Londa Kristo Mulombodi muimpe

BANTU badi balonda bamfumu ba pa buloba batu misangu ya bungi batekeshibua mu mikolo. Kadi, bukokeshi bua Yezu bobu kabuena buela badi babulonda mâyi ku makasa to. Yezu wakamba ne: ‘Luayi kundi, bonso badi ne mudimu mukole, badi ne bujitu bunene, meme nennupe dikisha. Angatayi mutshi wanyi wa tshikokedi pa nshingu yenu, nuyile malu kundi; bualu bua meme ndi ne kalolo ne kanemu mu mutshima wanyi; nunku nenusangane dikisha mu mitshima yenu.’ (Mat. 11:28, 29) Bukokeshi bua Yezu budi bupetesha bantu disanka. Yezu udi utamba kuditatshisha bua bantu bapuekele ne badibu bakengesha ne udi ubabikila bua kuambula mutshi wende wa tshikokedi. Kadi kulonda bulombodi bua Yezu kudi kumvuija tshinyi?

Mupostolo Petelo wakafunda ne: ‘Kristo wakakenga bua bualu buenu, wakanushila tshilejilu bua nuenu numulonde mu makasa ende.’ (1 Pet. 2:21) Bua tshinyi bidi bikengela tuetu kulonda mu makasa a Yezu? Ela meji ne: udi mu tshisumbu tshia bantu badi bapitshila muaba udibu bajiike bingoma mu buloba, kadi munkatshi muenu mudi anu muntu umue udi mumanye muaba muimpe wa kuendela. Kuakulondaku mu makasa ende, pamuapa upingaja dikasa diebe pa muaba udiye mudiate anyi? Bia muomumue, bua Nzambi kutulama mu matuku atshilualua, tudi ne bua kulonda bimpe menemene tshilejilu tshia Yezu mu nsombelu wetu. Mbuena kuamba ne: kumuteleja, kumutumikila ne kueleshangana diboko ne baleji mpala bende.

Ikala uteleja ne utumikila

Pakavuaye ku ndekelu kua Muyuki wende wa pa mukuna, Yezu wakamba ne: ‘Muntu yonso udi mumvue mêyi anyi aa ne utu uatumikila neikale bu muena meji, wakibaka nzubu wende pa mutu pa dibue; mvula yakaloka, misulu yakuula, bipupu biakalua, biakakuma ku nzubu, kadi nzubu kakupuka, bua yeye wakadi muibaka pa dibue.’​—Mat. 7:24, 25.

Yezu wakafuanyikija muntu udi uteleja ne utumikila mêyi ende ne ‘muena meji.’ Patudi tutumikila ne muoyo umue, tutuku tuleja ne: tudi tunemeka ne tuanyisha tshilejilu tshia Kristo anyi? Mu mikenji ya Yezu, tutu basue kutumikila anu idi mipepele ne idi itusankisha anyi? Yezu wakamba ne: ‘Ntu ngenza malu adi asankisha Nzambi.’ (Yone 8:29) Tudienzejayi bua kulonda tshilejilu tshiende.

Mu bidimu lukama bia kumpala, bapostolo bakafila tshilejilu tshimpe tshia kulonda bulombodi bua Kristo. Musangu kampanda Petelo wakambila Yezu ne: ‘Apu tuetu tuakushiya malu etu onso, tuakukulonda.’ (Mâko 10:28) Bushuwa, bapostolo bavua bangata bulombodi bua Yezu ne mushinga wa bungi bualu bakalekela malu makuabu onso bua kumulonda.​—Mat. 4:18-22.

Eleshangana diboko ne baleji mpala ba Kristo

Katupa kakese kumpala kua lufu luende, Yezu wakaleja mushindu mukuabu utudi mua kulonda bulombodi buende. Wakamba ne: ‘Witabuja ungatuma neangitabuje meme.’ (Yone 13:20) Yezu uvua wakula bua baleji mpala bende bela manyi bu “bana” babu. (Mat. 25:40) Panyima pa Yezu mumane kubishibua ne muye mu diulu, “bana” babu bakashala pa muaba wende bikale ‘milopo bua bualu bua Kristo’ babikila bantu bakuabu bua kulengejangana ne Yehowa Nzambi. (2 Kol. 5:18-20) Kuitaba bulombodi bua Kristo kudi kumvuija kutumikila “bana” babu.

 Tudi ne bua kukonkonona mushindu utudi tuangata mibelu ya mu Bible idibu batupesha pa dîba dikumbane idi mu mikanda yetu idi yumvuija Bible. Patudi tulonga Bible ne tubuela mu bisangilu bia tshisumbu, badi batuvuluija malu avua Kristo muambe. (2 Pet. 3:1, 2) Tudi tuleja dianyisha ne muoyo mujima bua malongesha aa patudi tuayila. Kadi ntshinyi tshitudi ne bua kuenza padibu imue misangu bambulula mubelu kampanda? Tshilejilu, Dîyi dia Nzambi didi dibela bena Kristo bua kuselangana ‘anu mu Mukalenge.’ (1 Kol. 7:39) Mu bidimu bidi bishale ebi, bavua bambulule tshiena-bualu etshi misangu ya bungi mu Tshibumba tshia Nsentedi. Bana babu ne Kristo badi bushuwa baleja mudibu baditatshisha ne dinanga dionso bua malanda etu ne Yehowa padibu batufundila biena-bualu bidi biakula bua tshilumbu etshi ne bua malu makuabu. Tuetu tutumikila malu adibu batuvuluija aa netuleje ne: tudi tulonda Mulombodi muimpe, Yezu Kristo.

Nsumuinu 4:18 udi wamba ne: ‘Njila wa bantu bakane udi bu dîba dia kabundubundu, didi ditema ne dikenkakenka too ne pakumbana dîba dia munda munya.’ Bushuwa Yezu udi utungunuka ne kutuambuluisha bua kumvua Bible bimpe. Mushindu mukuabu utudi tueleshangana diboko ne “bana” babu ne Kristo nkuitaba mumvuija onso mapiamapia adi ‘mupika wa lulamatu ne wa budimu’ upatula.​—Mat. 24:45, NW.

Tudi kabidi tuleja mutudi tutumikila “bana” babu ne Kristo patudi tueleshangana diboko ne bakulu badibu bateke mu tshisumbu tshia bena Kristo. Mupostolo Paulo wakamba ne: ‘Nutumikile badi banukokesha, nubakokele; bua bobu badi bikale ne tshitabela bua mioyo yenu.’ (Eb. 13:17) Tshilejilu, mukulu udi mua kutukankamija bua kuangata dienza ntendelelu wa mu dîku pa tshibidilu ne mushinga anyi kutubela bua kulengeja mudimu wetu wa buambi. Mutangidi wa tshijengu anyi wa distrike udi mua kutupesha mibelu ya mu Bible bua nsombelu kampanda wa buena Kristo. Patudi tutumikila mibelu ya buena eyi ne muoyo mujima, tudi tuleja mutudi tulonda Yezu Mulombodi wetu.

Lelu bantu kabena ne bulombodi bua nsongo to. Bidi bienza disanka bua kulonda bulombodi bua Kristo bua dinanga. Mu mishindu yonso, tutumikilayi Mulombodi wetu ne tueleshanganayi diboko ne bantu badiye ukuata nabu mudimu lelu.

[Bimfuanyi mu dibeji 27]

Utuku utumikila mubelu wa mu Bible wa kubenga kuselangana ne muntu udi kayi muena Kristo nebe anyi?