Udi muvuluke anyi?

Dibala dia bibejibeji bia Tshibumba tshia Nsentedi bishale ebi divua dikusankishe anyi? Nanku anji tangila ni udi mua kuandamuna nkonko idi ilonda eyi:

• Nzambi wakatuma muanjelu kayi kumpala kua bena Isalele pakabapatulaye mu Ejipitu? (Ekes. 23:20, 21)

Bidi bia meji bua kuamba ne: muanjelu uvua ‘ne dîna dia Yehowa munda muende’ uvua Muanende muanabute, wakalua pa buloba bu Yezu.​—15/9, dibeji dia 21.

• Tela amue malu atu asaka bantu bua kuenza malu mabi.

Tudi mua kutela ntatu idi ifumina ku dikenga, lukuka lua biuma, dibenga kunyoka bantu babi kudi mbulamatadi ne dikuatshika mu buteyi. (Muam. 7:7; 8:11; 1 Tim. 6:10; Yak. 1:14, 15)​—1/10, dibeji 4.

• Bua tshinyi mbimpe kuteleja mulunda wetu udi usama ne kuditeka pa muaba wende?

Mubedi kena dijinga amu ne mandamuna kampanda to, kadi udi nangananga ukeba muntu udi mua kumuteleja ne lungenyi luimpe ne muoyo mujima. Udi mua kuikala dijinga ne muntu udi mua kumuteleja kayi umupisha to. (Muam. 3:1, 7; Yak. 1:19)​—1/10, dibeji dia 10, 11.

• Mulume ne mukaji badi ne bua kuebejangana malu bua tshinyi?

Yehowa Nzambi udi umona bena dibaka bu “mubidi umue.” (Mat. 19:3-6) Bidi bikengela kuikala kuyikila bimpe bua kukolesha malanda aa.​—1/10, dibeji dia 15.

• Mmunyi mudi baledi mua kufila ‘tshilejilu’ bua bana babu kumanya mua kudiambuila majitu? (Yone 13:15)

Anu bu Yezu, baledi badi ne bua kumvuija bana malu ne kuenza malu bua bana bamone tshidi kudiambuila majitu kumvuija menemene.​—1/10, dibeji dia 19.

• Tela amue malu adi mua kuenza bua dibala dietu dia Bible kutuambuluishadi bikole.

Umanye tshiudi ubadila Bible. (Yak. 1:23-25) Keba Bible udibu bakudimune bimpe. Ikala usambila, ulomba Yehowa diambulusha. (Mus. 119:18) Bala Bible dituku dionso. (Yosh. 1:8) Ikala ushintulula mishindu iudi ulonga Bible. Ikala welangana meji bua biudi ubala. (Mus. 119:97) Keba bantu badi mua kukuambuluisha bua kumumvua. (2 Pet. 3:16)​—1/10, dibeji dia 21-23.

• Pa bidi bitangila ntendelelu mulelela, mmalu kayi atu bantu bamba bua kudibingisha atu Nzambi kayi witaba?

‘Mudimu mukole be! Tshiena musue to. Tshiena ne dîba to. Tshiena mukumbane to. Kudi muntu udi mungenzele bibi.’ Aa ki mmalu majalame atudi mua kudibingisha nawu bua kubenga kutumikila mikenji ya Nzambi.​—15/10, dibeji dia 12-15.

• Mmalu kayi audi mua kuenza bua bisangilu bia bena Kristo bikukoleshe wewe ne bantu bakuabu?

Ikala udilongolola kumpala. Ikala ubuelamu pa tshibidilu. Ikala ufika kumpala kua dîba. Ambula mikanda yonso ya kulonga. Epuka ditanaji. Ikala wandamuna. Ikala wandamuna mu mêyi makese. Ikala wenza midimu idibu bakupesha. Ikala wela bakuabu kalumbandi. Ikala uyukila ne bantu.​—15/10, dibeji dia 22.

• Ntshinyi tshitudi tulongela ku mushindu uvua Alona muenze bualu bubi buvua bakuabu bamusake bua kuenza?

Pavua Mose mumbuke, bena Isalele bakasaka Alona bua kubenzela nzambi. Wakenza tshivuabu bakeba. Bualu ebu budi buleja ne: ki nganu bansonga batubu bafikisha ku dienza bualu bubi to. Bidi mua kufikila too ne bantu bakulumpe badi basue kuenza malu mimpe. tudi ne bua kukandamena balunda babi.​—15/11, dibeji dia 8.