua kuikala umumvuila mukawu bua mudiye ne bana. Ntshinyi tshitudi ne bua kuenza bua mukawu wa nunku kaunyangi buobumue buetu?

¹³ Bua kutuambuluisha bua kuepuka mukawu, tuvuluke ne: Bible udi ufuanyikija tshisumbu tshia bena Kristo bela manyi ne bitupa bia mubidi wa muntu. (Bala 1 Kolinto 12:14-18.) Tshilejilu, nansha mudi dîsu dikale dimueneka kupita muoyo, bionso bibidi bidi ne mushinga kuudi. Bia muomumue, Yehowa udi wangata bena mu tshisumbu bonso ne mushinga nansha mudi bamue ba kudibu mua kuikala bamueka kupita bakuabu bua tshikondo kampanda. Nunku, tuikale tumona bana betu anu mudi Yehowa ubamona. Pamutu pa kubumvuila mukawu, tudi mua kuditatshisha bua bualu buabu. Tuetu tuenza nunku, tudi tuambuluisha bua dishilangana dikale pankatshi pa bena Kristo balelela ne ba dishima.

Bena Kristo ba dishima mbatapuluke

14, 15. Ntshinyi tshivua tshifikishe bena Kristo batontolodi bua kutapuluka?

¹⁴ Buobumue bua bena Kristo balelela mbushilangane bikole ne dikokangana didi pankatshi  pa bitendelelu bia bena Kristo ba dishima. Bua mushindu uvua buena Kristo butontolodi butangalake bikole mu bidimu bia 300, mukalenge mukuabu wa bena Lomo wakabuitabuja, kubanga kubukokesha ne kuenza bua buena Kristo bua dishima buye kumpala. Pashishe kuakenzeka matapuluka a bungi, ne matunga a bungi akatukakana ne Lomo ne kuenza bitendelelu biabu nkayabu.

¹⁵ Matunga a bungi a kudiwu akaluishangana munkatshi mua bidimu bia bungi. Mu bidimu bia 1600 ne 1700 bantu ba mu ditunga dia Grande-Bretagne, France ne États-Unis bakatuadija kusaka bantu bua kunangabu ditunga diabu bikole. Ke muakalua dinanga dia ditunga bu tshitendelelu. Mu bidimu bia 1800 ne 1900, dinanga dinekesha dia ditunga diakatuadija kukoka ntema ya bantu ba bungi. Ndekelu wa bionso, bitendelelu bia buena Kristo bua dishima biakatapuluka mu tusumbusumbu tuvule ne tua bungi tua kuditu tudi tuitaba bua benamu bikale ne dinanga dinekesha dia ditunga diabu. Bena mu bitendelelu ebi batu baya kuluisha bena mu bitendelelu biabu ba mu ditunga dikuabu. Lelu bena Kristo ba dishima mbatapuluke ku malongesha ne ku dinanga dia ditunga diabu.

16. Mmalu kayi adi atapulula buena Kristo bua dishima?

¹⁶ Mu bidimu bia 1900, bitendelelu bia bungi bia mu buena Kristo bua dishima biakadisangisha pamue bua kukeba buobumue. Kadi panyima pa diditatshisha munkatshi mua bidimu bivule, bitendelelu bikese mbidisange mu tshimue ne benamu mbatapuluke bua malu bu mudi dilongesha dia ne: bintu mbidienzekele, ditula dia mafu, diselangana dia balume ne balume anyi bakaji ne bakaji ne kupesha bakaji mianzu mu tshitendelelu. Mu imue miaba idi buena Kristo bua dishima, bamfumu ba bitendelelu badi bapepeja amue malongesha avua abatapulula bua kuteta bua kusankisha bantu ba mu tusumbu tushilangane. Kadi kupepeja malongesha aa kudi kushiya bantu ne ditabuja dikese ne kakuena kusangisha bantu ba mu bitendelelu bia mu buena Kristo bua dishima to.

