Ndi mumone bukole budi nabu bulelela bua mu Bible

Muyuki mulonda kudi Vito Fraese

IMUE misangu kutu muanji kumvua bakula bua Trentinara. Nkatshimenga kakese kadi ku Sud kua Naples mu ditunga dia Italie. Ke muvuabu balelele baledi banyi ne tutuanyi Angelo. Baledi banyi bamane kulela tutu Angelo, bakaya mu ditunga dia États-Unis ne kusombela mu tshimenga tshia Rochester mu New York ne ke muakandelabu mu 1926. Tatu wakapetangana ne Bantemu ba Yehowa bua musangu wa kumpala mu 1922. Mutantshi mukese pashishe yeye ne mamu bakalua Bantemu ba Yehowa.

Tatu kavua wakula bikole to, kadi malu mabi avua enzeka avua amufikisha munda. Kavua witaba mushindu uvua bamfumu ba bitendelelu bashima bantu, ke bualu kayi kavua upitshisha mpunga wa kuambila bantu bulelela bua mu Bible. Pakapetaye pansio, wakalua mpanda-njila ne kutungunuka ne mudimu eu too ne pavua masama ne bikondo bia mashika makole bimuenzeje bua kuulekela ne bidimu 74. Nansha nanku, wakatungunuka ne kuyisha mêba 40 anyi 60 ku ngondo yonso too ne pakakumbajaye bidimu bipite pa 90. Tshilejilu tshia Tatu tshiakangambuluisha bikole. Nansha muvuaye weleshangana bilele, uvua wangata malu ne mushinga wa bungi. Uvua utamba kuamba ne: “Tudi ne bua kuangata bulelela ne mushinga wa bungi.”

Tuvua bana batanu kuetu ne tatu ne mamu bavua badienzeja bua kutulongesha Dîyi dia Nzambi. Ngakatambula mu dia 23/8/1943 ne mu ngondo muisambombo wa 1944 meme kulua mpanda-njila. Yayanyi Carmela ne Fern muenzejanganyi nende wa mudimu bavua bampanda-njila mu tshimenga tshia Geneva mu New York. Matuku makese pashishe ngakalua kumona ne: Fern ke nsongakaji umvua musue kupitshisha nende matuku anyi onso a muoyo. Nanku tuakaselangana mu ngondo wa 8 mu 1946.

Mudimu wa bumisionere

Bakanji kututuma bua kuikala bampanda-njila ba pa buabu mu tshimenga tshia Geneva ne tshia Norwich mu New York. Mu ngondo wa 8 mu 1948 tuakapeta diakalenga dia kubuela mu kalasa ka 12 ka Gilada. Pashishe bakatutuma mu Naples mu Italie ne Carl Ridgeway ne mukajende Joanne. Tshikondo atshi, Naples uvua munyangakaja kudi mvita. Bivua bikole bua kupeta nzubu, ke bualu kayi munkatshi mua ngondo ndambu, tuetu bonso tuakasomba mu kazubu kakese ka bibambalu bibidi.

Bu muvua baledi banyi bakula tshiena Italie tshia mu Naples, nunku bantu bavua bumvua tshiena Italie tshimvua ngakula nansha mumvua nshindumuna imue miaku bu mu Anglais. Fern wakapeta lutatu bua kumanya muakulu. Kadi matuku makese pashishe, wakaumanya kumpita ne meme.

Kumpala, anu bantu banayi ba mu dîku dimue ke bakitaba bua tuetu kubalongesha Bible. Bavua bapana makanya avua mbulamatadi mukandike. Dituku dionso, Teresa umue wa mu dîku edi uvua ushintuluka mu mushindu wa dikema. Mu dinda, uvua umueka munene bualu uvua uuja makanya mu mpaya ya bungi ya  nkanzu wende. Dilolo uvua umueneka mukese anu bu kampongoloji. Bulelela buakashintulula bena mu dîku edi bikole. Bena mu dîku edi 16 bakalua kuitaba bulelela ne kuluabu Bantemu. Mpindieu mu tshimenga tshia Naples mudi Bantemu batue ku 3 700.

