Ambuluisha bana bebe bua bamanye bulongolodi bua Yehowa bimpe

BANA batu basue kulonga. Elabi meji nkonko ivua bana ba bena Isalele mua kuikala bele mu Ejipitu butuku buvuabu benze Kupita kua Yehowa bua musangu wa kumpala: ‘Bua tshinyi nudi nushipa muana wa mukoko?’ ‘Bua tshinyi tatu udi ulaba mashi ku tshibi?’ ‘Tudi tuya kuepi?’ Tshivua Yehowa muambile baledi bena Isalele tshidi tshileja ne: uvua musue nkonko ya mushindu eu. Wakabambila bua mushindu uvuabu ne bua kuikala benza Kupita kua Yehowa ne: ‘Panukonka bana benu ne: Nudi nuenzela tshilele etshi tshinyi? Nenubambile ne: Tshidi tshintu tshishipa tshia kupita kua Yehowa, yeye wakapita pa mutu pa nzubu ya bena Isalele mu Ejipitu, pakashipaye bena Ejipitu, ne wakasungila nzubu yetu.’ (Ekes. 12:24-27) Pashishe Yehowa wakavuluija baledi bena Isalele bua muvuabi ne mushinga bua kuandamuna nkonko ya bana babu ivua itangila ‘mikenji ne malu’ avuaye mubambile.​—Dut. 6:20-25.

 Bidi bimueneka ne: Yehowa uvua musue bana bapete mandamuna mimpe ku nkonko ivuabu bela bua ntendelelu mulelela. Mandamuna au avua ne bua kubambuluisha bua kunanga Yehowa ne kumuangata bu Nzambi wabu ne Musungidi wabu. Lelu eu, Yehowa mmusue bualu bua muomumue bua bana betu. Baledi badi mua kulongesha bana babu bua kunanga Nzambi ne batendeledi bende ne muoyo umue padibu babambuluisha bua kumanyabu bulongolodi bua Yehowa bimpe ne kumona mudibu bubambuluisha. Nunku tumonayi mudi baledi mua kuambuluisha bana babu bua kumanya bulongolodi bua Nzambi bimpe.

Tshisumbu tshienu

Bana badi ne bua kumanya tshisumbu tshinudi nubuela. Bua kutshimanyabu, nuenu baledi nudi ne bua kuikala nuya nabu mu bisangilu bionso bia bena Kristo. Dîba adi, nudi nulonda tshivua Yehowa muambile bena Isalele bua kuenza. Wakabambila ne: ‘Nusangishe bantu bonso, ne balume ne bakaji ne bana bakese bua buonso buabu bumvue, bayile lungenyi, batshine Yehowa, Nzambi wenu, batumikile mêyi onso a mikenji eyi; nunku bana babu badi kabayi banji kumanya nebumvue, nebamanye mua kutshina Yehowa Nzambi wenu.’​—Dut. 31:12, 13.

Bana badi mua kutuadija kulonga Dîyi dia Yehowa katshia ku buana buabu. Mupostolo Paulo wakambila Timote ne: “Ku buana buebe wewe wakamanya Mukanda wa Nzambi.” (2 Tim. 3:15) Nansha bana bakese badi mua kutuadija kumvua malu adibu balongesha mu bisangilu ku Nzubu wa Bukalenge ne kumanya misambu ya Bukalenge. Badi balonga kabidi mua kukeba mvese ne kunemeka Bible ne mikanda yetu mikuabu. Badi bamona  kabidi dinanga dilelela didi dikale tshimanyinu tshia bayidi balelela ba Kristo. Yezu wakamba ne: ‘Ndi nuelela mukenji mupiamupia ne: Nusuangane; nusuangane bu mungakunusua. Bua bualu ebu bantu bonso nebamanye ne: Nudi bayidi banyi, binuasuangana nunku.’ (Yone 13:34, 35) Dinanga dilelela ne bukubi bidi bimueneka ku Nzubu wa Bukalenge nebikoke bana ne nebibambuluishe bua kupeta tshibidilu tshia kubuela mu bisangilu matuku abu onso a muoyo.

