Mutudi mua kuikala ne bululame mu bulongolodi ebu bubi

DIPANGA bululame nditampakane lelu miaba yonso anu bu kapepa katudi tueyela. Bantu badi bashima, bibila, biba, kabayi bafuta mabanza ne baditumbisha bua midimu mibi idibu benza. Bu mutudi basombe munkatshi mua bantu ba nunku, tutu tutuilangana ne nsombelu idi iteta muoyo wetu mutoke. Mmunyi mutudi mua kutungunuka ne kukandamena lungenyi lua dipanga bululame? Tukonkononayi malu manene asatu atuambuluisha bua kuenza nunku. Malu aa ke: kutshina Yehowa, kuikala ne kondo ka muoyo kimpe ne kusanka ne bitudi nabi.

Ditshina dimpe dia Yehowa

Muprofete Yeshaya wakafunda ne: ‘Yehowa udi mulumbuluishi wetu, Yehowa udi mutueledi wa mikenji, Yehowa udi Mukalenge wetu.’ (Yesh. 33:22) Tuetu bitabe bukokeshi budi nabu Yehowa netupete ditshina dia Nzambi didi mua kutusaka bua kubenga kuenza malu adi kaayi malulame. Mukanda wa Nsumuinu 16:6 udi wamba ne: ‘Muntu udi utshina Yehowa udi wepuka malu mabi.’ (MMM) Ditshina edi ki nkumvua buôwa bua Nzambi katunyoki to, kadi nkudienzeja bua kubenga kunyingalaja Tatu wetu wa mu diulu udi uditatshisha bikole bua diakalenga dietu.​—1 Pet. 3:12.

Tuangate tshilejilu tshilelela tshia bualu buvua buenzeke tshidi tshileja mudi ditshina dimpe dia Nzambi dikale diambuluisha. Ricardo ne mukajende Fernanda bavua bangate makuta abu ku banke dolare 700. * Fernanda wakela makuta mu kabuta kayi muabale to. Padibu bafika kumbelu panyima pa bobu bamane kutula makuabu, bakakema pakasanganabu makuta mu kabuta anu bungi bua avuabu bangate. Bakadiambila ne: “Muena ku banke uvua mua kuikala mutupitshishile makuta.” Muoyo wakanji kubasaka bua kulama makuta au bu muvuabu ne mabanza a bungi a kufuta. Ricardo udi wamba ne: “Tuakalomba Yehowa bua atupeshe dikima bua kupingaja makuta au. Dijinga dietu dia kumusankisha bua kutumikila tshidiye utulomba bua kuenza mu Nsumuinu 27:11 diakatusaka bua kuapingaja.”

Kondo ka muoyo kalongesha kudi Bible

Tudi mua kulongesha kondo ketu ka muoyo patudi tulonga Bible ne tudienzeja bua kutumikila bitudi tulonga. Dîba adi ‘dîyi dia Nzambi didi ne muoyo ne bukole’ nedilenge lungenyi luetu ne mutshima wetu kabidi. Ebi nebitusake bua “kuenda bimpe mu malu onso.”​—Eb. 4:12; 13:18.

Tuangate tshilejilu tshia João. Uvua mubuele dibanza dinene dia dolare 5 000. Pashishe wakamuangala kuya mu tshimenga tshikuabu kayi mufute dibanza edi to. Bidimu muanda mukulu pashishe João wakalonga bulelela, nunku kondo kende ka muoyo kalongesha kudi Bible kakamusaka bua kumonangana ne muena dibanza divuaye nadi bua kumufutadi. Bu muvua João upeta makuta makese eku muikale ne mukaji ne bana banayi, muena makuta wakitaba bua ikale umufuta ku ngondo ku ngondo.

