Bana badiku mua kutambula anyi?

MUANETU mukuabu wa balume diende Carlos * wa mu ditunga dia Philippines udi wamba ne: “Ndi ne disanka dia bungi bua mudi muananyi wa bakaji mulue Ntemu wa Yehowa, ndi mumanye ne: yeye pende udi ne disanka dia muomumue.” Muanetu mukuabu wa mu Grèce udi wamba ne: “Meme ne mukajanyi tudi ne disanka dia bungi bua muvua bana betu basatu batambule ne balue Bantemu ba Yehowa patshivuabu anu bana. Badi balubuluka mu malu a Yehowa ne badi ne disanka bua kumuenzela mudimu.”

Bushuwa baledi bena Kristo batu bumvua disanka padi bana babu batambula, kadi imue misangu batu ne buôwa. Mamu mukuabu udi wamba ne: “Mvua ne disanka dia bungi ne buôwa kabidi.” Bua tshinyi? Udi wamba ne: “Ngakajingulula ne: muananyi udi mpindieu ne dibanza ku mêsu kua Yehowa.”

Kuenzela Yehowa mudimu bamane kutambula ntshipatshila tshidi bana bonso ne bua kudifundila. Kadi baledi badi batshina Nzambi badi mua kudiebeja ne: ‘Ndi mumanye ne: muananyi udi ulubuluka bimpe, kadi udiku mua kushala mukezuke ku mêsu kua Yehowa ne kukandamena bantu padibu bamusaka bua kuenza malu mabi anyi?’ Baledi bakuabu badi mua kudiebeja ne: ‘Muananyi udi mua kutungunuka ne kuenzela Yehowa mudimu ne disanka ne tshisumi yeye mutuilangane ne diteta dia dinanga dinekesha dia biuma anyi?’ Mmibelu kayi ya mu Bible idi mua kuambuluisha baledi bua kumanya bikala bana babu bakumbane bua kutambula?

Bualu bunene budi bukengela kukumbaja bua kutambula, nkuikala muyidi wa Kristo

Dîyi dia Nzambi ki ndikose bidimu bungi kampanda bua muntu kushishaye kutambula to, kadi didi dileja amue malu adi muntu ne bua kukumbaja kumpala kua yeye kutambula. Yezu wakambila bayidi bende ne: ‘Nuvuije ba bisamba bionso bayidi, nubabatize.’ (Mat. 28:19) Nunku badi mua kutambula ngaba bakadi bayidi ba Kristo.

Kuikala muyidi kudi kumvuija tshinyi? Mukanda wa Étude perspicace des Écritures udi wamba ne: “Muaku muyidi udi uleja bantu bonso badi bitabuje malongesha a Kristo ne baatumikila.” Bana badiku mua kulua bayidi balelela ba Kristo anyi? Muanetu mukuabu wa bakaji uvua muenze mudimu wa bu misionere mu Amérique wa ku sud munkatshi mua bidimu 40 udi wakula  buende yeye ne bua bana babu ba bakaji babidi wamba ne: “Tuvua bakumbane bua kumanya ne: tuvua basue kuenzela Yehowa mudimu ne kupeta muoyo mu Mparadizu. Bu mutuvua badilambule kudi Yehowa, bivua bituambuluisha bua kukandamena mateta atu bana batuilangana nawu. Katuena tunyingalala bua mutuvua badilambule kudi Nzambi ne buana buonso to.”

Mmunyi muudi mua kumanya ne: muanebe ukadi muyidi wa Kristo? Bible udi wamba ne: ‘Muana mene udi umuenesha tshikadilu tshiende ku bienzedi biende, ne bikala mianda idiye wenza milengele ne miakane.’ (Nsu. 20:11) Tukonkononayi amue malu adi aleja mudi ‘kudiunda kua muana kumueneka’ bua kuleja mudiye muyidi.​—1 Tim. 4:15.