Panudi ne tshibidilu tshia kufika ku Nzubu wa Bukalenge kumpala kua dîba ne kushalaku mutantshi padi bisangilu bijika, bana benu nebapete mushindu wa kudia bulunda ne bantu bakuabu. Pamutu pa kulekela bana badia bulunda anu ne bena mulongo nabu, tudi mua kubamanyisha kudi bana betu ba bidimu bishilangane. Bobu bamanye bantu bakulumpe, nebamone ne: bakulumpe mbamanye malu a bungi ne badi ne meji. Anu bu muvua Zekâya uvua ‘ulongesha’ Uziya mukalenge muena Yuda utshivua muana ‘mua kutshina Nzambi’ mumuambuluishe bikole, ke mudi bantu bakadi benzele Yehowa mudimu ne lulamatu munkatshi mua bidimu bia bungi mua kuambuluisha bansonga lelu. (2 Kul. 26:1, 4, 5, MMM) Panudi ku Nzubu wa Bukalenge, nudi kabidi mua kumvuija bana benu mudimu wa tshitekelu tshia mikanda, tshibasa tshia mamanyisha ne malu makuabu.

Bulongolodi budi pa buloba bujima

Bana badi ne bua kumanya ne: tshisumbu tshienu tshidi munkatshi mua bulongolodi bua Nzambi budi pa buloba bujima budi ne bisumbu bipite pa 100 000. Ubumvuije malu adi enzeka mu bulongolodi ebu, mudibu buenza mudimu ne tshidi bana mua kuenza bua kukuatshisha mudimu udibu buenza. Ubaleje bua tshinyi utu windila mpuilu ya tshijengu, mpungilu ya distrike ne dikumbula dia mutangidi wa tshijengu ne muoyo kulu kulu.​—Tangila kazubu kadi kamba ne: “ Malu a kulonga mu Ntendelelu wa mu dîku” kadi mu dibeji dia 28.

Nuenu ne mushindu, nudi mua kubikila batangidi bena ngendu, bamisionere, bena mu dîku dia Betele ne bampanda-njila bakuabu ku mbelu kuenu bua kudia nabu pamue. Kanuedi meji ne: kabena ne dîba bua bana to. Bana betu aba badi baditatshisha bua kuidikija Yezu uvua misangu yonso wakidila bana ne wakula nabu. (Mâko 10:13-16) Padi bana bateleja batendeledi ba Yehowa aba balonda malu abu ne bamona mudibu ne disanka mu mudimu wa tshijila, badi mua kudifundila pabu tshipatshila tshia kulua bena mudimu wa ku dîba ne ku dîba.

Ntshinyi tshikuabu tshinudi mua kuenza mu dîku dienu bua kuambuluisha bana bua kumanya bulongolodi bua Yehowa bimpe? Ngenyi idi ilonda eyi idi mua kunuambuluisha: Nudi mua kulonga mu dîku mukanda wa Les Témoins de Jéhovah: Prédicateurs du Royaume de Dieu. Akula bikole bua didifila, didipuekesha ne lulamatu ludi batendeledi ba Yehowa baleja. Leja mudi Yehowa muenze nabu mudimu bua kuyisha lumu luimpe pa buloba bujima. Nutangile video idi bulongolodi bua Yehowa bupatule bua balongele ku malu a kale ne a mpindieu adi ne mushinga. Nuenu ne mushindu, nudi mua kuya kutangila Betele ne nzubu idi bena ku Betele basombele ya mu ditunga dienu anyi mu ditunga dikuabu. Bualu ebu nebuleje bana benu mushindu udi tshitupa tshia bulongolodi bua Yehowa tshia pa buloba tshidibu balombola kudi kasumbu ka mupika tshienza mudimu bua kupesha bana betu ba pa buloba bujima biakudia bia mu nyuma ne mibelu anu bu muvuabi mu bidimu lukama bia kumpala.​—Mat. 24:45-47; Bien. 15:22-31.