Tusanke bua bitudi nabi

Mupostolo Paulo wakafunda ne: ‘Lupetu ludi lutamba bulengele ludi buimpe bua Nzambi busangisha ne mutshima mupole; kadi patuikala ne biakudia ne bia kuluata, netuikale ne mitshima mipole ne bintu ebi.’ (1 Tim. 6:6-8) Kutumikila mubelu wa meji eu kudi kutuambuluisha bua kuepuka buteyi bua lukuka,  kuibila anyi kukeba makuta ne lungenyi lua kunema lukasa. (Nsu. 28:20) Kutumikila mubelu wa Paulo nekutuambuluishe kabidi bua kuteka Bukalenge bua Nzambi pa muaba wa kumpala bashindike ne: neatukumbajile majinga etu.​—Mat. 6:25-34.

Kadi bu mudiku “mashimi a biuma” katuena ne bua kupepeja njiwu ya lukuka ne dinanga dinekesha dia biuma to. (Mat. 13:22) Vuluka tshilejilu tshia Akana. Uvua mudimuene muvua bena Isalele basabuke musulu wa Yadene mu tshishima. Nansha nanku, lukuka luakamusaka bua kuiba argent, or ne tshilamba tshia mushinga mukole mu bintu bivuabu bapawule mu tshimenga tshia Yeleko. Wakafua bua bualu buvuaye muenze ebu. (Yosh. 7:1, 20-26) Kabiena bitukemesha bua muakalua Yezu kuamba bidimu bia bungi pashishe ne: “Nudimuke, kanukumi mitshima ku biuma.”​—Luka 12:15.

Leja bululame ku mudimu

Tukonkonone mpindieu imue nsombelu idi mua kuteta dipangadika dietu dia kulama bululame mu malu onso. Kuleja bululame ku mudimu kudi kumvuija ‘kubenga kuiba’ nansha padi bantu bakuabu biba. (Tito 2:9, 10) Tshilejilu, Jurandir udi wenza mudimu mu tshibambalu kampanda tshia mbulamatadi, uvua ufila luapolo lujalame lua makuta avuaye utula pavuaye wenza ngendu ya mudimu. Kadi bena mudimu nende bavua batenteka makuta a mafi pa mutu pa avuabu batule. Bavua benza nanku bualu mfumuabu uvua mubanyishile bua kuenza nanku. Mfumuabu eu uvua utandisha Jurandir bua muvuaye wamba anu bulelela ne kubenga bua kumutuma kabidi ku ngendu ya mudimu. Mu bungi bua matuku, mbulamatadi wakakonkonona tshibambalu atshi bua kumona muvuabu batula makuta, bakela Jurandir kalumbandi bua muvuaye muena bululame. Bakamubandisha kabidi mianzu.

André udi wenza mudimu wa kupanyinangana bintu, mfumuende wakamuambila bua kubandishila basumbi mushinga misangu ibidi. Muanetu eu wakalomba Yehowa dikima bua kutumikila mikenji ya mu Bible. (Mus. 145:18-20) Wakaditatshisha kabidi bua kumvuija mfumuende bua tshinyi kavua mua kulonda tshivuaye mumuambile, kadi kakamumvuila. Nunku André wakangata dipangadika dia kulekela mudimu wa makuta a bungi eu. Kadi tshidimu tshimane kupita pashishe, mfumuende au kumubikila bua kupingana ku mudimu, kumujadikila ne: katshivua kabidi ubandishila basumbi mushinga bua kuibila to. Wakabandisha André mianzu.

Tuikale tufuta mabanza

Mupostolo Paulo wakabela bena Kristo ne: “Kanuikadi ne muntu dinga dibanza.”  (Lomo 13:8) Tudi mua kuikala tudibingisha bua kufuta dibanza tudiambila ne: utudi bangate dibanza udi ne makuta a bungi, kena bualu ne makuta. Kadi Bible udi wamba ne: “Muntu mubi udi usomba bintu, kena ubifuta kabidi.”​—Mus. 37:21.

