Bidimu kabiena mua kupangisha muntu bua kuenzela Nzambi mudimu

Mu tshimenga tshia Málaga tshidi ku Sud kua ditunga dia Espagne, mamu mukuabu ne muanende wa bakaji bonso bikale ne dîna dia Ana bakatambula mu dia 19/12/2009. Bavua munkatshi mua bantu 2 352 bavua batambule mu Espagne tshidimu atshi. Kadi bidimu biabu ke bivua bikemesha. Mamu uvua ne bidimu 107 ne muanende bidimu 83.

Ntshinyi tshivua tshibasake bua kudilambula kudi Yehowa ne kutambula? Ku ntuadijilu kua bidimu bia 1970, muena mutumba mukuabu uvua Ntemu wa Yehowa uvua ne tshibidilu tshia kubikila Ana wa muana bua kubuela mu Dilonga dia mukanda dia Tshisumbu divua dienzekela kuende. Ana uvua ubuelamu imue misangu. Kadi kakaya kumpala bua mudimu wende wa bianza.

Bidimu bitue ku dikumi pashishe, bana ba Ana bakatuadija kulonga Bible ne kuluabu bantendeledi ba Yehowa. Mari Carmen, umue wa kudibu wakambuluisha mamuende bua kunanga kabidi malu a Nzambi ne kuitaba bua kulonga Bible. Pashishe, Ana wa mukole, kakuende wa Mari Carmen wakatuadija pende kunanga malu a Nzambi. Ndekelu wa bionso, bantu dikumi ba mu dîku edi bakatambula.

Dituku diakatambula ba Ana bonso babidi aba bavua ne disanka dia bungi. Ana wa bidimu 107 wakamba ne: “Yehowa mmungenzele bualu buimpe bikole padiye mungambuluishe bua kumumanya.” Muanende wakamba pende ne: “Kumpala kua Mparadizu kulua, ndi musue kuenzela Yehowa mudimu, kuenza disua diende ne kuyisha lumu luimpe ne bukole buanyi buonso.”

Kubuela mu bisangilu kudi kabidi kuvudija disanka dia bakaji babidi ba mu lufuila aba. Mukulu mukuabu wa mu tshisumbu tshiabu udi wamba ne: “Kabatu bapumbisha mu bisangilu to. Batu misangu yonso bandamuna mu Dilonga dia Tshibumba tshia Nsentedi.”

Tshilejilu tshiabu tshimpe tshidi tshituvuluija tshia Ana mukaji mukuabu wa mu lufuila uvua ‘kayi umuka mu ntempelo, utendelela Nzambi butuku ne munya, ujila biakudia ne umulomba.’ Bualu ebu buakamufikisha ku dipeta diakalenga dia kumona Yezu patshivuaye muana. (Luka 2:36-38) Nansha muvua Ana eu ne bidimu 84, bidimu biende kabivua bimupangisha bua kuenzela Yehowa mudimu anu bu bashakena bende lelu.

Udiku ne balela badi basue kuteleja lumu luimpe anyi? Peshi udiku mupetangane ne muntu mukulakaje udi muitabe bua kukuteleja paudi uyisha ku nzubu kuende? Bantu ba mushindu eu badi mua kuikala bu ba Ana batudi batele kuulu eku, bualu bidimu kabiena mua kupangisha muntu bua kuenzela Yehowa Nzambi mulelela mudimu to.

[Lungenyi lunene lua mu dibeji 25]

“Yehowa mmungenzele bualu buimpe bikole”

[Lungenyi lunene lua mu dibeji 25]

“Kumpala kua Mparadizu kulua, ndi musue kuenzela Yehowa mudimu”