Badi baluisha mudimu wetu

Tuetu bamane kuenza ngondo tshitema mu Naples, bamfumu ba tshimenga atshi bakatuenzeja bunayi buetu bua kumbukamu. Tuakaya mu ditunga dia Suisse bua ngondo umue ne tuetu kupingana mu Italie ne mikanda ya benyi batu balua kutangila musoko. Bakatutuma meme ne Fern mu tshimenga tshia Turin. Ku ntuadijilu mamu mukuabu wakatupesha nzubu wa kulala wa kufutshila ne tuvua towela mâyi mu tshiowedi tshiende ne tulambila mu tshikuku tshiende. Pakalua ba Ridgeway mu Turin, tuakaya kufutshila nzubu munene ndambu pamue nabu. Ndekelu wa bionso, mêku atanu a bamisionere akalua kusombela mu nzubu umue.

Pakatuipata bamfumu mu Turin mu 1955, kukavua tshishimikidi bua kuenza bisumbu bipiabipia binayi. Kuvua bana betu ba mu tshimenga atshi bavua bakumbane bua kutangila bisumbu abi. Bamfumu bakatuambila ne: “Tudi bashindike ne: nuenu bena mu Amérique nuenu baye, bionso binudi benze nebiye mu mâyi.” Kadi didiunda diakalua kuenzeka diakaleja ne: Nzambi ke uvua ukuatshisha mudimu au. Lelu mu Turin mudi Bantemu bapite pa 4 600 ne bisumbu 56.

Florence, tshimenga tshia dikema

Bakatutuma pashishe mu tshimenga tshia Florence. Tukavua bumvue bakula bua tshimenga etshi, bualu yaya Carmela ne bayende Merlin Hartzler bavua bamisionere mu tshimenga etshi. Miaba bu mudi Piazza della Signoria, Ponte Vecchio, Piazzale Michelangelo, Palazzo Pitti ivua yenza bua tshimenga etshi tshikale tshia dikema. Bivua bienza disanka bua kumona muvua bantu ba mu Florence bitaba lumu luimpe.

Tuakalonga ne dîku dikuabu ne baledi bakatambula. Kadi tatu wa dîku edi uvua unua makanya. Mu 1973 bakamba mu Tshibumba tshia Nsentedi ne: kunua makanya nkubi ne kulombabu babadi bua balekele kuanua. Bana ba bakulumpe bakalomba tatuabu bua kulekela makanya. Wakabambila ne: nealekele, kadi kakalekela to. Dituku dikuabu butuku, mukajende wakatuma bana bende ba mapasa ba bidimu 9 bua kuya kulala kayi muanji kubenzela disambila. Pashishe wakumvua bibi ne kuya muaba uvuabu balala. Bana bakavua basambile nkayabu. Wakabakonka ne: “Ntshinyi tshinudi balombe mu disambila?” Bana bakamuandamuna ne: “Tudi balomba Yehowa bua ambuluishe Papa bua alekele  makanya.” Mamu wakabikila bayende ne kumuambila ne: “Luaku umvue disambila dia bana bebe.” Pakumvua tatu disambila dia bana, wakatuadija kudila ne kuamba ne: “Tshiakunua kabidi makanya to.” Wakakumbaja dîyi diende ne lelu eu bantu 15 ba mu dîku edi badi Bantemu.

Tudi tuenza mudimu mu Afrique

Mu 1959 bakatutuma mu tshimenga tshia Mogadiscio mu ditunga dia Somalie ne bamisionere bakuabu babidi Arturo Leveris ne tutu Angelo. Patuakafikamu nsombelu uvua mubi bua malu a tshididi. Mbulamatadi wa Italie uvua ne bua kulombola ditunga dia Somalie ku dipanda bilondeshile mikenji ya matunga masanga, kadi bivua bimueneka ne: nsombelu uvua wenda anu unyanguka. Bamue bena Italie batuvua tulonga nabu Bible bakumbuka mu ditunga ne kakuvua mushindu wa kuenza tshisumbu muaba au to.

