Dikisha dia Nzambi ntshinyi?
Dikisha dia Nzambi ntshinyi?
“Nunku kudi kushala dikisha dia lumingu dia bantu ba Nzambi.”—EB. 4:9.
1, 2. Ntshinyi tshitudi tulongela ku Genese 2:3? Nkonko kayi ituandamuna?
MU NSHAPITA wa kumpala wa mukanda wa Genese, badi balejamu ne: Nzambi wakalongolola buloba mu matuku asambombo bua bantu kusombelapu. Matuku aa kaavua matuku etu a mêba 24 to, kadi avua bikondo bule kampanda. Bible udi wakula bua ndekelu wa tshikondo tshionso wamba ne: ‘Dinda ne dilolo biakadiku.’ (Gen. 1:5, 8, 13, 19, 23, 31) Kadi bua dituku dia muanda mutekete Bible udi wamba ne: ‘Nzambi wakavudijila dituku dia muanda mutekete disanka, wakadijidila; bualu bua yeye wakikisha dituku adi ku mudimu wende wonso wa kufuka.’—Gen. 2:3.
2 Padi Mose wamba ne: Nzambi ‘wakikisha,’ udi usua kumvuija ne: Nzambi utshivua wikisha tshikondo atshi pavua Mose mufunde mukanda wa Genese mu tshidimu tshia 1513 kumpala kua Yezu. Pashishe Nzambi wakamba kabidi mu Bible ne: bantu badi mua kubuela mu dikisha diende. Nzambi utshidi anu wikisha too ne lelu anyi? Bikalabi nanku, tudiku mua kubuela mu dikisha diende anyi? Mbimpe tuetu kupeta mandamuna a nkonko eyi.
Yehowa utshidi anu ‘wikisha’ anyi?
3. Mmunyi mudi mêyi a Yezu adi mu Yone 5:16, 17 aleja ne: dituku dia muanda mutekete ditshivua ditungunuka mu matuku a Yezu?
3 Kudi malu adi ajadika ne: dituku dia muanda mutekete ditshivua ditungunuka mu bidimu lukama bia kumpala. Tshia kumpala, tumone tshivua Yezu muambile baluishi bende bavua bamubande pavuaye muondope muntu dituku dia Nsabatu bamba ne: mmuenze mudimu. Yezu wakabambila ne: ‘Tatu wanyi udi ukuata mudimu too ne katataka, ne meme kabidi ndi ngukuata.’ (Yone 5:16, 17) Yezu uvua musue kuamba tshinyi? Bavua bamubanda ne: udi wenza mudimu dia Nsabatu. Ke yeye kubandamuna ne: ‘Tatu wanyi udi ukuata mudimu too ne katataka.’ Bushuwa Yezu uvua wambila baluishi bende ne: ‘Meme ne Tatuanyi tudi tuenza mudimu wa muomumue. Bu mudi Tatuanyi utungunuka ne kuenza mudimu mu dituku dia Nsabatu wa bidimu binunu ne binunu, meme panyi ndi mua kutungunuka ne kuenza mudimu too ne dia Nsabatu.’ Nunku Yezu uvua musue kuleja ne: dituku dia muanda mutekete anyi dia dikisha dia Nzambi ditshivua ditungunuka bua buloba mu tshikondo tshiende. *
4. Mbualu kayi buvua Paulo muambe budi buleja ne: dituku dia muanda mutekete ditshivua ditungunuka mu matuku ende?
4 Bualu buibidi budi buleja ne: dituku dia muanda mutekete ditshivua ditungunuka mu matuku a Yezu, mbabuleje kudi mupostolo Paulo. Pavuaye utela mêyi adi mu Genese 2:2 adi akula bua dikisha dia Nzambi, Paulo wakafunda ne: ‘Tuetu bakitabuja tudi tubuela mu dikisha.’ (Eb. 4:3, 4, 6, 9) Bidi bimueneka ne: dituku dia muanda mutekete ditshivua ditungunuka mu matuku a Paulo. Kadi ntshikondo kayi tshivua dituku edi ne bua kujika?
