Ndi ntungunuka ne kuenza mudimu wa bungi mu bulongolodi bua Yehowa

Muyuki mulonda kudi Vernon Zubko

MVUA mukolele ku madimi pabuipi ne musoko wa Stenen mu provense wa Saskatchewan mu ditunga dia Canada. Baledi betu Fred ne Adella bavua baditatshisha bikole bua kutulongesha meme, yaya Aurellia ne bakunyi banyi Alvin, Allegra ne Daryl malu a Nzambi. Bavua benza kabidi mudimu mukole bua kutupetesha bintu bituvua nabi dijinga. Tutshidi anu ne dianyisha dia bungi kudi baledi betu bua muvuabu batulongeshe bulelela.

Tatu uvua muena Kristo muela manyi ne uvua uyisha ne dikima dia bungi. Uvua wenza mudimu mukole bua kutudisha, kadi uvua wenza kabidi muende muonso bua bantu bonso bamanye ne: uvua Ntemu. Uvua misangu yonso wakula anu bua bulelela. Tshisumi ne dikima bivuayi nabi mbingambuluishe bikole. Uvua utamba kungambila ne: “Wewe wenza mudimu wa bungi mu bulongolodi bua Yehowa, newepuke bilumbu bia bungi.”

Tuvua tutamba kuyisha mu njila ya mu Stenen ne mu misoko ivua pabuipi apu. Kabivua anu bipepele buanyi meme to, bualu tshimenga tshionso tshivua ne bena tshikisu bavua balua kutudi tuetu bana bua kutuseka. Dituku dikuabu pamvua ne bidimu muanda mukulu, mvua muimane mu njila ne bibejibeji bia Tshibumba tshia Nsentedi ne Réveillez–vous! pavua tshisumbu tshia bana bakuabu banyunguluke. Bakantula tshifulu tshianyi tshipiatshipia ne kutshikudika ku dikunji divua kumpenga kuanyi. Diakalenga dianyi, kuvua muanetu mukuabu mukulumpe uvua untangila ne kumonaye tshivua tshienzeka. Wakalua kutudi ne kungebeja ne: “Vern ntshilumbu kayi?” Bana abu kunyemabu. Nansha muvua bualu ebu bunyingalaje, buakandongesha ne: padi muntu uyisha mu njila mbimpe kutua eku kutua kuaka pamutu pa kushala muimane muaba umue bu dikunji. Malu angakalonga ku buana buanyi aa akampesha dikima dia kuyisha ku nzubu ne ku nzubu.

Meme ne Alvin tuakatambula mu ngondo muitanu wa 1951. Mvua ne bidimu 13. Ntshidi mvuluka muvua muanetu Jack Nathan uvua muenze muyuki wa ntambu mutubele bua kubenga kutumpika ngondo nansha umue katuyi bakule bua Yehowa. * Tuvua tuangata bumpanda-njila mu dîku dietu bu mudimu muimpe wa kuenza. Ke bualu kayi pangakajikija tulasa tuanyi mu 1958 ngakaya mu tshimenga tshia Winnipeg mu Manitoba bua kuikala mpanda-njila. Nansha muvua Tatu musue bua ne: ngenze nende mudimu wa kukona mabaya uvuaye wenza, yeye ne Mamu bakankankamija bikole bua kulua mpanda-njila ne kungitabilabu bua kuya.

Muaba mupiamupia ne muenzejanganyi nanyi wa mudimu mupiamupia

Mu 1959, Betele wakalomba muntu yonso uvua ne mushindu bua kuya mu Québec  muaba uvuabu dijinga ne bamanyishi ba lumu luimpe. Ngakaya kuenza bumpanda-njila mu tshimenga tshia Montreal. Tshivua dishintuluka dinene buanyi meme bualu mvua ne bua kulonga mua kuakula Mfualansa ne kuibidilangana ne bilele bishilangane. Mutangidi wetu wa tshijengu wakangambila ne: “Kuambi ne: ‘ke mutuvua tuenza kuetu to.’” Uvua mubelu muimpe be!​—1 Kol. 9:22, 23.

Tshivua ne muntu wa kungenzeja mudimu pangakaya kuenza bumpanda-njila mu Québec to. Kadi mu ngondo muibidi 1961 pangakasela Shirley Turcotte muanetu wa bakaji umvua mumanye mu Winnipeg wakalua muenzejanganyi nanyi wa mudimu wa kashidi. Yeye pende uvua mufume mu dîku dia bantu bavua banange Yehowa. Tshikondo atshi tshivua mujingulule ne: uvua mua kuikala unkolesha ne unkankamija mu kupita kua bidimu.