Kadi bikala ‘bikondo bidi malu atulukila’ bantu bitupangisha bua kufuta dibanza, tudi mua kuenza tshinyi? (Muam. 9:11) Tshilejilu, Francisco wakasomba Alfredo dolare 7 000 bua kusumba nzubu. Kadi bu muvua mudimu wende kautshiyi wenda bimpe, Francisco wakapangila bua kufuta dibanza pa dîba divuabu bumvuangane. Wakangata dipangadika dia kuya kuyukila ne Alfredo bua bualu ebu, Alfredo kuitabaye bua ikale umufuta ku kakese ku kakese.

Umusha tshimuenekelu tshibi

Vuluka tshilejilu tshibi tshia Anania ne Sapila bena Kristo ba mu tshikondo tshia bapostolo. Bakapanyisha budimi buabu ne kuluabu ne tshitupa tshia makuta kudi bapostolo ne kubambilabu ne: ke onso avuabu bapete ku budimi abu. Bavua basue kuleja bakuabu muvuabu ne mutshima wa difila. Kadi mupostolo Petelo wakatandula mashimi abu ku diambuluisha dia nyuma wa Nzambi ne Yehowa wakabashipa.​—Bien. 5:1-11.

Bishilangane ne Anania ne Sapila, bafundi ba Bible bobu bavua bamba bulelela ne bavua bena bululame. Mose wakamba patoke muvuaye mufike tshiji, kupangaye ne bua kubuela mu Buloba bulaya. (Nom. 20:7-13) Bia muomumue, Yona kavua musokoke bilema bivuaye muenze kumpala kua kuyisha bena Ninewe ne biakenzaye pashishe to. Kadi wakabifunda.​—Yona 1:1-3; 4:1-3.

Bushuwa, tudi ne bua kuikala ne dikima bua kuamba bulelela nansha biobi bitukebela ntatu anu mutudi mua kubimuena ku tshivua Nathalia nsongakaji wa bidimu 14 muenze mu kalasa. Wakakonkonona dibeji dia mateta avuabu benze mu kalasa ne kusanganaye ne: mulongeshi uvua mumuele mpue pa mandamuna avuaye mubule. Nansha muvuaye mumanye ne: yeye muleje mulongeshi uvua ne bua kumumbusha mpue, Nathalia wakaleja mulongeshi. Wakamba ne: “Baledi banyi batu bandongesha ne: bua meme kusankisha Yehowa ndi ne bua kuamba anu bulelela. Bu meme tshinyi muambile mulongeshi bualu ebu, kondo kanyi ka muoyo kakavua mua kuikisha to.” Mulongeshi wakaleja dianyisha bua tshivua Nathalia muenze.

Bululame nngikadilu udi utumbishisha Yehowa

Giselle nsongakaji wa bidimu 17 uvua muangule kabuta ka ku bianza kavua ne mikanda ne dolare 35 munda. Wakenza bua balombodi ba tulasa bafikishe kabuta aku kudi muenaku. Ngondo umue pashishe, mulombodi tshindondi wa tulasa wakabadila balongi mukanda uvua utumbisha Giselle bua muvuaye ne bululame ne kuela baledi bende kalumbandi bua muvuabu bamukoleshe bimpe mu malu a Nzambi. ‘Midimu yende mimpe’ yakatumbishisha Yehowa.​—Mat. 5:14-16.

Bidi bikengela kudienzeja bikole bua kuikala bena bululame munkatshi mua bantu badi ‘badisui, banangi ba biuma, baditumbishi, badileji, kabayi ne tshijila.’ (2 Tim. 3:2) Nansha nanku, ditshina dimpe dia Yehowa, kondo ka muoyo kalongesha kudi Bible ne kusanka ne bitudi nabi bidi bituambuluisha bua kuikala ne bululame mu bulongolodi ebu bubi. Tudi kabidi tudia malanda masheme ne Yehowa ‘udi muakane ne udi unanga buakane.’​—Mus. 11:7.

[Mêyi adi kuinshi]

[Bimfuanyi mu dibeji 7]

Ditshina dimpe dia Yehowa didi dikolesha dipangadika dietu dia kuikala bena bululame

[Tshimfuanyi mu dibeji 8]

Bienzedi bietu bimpe bidi bitumbisha Yehowa