Udiku ujingulula tshijadiki tshia mudi Nzambi utulombola anyi?

BENA Isalele ne bena Ejipitu bakamona bualu buvuabu katshia kabayi banji kumona. Pavua bena Isalele bamuangale mu Ejipitu, ditutu divua pa mutu pabu dîba dionso. Ditutu edi divua dikenka butuku. Buvua bualu bua dikema. Kadi ditutu edi divua difumina kuepi? Divua ne mudimu kayi? Lelu ukadi bidimu bipite pa 3 500, ntshinyi tshitudi mua kulongela ku mushindu uvua bena Isalele bangata ‘ditutu ne tshimunyi tshia kapia’?​—Ekes. 14:24, MMV.

Dîyi dia Nzambi didi diumvuija kuvua ditutu difumine ne mudimu wadi diamba ne: ‘Yehowa wakaya kumpala kuabu mu ditutu bua kubaleja njila, ne butuku mu ditutu diakadi ne dinkenke bua kubatemena mu njila; bua bobu bamanye mua kuya mu munya ne butuku.’ (Ekes. 13:21, 22) Yehowa Nzambi wakakuata mudimu ne ditutu divua dikenka ne divuba bua kulombola bantu bende kumukila mu Ejipitu too ne mu tshipela. Bavua ne bua kuikala badilongolole bua kudilonda. Pavua biluilu bia bena Ejipitu bivua bilonda bantu ba Nzambi mu nyima bisemena pabuipi nabu, ditutu divua dimana pankatshi pabu ne bena Isalele bua kubalama. (Ekes. 14:19, 20) Nansha muvua ditutu kadiyi dilonda njila wa tshikoso, kudilonda ke mushindu umue uvua bena Isalele ne bua kufika mu Buloba bulaya.

Ditutu divua dijadikila bena Isalele ne: Yehowa uvua nabu. Divua dileja dikalaku dia Yehowa ne imue misangu uvua wakuilamu. (Nom. 14:14; Mus. 99:7) Ditutu edi diakaleja kabidi ne: Mose ke uvua Yehowa musungule bua kulombola tshisamba tshiende. (Ekes. 33:9) Bia muomumue, musangu wa ndekelu udibu bakula bua ditutu mu Bible udi ujadika muvua Yehowa musungule Yoshua bua kupingana Mose. (Dut. 31:14, 15) Bushuwa, bua kufika mu buloba bulaya bena Isalele bavua ne bua kujingulula tshijadiki tshia muvua Nzambi ubalombola ne kutshilonda.

Bakapua tshijadiki muoyo

Pavua bena Isalele bamone ditutu bua musangu wa kumpala, bivua mua kuikala bibakemeshe. Bia dibungama, tshishima tshivuabu bamona matuku onso etshi katshivua tshibakemeshe mu mushindu wa kushalabu beyemene Yehowa kashidi to. Bakatombokela Nzambi misangu ya bungi. Pavua tshiluilu tshia bena Ejipitu tshibalonda, kabavua baleja ne: bavua beyemene bukole bua Yehowa buvua mua kubasungila to. Kadi bavua bamba muvua Mose muntu wa Nzambi mulue nabu mu tshipela bua kubashipesha. (Ekes. 14:10-12) Pakapandukabu ku Mbuu mukunze, bakabanga kujana Mose, Alona ne Yehowa bamba muvuabu kabayi ne biakudia ne mâyi. (Ekes. 15:22-24; 16:1-3; 17:1-3, 7) Mbingu mikese pashishe, bakasaka Alona bua kuenza kana ka ngombe ka or. Anji elabi meji tung, ku lumue luseke lua tshitudilu bena Isalele bavua bamona ditutu dia kapia ne divuba bivua bijadika dikalaku dia Nzambi uvua mubapatule mu Ejipitu, ku lukuabu luseke lua tshitudilu bakatuadija kutendelela lupingu luvua kaluyi ne muoyo bamba ne: ‘Bena Isalele, eu ke Nzambi wenu wakanulopola mu buloba bua Ejipitu.’ Bushuwa, bavua bapetule Nzambi anyi ‘bamutatshishe bikole.’​—Ekes. 32:4; Neh. 9:18.

