Ndi ne disanka bua mundi muenzele Yehowa mudimu nansha mu ntatu

Muyuki mulonda kudi Maatje de Jonge-van den Heuvel

NDI ne bidimu 98 mpindieu, kadi ndi mupitshishe bidimu 70 bia kudibi mu dienzela Yehowa mudimu ne disanka nansha mumvua ne ntatu ivua iteka ditabuja dianyi mu njiwu. Mu Mvita mibidi ya buloba bujima bakangela mu buloko bunene, muomu emu meme kufika ne kudiangata dipangadika divua dinyingalaje pashishe. Bidimu ndambu pashishe meme kupeta lutatu lukuabu lukole. Nansha nanku, ndi ne dianyisha kudi Yehowa bua mundi mupete diakalenga dia kumuenzela mudimu nansha mu ntatu.

Nsombelu wanyi wakashintuluka mu ngondo wa 10 wa tshidimu tshia 1940. Mvua musombele mu tshimenga tshia Hilversum tshidi ntanta wa kilometre 24 ku sud kua tshimenga tshia Amsterdam mu ditunga dia Pays-Bas divua ku bulombodi bua bena Nazi. Nkavua ne bidimu 5 mu dibaka ne bayanyi Jaap de Jonge, tukavua ne muana wa bakaji wa bidimu 3 diende Willy. Tuvua mutumba ne dîku dikuabu divua mu bupele bukole kadi bikale baditatshisha bua kudisha bana 8. Bavua kabidi bambule bujitu bua nsongalume mukuabu uvua musombele kuabu aku. Mvua ndikonka ne: ‘Bua tshinyi bavua badiambuishe bujitu abu?’ Dimue dituku pamvua mubapesha biakudia, bakangambila ne: nsongalume au uvua mpanda-njila. Yeye muine kungambila malu a Bukalenge bua Nzambi ne masanka atuadilabu bantu. Malu aa akandenga ku muoyo bikole ne meme kuitaba diakamue bulelela. Anu mu tshidimu tshimue atshi meme kudilambula kudi Yehowa ne kutambula. Tshidimu tshiakalonda, bayanyi e kuitaba pende bulelela.

Nansha mumvua ne dimanya dikese dia malu a mu Bible, mvua mumanye bimpe ne: meme mulue Ntemu, mvua ndua panyi muena mu bulongolodi buvuabu bakandike. Mvua mumanye kabidi ne: Bantemu ba bungi bavua mu buloko bualu bavua bayisha lumu luimpe lua Bukalenge. Nansha nanku, ngakabangisha kuyisha diakamue ku nzubu ne ku nzubu, meme ne bayanyi tuakatuadija kuakidila bampanda-njila ne batangidi ba bijengu ne ba distrike ku nzubu kuetu. Tuvua tulama kabidi mikanda ya malu a mu Bible mu nzubu muetu ivuabu batupesha kudi bana betu ba mu Amsterdam. Bavua balua ne mikanda eyi ku makalu mibuikila ntenta. Bushuwa, bana betu aba bavua ne dinanga ne dikima. Bavua bateke mioyo yabu mu njiwu bua bena Kristo nabu.​—1 Yone 3:16.

“Mamu, neupingane lukasa anyi?”

Ngondo mitue ku 6 panyima pa ditambula dianyi, mpulushi isatu yakakokola ku tshibi tshietu. Bakabuela mu nzubu ne kukalakajabu mu nzubu muonso. Nansha muvuabu kabayi bapete kabadi kavua ne mikanda, bakapeta imue misokoka muinshi mua bulalu buetu. Musangu umue, bakangambila bua kubalonda ku biro bia bampulushi bivua mu tshimenga tshia Hilversum. Pangakakidila muananyi bua kumulaya, wakankonka ne: “Mamu, neupingane lukasa anyi?” Ngakamuandamuna ne: “Eyowa muananyi, mamuebe nealukile lukasa.” Kadi ngakenza ngondo 18 bua meme kumuakidila kabidi.

