Ndi ngenza mudimu mu tshikondo tshia didiunda dinene

Muyuki mulonda kudi Harley Harris

Tuvua mu dia 2/9/1950 mu tshimenga tshia Kennet mu Missouri mu ditunga dia États-Unis. Tuvua mu mpuilu wa tshijengu, banyunguluka kudi tshisumbu tshia bantu bavua balue bua kuenza tshimvundu. Mulombodi wa tshimenga wakalua ne basalayi bua kutulama. Basalayi bavua buule tente mu njila bambule bingoma ne tuele. Tuakaya batangile ku mashinyi etu bua kuya mu tshimenga tshia Cape Girardeau mu Missouri bua kutungunuka ne bitupa bivua bishale nansha muvua bantu benda batupenda. Ngakatambula mu mpungilu au ne bidimu 14. Kadi ndi musue kunulondela mungakalua muena mudimu wa Yehowa mu tshikondo tshia bimvundu atshi.

KU NTUADIJILU kua bidimu bia 1930, baledi ba tatu ne bana babu muanda mukulu bavuabu balele bakumvua miyuki ya muanetu Rutherford mikuata pa matadi ne bakatuishibua ne: bavua bapete bulelela. Baledi banyi Bay ne Mildred Harris bakatambula mu mpungilu uvua muenzeke mu tshimenga tshia Washington mu 1935. Bavua ne disanka dia bungi bualu bavua munkatshi mua “tshisumbu tshinene” tshivuabu bamanyishe mu mpungilu au.​—Buak. 7:9, 14.

Ngakaledibua tshidimu tshiakalonda. Tshidimu tshikuabu pashishe, baledi banyi bakaya kusombela mu tshitupa kampanda tshia kule mu Mississippi. Patuvua muaba au, katuvua ne mutangidi wa tshijengu uvua ulua kutukumbula to. Baledi banyi bavua bafundilangana ne Betele ne babuela mu mpuilu, ne bua tshikondo kampanda, ke mushindu uvuabu bapetangana ne bena Kristo bakuabu.

Tudi tutantamena buluishi

Mu mvita mibidi ya buloba bujima, bavua bakengesha Bantemu ba Yehowa bikole bualu kabavua basue kubuelakana mu mvita to. Tukavua baye kusombela mu tshimenga tshia Mountain Home, mu Arkansas. Dimue dituku, meme ne tatu tuvua tuenda tuyisha mu njila. Tatu mukuabu kunyenga tatu bibejibeji bivuaye nabi ne kubiosha diakamue. Wakamba mutuvua bena buôwa bualu katuvua baye mu mvita. Bu mumvua anu ne bidimu bitanu, meme kuasa muadi. Tatu wakashala mutangila muntu au kayi wakula too ne muakaya muntu au.

Kuvua kabidi bantu bimpe bavua batuakuila. Dituku dikuabu pavua tshisumbu tshia bantu bavua bakeba kutuenzela bibi tshinyunguluke mashinyi etu, mulumbuluishi munene wakalua. Kuebejaye ne: “Ntshilumbu kayi?” Muntu mukuabu kuandamunaye ne: “Bantemu ba Yehowa aba kabena baluila ditunga diabu to.” Pakumvua mulumbuluishi au nanku, wakabanda pa tshibandilu tshia mashinyi etu ne kuela  mbila wamba ne: “Mvua muluangane mu mvita ya kumpala ya buloba bujima, ne nenduangane mu eyi kabidi. Lekelayi bantu aba baya tshianana. Kabatu benzela muntu bualu bubi.” Bantu bakatangalaka mu tshimuma. Tuvua tuanyisha bantu bimpe ba mushindu eu bavua batuenzela malu mimpe.​—Bien. 27:3.