Buntomboji bua bena Isalele buakaleja muvuabu bapepeja bulombodi bua Yehowa. Tshilumbu katshivua ku bivuabu bamona to, kadi nku mushindu uvuabu bumvua muvua Yehowa ubalombola ne muvuabu balonda buludiki buende. Bavua bamone ditutu, kadi  bakapua muoyo ne: divua tshijadiki tshia muvua Yehowa ubalombola. Bienzedi biabu ‘biakatatshisha wa Tshijila wa bena Isalele,’ kadi bua luse luende, Yehowa wakatungunuka anu ne kubalombola ne ditutu too ne muakabuelabu mu Buloba bulaya.​—Mus. 78:40-42, 52-54; Neh. 9:19.

Tshijadiki tshia mudi Nzambi utulombola lelu

Yehowa udi ulombola bantu bende lelu anu muvuaye ulombola bena Isalele. Anu muvuaye kayi musue bua bena Isalele kudikebelabu njila wa kulonda, ke mudiye kabidi kayi musue bua tuetu kudikebela njila udi mua kutufikisha mu bulongolodi bupiabupia budiye mutulaye. Yezu Kristo ke udiye muteke bua kulombola tshisumbu. (Mat. 23:10; Ef. 5:23) Mmupeshe kabidi kasumbu ka mupika kadi kenza ne bena Kristo bela manyi ba lulamatu bukokeshi. Kasumbu aka kadi paku kasungula bakulu mu tshisumbu tshia bena Kristo.​—Mat. 24:45-47; Tito 1:5-9.

Mmunyi mutudi mua kujingulula kasumbu ka mupika wa lulamatu aka? Mona mudi Yezu nkayende umvuija: ‘Mmulami wa bintu kayi udi ulamata mfumu wende ne dinanukila, ne udi muntu wa meji? Mfumu wende neamuteke pa mutu pa bantu bende bua yeye kubapa biakudia biabu, palua dituku diabi. Mupika au neikale ne disanka, papingana mfumu wende, pamusanganaye wenza nunku.’​—Luka 12:42, 43.

Bushuwa, kasumbu ka mupika aka kadi ne “lulamatu” bualu kakatu kalekela Yehowa, Yezu, bulelela budi mu Bible ne bantu ba Nzambi to. Bu mudiku ne “meji” kadi kalombola bimpe mudimu wa mushinga mukole wa kuyisha ‘lumu luimpe lua Bukalenge’ ne kuvuija ‘ba mu bisamba bionso bayidi.’ (Mat. 24:14; 28:19, 20) Kasumbu ka mupika aka kadi kafila malongesha mimpe adi akolesha adi menze bu biakudia ‘pa dîba diabi.’ Yehowa udi uleja mudiye wanyisha bena mu kasumbu ka mupika ku mushindu udi bungi bua batendeledi balelela buenda buvula, mudiye ubalombola bua kuangata mapangadika a mushinga, bua kumvuabu bimpe bulelela budi mu Bible, mudiye ubalama bua baluishi babu kabababutudi ne mudiye ubapeshe ditalala dia mu lungenyi ne dia mu mutshima.​—Yesh. 54:17; Filip. 4:7.

Itaba bulombodi bua Nzambi

Mmunyi mutudi mua kuleja ne: tudi tuanyisha bulombodi bua Nzambi? Mupostolo Paulo wakamba ne: “Nutumikile badi banukokesha, nubakokele.” (Eb. 13:17) Kabitu bipepele bua kuenza nunku to. Tshilejilu, ditekabi pa muaba wa muena Isalele wa mu tshikondo tshia Mose. Ela meji ne: wewe mumane kuenda mutantshi ditutu didi dimana. Nedimane mutantshi bule kayi? Dituku dimue anyi? Lumingu anyi? Ngondo ya bungi anyi? Udi udiebeja ne: ‘Bidi bikengela kukutulula mabuki onso anyi?’ Udi wanji kukutulula mabuki adi ne bintu biudi nabi dijinga lukasa. Matuku makese pashishe padibi bikutonda bua kukeba bintu udi utuadija kukutulula mabuki onso. Kadi wewe mumane kujikija diakutulula, udi umona ditutu dijuka bua kuya, bikulomba bua kusuika kabidi mabuki. Kabivua mua kuikala bipepele anyi bisankisha to. Nansha nanku, bena Isalele bavua ‘basa luendu diakamue pavua ditutu dituadija kuya.’​—Nom. 9:17-22, NW.