Tudi tuyisha mu Gaspé mujima

Bidimu bibidi tuetu bamane kuselangana, bakatutuma mu tshimenga tshia Rimouski mu Québec bua kuikala bampanda-njila ba pa buabu. Tshidimu tshiakalonda, Betele wakatulomba bua kunyunguluka ne kuyisha mu tshidila tshijima tshia Gaspé tshidi ku Est kua Canada. Mudimu wetu uvua wa kukuna ntete ya bungi ya bulelela. (Muam. 11:6) Tuakuuja mashinyi etu ne bibejibeji bipite pa 1 000 ne mikanda mitue ku 400 ne biakudia ne bilamba ne tuakatuadija kunyunguluka mu ngondo mujima tuenda tuyisha. Tuakayisha bikole mu misoko mikese yonso ya mu Gaspé. Bena ku tudiomba tua muaba au bakadimuija bantu ne: Bantemu bavua balua ne kubambilabu bua kabangatshi mikanda yetu. Kadi bantu ba bungi kabakumvua bimpe tshivuabu bamanyishe ne kuelabu meji ne: bavua babambila bua kuangata mikanda yetu, ke bobu kuyangata.

Mu matuku au, budikadidi bua kuyisha buvua bualu bupiabupia mu bimue bitupa bia mu provense wa Québec ne bavua batukuata misangu ya bungi kudi bampuluishi. Bakatukuata dikuabu dituku patuvua tufila mikanda ku nzubu ne ku nzubu. Mpulushi mukuabu wakatulomba bua kuya nende ku biro biabu ne tuakitaba. Ngakalua kumona ne: nzuji wa muaba au uvua muele mukenji bua batuimanyike bua katuyishi to. Bu muvua mfumu wa bampulushi kayiku dituku adi, ngakaleja nzuji mukanda uvua mufume ku Betele wa mu Toronto uvua uleja ne: tuvua ne budikadi bua kuyisha. Nzuji au mumane kubala mukanda, wakamba diakamue ne: “Tangila, tshiena musue bilumbu to. Mukalenge Abbé ke uvua mungambile bua nnuimanyike.” Bu mutuvua basue bua bantu ba muaba au bajingulule ne: mudimu wetu mbawanyishe kudi mbulamatadi, tuakapingana diakamue muaba uvuabu batuimanyikile kudi bampulushi ne tuetu kutungunuka ne mudimu wetu.

Dituku diakalonda patuakapingana bua kumonangana ne mfumu wa bampulushi wakanyingalala pakumvuaye ne: bavua batukuate. Wakabikila nzuji au ku telefone ne kumutandisha bikole. Wakatuambila ne: nuenu bapete bualu kayi buonso, numbikile ne nenjikije bualu abu. Nansha mutuvua benyi ne katuyi bamanye Mfualansa bimpe, tuakamona ne: bantu bavua ne musangelu ne bakatuakidila bimpe. Kadi tuvua tudikonka ne: ‘Nebitabe bulelela anyi?’ Tuakapeta diandamuna kunyima kua bidimu bia bungi patuakapingana mu Gaspé bua kuibaka Nzubu ya Bukalenge. Tuakamona ne: bantu ba bungi batuvua bayishe bakavua balue Bantemu. Bushuwa, Yehowa ke utu udiundisha mudimu eu.​—1 Kol. 3:6, 7.

Tudi tupeta bumpianyi

Lisa muanetu wa bakaji wakaledibua mu 1970. Bumpianyi ebu buvua bufume kudi Yehowa buakatusankisha bikole. Meme, Shirley ne Lisa tuakenza mudimu wa dibaka Nzubu ya Bukalenge ya bungi. Pakajikija Lisa tulasa tuende, wakatuambila ne: “Mamu ne Tatu, bu mumvua munulekeshe mudimu wa ku dîba ne ku dîba, nengenze muanyi muonso bua kulua mpanda-njila.” Lisa ukadi muenze mudimu eu wa bumpanda-njila bidimu bipite pa 20 ne mpindieu udi uwenza ne bayende Sylvain. Mbapete diakalenga dia kuibaka Nzubu ya Bukalenge mu matunga a bungi. Tshipatshila tshietu ntshia kuikala ne bintu bikese ne kuitaba  mudimu wonso udibu mua kutupesha mu bulongolodi bua Yehowa. Ntshidi muvuluke mêyi akamba Lisa pakatuadijaye bumpanda-njila. Bulelela, wakansaka bua kupingana mu mudimu wa ku dîba ne ku dîba mu 2001 ne ndi mpanda-njila too ne lelu. Bumpanda-njila mbutungunuke ne kundongesha mua kueyemena Yehowa mu bualu buonso bundi ngenza ne kuikala ne nsombelu mupepele wa disanka ne wa musangelu.