5. Dituku dia muanda mutekete divua ne tshipatshila kayi? Tshipatshila atshi netshikumbane dîba kayi?
5 Bua kuandamuna ku lukonko elu tudi ne bua kuvuluka tshivua Yehowa musunguile dituku dia muanda mutekete. Genese 2:3 udi wamba ne: ‘Nzambi wakavudijila dituku dia muanda mutekete disanka, wakadijidila.’ Yehowa wakajidila dituku edi anyi kudivuija dia pa buadi bua kukumbaja malu avuaye mulongolole bua buloba. Uvua mulongolole bua bantu badi bamutumikila kusombabu pa buloba, kubulongolola ne kulama bintu bidipu. (Gen. 1:28) Yehowa Nzambi ne Yezu Kristo ‘mukalenge wa dituku dia nsabatu’ badi ‘bakuata mudimu too ne katataka’ bua kukumbajabu tshivua Nzambi mulongolole bua buloba. (Mat. 12:8) Dituku dia dikisha dia Nzambi neditungunuke too ne pakumbana malu adiye mulongolole bua buloba ku ndekelu kua bidimu tshinunu bia bukokeshi bua Yezu.
‘Katuponyi mu kulonda kua tshifuanyikiji tshiotshimue tshia bupidia’
6. Mbilejilu kayi bidi mua kutudimuija? Bidi mua kutulongesha tshinyi?
6 Nzambi uvua mumvuije Adama ne Eva patoke tshivuaye mulongolole bua buloba, kadi bakamutombokela. Bushuwa, Adama ne Eva ke bantu ba kumpala bavua babenge kutumikila Nzambi. Katshia anu pine apu, bantu ba bungi mbatombokele Nzambi. Nansha bena Isalele tshisamba tshivua Nzambi musungule, bakamutombokela misangu ne misangu. Ke bualu kayi, Paulo wakadimuija bena Kristo ba mu bidimu lukama bia kumpala ne: bamue ba kudibu bavua mua kutombokela Nzambi anu bu muvua bena Isalele ba kale benze. Wakamba ne: ‘Nunku tuditshintayi bietu bua kubuela mu dikisha adi, bua muntu kaponyi mu kulonda kua tshifuanyikiji tshiotshimue tshia bupidia.’ (Eb. 4:11) Paulo wakaleja ne: dibenga kutumikila didi mua kupangisha bantu bua kubuela mu dikisha dia Nzambi. Bidi biumvuija tshinyi buetu tuetu? Tuetu babenge kutumikila mu mushindu kampanda malu adi Nzambi mulongolole, tudiku mua kupanga kubuela mu dikisha diende anyi? Bidi ne mushinga wa bungi bua kumanya diandamuna dia lukonko elu bualu netuakuilepu bikole mu tshiena-bualu etshi. Tuanji kukonkonona muvua tshilejilu tshibi tshia bena Isalele tshibapangishe mua kubuela mu dikisha dia Nzambi.
‘Kabena babuela mu dikisha dianyi’
7. Bua tshinyi Yehowa uvua mupikule bena Isalele ku bupika mu Ejipitu? Bena Isalele bavua ne bua kuenza tshinyi?
7 Mu tshidimu tshia 1513 kumpala kua Yezu, Yehowa wakambila muena mudimu wende Mose malu avuaye mulongolole bua bena Isalele. Nzambi wakamba ne: ‘Ngakulua panshi bua kubasungila mu bianza bia bena Ejipitu, ne bua kubalopola mu buloba abu, ne bua kulua nabu mu buloba buimpe ne bunene, mu buloba mudi mabele ne buitshi bia bungi.’ (Ekes. 3:8) Anu muvua Yehowa mulaye nkambua wabu Abalahama, uvua musue kusungila bena Isalele ‘mu bianza bia bena Ejipitu’ ne kubavuija tshisamba tshiende. (Gen. 22:17) Nzambi wakapesha bena Isalele mikenji ivua mua kubambuluisha bua kuikala nende mu ditalala ne kudia nende bulunda. (Yesh. 48:17, 18) Wakambila bena Isalele ne: ‘Binuatumikila dîyi dianyi, ne binuanemeka tshipungidi tshianyi, nuenu nenuikale bantu banyi ba munkatshi mua bantu bonso; bualu bua buloba buonso mbuanyi.’ (Ekes. 19:5, 6) Nunku, bena Isalele bavua mua kuikala mu malanda mimpe ne Nzambi anu pavuabu batumikila mikenji yende.