Malu adi aleja ne: muanebe ukadi muyidi wa Kristo

Muanebe utuku ukutumikila anyi? (Kolos. 3:20) Utuku wenza midimu ya kumbelu iutu umupesha anyi? Bible udi wakula bua Yezu pavuaye ne bidimu 12 wamba ne: ‘Wakadi utumikila baledi bende.’ (Luka 2:51) Bushuwa lelu kakuena muana udi mua kutumikila baledi bende anu mudibi bikengedibua to. Kadi bena Kristo balelela badi ne bua ‘kulonda mu makasa a Yezu.’ Nunku bana badi bajinga kutambula badi ne bua kuikala batumikila baledi babu.​—1 Pet. 2:21.

Konkonona nkonko idi ilonda eyi: Muanebe utuku ‘ukeba diambedi bukalenge’ padiye uyisha ne tshisumi anyi? (Mat. 6:33) Utuku musue kuyisha ne bantu bakuabu lumu luimpe anyi bitu bikengela kumusaka bua kuya mu buambi ne kuyukila ne bantu panudi ku nzubu ne ku nzubu? Utuku mumanye tshidi kuikala muambi wa lumu luimpe udi kayi muanji kutambula kumvuija anyi? Utuku ne dijinga dia kupinganyina bantu bavua bamuteleje mu buambi anyi? Utuku udimanyisha kudi balongi babu ne balongeshi bende bua mudiye Ntemu wa Yehowa anyi?

Utuku wangata dibuela mu bisangilu ne mushinga anyi? (Mus. 122:1) Utuku wandamuna mu dilonga dia Tshibumba tshia Nsentedi ne Dilonga dia Bible dia Tshisumbu anyi? Utuku wenza midimu ya mu Kalasa ka Mudimu wa Nzambi ne disanka anyi?​—Eb. 10:24, 25.

Muanebe utuku udienzeja bua kuikala ne bibidilu bimpe padiye wepuka balunda babi mu kalasa ne miaba mikuabu anyi? (Nsu. 13:20) Utuku munange mijiki, filme, ndongamu ya ku televizion, manaya a video ne malu a ku Enternete a mushindu kayi? Malu adiye wakula ne wenza adiku aleja ne: mmusue kutumikila mikenji ya mu Bible anyi?

Muanebe mmumanye Bible bimpe anyi? Udiku mua kuakula mu mêyi ende nkayende malu adiye ulonga mu ntendelelu wenu wa mu dîku anyi? Udiku mua kumvuija malongesha a nshindamenu a mu Bible anyi? (Nsu. 2:6-9) Utuku wanyisha kubala Bible ne kulonga mikanda ya mupika wa lulamatu ne wa budimu anyi? (Mat. 24:45) Utuku wela nkonko pa malongesha a mu Bible ne mvese anyi?

Nkonko eyi idi mua kukuambuluisha bua kumona mudi muanebe ulubuluka mu malu a  Nzambi. Panyima pa wewe mumane kukonkonona nkonko eyi, udi mua kumona ne: muanebe udi ne bua kuakaja amue malu kumpala kua kutambula. Kadi yeye wenza malu adi aleja ne: mmuyidi wa Kristo ne ukadi mudilambule kudi Nzambi, udi mua kumuanyishila bua kutambula.

Bana badi mua kutumbisha Yehowa

Batendeledi ba Yehowa ba bungi bavua baleje ditabuja ne lulamatu pavuabu bana. Vuluka tshilejilu tshia Yosefe, Samuele, Yoshiya ne Yezu. (Gen. 37:2; 39:1-3; 1 Sam. 1:24-28; 2:18-20; 2 Kul. 34:1-3; Luka 2:42-49) Bana ba bakaji banayi ba Filipo bavua benza mudimu wa buprofete bavua mua kuikala balongeshibue bimpe katshia ku buana.​—Bien. 21:8, 9.