Mu tshikondo atshi, mutangidi wa zone wakandomba bua ngikala mmuambuluisha. Tuakatuadija kuya kutangila bana betu ba mu matunga avua bapupi ne dia Somalie. Bantu bakuabu batuvua balongeshe Bible bakaya kumpala kadi bakumbuka mu ditunga diabu bua buluishi. Bakuabu pabu bakashala nansha muvuabu babakengeshe bikole. * Patudi tuvuluka mushindu uvuabu banange Yehowa ne muvuabu batantamene ntatu bua kushala bamulamate, tudi tupuekesha binsonji.

Mu ditunga dia Somalie ne dia Érythrée mutu luya lukole. Biakudia biabu bikuabu bivua pabi bitutudisha luya mukana bualu bavua belamu ndungu wa bungi. Musangu wa kumpala utuakadia biakudia kua mulongi mukuabu wa Bible, mukajanyi wakamba wela bilele ne: bua bungi bua ndungu uvua mu biakudia matshi ende avua makunze tshididi.

Tuakashala nkayetu pakatumabu tutu Angelo ne Arturo muaba mukuabu. Kabivua bipepele to, bualu kakuvua muntu wa kutukankamija. Nansha nanku, nsombelu eu wakatuambuluisha bua kusemena pabuipi ne Yehowa ne kumueyemena mu malu onso. Ngendu ituvua tuenza bua kuya kutangila bana betu ba mu matunga avua mudimu wetu mukandika, ivua itukolesha bikole.

Mu Somalie muvua ntatu ya bungi. Katuvua ne frigo to, nanku tuvua tusumba biakudia bia kudia anu dituku dimue bu mudi bitupa bia mushipa wa requin, anyi bimuma bu mudi mangaya, bipapayi, pamplemousse, coco anyi bibote. Bishi bivua bitutatshisha kabidi bikole. Imue misangu bivua bitulandala ku nshingu patuvua tulongesha bantu Bible. Kadi tuvua ne ntukutuku ne katuvua tuenda lua makasa mu munya mukole to.

 Tudi tupingana mu Italie

Balunda betu bakuabu bakatuambuluisha bua kupeta muaba mu mazuwa atu ambula bibote bua kupingana mu Italie ne kubuela mu mpungilu wa bantu ba mu matunga a bungi uvua muenzeke mu Turin mu 1961. Tuakumvua lumu ne: nebatutume muaba mukuabu wa kuenzela mudimu. Mu ngondo wa 9 mu 1962, tuakapingana mu Italie ne ngakalua mutangidi wa tshijengu. Tuakasumba kamashinyi kakese katuvua benze naku mudimu bidimu bitanu bua kutangila bijengu bibidi.

Tuetu bamane kuenza mudimu mu Afrique muaba uvua luya lukole, tuvua mpindieu muaba wa mashika makole. Mu tshikondo tshia mashika patuakaya kutangila tshisumbu tshikuabu tshivua kuinshi kua mikuna ya Alpes, tuakalala kuulu ku tshisasa mu nzubu muvua mashika makole. Bua bukole bua mashika, tuakalala ne nkotshi yetu ya mashika. Butuku abu, nzolo inayi ne tubua tubidi biakafua bua mashika mu musoko au.

Pashishe, ngakalua mutangidi wa distrike. Mu bidimu abi, distrike divua diangata ditunga dijima dia Italie. Tuvua tuya mu bimue bitupa bu mudi Calabre ne mu Sicile misangu ya bungi. Tuvua tukankamija bansonga bua kuyabu kumpala mu dîyi dia Nzambi ne kujinga kulua bakulu, batangidi bena ngendu anyi bena ku Betele.

Tudi balonge malu a bungi kudi balunda betu badi benzele Yehowa mudimu ne muoyo mujima. Tudi tuanyisha ngikadilu yabu mimpe bu mudi lulamatu lukole kudi Yehowa, dipeshangana bintu, dinanga dia bana betu ne lungenyi lua kuitaba nsombelu yonso ne kudipangisha amue malu. Tudi babuele mu miyuki ya mabaka ku Nzubu ya Bukalenge. Miyuki eyi ivua mienza kudi Bantemu badi mbulamatadi muanyishile, bualu buvua kabuyi mua kuenzeka mu ditunga ku kale. Bena mu bisumbu kabatshiena badisangishila mu bikuku bia bana betu anyi basomba pa mabaya bu muvuabu benza kale mu Turin to. Kadi bisumbu bia bungi bidi ne Nzubu ya Bukalenge mimpe idi itumbisha Yehowa. Katutshiena tuenzela mpuilu mu miaba ya manaya ivua kayiyi mimpe, kadi tudi mpindieu ne Nzubu ya mpuilu minene. Tudi kabidi bapete disanka dia kumona bungi bua bamanyishi bupita pa 243 000. Patuvua bafike mu Italie bavua anu 490.