8. Bu bena Isalele batumikile Nzambi bavua mua kuikala ne nsombelu kayi?
8 Anji elabi meji ku nsombelu uvua bena Isalele mua kuikala nende bu bobu batumikile Nzambi. Yehowa uvua mua kuikala mubenesha madimi abu, madimi abu a mvinyo ne bimuna biabu. Uvua kabidi mua kuikala mubakube ku tshianza tshia bena lukuna babu. (Bala 1 Bakelenge 10:23-27.) Bavua ne diakalenga dia kubenga kuikala ku bukokeshi bua bisamba bikuabu, nansha mu tshikondo tshia Yezu kabavua mua kuikala ku bukokeshi bua bena Lomo bavua bakuate bisamba bia bungi to. Yehowa uvua musue bua ne: bisamba bikuabu bilonde tshilejilu tshimpe tshia bena Isalele. Uvua musue bua muntu yonso amanye ne: bantu bonso badi bamutumikila yeye Nzambi mulelela, nebapete disanka.
9, 10. (a) Dijinga dia bena Isalele dia kupingana mu Ejipitu divua dibi bua tshinyi? (b) Dipingana diabu divuaku mua kubambuluisha bua kutendelela Yehowa muvuabi bikengela anyi?
9 Bena Isalele bavua ne diakalenga dia kuenza mudimu pamue ne Yehowa bua kukumbaja malu avuaye mulongolole, nunku bavua mua kupeta masanka, ne buloba bujima buvua mua kubeneshibua bua bualu buabu. (Gen. 22:18) Kadi bena Isalele ba bungi kabavua bangate ne mushinga diakalenga dia kuikala tshisamba tshia Nzambi ne kuikala tshilejilu kudi bisamba bikuabu to. Bakajinga too ne bua kupingana mu Ejipitu. (Bala Nomba 14:2-4.) Kadi bu bobu mua kupingana mu Ejipitu, mmunyi muvua dijinga dia Nzambi dia kubavuija tshisamba tshia tshilejilu kudi bisamba bikuabu mua kukumbana? Kadivua mua kukumbana to. Bu bena Isalele bapingane ku bupika bua bena Ejipitu, kabavua mua kukokesha bua kutumikila mikenji ya Mose, ne Yehowa kavua mua kubabuikidila mibi yabu to. Pavua bena Isalele basue kupingana mu Ejipitu, bavua batangila anu majinga abu ne kabavua bela meji bua Nzambi ne malu avuaye mulongolole to. Ke bua tshinyi, Yehowa wakabambila ne: ‘Ngakadi ne ba mu tshikondo etshi tshiji ne ngakamba ne: badi bapambuka mu mitshima yabu misangu yonso, ne kabakamanya njila yanyi; bu mungakaditshipa mu tshiji tshianyi ne: kabena babuela mu dikisha dianyi.’—Eb. 3:10, 11; Mus. 95:10, 11
10 Dijinga diabu dia kupingana mu Ejipitu diakaleja ne: kabavua bangata mabenesha a kudi Yehowa ne mushinga to, kadi bavua bajinga bua kuikala badia puaro ne matungulu a mishindu mishilangane avuabu badia mu Ejipitu. (Nom. 11:5) Bavua anu bu Esau uvua kayi muangate buana buta buende ne mushinga ne mubupanyishe ku biakudia.—Gen. 25:30-32; Eb. 12:16.
11. Nansha muvua bena Isalele bavua bapatuke mu Ejipitu bapange ditabuja, bualu ebu buvuaku bushintulule malu akavua Yehowa mulongolole anyi?
