“Kadi kangambuluisha bua kulenga mioyo ya bantu”

PORTO ALEGRE ntshimenga tshidi lua ku Sud kua ditunga dia Brésil ne mukuabu musangu bavua benzamu tshisangilu tshinene tshia bantu ba mu matunga a bungi bua kuakula pa malu adi atangila nsombelu wa bantu. Bantu binunu ne binunu ba mu matunga 135 bavua balue bua tshisangilu atshi. Mu mêba a dikisha, Bantemu ba mu tshimue tshisumbu tshia mu Porto Alegre bakaya kudi bantu bavua balue mu tshisangilu atshi bua kubambila malu a mu Bible. Mmunyi muvuabu bayukile nabu?

Elizabete udi mpanda-njila udi wamba ne: “Tuakayukila nabu ku diambuluisha dia kakanda ka Une bonne nouvelle pour des gens de toutes nations.” Udi wamba kabidi ne: “Ba bungi ba ku bantu abu kabavua banji kumvua lumu luimpe lua Bukalenge, kadi bakitaba ne disanka malu atuvua tubambila. Tuakakula ne bantu bavua bafumine mu ditunga dia Bolivie, Chine, France, Inde, Israël ne dia Nigeria. Tuvua ne mikanda ya mu miakulu ya bamue ba kudibu ne bakayitaba ne disanka.”

Mu ditunga dia Mexique, mpanda-njila mukuabu diende Raúl utu pende uyisha ne kakanda aka bikole ne wambuluisha bantu ba bungi. Musangu mukuabu wakayukila ne tatu mukuabu muena Arabe wa bidimu 80 uvua ufuma ku difuisha mukajende. Pakabala tatu au dibeji dia mu kakanda aka didi ne mukenji wa Bukalenge mu tshiena Arabe, wakapuekesha binsonji bia disanka. Bua tshinyi? Bualu budi Nzambi mulaye mu Buakabuluibua 21:3, 4 bua ne: neajimije lufu buakamulenga bikole pakabubalaye mu muakulu wende. Dituku dikuabu pavua Raúl uyisha pavua mpunga mumueneke, wakapetangana ne muntu uvua wakula Tshimputulukeshi. Muntu au pende uvua mufuishe muanende. Raúl wakamubadisha dibeji didi ne mukenji wa mu Tshimputulukeshi. Pakaubalaye wakaleja ne: uvua musue kumanya malu a bungi a mu Bible ne kuitabaye bua kulonga Bible.

Raúl utu uyisha bantu badi bakula Anglais, Mfualansa, tshiena Arménie, tshiena Chine, tshiena Allemagne, tshi Hindi, tshiena Corée, tshiena Perse, tshiena Russie, muakulu wa Mixe ne wa Zapotèque ne kakanda ka Une bonne nouvelle pour des gens de toutes nations. Udi wamba ne: “Ndi mumone mushinga wa kakanda aka pandi nyisha. Kadi kangambuluisha bua kulenga mioyo ya bantu nansha meme tshiyi ngakula muakulu wabu.”

Bu mudi bantu benza ngendu ya bungi ne baya kusomba ku babende, tudi mua kupetangana ne bantu badi bakula muakulu mukuabu. Tudi mua kubayisha lumu luimpe lua Bukalenge ku diambuluisha dia kakanda ka Une bonne nouvelle pour des gens de toutes nations. Utuku uya naku mu buambi anyi?

[Bimfuanyi mu dibeji 32]

Raúl ne kakanda kende kadi kamuambuluisha bua kulenga mioyo ya bantu