Mpungilu idi itukolesha

Mpungilu uvua muenzeke mu tshimenga tshia St. Louis mu Missouri mu 1941 uvua mutuambuluishe bikole. Bilondeshile muvuabu batshinke, bantu bapite pa 115 000 bavua babuelamu ne bantu 3 903 bavua batambule. Ntshidi mvuluka muyuki uvua muanetu Rutherford muenze uvua ne tshiena-bualu tshia ne: “Enfants du Roi” (Bana ba Mukalenge). Wakakula netu tuetu bana buludiludi ne tuetu bonso tuakapeta mukanda mulenga wa tshizubu tshia blé wa Enfants. (Bana). Mpungilu eu wakangambuluisha bua kutantamena malu avua ne bua kuenzeka tshidimu tshivua tshilonda, tshimvua ne bua kubuela mu kalasa. Bakatuipata ne bana ba tatuanyi mukuabu mu kalasa bualu katuvua tunemekela dibendele. Tuvua tupingana mu kalasa dituku dionso bua kumona bikala balombodi ba kalasa bashintulule muoyo wabu. Matuku a bungi mu dinda, tuvua tupitshila mu dîtu bua kuya mu kalasa, kadi bavua anu batualuja. Ngakamona ne: eu ke mushindu utuvua mua kuleja mutuvua balamate Bukalenge bua Nzambi.

Kadi matuku makese pashishe, kabadi kakulu ka mu États-Unis kakamba ne: kabavua ne bua kuenzeja bantu bua kunemekela dibendele to. Ndekelu wa bionso tuakapingana mu kalasa. Mulongeshi wetu uvua ne muoyo muimpe ne wakatuenzeja midimu yonso ituvua bapangile. Balongi betu bavua pabu batuangata ne mushinga.

Ndi mvuluka kabidi mpungilu wa mu 1942 uvua muenzeke mu tshimenga tshia Cleveland mu Ohio muvua muanetu Nathan Knorr muenze muyuki uvua wamba ne: “La paix de demain sera-t-elle de longue durée?” (Ditalala nedinenge anyi)? Dikonkonona dia Buakabuluibua nshapita wa 17 edi diakaleja ne: kuvua ne bua kuikala tshikondo tshia ditalala panyima pa mvita mibidi ya buloba bujima. Nunku didiunda divua ne bua kuenzeka. Bua kudilongolola bua didiunda adi, bakakangula kalasa ka Gilada mu 1943. Tshivua mumanye ne: kalasa aku kavua mua kushintulula nsombelu wanyi mu matuku atshilualua to. Ditalala diakabuela panyima pa mvita ne buluishi buakakepela. Kadi pakatuadija mvita ya mu ditunga dia Corée mu 1950, buluishi buakatuadija kabidi anu bu munkamvua muambe ku ntuadijilu.

Ngakadifila ne muoyo mujima bua didiunda

Ngakajikija tulasa tuanyi tua bikadilu mu 1954 ne panyima pa ngondo umue ngakalua mpanda-njila. Meme mumane kuenza mudimu mu Kennett mu Missouri muvua tshisumbu tshia bantu tshitunyunguluke mu 1950, bakambikila ku Betele mu ngondo muisatu mu 1955. Mu teritware wa tshisumbu tshivuabu bantume muvua kartie kanene ka bangenda ka Times Square kavua munkatshi mua tshimenga tshia New York. Kuvua dishilangana dinene ne nsombelu wa ku musoko! Mvua nkoka ntema ya bena mu tshimenga bavua kabayi ne dîba dia bungi pa kubulula bibejibeji muaba uvua biena-bualu bivua bikoka ntema ne ngamba ne: “Ukadiku mudiele lukonko elu anyi?” Bantu ba bungi bavua bangata bibejibeji.

Ntendelelu wa mu dinda uvua muanetu Knorr ulombola uvua munkatshi mua malu amvua munange bikole ku Betele. Uvua umvuija mvese ya mu Bible mu mushindu muimpe ne uleja mutuvua mua kuyitumikila. Uvua uyukila netu tuetu bansonga bavua kabayi banji kusela anu bu mutu tatu uyukila ne bana bende, utupesha mibelu ya mushindu wa kusomba bimpe ne bana betu ba bakaji. Patuakafika mu 1960, ngakangata dipangadika dia kusela.