Midimu ya dibaka idi ilomba dinanga, didifila ne lulamatu

Yehowa mmundongeshe ne: Tuetu tudifila ne tuitaba mudimu wonso udiye utupesha, netupete masanka a bungi. Kuenza mudimu mu Komite wa luibaku ne kuibaka pamue ne bana betu mu Québec mujima ne miaba mikuabu ndiakalenga dinene.

Nansha mutu bamue bana betu batu benza midimu ya dibaka kabayi bela miyuki ya dikema ku tshiakuidi, padiku bualu bua kuibaka Nzubu wa Bukalenge batu benza mudimu wa dikema. Bana betu aba batu badifila ne muoyo wabu mujima ku mudimu ne baleja mamanya abu. Ke bualu kayi tutu tuibaka misangu yonso nzubu mimpe ya kutendelela Yehowa.

Batu bankonka ne: “Nngikadilu kayi idi ne mushinga wa bungi bua bantu batu bibaka Nzubu ya Bukalenge?” Bilondeshile malu ankadi mumone, muntu udi ne bua kuanji kunanga Yehowa ne Muanende ne bana betu. (1 Kol. 16:14) Bualu buibidi, kudifila ne kuikala ne lulamatu bidi ne mushinga. Padi malu kaayi enda mutudi basue, ne nebienzeke nanku, muntu udi ne lulamatu neatungunuke ne kulonda buludiki bua bulongolodi bua Nzambi. Didifila nedimusake bua kuitaba midimu mikuabu.

Ndi ne dianyisha kudi Yehowa

Nansha muvua Tatu mufue mu 1985, ntshidi muvuluke mibelu yende bua kutungunuka ne kuenza mudimu wa bungi mu bulongolodi bua Yehowa. Kakuyi mpata anu bu bena Kristo bela manyi bakuabu bakadi bapete mudimu wabu mu tshitupa tshia bulongolodi bua Yehowa tshia mu diulu, udi ne bia bungi bia kuenza mpindieu. (Buak. 14:13) Mamu udi mpindieu ne bidimu 97. Nansha mudiye kayi ne mushindu wa kuakula bu muvuaye wakula bua disama didiye nadi, utshidi mumanye malu a mu Bible. Utu utela mvese mu mikanda ituye utufundila ne utu utukankamija bua kutungunuka ne kuenzela Yehowa mudimu ne lulamatu. Tuetu bonso bana tudi ne dianyisha bua baledi betu bavua batunange!

Ndi ne dianyisha kabidi kudi Yehowa bua Shirley mukajanyi udi muenzejanganyi nanyi wa mudimu wa lulamatu. Mmushale mulame mubelu uvua mamuende mumupeshe eu ne: “Vern neikale ne mudimu wa bungi mu bulongolodi, ne mbimpe witabe bua ikale ukushiya bua mudimu eu.” Patuvua baselangane kukadi bidimu 49, tuvua badisuike bua kukulakaja pamue, kuenzela Yehowa mudimu pamue ne tuetu bashale bonso babidi ne muoyo ku ndekelu kua bulongolodi ebu, kupingana bansonga pamue ne kutungunuka ne kumuenzela mudimu bua kashidi ne tshiendelele. Bushuwa, tudi bapete ‘bia bungi bia kuenza mu mudimu wa Mukalenge.’ (1 Kol. 15:58, NW) Yehowa ku luende luseke mmutulame ne mmuenze bua katupangidi tshintu tshimpe nansha tshimue.

[Mêyi adi kuinshi]

[Tshimfuanyi mu dibeji 31]

“Tshipatshila tshietu ntshia kuikala ne bintu bikese ne kuitaba mudimu wonso udibu mua kutupesha mu bulongolodi bua Yehowa”