Kadi tuetu tutu tuenza tshinyi padi Nzambi utuleja tshia kuenza? Tutuku tudienzeja bua kutumikila ‘diakamue’ padiye utuleja tshia kuenza anyi? Tutuku tutungunuka ne kuenza malu anu mutuvua tuenza kuonso eku anyi? Tutuku tutumikila mibelu bu mudi ya kulombola malonga a Bible, kuyisha bantu badi bakula muakulu muenyi, kuenza ntendelelu wa mu dîku pa tshidilu, kueleshangana diboko ne Komite wa diumvuangana ne mpitadi ne kuikala ne bukalanga mu mpuilu ne mu mpungilu anyi? Tudi kabidi tuleja mutudi tuangata bulombodi bua Yehowa ne mushinga patudi tutumikila mibelu. Tuetu tujinga kuangata mapangadika a mushinga, katueyemenyi meji etu to, kadi tukebe bulombodi bua Yehowa ne bua bulongolodi buende. Anu mutu muana ukeba bua baledi bende bamulame  tshikondo tshia mvula mukole, tuetu petu tudi tukeba bukubi bua Yehowa mu bulongolodi buende padi ntatu ya mu bulongolodi ebu idi mienze bu mvula mukole itukuata.

Tumanye ne: bantu badi Nzambi muteke bua kulombola tshitupa tshia bulongolodi buende tshidi pa buloba mbena mibi anu bu muvua Mose. Nansha nanku, ditutu divua dileja misangu yonso muvua Nzambi musungule Mose ne mumuanyishe. Tumanye kabidi ne: muena Isalele yonso kavua mua kudisunguila dîba dia kuasa luendu to. Kadi bantu bakatumikila ‘dîyi dia Yehowa, bu muakambila Yehowa Mose.’ (Nom. 9:23) Nunku Mose ke uvua ufila dîba dia kuasa luendu bualu Nzambi uvua ulombola bantu bende ku butuangaji buende.

Lelu kasumbu ka mupika kadi Yehowa muteke kadi kaleja patoke tshia kuenza ne dîba dia kutshienza. Mushindu kayi? Ku diambuluisha dia biena-bualu bidi mu Tshibumba tshia Nsentedi, Mudimu wetu wa Bukalenge, mikanda mipiamipia ne miyuki idibu benza mu mpuilu ne mu mpungilu. Kadi kabidi kafila mibelu mu bisumbu ku diambuluisha dia batangidi ba bijengu ne ba distrike anyi mikanda itubu bafundila bakulu peshi tulasa tua bakulu ne basadidi.

Utuku ujingulula bimpe tshijadiki tshia mudi Nzambi utulombola anyi? Mu matuku a ku nshikidilu aa, Yehowa udi ukuata mudimu ne bulongolodi buende bua kutulombola tuetu bantu bende mu bulongolodi bubi bua Satana ebu budi buenze bu tshipela. Ke bualu kayi tudi mu buobumue, tudi banangangane ne tudi mu bukubi.

Pavua bena Isalele bafike mu Buloba bulaya, Yoshua wakamba ne: ‘Nudi bamanye mu mitshima yenu yonso ne mu mioyo yenu yonso ne: kanuakapanga tshintu tshimpe tshimue tshiakanulaya Yehowa Nzambi wenu; nuakapeta bintu bionso.’ (Yosh. 23:14) Bia muomumue, batendeledi ba Nzambi ba lelu nebabuele mu bulongolodi bupiabupia kakuyi mpata. Kadi bua tuetu kubuelamu bidi bikengela kulonda ku budisuile bulombodi bua Nzambi. Nunku, tutungunukayi ne kujingulula tshijadiki tshia mudi Yehowa utulombola.

[Bimfuanyi mu dibeji 5]

Yehowa udi utulombola lelu ku diambuluisha dia bulongolodi buende

Mikanda idi ipatuka mu mpungilu

Tulasa tua malu a Nzambi

Bisangilu bia mudimu wa buambi