Longesha muana bilondeshile bukole buende

Panudi nulongesha bana benu, nuvuluke mushindu uvua Yezu ulongesha bapostolo bende. Wakabambila dimue dituku ne: “Ntshidi ne malu makuabo a bungi a kunuambila, kadi nuenu kanuena bamanye mua kuatuala katataka.” (Yone 16:12) Yezu kavua  ubalongesha malu a bungi musangu umue to. Kadi uvua ubalongesha malu avua ne mushinga avuabu mua kumvua bimpe. Bia muomumue, kanulongeshi bana malu a bungi musangu umue to. Nuenu bikale ne tshibidilu tshia kubalongesha malu adi atangila bulongolodi bua Yehowa ku kakese ku kakese, nebanange malu anudi nubalongesha ne nebikale basanka bua kualonga. Padi majinga a bana benu ashintuluka, nudi mua kubambuluila malu akadibu balonge ne kusakidila makuabu.

Tshisumbu tshia bena Kristo mmuaba udi utuambuluisha bua kukolesha malanda etu ne Nzambi, ne bansonga badi badifila ne tshisumi mu malu a tshisumbu mbadiakaje bimpe bua kukandamena mateyi a mu bulongolodi bua Satana. (Lomo 12:2) Tudi batuishibue ne: nenuikale ne disanka dia kuambuluisha bana benu bua kumanya bulongolodi bua Yehowa bimpe. Tudi tujinga bua Yehowa Nzambi utudi tuenzela mudimu ababeneshe bua bashale balamate bulongolodi buende ne bamunange.

[Kazubu/​Tshimfuanyi mu dibeji 28]

 Malu a kulonga mu Ntendelelu wa mu dîku

Nudi mua kukonkonona malu adi atangila bulongolodi bua Yehowa adi alonda aa mu ntendelelu wenu wa mu dîku.

▪ Nuakule bua dîba ne mushindu uvua tshisumbu tshienu tshituadije. Nzubu ya Bukalenge kayi ivuatshi tshidisangishile? Bua dikonkonona edi, nudi mua kubikila muanetu kampanda wa kale wa mu tshisumbu tshienu ku mbelu kuenu bua kuandamuna nkonko ya bana.

▪ Numvuije kipatshila ka tshisangilu tshionso mu tshisumbu, ka mpuilu ne mpungilu ne mudibi mua kuambuluisha bana.

▪ Nuleje bua tshinyi bulongolodi bua Yehowa butu bulongolola tulasa tushilangane. Nuakule bua malu mimpe adi bana betu badi babuele mu tulasa atu benze.

▪ Nuleje bana mudibi ne mushinga bua balue bamanyishi ba lumu luimpe badi kabayi batumpika ngondo. Nubaleje mudibu mua kuambuluisha mu luapolo lua pa buloba bujima lutu lupatuka mu Annuaire des Témoins de Jéhovah.

▪ Nuakule bua mishindu mishilangane idi bansonga badi mu bulongolodi bua Yehowa mua kuenza mudimu wa ku dîba ne ku dîba. Nshapita wa 10 wa mukanda wa Bulongolodi budi buenza disua dia Yehowa udi wakula bua mishindu eyi.

▪ Nuambuluishe bana bua kumvua tshitutu tuenzela amue malu mu tshisumbu. Nubumvuije bua tshinyi kabena ne bua kudienzela malu nansha makese mu bulongolodi bua Yehowa. Nubambile bua balonde mibelu ya bakulu bua malu enzeke mu bulongame mu tshisumbu.

[Tshimfuanyi]

Padi bana benu badia bulunda ne Bantemu bakadi benze bidimu bia bungi nebibambuluishe

[Bimfuanyi mu dibeji 26]

Anu bu mu Isalele wa kale, lelu baledi badi baditatshisha bua kuandamuna nkonko idi itangila bulongolodi bua Yehowa