‘Bienzedi biende mbiye nende’

MUANETU THEODORE JARACZ, muena mu Kasumbu Kaludiki ka Bantemu ba Yehowa mmujikije lubilu luende lua pa buloba mu Disatu dia 9/6/2010 mu dinda. Uvua ne bidimu 84 ne mmushiye mukajende Melita uvuabu basombe nende mu dibaka bidimu 53. Mmushiye kabidi yayende ne bana basatu ba bana babu.

Muanetu Jaracz uvua muledibue mu dia 28/9/1925, mu Pike County mu Kentucky mu ditunga dia États-Unis. Wakatambula mu dia 10/8/1941 pavuaye ne bidimu 15. Kunyima kua bidimu bibidi pakavuaye ne bidimu 17, wakalua mpanda-njila wa pa tshibidilu ne mmuenze mudimu wa ku dîba ne ku dîba bidimu bitue ku 67.

Mu 1946 pavua muanetu Jaracz ne bidimu 20, wakabuela mu kalasa ka muanda mutekete ka Gilada. Pakajika kalasa, bakamutuma mu Cleveland mu Ohio tshitupa tshia mu États-Unis bua ikale mutangidi muena ngendu. Mu 1951, bakamutuma mu ditunga dia Australie bu mutangidi wa midimu ya ku Betele. Mbaleje mu Annuaire wa 1983 ne: muanetu Jaracz “wakakankamija bana betu ba mu ditunga edi ku tshisumi tshiende bua kulonda malu adi bulongolodi bua Nzambi buamba ne uvua tshilejilu tshimpe mu mudimu wa buambi.”

Pakapinganaye mu États-Unis, wakasela Melita Lasko mu dia 10/12/1956. Bakatuadija nsombelu wabu wa mu dibaka ne mudimu wa dikumbula bisumbu ne bakenza mudimu eu ne tshisumi tshionso mu bijengu ne mu distrike mu tshitupa tshinene tshia mu États-Unis. Mu 1974, bakabikila muanetu Jaracz bua kuluaye muena mu Kasumbu Kaludiki ka Bantemu ba Yehowa.

Bantu ba bungi nebatungunuke ne kuvuluka muanetu Jaracz bua muvuaye mudifile mu mudimu wa Yehowa ne lulamatu luonso ne muoyo mujima. Uvua munange mukajende ne umutabalela. Uvua kabidi muntu mushindame mu dîyi dia Nzambi uvua uteka malu a bakuabu kumpala kua ende. (1 Kol. 13:4, 5) Bualu ebu buvua bumueneka ku mushindu uvuaye uditatshisha bua benzele bantu bonso malu mimpe ne babumvuile. Uvua uleja kabidi mudiye munange bantu ne ubatabalela ku mushindu uvuaye uyisha ne tshisumi.

Nansha mutudi tumvua bibi bua lufu lua muanetu Jaracz muenji wa mudimu wa tshisumi uvuabu banange kudi bena mu dîku dia Betele ne kudi bana betu ba pa buloba bujima, tudi ne disanka bua mudiye muenzele Yehowa mudimu ne lulamatu munkatshi mua bidimu bia bungi. Tudi batuishibue ne: mmushale ne ‘lulamatu too ne ku lufu ne mmupete tshifulu tshia butumbi tshia muoyo.’ (Buak. 2:10) Tudi kabidi batuishibue ne: ‘Bienzedi biende mbiye nende.’​—Buak. 14:13.