Nkavua mufundile Betele bua kulekela mudimu panyima pa matuku 30, kadi kabavua bangandamune to. Nansha mumvua ne bundu bua bungi, pakakumbana matuku 30 ngakapeta muoyo mukole bua kukonka ni bavua bapete mukanda wanyi wa diumbuka ku Betele. Muanetu Robert Wallen ke wakitaba ku telefone ne kulua muaba umvua ngenzela mudimu. Wakangebeja ni mvua ngela meji kayi bua kulua mpanda-njila wa pa buende anyi mutangidi wa tshijengu. Ngakamuambila ne: “Kaah, muanetu Robert, ntshidi anu ne bidimu 24 patupu; tshiena ne tshindi mumanye to.”

 Mu mudimu wa kutangila bisumbu

Dilolo adi ngakasangana amvelope munene mu nzubu wanyi wa bulalu. Muvua dibeji dia bumpanda-njila bua pa buabu ne dikuabu dia mutangidi wa tshijengu. Biakankemesha bikole be! Ngakapeta diakalenga dinene dia kuenzela bana betu mudimu mu tshijengu ku Sud-Ouest kua Missouri ne ku Est kua Kansas. Kadi kumpala kua kumbuka ku Betele, ngakabuela mu tshisangilu tshia batangidi ba bijengu ne ba distrike. Muanetu Knorr wakamba mu mêyi ende a ndekelu ne: “Kuikala batangidi ba bijengu anyi ba distrike kakuena kumvuija ne: nudi bamanye malu a bungi kupita bana betu badi mu bisumbu to. Kudi badi bamanye malu a bungi kunupita. Kadi nsombelu wabu udi ubapangisha bua kuenza mudimu unudi nuenza. Nudi mua kulongela malu a bungi kudibu.”

Uvua muambilamu. Muanetu Fred Molohan ne mukajende pamue ne tutuende Charley ba mu tshimenga tshia Parsons mu Kansas bavua bilejilu bimpe bia dikema. Bavua balonge bulelela ku ntuadijilu kua bidimu bia 1900. Mvua ne disanka dia kumvua malu avuabu bamone meme tshiyi nansha muanji kuledibua! Muanetu mukuabu uvua John Wristen, muanetu mukulakaje wa malu mimpe wa mu tshimenga tshia Joplin mu Missouri uvua mpanda-njila munkatshi mua bidimu bia bungi. Bana betu aba bavua banemeka bikole muvua malu enzeka mu bulongolodi bua Yehowa. Bakandeja muvuabu banganyisha bu mutangidi wabu wa tshijengu nansha muntshivua muana.

Mu 1962, ngakasela Cloris Knoche mpanda-njila wa musangelu uvua ne nsuki mikunze. Ngakatungunuka ne kukumbula bisumbu pamue ne Cloris. Kusomba pamue ne bana betu kuakatuambuluisha bua kubamanya bimpe. Tuvua tuambuluisha bansonga bua kulua bampanda-njila. Tshilejilu bansonga babidi ba mu tshijengu, Jay Kosinski ne JoAnn Kresyman bakitaba mibelu yetu. Kuenza nabu mudimu ne kumona masanka a nsombelu wa kudipangisha amue malu, kuakabasaka bua kudifundila bipatshila bimpe. JoAnn wakalua mpanda-njila wa pa buende ne Jay wakaya ku Betele. Bakalua kuselangana ne bakadi benze bidimu bipite pa 30 mu dikumbula bisumbu.

Mudimu wa bumisionere

Mu 1966, muanetu Knorr wakatuebeja ni tuvua mua kuya kuenzela mudimu mu ditunga dikuabu. Tuakamuandamuna ne: “Tudi bimpe muaba utudi, kadi koku kuikale dijinga mukuabu muabu, tudi mua kuya.” Lumingu lumue pashishe, bakatubikila mu kalasa ka Gilada. Mvua ne disanka dia bungi dia kupingana ku Betele bua kubuela mu kalasa ne kupetangana ne bana betu ba bungi bamvua munange ne nnemeka bikole. Tuakadia kabidi bulunda ne balongi betu batshidi benzela Yehowa mudimu ne lulamatu too ne lelu.