Ntendelelu mulelela udi upita dinanga dinekesha dia ditunga

17. Mmunyi muvua Bible mumanyishe ne: ntendelelu mulelela neasangishe bantu “mu matuku alualua”?

¹⁷ Nansha mudi bantu batapuluke mu mushindu mubi lelu, bena Kristo balelela bobu mbamanyike bua buobumue. Muprofete Mika wakamba muvua Nzambi muambe ne: ‘Nembasangishe popamue bu mikoko mivule mu lupangu.’ (Mika 2:12) Mika wakamanyisha muvua ntendelelu mulelela ne bua kuikala ku mutu kua ntendelelu mikuabu yonso nansha ya nzambi ya dishima nansha ya ditunga. Wakafunda ne: ‘Mu matuku alualua mukuna wa nzubu wa Yehowa neujadikibue bu mukuna wa pa mutu pa mikuna minene, neubandishibue pa mutu pa mikuna mikese; ne ba mu bisamba bionso nebabuelemu. Bualu bua ba mu bisamba bionso batshidi benda muntu ne muntu mu dîna dia nzambi wende; kadi tuetu netuende mu dîna dia Yehowa Nzambi wetu tshiendelele.’​—Mika 4:1, 5.

18. Ntendelelu mulelela mutuambuluishe bua kushintulula malu kayi?

¹⁸ Mika wakaleja kabidi muvua ntendelelu mulelela mua  kusangisha bantu bavua bakinangane kumpala. ‘Ba mu bisamba bia bungi bia bantu nebalue, nebambe ne: Luayi bienu, tubande ku mukuna wa Yehowa, tubuele mu nzubu wa Nzambi wa Yakoba; yeye neatuyishe bienzedi biende, tuetu netuende mu njila yende; bobu nebangate miele yabu ya mvita, nebayifule nkasu ya kudima nayi; nebangate mafuma abu, nebaafule miele ya kulengeja nayi matamba a mionji ya tumuma tua mvinyo. Tshisamba tshikuabu tshia bantu katshiena tshibisha muele wa mvita bua kuluisha nawu tshinga tshisamba; kabena mua kuyila lungenyi lua kuluangana nalu mvita kabidi.’ (Mika 4:2, 3) Bantu bonso badi bumbuka mu ntendelelu ya nzambi idi bantu badienzele anyi ya matunga bua kubuela mu ntendelelu wa Yehowa badi basomba mu buobumue ne bana babu ba pa buloba bujima. Nzambi udi ubalongesha bua kunangangana.

19. Buobumue bua binunu ne binunu bia bantu badi mu ntendelelu mulelela budi buleja tshinyi?

¹⁹ Buobumue bua bena Kristo balelela ba pa buloba bujima ntshintu tshia pa buatshi ne budi buleja ne: Yehowa udi utungunuka ne kulombola Bantemu bende ku diambuluisha dia nyuma wende. Nzambi udi usangisha bantu ba mu bisamba bionso mu mushindu utu kauyi muanji kuenzeka to. Bualu ebu budi bukumbaja mu mushindu wa dikema mêyi adi mu Buakabuluibua 7:9, 14, ne budi buleja ne: Banjelu ba Nzambi bakadi pa kulekelela ‘mpepele’ ikala ne bua kubutula bulongolodi bubi bua Satana. (Bala Buakabuluibua 7:1-4, 9, 10, 14.) Kuikala mu buobumue budi bena Kristo nabu pa buloba bujima ndiakalenga dinene be! Kadi ntshinyi tshidi yonso wa kutudi mua kuenza bua buobumue ebu buikalaku? Tshiena-bualu tshialonda netshiandamune lukonko elu.

Newandamune munyi?

• Mmunyi mudi ntendelelu mulelela usangisha bantu?

• Ntshinyi tshitudi ne bua kuenza bua mukawu kawunyangi buobumue buetu?

• Bua tshinyi dinanga dia ditunga kadiena ditapulula batendeledi balelela?

[Nkonko ya dilonga]

[Tshimfuanyi mu dibeji 13]

Bena Kristo ba kumpala bavua bafumine miaba mishilangane

[Bimfuanyi mu dibeji 15]

Mmunyi mudi kuenza mudimu ku Nzubu wa Bukalenge kuambuluisha bua kuikala mu buobumue?