Ntemu kampanda wa mu Grèce udi wamba ne: “Mvua mutambule pamvua ne bidimu 12. Tshitu muanji kunyingalala bua dipangadika dimvua muangate edi to. Kukadi bidimu 24 katshia ngatambula ne ndi muenze bidimu 23 mu mudimu wa ku dîba ne ku dîba. Dinanga dindi munange Yehowa divua dingambuluisha misangu yonso bua kutantamena ntatu itu bansonga batuilangana nayi. Pamvua ne bidimu 12 tshivua mumanye Bible bimpe bu mundi mumumanye mpindieu to. Kadi mvua mumanye ne: mvua munange Yehowa ne mvua musue kumuenzela mudimu bua kashidi. Ndi ne disanka bua mudiye mungambuluishe bua kutungunuka ne kumuenzela mudimu.”

Muntu udi ne bikadilu bidi bileja mudiye muyidi mulelela wa Kristo udi ne bua kutambula nansha yeye muana anyi mukole. Mupostolo Paulo wakamba ne: ‘Bantu badi bitabuja ne mutshima bua kupeta buakane, badi bajikula ne mukana bua kupeta lupandu.’ (Lomo 10:10) Padi muana ulua muyidi wa Kristo ne utambula, yeye ne baledi bende mbakumbaje bualu bua mushinga. Kanulekedi tshintu nansha tshimue tshinupangisha nuenu ne bana benu bua kupeta masanka adi manuindile to.

[Mêyi adi kuinshi]

[Kazubu mu dibeji 5]

Tuikale tumona batismo mu mushindu muimpe

Bamue baledi badi bamona padi muanabu utambula bu ne: mbualu buimpe kadi batshina ne: bualu ebu budi mua kukebesha njiwu. Kadi batismo ne mudimu wa tshijila utudi tuenzela Yehowa bidiku mua kupangisha muntu bua kupeta disanka anyi? Ki ntshidi Bible wamba to. Nsumuinu 10:22 udi wamba ne: ‘Disankisha didi difuma kudi Yehowa didi divuija bubanji, ne kena utenteka kanyinganyinga pa mutu padi.’ Paulo wakafundila pende Timote wamba ne: ‘Bushuwa, ditshina dia Nzambi ntshiuma tshipite bunene tshidi natshi muntu udi usanka bua bidiye nabi.’​—1 Tim. 6:6, MMM.

Bushuwa kuenzela Yehowa mudimu ki mbualu bupepele to. Yelemiya uvua mupete ntatu ya bungi pavuaye wenza mudimu wende wa buprofete. Wakafunda bua ntendelelu wende wa Nzambi ne: ‘Ngakasangana mêyi ebe, ngakaadia; mêyi ebe akadi kundi bu disanka ne akasankisha mutshima wanyi; bualu bua badi bambikila ku dîna diebe, wewe Yehowa, Nzambi wa misumba.’ (Yel. 15:16) Yelemiya uvua mumanye ne: mudimu uvuaye wenzela Nzambi uvua umupetesha disanka. Bulongolodi bua Satana budi butukebela ntatu. Nunku baledi badi ne bua kuambuluisha bana babu bua kumanya dishilangana didi pankatshi pa mudimu utudi tuenzela Nzambi ne bulongolodi bua Satana.​—Yel. 1:19.

 [Kazubu/​Tshimfuanyi mu dibeji 6]

Muananyi udiku mua kuanji kuindila bua kushisha kutambula anyi?

Baledi batu imue misangu bambila bana babu bua kuanji kuindila kabidi ndambu bua kushisha kutambula nansha bobu bakadi bakumbane bua kutambula. Bua tshinyi?

Bidi bingenza buôwa bua muananyi kutambula, bualu udi mua kulua kuenza bubi bunene ne kumuipatabu mu tshisumbu. Tudiku mua kuamba ne: muana udi uladikija bua kutambula kakuikala ne dibanza ku mêsu kua Nzambi bua bienzedi biende anyi? Solomo wakabela bana wamba ne: ‘Umanye biebe ne: Nzambi neakulumbuluishe bua bienzedi biebe.’ (Muam. 11:9) Paulo uvua wakula bua bantu ba bidimu bionso pakambaye ne: ‘Buonso buetu, muntu ne muntu, neabadile Nzambi malu ende.’​—Lomo 14:12.