Bakatutuma meme ne Cloris mu ditunga dia Équateur ku Sud kua Amérique, pamue ne Dennis ne Edwina Crist, Ana Rodríguez, ne Delia Sánchez. Muanetu Dennis Crist ne mukajende bakaya mu Quito, tshimenga tshinene tshia mu Équateur. Anu bu tuetu, Ana ne Delia bakaya mu Cuenca, tshimenga tshinene tshisatu tshia mu ditunga. Teritware wetu uvua ne provinse ibidi. Tshisumbu tshia kumpala tshia mu Cuenca tshivua tshidisangishila mu nzubu  muetu. Tuvua tuetu banayi ne bana betu bakuabu babidi. Tuvua tudikonka tshituvua mua kuenza bua kuyisha.

Mu Cuenca muvua bitendelelu bia bungi ne mu matuku avuabu babikila ne: a tshijila, bena mu bitendelelu bavua benza ngendu ya mindololotshi mu tshimenga tshijima. Kadi bena mu Cuenca bavua ne nkonko ya bungi. Tshilejilu, musangu wa kumpala ungakapetangana ne Mario Polo uvua mutuke wa kumpala mu dinyema ne dikalu mu Cuenca, wakangela lunkonko luakankemesha bikole. Wakangebeja ne: “Mukaji wa masandi udibu batele mu Buakabuluibua nnganyi?”

Dituku dikuabu, Mario wakalua kuetu butuku ne bualu buvua bumutatshisha. Mpasata mukuabu uvua mumupeshe mikanda ivua yakula bibi bua Bantemu ba Yehowa. Ngakamuambila ne: muntu udibu babanda udi ne bua kudiakuila. Ke bualu kayi dituku diakalonda, Mario wakambikidisha meme ne mpasata au kuende bua kuakula bua malu avuabu batubanda nawu. Meme kubambila bua tuimanyine pa tshilumbu tshia Busatu Bunsantu. Pakabala mpasata mvese wa Yone 1:1, Mario nkayende wakumvuija mvese eu bimpe. Ke muakenzekabi bua mvese mikuabu yonso. Nunku, mpasata wakaya kayi mukokeshe bua kumvuija Busatu Bunsantu to. Bualu ebu buakajadikila Mario ne mukajende ne: tuvua ne bulelela ne bakatuadija kuyisha malongesha a mu Bible bikole. Tuakapeta disanka dia kumona bisumbu bia mu Cuenca bivula bilua 33 ne bia mu teritware mujima uvuabu batutume kumpala bifika 63. Divua didiunda dia dikema!

Tudi tuya ku Betele ne tumona mudi didiunda dienzeka

Mu 1970 bakambikila meme ne muanetu Al Schullo ku Betele uvua mu tshimenga tshia Guayaquil. Tuetu babidi tuvua tuenza midimu ya ku Betele. Joe Sekerak uvua ulua bua mêba makese bua kuela mikanda mu turton ne kuyitumina bisumbu 46 bia mu ditunga dijima. Bua tshikondo kampanda, Cloris uvua wenza mudimu wa bu misionere pamvua ngenza mudimu ku Betele. Mmuambuluishe bantu 55 bua kutambula ne misangu ya bungi uvua ufikisha bantu basatu anyi batanu ku ditambula mu mpuilu yonso.

Tshilejilu, Cloris uvua mulongeshe mamu mukuabu dîna diende Lucresia uvua bayende uluisha bikole. Kadi Lucresia wakatambula ne kulua mpanda-njila wa pa tshibidilu. Wakalongesha bana bende njila ya Yehowa. Bana bende ba balume babidi mbakulu ne umue udi mpanda-njila wa pa buende; muanende wa bakaji udi pende mpanda-njila. Bakasela muikuluende kudi muanetu wa malu mimpe ne bonso babidi mbampanda-njila ba pa buabu. Bena mu dîku edi mbambuluishe bantu ba bungi bua kumanyabu bulelela.

