“Mulami mulenga muikale kabidi mulunda wa pa muoyo”

JOHN (JACK) BARR udi muenzele Yehowa mudimu mu Kasumbu kaludiki ka Bantemu ba Yehowa mmujikije lubilu luende lua pa buloba mu Disambombo mu dinda dia matuku 4 ngondo wa dikumi ne muibidi tshidimu tshia 2010. Uvua ne bidimu 97. Bavua bamubikila ne: “mulami mulenga ne mulunda wa pa muoyo.”

Muanetu Jack Barr uvua muledibue mu tshimenga tshia Aberdeen mu ditunga dia Écosse, uvua muana wa ndekelu mu dîku diabu dia bana basatu. Baledi bende bonso babidi bavua bela manyi. Muanetu Barr uvua uleja muvuaye munange nsombelu wende wa pa buloba ne uvua kabidi ne dianyisha bua tshilejilu tshimpe tshivua baledi bende bavuaye munange bamushile.

Pakakumbajaye bidimu dikumi ne bia mu njila, Jack uvua umona bimukolela bua kuyukila ne bantu bavuaye kayi mumanye. Kadi wakaditatshisha bikole bua kutantamena lutatu elu, mu tshidimu tshia 1927 mu Dia lumingu mu mapingaja, pavuaye ne bidimu 14, wakambila tatuende bua kuya kumufila mu mudimu wa ku nzubu ne ku nzubu. Ke mushindu wakatuadijaye kuenzela Yehowa mudimu. Kutuadijila ku dituku adi too ne ku lufu luende, muanetu Barr uvua anu uyisha lumu luimpe ne tshisumi.

Dîba diakafua mamuende mu njiwu kampanda, Jack wakatuadija kuela meji bikole bua tshivuaye mua kuenza mu nsombelu wende, mu tshidimu tshia 1929 wakadilambula kudi Yehowa ne kutambula mu tshidimu tshia 1934. Pashishe mu 1939 bakamubikila ku Betele wa mu Londres mu ditunga dia Angleterre. Ke tshidimu tshiakatuadijaye kuenza mudimu wa ku dîba ne ku dîba udiye muenze mu bidimu 71.

Mu dia 29 ngondo wa dikumi tshidimu tshia 1960, muanetu Barr wakatuadija tshivuaye ubikila ne: “malanda a mushinga a pa buawu” pakaselaye Mildred Willett uvua mpanda-njila wa tshisumi ne misionere wa bidimu bia bungi. Muanetu Barr ne mukajende bavua bena dibaka ba tshitembu ne bakashala anu ne bikadilu bimpe too ne pakajikija mukajende Mildred lubilu luende lua pa buloba mu ngondo wa dikumi mu tshidimu tshia 2004. Muanetu Barr ne mukajende bavua babala Bible pamue dituku dionso mu dibaka diabu.

Bua badi bamanye muanetu Jack Barr, badi bavuluka muntu uvua ne tshibidilu tshia kufila mibelu ya meji ne milenga miangatshila mu Bible mu mushindu muimpe. Uvua muenji wa mudimu wa dikema, uvua uditeka pa muaba wa bakuabu, uvua mulami wa dinanga ne mulunda wa kueyemena. Mandamuna ende, miyuki yende ne masambila ende bivua bileja muvuaye munange bulelela ne muvuaye mu malanda mashême ne Yehowa.

Nansha mutudi bajimije muanetu Barr, tudi ne disanka bualu mmupete difutu diende dia muoyo udi kauyi ufua, diakalenga divuaye mutekemene ne divuaye wambila bakuabu misangu yonso. Mbualu buvuaye mutekemene bikole.​—1 Kol. 15:53, 54. *

[Mêyi adi kuinshi]