Batendeledi ba Nzambi bonso, bakadi batambule ne badi kabayi banji kutambula badi ne dibanza ku mêsu kuende. Ikala mumanye ne: Yehowa udi ulama batendeledi bende bualu ‘kena witabuja bua bobu kutetshibua ne diteta didi dibapita bukole.’ (1 Kol. 10:13) Bu mudibu anu ‘batabale’ ne batantamena mateta, Nzambi neabakuatshishe. (1 Pet. 5:6-9) Mamu mukuabu muena Kristo udi wamba ne: “Bana bakadi batambule mbamanye malu adi abambuluisha bua kukandamena malu mabi a mu bulongolodi ebu. Muananyi wa balume uvua mutambule ne bidimu 15 wakamona ne: batismo uvua bukubi. Udi wamba ne: ‘Wewe mumane kutambula, kuena wela meji bua kuenza bualu budi bubengangana ne mikenji ya Yehowa to.’ Batismo udi usaka bantu bua kuenza malu makane.”

Wewe mulongeshe bana bebe ku mêyi ne ku bienzedi bua kutumikila Yehowa, udi mua kuikala mushindike ne: nebatungunuke ne kumutumikila patambulabu. Nsumuinu 20:7 udi wamba ne: ‘Muntu muakane udi wenda mu buakane bua mutshima wende, bana bende badi bamulonda badi bavudijibua disanka.’

Ndi musue bua muananyi anji akumbaje bipatshila kampanda. Bana badi ne bua kulonga mudimu bua kuluabu kudiambuila bujitu. Kadi kubasaka anu bua kulonga tulasa tua bungi ne kukeba makuta pamutu pa kuteka ntendelelu mulelela pa muaba wa kumpala kudi ne njiwu. Yezu wakakula bua ‘mamiinu’ anyi dîyi dia Bukalenge didi kadiyi didiunda wamba ne: ‘Yeye wakadi mumiamina mu mionji ya mêba udi umvua dîyi dia Nzambi; kadi meji a malu a pa buloba ne mashimi a biuma bidi binyengela dîyi, yeye udi wikala kayi ne mamiinu.’ (Mat. 13:22) Baledi bobu basaka muanabu bua kudifundila bipatshila bia malu a pa buloba bidi mua kumufikisha ku dilengulula malanda ende ne Yehowa, muana kakuikala ne dijinga dia kuenzela Nzambi mudimu to.

Mukulu kampanda mupiluke udi wakula bua bana badi bakumbane bua batismo kadi baledi babu babakandika wamba ne: “Kukandika muana bua kutambula kudi mua kumupangisha bua kulubuluka bimpe mu bulelela ne kumutekesha mu mikolo.” Mutangidi muena ngendu mukuabu udi wamba ne: “Muana udi mua kutuadija kudimona kayi mukumbane peshi umvua buôwa bua kudia malanda ne Yehowa. Udi mua kuipatshila malu a pa buloba bua kudimona pende bu muntu.”

[Tshimfuanyi]

Tulasa tua iniversite ke tutudi ne bua kuteka pa muaba wa kumpala anyi?

[Tshimfuanyi mu dibeji 3]

Bana badi mua kuleja mudibu bayidi ba Kristo

[Bimfuanyi mu dibeji 3]

Bana badi mua kulongolola bisangilu ne kuandamuna

[Tshimfuanyi mu dibeji 4]

Bana badi ne bua kutumikila baledi babu

[Tshimfuanyi mu dibeji 4]

Bana badi mua kuyisha

[Tshimfuanyi mu dibeji 4]

Bana badi mua kuenza masambila pa nkayabu