Patuakafika mu 1980, kuvua bamanyishi 5 000 mu Équateur. Nzubu wetu wa Betele katshivua ukumbana bantu to. Muanetu mukuabu wa balume wakatupesha lupangu lua hektare 32 pabuipi ne Guayaquil. Tuakatuadija kuibaka Betele mupiamupia ne Nzubu wa Mpuilu mu lupangu alu mu 1984 ne tuakabibanjija mu 1987.

Bantu ba bungi badi bambuluisha bua didiunda

Munkatshi mua bidimu bionso ebi, tuvua ne disanka dia kumona bamanyishi ba bungi ne bampanda-njila ba mu matunga makuabu balua mu Équateur bua kuambuluisha muaba uvuabu dijinga dikole ne bamanyishi ba Bukalenge. Tshilejilu tshivua tshindenge bikole ntshia Andy Kidd, mulongeshi wa kale uvua mufumine mu ditunga dia Canada. Wakalua mu Équateur mu 1985 ne bidimu 70 ne wakenza mudimu ne lulamatu too ne pakafuaye mu 2008 ne bidimu 93. Musangu wa kumpala utuakapetangana nende, uvua mukulu nkayende mu ka tshisumbu kakese. Uvua utata ne tshiena Espagne, kadi wakenza muyuki wa patoke ne pashishe kulombola Dilonga dia Tshibumba tshia Nsentedi. Uvua ulombola kabidi Kalasa ka Mudimu wa Nzambi ne wenza midimu ya bungi ya mu Tshisangilu tshia Mudimu. Muaba au pakadi bisumbu bibidi binene bidi ne bamanyishi batue ku 200 ne bakulu ba muaba au ba bungi.

Muanetu mukuabu Ernesto Diaz uvua mufume mu États-Unis ne dîku diende wakamba panyima pa mumane kuenza ngondo muanda mukulu mu Équateur ne: “Bana banyi basatu bakadi bamanye muakulu ne mbalue balongeshi bimpe.  Meme tatuabu ndi mukumbaje tshipatshila tshivua tshimueneka bu tshikole tshikondo etshi tshia kuikala mpanda-njila wa pa tshibidilu, nyisha pamue ne bena mu dîku dianyi. Tuetu bonso tudi tulongesha bantu 25 Bible. Malu onso aa mmambuluishe dîku dietu bua kuikala mu buobumue ne nangananga, mmatusemeje kudi Yehowa mutuvua katuyi mua kuelela meji.” Tudi tuanyisha bena Kristo netu bonso bikole.

Tuakadiundisha Betele mu 1994, kuluaye munene misangu ibidi mupite wa kumpala. Mu 2005 tuakalua bamanyishi bapite pa 50 000 ne bivua bikengela kudiundisha kabidi Betele. Bivua bikengela kudiundisha kabidi Nzubu wa Mpuilu, miaba ya bana betu kusombela ne miaba ya kukudimuina mikanda. Bakabanjija nzubu mipiamipia eyi mu dia 31/10/2009.

Pavuabu bangipate mu kalasa mu 1942, mu États-Unis muvua Bantemu batue ku 60 000. Mpindieu mbapite pa muliyo mujima. Patuakafika mu Équateur mu 1966, muvua bamanyishi ba Bukalenge 1 400. Lelu bakadi bapite pa 68 000 ne tudi batekemene ne: nebapite apu bualu bantu 120 000 badi balonga Bible ne bantu bapite pa 232 000 bavua babuele mu Tshivulukilu tshia lufu lua Kristo mu 2009. Bushuwa, Yehowa mmubeneshe bantu bende mu mushindu utuvua katuyi tuelela meji to. Ndi ne disanka dia bungi dia kuikala ne muoyo mu tshikondo ne muaba udi didiunda dia dikema dienzeke! *

[Mêyi adi kuinshi]

[Bimfuanyi mu dibeji 5]

Tudi tuenzela mpuilu pambelu (1981) ne Nzubu wa Mpuilu wa mu Guayaquil (2009) anu muaba umue au