Nkonko ya babadi

Bua tshinyi Mose uvua mukuatshile Eleazâ ne Itamâ bana ba Alona tshiji kunyima kua lufu lua bana babu Nadaba ne Abihu? Mmunyi muakajika tshiji tshiende?​—Lew. 10:16-20.

Mutantshi mukese panyima pa bamane kubanjija bakuidi, Yehowa wakashipa Nadaba ne Abihu bana ba balume ba Alona bualu bavua bamulambule kapia kavua kakayi ka tshijila. (Lew. 10:1, 2) Mose wakambila bana ba Alona bavua bashale ne muoyo bua kabadidi bana babu bavua bafue. Mutantshi mukese pashishe, Mose wakakuatshila Eleazâ ne Itamâ tshiji bualu kabavua badie mbuji wa mulambu wa kubuikidila nawu bantu mibi to. (Lew. 9:3) Bua tshinyi Mose wakafika munda?

Mikenji ivua Yehowa mupeshe Mose ivua ileja ne: muakuidi uvua ufila mulambu wa mibi uvua ne bua kudia ndambu wa munyinyi mu lubanza lua ntenta wa kusambakena. Kuenza nunku kuvua kuleja ne: uvua witaba mibi ya bantu bavua bafile mulambu. Kadi kabavua ne bua kudia munyinyi wa mulambu au pavuabu baya ne ndambu wa mashi awu mu muaba wa tshijila anyi mu tshitupa tshia kumpala tshia ntenta wa kusambakena to. Dîba adi bavua ne bua kuwosha.​—Lew. 6:24-26, 30.

Bidi bimueneka ne: kunyima kua lufu lua bana ba Alona, Mose wakamona ne: bivua bikengela atangile ni bavua balonde malu onso avua Yehowa muambe. Pakamonaye ne: bavua buoshe mbuji wa mulambu wa kubuikidila nawu bantu mibi, wakebeja Eleazâ ne Itamâ ne tshiji tshionso bua tshinyi kabavua baudie muvua Yehowa muambe, bualu kabavua baye ne mashi awu kumpala kua Yehowa mu muaba wa tshijila to.​—Lew. 10:17, 18.

Alona wakandamuna lukonko lua Mose bualu yeye ke uvua muanyishile bakuidi bavua bashale ne muoyo bua kuenza nanku. Bu muvua bana bende babidi bafue, uvua mua kuikala mudiebeje bikala bakuidi bavua bashale bavua bakumbane bua kudia munyinyi wa mulambu wa mibi dituku adi. Uvua mua kuikala muele meji ne: kudia munyinyi au kakuvua mua kusankisha Yehowa nansha muvuabu kabayi ne bualu mu tshilema tshivua Nadaba ne Abihu benze.​—Lew. 10:19.

Alona uvua mua kuikala nangananga muele meji ne: dituku dia kumpala divua bena mu dîku diende benze midimu ya buakuidi, ke divuabu nangananga ne bua kuteya ntema bikole bua kusankisha Nzambi nansha mu tumalu tukese. Kadi Nadaba ne Abihu bavua bapendeshishe dîna dia Yehowa ne tshiji tshiende tshiakabakuata. Nunku Alona uvua mua kuikala muele meji ne: bena mu dîku dia bakuidi muvuabu benze bubi bunene ebu kabavua ne bua kudia munyinyi wa mulambu wa tshijila to.

Bidi bimueneka ne: Mose wakitaba diandamuna dia tutuende bualu muyuki eu udi ujika ne mêyi a ne: ‘Pakumvua Mose mêyi au, bualu ebu buakadi buimpe ku mêsu kuende.’ (Lew. 10:20) Bidi bimueneka kabidi ne: diandamuna dia Alona divua disankishe Yehowa.