Tuvua bangate mapangadika mimpe

Tudi bapete ndambu ya ntatu bu mudi masama ne dijinga dia kupingana kuetu. Tshilejilu, misangu yonso ivua Fern umona mbuu uvua umvua kuetu kumusamina muoyo. Bakamupanda kabidi misangu isatu bua masama manene. Dituku dikuabu pavuaye uya bua kulonga ne muntu Bible, muntu kampanda uvua kayi musue mudimu wetu wakamuasa nkanya. Wakabuela kabidi mu lupitadi bua bualu abu.

 Nansha mutuvua imue misangu tuteketa mu mikolo, tuvua ‘tutekemena anu kudi Yehowa’ bu mudibu bambe mu Muadi wa Yelemiya 3:24. Nzambi udi utukolesha. Musangu mukuabu utuvua batekete ku muoyo bikole, Fern wakapeta mukanda mulenga wa kudi muanetu Nathan Knorr. Wakafunda ne: bu muvuabu bamulele pabuipi ne tshimenga tshia Bethlehem mu Pennsylvanie muaba uvua Fern mutuadijile bumpanda-njila, uvua mumanye bimpe ne: bantu bakaji ba muaba au bu yeye batu ne bukole ne kabatu balukila tshianyima bipepele to. Uvua muambilamu. Munkatshi mua bidimu, bantu ba bungi bavua batukolesha ku muoyo mu mishindu mivule.

Nansha mutudi bapete ntatu ya bungi, tudi badienzeje bua kuikala anu ne tshisumi mu mudimu wa Nzambi. Fern uvua ufuanyikija tshisumi tshia mudimu wa Nzambi ne maluvu kampanda makole mimpe a mu Italie (Lambrusco), wamba mu bilele ne: “Tshisumi tshietu tshidi ne bua kusaba anu bu maluvu aa.” Tuetu bamane kuenza bidimu bipite pa 40 mu bijengu ne mu distrike, tuakapeta diakalenga dia kukumbula ne kuenza tusumbu ne bisumbu bia miakulu mikuabu pa kumbusha tshiena Italie. Bena mu bisumbu ebi badi bayisha bantu badi bafumina mu Bangladesh, Chine, Érythrée, Éthiopie, Ghana, Inde, Nigeria, Philippines, Sri Lanka ne matunga makuabu. Katuena ne mushindu wa kunulondela malu onso atudi bamone adi aleja mudi Dîyi dia Nzambi dikale ne bukole bua kushintulula nsombelu wa bantu badi bumvue mudi Yehowa ne luse.​—Mika 7:18, 19.

Tudi tusambila dituku dionso edi bua Yehowa atungunuke ne kutupesha bukole bua kutungunuka ne mudimu wetu. Disanka dia Mukalenge ke didi ditukolesha. Didi dikenkesha mêsu etu ne ditushindikila ne: tudi benze bualu buimpe bua kumanyisha bantu bulelela bua mu Bible.​—Ef. 3:7; Kolos. 1:29.

[Mêyi adi kuinshi]

[Tablo/​Bimfuanyi mu dibeji 27]

(Bua kumona malu bimpe, tangila mukanda)

Baledi banyi mu Rochester mu New York

1948

Mu South Lansing bua kalasa ka 12 ka Gilada

1949

Meme ne Fern kumpala kua kuya mu Italie

Capri mu Italie

1952

Tuetu ne bamisionere bakuabu mu Turin ne mu Naples

1963

Fern ne bamue ba ku balongi bende ba Bible

“Tshisumi tshietu tshidi ne bua kusaba anu bu maluvu”