Mpulushi mukuabu wakaya nanyi too ne ku Amsterdam mu kawulu bua kungela nkonko.  Bakankonka ni mvua mumanye bana betu bakuabu ba balume 3 ba mu Hilversum bavua Bantemu ba Yehowa. Ngakabambila ne: “Tshiena mubamanye to, pa kumusha umue. Yeye au uvua utusumbisha mabele.” Mvua muambe bulelela bualu muanetu au uvua ututuadila mabele. Ngakamba kabidi ne: “Bua kumanya bikalaye Ntemu wa Yehowa, numukonke yeye nkayende, meme to.” Pangakabenga kuamba bualu bukuabu, bakantuta bisusu kuisu ne kunkangilabu mu kazubu kakuabu, meme kuenzamu ngondo ibidi. Pakamanya bayanyi muaba umvua, wakabanga kuntuadila bilamba ne biakudia. Mu ngondo wa 8 mu 1941 bakantuma mu buloko bua bantu bakaji bua Ravensbrück (buvua buende lumu bua muvuabu bakengeshanganemu bikole) buvua ntanta wa kilometre 80 ku nord kua tshimenga tshia Berlin mu ditunga dia Allemagne.

“Kolesha ku muoyo muanetu”

Patuakafika, bakatuambila ne: tuetu batue biala pa mukanda bua kuleja mutudi balekele buntemu, bavua mua kutulekela. Kadi ngakabenga. Pangakabenga, bakangambila bua kubapesha bintu bianyi bionso ne kusomba mu tshiowedi tshiyi ne bilamba, muomu emu meme kusangana Bantemu nanyi bakuabu ba bakaji ba ku Pays-Bas. Bakatupesha bilamba bia bena buloko bivua ne kamanyinu ka matumba asatu, bakatupesha kabidi dilongo, dikopo ne lukutu. Butuku bua kumpala, bakatuela mu buloko butubu banji kuela bantu bua matuku makese. Muine emu ngakadila bua musangu wa kumpala katshia bankuata. Ngakadikonka ne: “Tshiangenzekela ntshinyi? Nenshale muaba eu matuku bungi munyi?” Mu kuamba kuimpe, malanda anyi ne Yehowa kaavua manji kukola menemene to, bualu ntshivua ne ngondo mikese mu bulelela. Ntshivua ne malu a bungi a kulonga. Dituku diakalonda patuvua ku milongo, muanetu wa bakaji wa mu ditunga dia Pays-Bas wakamona mumvua mubungame. Wakangambila ne: “Kolesha ku muoyo muanetu, bualu bubi kabuakutuenzekela to.”

Patuvua bumbuke ku milongo, bakaya netu mu buloko bukuabu muakatuakidilabu kudi Bantemu netu bakaji bakuabu nkama ne nkama bavua bafumine mu ditunga dia Allemagne ne dia Pays-Bas. Bamue bana betu ba mu Allemagne bakavua bapitshishe tshidimu tshijima mu buloko abu. Kuikala nabu kuakankolesha bikole. Ngakamona kabidi ne: mu buloko muvua Bantemu aba muvua mankenda kupita maloko makuabu. Pa kumusha mankenda avuamu, bantu bakuabu bavua bamanye ne: kamuvua buivi, dipendangana anyi diluangana. Nansha muvuabu batukengesha mu buloko emu, nzubu wetu wa buloko uvua yeye muaba muimpe wa kuikishila kupita nzubu mikuabu.

Nsombelu wa mu buloko

Mu buloko, tuvua tuenza mudimu wa bungi kadi tudia bintu bikese. Tuvua ne bua kubika pa dîba 5 wa dinda, ne mutantshi mukese pashishe tuvua ne bua kuya ku milongo bua kuitaba pavuabu babikila dîna dia muntu yonso. Balami bavua batuimanyika kulu pambelu mutantshi wa dîba dijima, nansha kuikala mvula anyi munya. Patuvua tufika kabidi pa dîba 5 wa dilolo, tuetu bamane kuenza mudimu mukole dituku dijima, tuvua tuela kabidi milongo bua kutubikilabu ku mêna. Pashishe bavua batupesha diampa ne nsupu bua kudia ne tuya kalala batshioke bikole.

Dituku dionso pa kumbusha mu Dia lumingu, mvua ngenza mudimu wa kukosa miepu ya blé mu budimi ne tshintu tshienza bu muele, kusukula minkoloji anyi tu mikidi ne bikumbi bia nguluba. Nansha muvua mudimu au mukole ne wa manyanu, mvua nguenza dituku dionso bualu ntshimvua nsonga wa dikanda. Kabidi pamvua  ngimba misambu ivua ne mêyi a mu Bible, mvua ndikolesha. Nansha nanku, mvua njinga bayanyi ne muananyi dituku dionso.

