Ela meji bikole bua malu adi Yehowa mukuenzele

MUTANTSHI mukese panyima pa Yezu mumane kubika ku lufu, bayidi bende bakuabu babidi bavua bumbukila mu Yelushalema batangile ku Emau. Mukanda wa Luka udi wamba ne: ‘Pakadibu bayukila ne bakonkangana, Yezu mene wakalua nabu pabuipi, wakenda nabu. Kadi mêsu abu akadi bitayitayi kabakamumanya.’ Pashishe Yezu wakabambila ne: “‘Nudi nuenda nuyukila tshinyi?’ Bobu bakimana babungame.” Bua tshinyi bavua babungame? Bayidi bavua bela meji ne: mu tshikondo atshi Yezu uvua mua kupikula Isalele ku bupika bua bena bisamba bia bende, kadi kabivua bienzeke nanku to. Kadi Yezu yeye wakafua. Ki bua tshinyi bayidi aba bavua babungame.​—Luka 24:15-21; Bien. 1:6.

Yezu wakabanga kubelesha meji. ‘Wakabangila ku Mose ne ku baprofete bonso, wakabajinguluila malu akafundabu mu Mukanda wa Nzambi onso bua bualu buende.’ Bushuwa, Yezu uvua muenze bimanyinu bia bungi ne malu avua akolesha ditabuja mu mudimu wende. Bu muvua bayidi aba bateleje malu avua Yezu mubumvuije, bakalekela kubungama diakamue ne kupetabu disanka. Pashishe dilolo adi, bakamba ne: ‘Mitshima yetu kayakadi itema munda muetu, anyi pakadiye utuambila malu mu njila, pakadiye utujinguluila Mukanda wa Nzambi?’ (Luka 24:27, 32) Ntshinyi tshitudi mua kulongela ku tshivua bayidi ba Yezu aba benze?

Tutu tumvua bishi padi malu atuvua batekemene kaayi akumbana?

Bayidi ba Yezu bavua baya ku Emau bavua babungame bualu malu avuabu batekemene kaavua menzeke to. Bakadiumvua anu mudibi bileja mu Nsumuinu 13:12 ne: ‘Muntu mupangile bivuaye mutekemene udi umvua kanyinganyinga mu muoyo.’ (MMM) Bia muomumue, bamue ba kutudi bakadi benzele Yehowa mudimu ne lulamatu munkatshi mua bidimu bia bungi bavua bela meji ne: lelu eu, “dikenga dinene” divua mua kuikala dimane kulua kale. (Mat. 24:21; Buak. 7:14) Mbushuwa bua se: kuindila bualu budi kabuyi bukumbana kudi mua kutubungamija mu matuku etu aa.

Vuluka ne: bayidi babidi abu bakapetulula disanka diabu pavua Yezu mubambuluishe bua kuela meji bua milayi ikavua mikumbane ne ivua ikumbana mu tshikondo  tshivuabu ne muoyo. Tudi petu mua kulama disanka ne kudienzeja bua kubenga kuteketa mu mikolo mu mushindu wa muomumue. Michael, mukulu mukuabu ukadi mushindame mu ditabuja wakamba ne: “Kutambi kuela meji bua malu adi Yehowa kayi muanji kuenza to. Kadi, utambe kuimanyina pa akadiye muenze.” Bushuwa, eu si mmubelu muimpe be!

Malu akadi Yehowa muenze

Ela meji bua malu mimpe akadi Yehowa muenze. Yezu wakamba ne: ‘Wangitabuja neenze biende kabidi malu antshidi ngenza; neenze biende malu adi mapite andi ngenza.’ (Yone 14:12) Batendeledi ba Nzambi lelu badi benza midimu ya bungi itu bena Kristo katshia kabayi banji kuenza. Bantu bapite pa miliyo 7 mbindile bua kupanduka ku dikenga dinene. Vuluka ne: katshia kakuvua kuanji kuikala bantemu ba Yehowa bungi nunku benza mudimu ne mitalu mushindu eu mu matunga a bungi pa buloba bujima to. Bushuwa, anu mukavua Yezu muambe, Yehowa mmuambuluishe basadidi bende bua kuenza ‘malu adi mapite avua Yezu muenze.’

Ntshinyi tshikuabu tshidi Yehowa mutuenzele? Mmuenze bua bena mitshima mipuekele bapatuke mu bulongolodi bubi bua malu ne babuele mu mparadizu wa mu nyuma udiye mubalongoluele. (2 Kol. 12:1-4) Ikala ukeba dîba dia kuela meji bikole bua malu a mu mparadizu au audi umona. Tshilejilu, tapa dîsu mu tshitekelu tshiebe tshia mikanda anyi tshia ku Nzubu wa Bukalenge, kebamu mukanda wa Index des publications Watch Tower anyi wa Watchtower Library. Teleja drama wa miyuki ya mu Bible. Vuluka mêyi ne malu a mu mpungilu unudi nufuma ku dienze. Kusakidilapu, ela meji bua disanka ditutu nadi patudi tupetangana ne bana betu bena Kristo balume ne bakaji. Bushuwa, Yehowa mmutuenzele bimpe bua mudiye mutupeshe biakudia bia mu nyuma bia bungi, bana betu bena Kristo ne mudiye mutulongoluele mparadizu wa mu nyuma.

Mufundi wa misambu Davidi wakamba ne: ‘Yehowa Nzambi wanyi, wakuvudija malu a kukema awakuenza ne malu awakupangadija bua kutuenzela.’ (Mus. 40:5) Eyowa, tuetu tuela meji bikole bua malu adi Yehowa mutuenzele ne mudiye mutunange, netupetulule makanda bua kushala ne lulamatu mu mudimu wa mushinga utudi tuenzela Tatu wetu wa mu diulu Yehowa.

[Tshimfuanyi mu dibeji 31]

Yezu wakambuluisha bayidi bende bua kutamba kuela meji bua malu akavua Yehowa mubenzele

[Bimfuanyi mu dibeji 32]

Vuluka mêyi ne malu a mu mpungilu unudi nufuma ku dienza