Kudienzeja kudi ne mushinga

BITUIKALA basue kukolesha bana betu mu ‘dibela ne didimuija bia Yehowa,’ tudi ne bua kuikala tuenza Ntendelelu wa mu Dîku ne dilonga dia Bible. (Ef. 6:4) Wewe muikale muledi, udi mumanye ne: bana badi mua kutshioka lukasa. Kadi ntshinyi tshiudi mua kuenza bua bikala anu ne ntema? Tumonayi tshivua bamue baledi benze.

George wa mu tshimenga tshia Californie mu ditunga dia Amérique udi wamba ne: “Patshivua bana banyi bapuekele, meme ne mukajanyi tuvua tudienzeja bua kushintulula mishindu ituvua tuenza dilonga dia mu dîku. Amue matuku tuvua tuvuala bilamba bifuane bia bantu ba mu Bible ne tuenza dinaya bua kumvuija muyuki kampanda wa mu mukanda wa Miyuki ya mu Mukanda wa Nzambi. Tuvua tuenza kabidi miele, makombo, bitunga ne bintu bikuabu. Tuvua tuenza manaya a kukonkangana mêna kampanda a bantu ba mu Bible ne tuelangana nkonko mipepele ne mikuabu mikole. Pashishe, tuvua tuenza bintu bu mudi buatu bua Noa ne tuzola tablo wa malu a mu Bible. Imue misangu tuvua tuzola bimfuanyi bia bantu ba mu Bible ne tumvuija malu avuabu benza. Mpindieu tudi tudilongolola bua kuzola bia mvita bia mu nyuma bidibu batele mu Efeso 6:11-17, ne tulomba yonso wa kutudi bua kumvuija tshia mvita kampanda. Mishindu eyi mmituambuluishe bua kuanyisha dilonga dietu dia mu dîku.”

Debi, mamu mukuabu wa mu tshimenga tshia Michigan mu ditunga dia Amérique udi wamba ne: “Meme ne bayanyi katuvua bamanye malu avua asankisha muanetu wa bakaji patshivuaye ne bidimu bisatu to. Dituku dikuabu pamvua mbala ne dîyi dikole muyuki wa Isaka ne Lebeka mu mukanda wa Miyuki ya mu Mukanda wa Nzambi, ngakangata tu popi tubidi ne kutuadija kuenza natu dinaya ngamba mêyi a muntu yonso. Yeye kutuadija kuteya ntema ku bimvua ngakula. Mu ngondo yakalonda, tuvua tukuata mudimu ne tu popi tubidi atu bua kuenza natu manaya a mu Bible. Patuvua tujikija kubala muyuki, muanetu wa bakaji uvua ukeba nzubu wa tu popi anyi bintu bikuabu bivua bikengela bua kuenza nabi dinaya. Bualu ebu buvua butusankisha bikole. Tshilejilu, tuvua tuangata kashete ka bisabata ne nshinga mukunze bilua nzubu wa Lahaba uvua ne muonji mukunzubile. Tuvua tuenza nyoka wa bilamba wa bule bua metre 1 ne tshitupa tumujingila ku mutshi bua kumvuija nyoka wa tshiamu udibu batele mu Nomba 21:4-9. Tuvua tuteka bintu bietu ebi mu tshibuta tshinene. Bivua bitukemesha patuvua tumona muanetu eu usomba mu nzubu wa tshisombedi ne ukeba bintu bia kuenza nabi manaya a mu Bible mu tshibuta atshi. Tuvua ne disanka dia bungi bua muvuaye ulonda miyuki ya mu Bible mu mêyi ende nkayende makese.”

Kukolesha bana ki mbualu bupepele to, bidi bikengela dîba dia bungi bua kukuna bana dijinga dia kuenzela Yehowa mudimu. Nunku bua kulongesha bana malu a Yehowa bimpe, bidi bikengela kunemeka ndongamu wetu wa ntendelelu wa mu dîku ne dilonga dia Bible. Bushuwa, kudienzeja kudi ne mushinga wa bungi.