Bavua batupesha biakudia anu bikese, kadi bana betu ba bakaji bonso batuvua nabu bavua benza ne muabu muonso bua kulamaku nansha katupa ka diampa dituku dionso bua kuikala ne ndambu wa biakudia bua mu Dia lumingu dituvua tutuilangana bua kuyikila malu a mu Bible. Katuvua ne mikanda ya malu a mu Bible to, kadi mvua nteleja ne ntema pavua bana betu ba bakaji bakulumpe ba mu ditunga dia Allemagne bavua bakole mu ditabuja ne ba lulamatu bumvuija malu a mu Bible. Tuvua tuenza too ne Tshivulukilu tshia lufu lua Yezu.

Dibungama, kanyinganyinga ne dikankamija

Imue misangu, bavua batupesha mudimu uvua utungunuja malu a mvita ya bena Nazi. Bu mutuvua katuyi tubuelakana mu malu a tshididi, bana betu ba bakaji bonso bavua babenga bua kuenza mudimu au, ne meme panyi kuidikija dikima diabu. Bua kutunyoka, bavua batupala biakudia munkatshi mua matuku ndambu ne tuvua ne bua kuimana ku milongo mêba a bungi. Dimue edi mu muvu wa mashika makole, bakatukangila mu buloko matuku 40 katuyi ne biamu bidi bifila luya to.

Bu mutuvua Bantemu ba Yehowa, bavua batuambila misangu ne misangu ne: bavua mua kutulekela anu tuetu mua kutua tshiala ku mukanda uvua uleja mutuvua balekele buntemu. Meme mumane kupitshisha tshidimu tshijima mu buloko bua ku Ravensbrück, ngakateketa ku muoyo bikole. Dijinga dikole dia kumona bayanyi ne muananyi diakansaka bua kuya kudi balami ba buloko ne kulomba mukanda wa kulekela buntemu ne kutuapu tshiala.

Pakumvua bana betu tshimvua muenze bakabanga kungepuka. Nansha nanku, bana betu babidi bakulumpe ba ku Allemagne, Hedwig ne Gertrud bakankokela ku luseke, kungambilabu muvuabu anu bannange. Patuvua tusukula nabu bikumbi bia nguluba, bakangambila mudibi bia mushinga bua kulamata Yehowa ne kuleja mutudi bamunange pa kubenga kumuvila kumpala kua bantu. Mushindu uvuabu bangenzela malu anu bu muanabu ne dinanga diabu biakandenga ku muoyo bikole. * Mvua mumanye ne: tshimvua muenze tshivua tshibi ke bualu kayi ngakajinga bua bapanda mukanda umvua mutue tshiala. Dilolo dikuabu ngakambila muanetu wa bakaji mukuabu bua dijinga dianyi dia kupanda mukanda au. Mpulushi mukuabu uvua mua kuikala mumvue muyiki wetu au, bualu anu dilolo dimue adi bakampatula mu buloko ne meme kupingana ku Pays-Bas mu kawulu. Ntshidi anu mvuluka tshimfuanyi tshia mamu umue wa ku bavua balama bena buloko wakangambila ne: “Utshidi anu Bibelforscher (Mulongi wa Bible), ne neutungunuke anu ne kuikala mulongi wa Bible.” Ke meme kuandamuna ne: “Eyowa, nentungunuke biasua Yehowa.” Nansha nanku, ngakatungunuka ne kudikonka ‘mushindu wa kushintuluisha tshiala tshimvua mutue tshia kubenga buntemu.’

Kamue kanungu mu mukanda au kavua kamba ne: “Ndi njadika ne: musangu nansha umue kabidi tshiakuenza mudimu bua Nsangilu wa balongi ba Bible pa buloba bujima to.” Mvua mumanye tshia kuenza! Mu ngondo wa 1 mu 1943 pangakapingana kuanyi, ngakatuadija diakamue kuyisha kabidi. Tshidibi, bu buobu bankuate bua musangu muibidi kudi bena Nazi nyisha bua Bukalenge bua Nzambi, bavua mua kunyoka bibi be.

Bua kuleja kabidi Yehowa dijinga dianyi dia muoyo mujima dia kuikala muntu wende, meme ne bayanyi tuakitaba bua bana betu bavua bambula mikanda ne batangidi bena ngendu kuikalabu batudila kuetu. Mvua ne dianyisha dia bungi bua mumvua mupeta kabidi mushindu wa kuleja mumvua munange Yehowa ne bantu bende!

Kanyinganyinga kakole

Ngondo mikese kumpala kua mvita kujikayi, meme ne bayanyi tuakapeta kanyinganyiga kakole. Mu ngondo wa 10 mu 1944, muanetu wa bakaji wakatuadija kusama diakamue. Willy uvua ne bia pa muminu. Disama diakakola  bikole e kufuaye matuku 3 pashishe. Uvua ne bidimu 7 tshianana.

Lufu lua muanetu umuepele eu luakatutonda be. Bushuwa, kanyinganyinga kamvua mupete bua lufu lua Willy kavua kapite dikenga dionso dimvua mumone mu buloko bua Ravensbrück. Kadi mu ntatu tuvua anu tukola ku muoyo ne mêyi a mu Musambu wa 16:8 adi amba ne: ‘Ngakuteka Yehowa kumpala kuanyi misangu yonso; bualu bua yeye udi ku tshianza tshianyi tshia balume, tshiena nyungishibua.’ Meme ne bayanyi tuvua beyemene ne muoyo mujima dilaya dia Yehowa dia kubisha bafue. Tuakananukila mu bulelela ne tuvua tuyisha lumu luimpe ne tshisumi misangu yonso. Bayanyi uvua anu ungambuluisha bua kuenzela Yehowa mudimu ne disanka too ne pakafuaye mu 1969.

Masanka andi mupete

Mu bidimu makumi bidi bipite ebi, tshimue tshintu tshivua tshimpesha disanka misangu yonso nkusomba ne bantu bavua benza mudimu wa ku dîba ne ku dîba. Tuvua anu tuakidila kumbelu kuetu batangidi ba bijengu ne ba distrike ne bakaji babu pavuabu bakumbula tshisumbu tshietu anu bu mutuvua tuenza mu tshikondo tshia mvita. Tshilejilu, Maarten Kaptein uvua mutangidi muena ngendu ne mukajende Nel bakasomba kuetu bidimu 13. Pakapeta Nel disama dia lufu, ngakapeta diakalenga dia kumulama kuanyi bua ngondo 3 too ne muakafuaye. Disomba nabu ne disomba ne Bantemu bakuabu ba mu tshisumbu tshietu diakangambuluisha bua kuanyisha mparadizu wetu wa mu nyuma mutudi mpindieu.

Bumue bualu buvua bumpeshe disanka mbuvua buenzeke mu tshidimu tshia 1995, pavuabu bambikile bua kubuela mu tshisangilu tshia kuvuluka buloko bua ku Ravensbrück. Mu tshisangilu atshi, ngakapetangana kabidi ne bana betu ba bakaji batuvua nabu mu buloko kukavua bidimu 50! Kupetangana nabu kuvua bualu bua disanka buvua bunkoleshe bundi ntshinyi mua kupua muoyo to, ne tshivua tshikondo tshimpe tshituvua bapete bua kukoleshangana ku muoyo bua kushala batangile anu kumpala bindila dituku dikala batudi bafuishe mua kubika.

Mupostolo Paulo udi wamba mu Lomo 15:4 ne: ‘Bua malu onso akafundabu diambedi akafundibua bua kutuyisha, bua tuetu tuikale ne ditekemena.’ Ndi ngela Yehowa tuasakidila bua mudiye mutupeshe ditekemena didi dingambuluishe bua kumuenzela mudimu ne disanka nansha mu ntatu.

[Mêyi adi kuinshi]

[Tshimfuanyi mu dibeji 10]

Meme ne Jaap mu 1930

[Tshimfuanyi mu dibeji 10]

Muanetu wa bakaji Willy pavuaye ne bidimu 7

[Tshimfuanyi mu dibeji 12]

Ngakabuela mu tshisangilu tshivua tshinkoleshe mu 1995. Meme ndi muntu muibidi mu mulongo wa kumpala kumbukila ku dia bakaji