11 Nansha muvua bena Isalele bavua bafumine mu Ejipitu bapange ditabuja, Yehowa wakatungunuka ne ‘kukuata mudimu’ ne lutulu bua kukumbaja malu avuaye mulongolole ku diambuluisha dia bana babu. Bana babu bavua batumikila Yehowa kupita ba tatuabu. Bakatumikila dîyi dia Yehowa dia kubuela mu Buloba bulaya ne kubukuatabu. Yoshua 24:31 udi wamba ne: ‘Nunku bena Isalele bakakuatshila Yehowa mudimu matuku onso a Yoshua, ne matuku onso a bakulu bakashala ne muoyo pakafua Yoshua ne bakadi bamanye malu onso akenzela Yehowa bena Isalele.’
12. Mmunyi mutudi bamanye ne: bena Kristo badi mua kubuela mu dikisha dia Nzambi lelu?
12 Kadi bena Isalele bavua batumikila Nzambi abu bakakulakaja ne bakafua. Bakuabu bavua babalonde ‘kabakamanya Yehowa anyi mudimu munene wakenzelaye bena Isalele.’ Nunku ‘bena Isalele bakenza malu akadi mabi ku mêsu kua Yehowa, bakakuatshila Bâla mudimu.’ (Bal. 2:10, 11) Kabavua bamone Buloba bulaya bu ‘muaba wa kuikishila’ to. Bu muvuabu kabayi batumikile Nzambi, malanda abu nende akafua. Paulo wakafunda bua bena Isalele aba wamba ne: ‘Bu Yoshua mufikishe bena Isalele muaba eu wa dikisha, Nzambi kavua kuikala muakule kabidi kunyima bua dinga dituku. Nunku, dikisha dia dituku dia muanda mutekete ndilamina bena tshisa tshia Nzambi.’ (Eb. 4:8, 9, MMM) ‘Tshisa tshia Nzambi’ tshivua Paulo wakuila muaba eu mbena Kristo. Bidiku bisua kumvuija ne: bena Kristo badi mua kubuela mu dikisha dia Nzambi anyi? Eyowa, bena Kristo bonso bena Yuda ne badi kabayi bena Yuda badi mua kubuelamu.
Bamue badi bapangila bua kubuela mu dikisha dia Nzambi
13, 14. (a) Mu tshikondo tshia Mose, ntshinyi tshivua bena Isalele ne bua kuenza bua kubuela mu dikisha dia Nzambi? (b) Mu tshikondo tshia Paulo, bena Kristo bavua ne bua kuenza tshinyi bua kubuela mu dikisha dia Nzambi?
13 Paulo uvua mufundile bena Kristo bena Ebelu bualu bamue ba kudibu bavua benza malu avua abengangana ne tshivua Nzambi mulongolole. (Bala Ebelu 4:1.) Bavua benza tshinyi? Batshivua anu benza amue malu a mu mikenji ya Mose. Munkatshi mua bidimu bitue ku 1 500, bena Isalele bavua ne bua kutumikila mikenji ya Mose bua kusankisha Nzambi. Kadi panyima pa lufu lua Yezu, kabatshivua kabidi muinshi mua mikenji ya Mose to. Bamue bena Kristo kabavua bajingulule bualu ebu to, ke bualu kayi bavua bela meji ne: bavua ne bua kutungunuka ne kutumikila mikenji ya Mose. *
14 Paulo wakumvuija bena Kristo bena Ebelu bavua basue kulonda mikenji ya Mose ne: mudimu wa Yezu wa muakuidi munene, tshipungidi tshipiatshipia ne ntempelo wa mu nyuma bivua bipite bia bena Isalele. (Eb. 7:26-28; 8:7-10; 9:11, 12) Nunku, Paulo wakakuata mudimu ne tshilejilu tshia Nsabatu wa mu mikenji ya Mose bua kumvuija bena Kristo mushindu udibu mua kubuela mu dituku dia dikisha dia Yehowa pakafundaye ne: ‘Kudi kushala dikisha dia Nsabatu dia bantu ba Nzambi. Bualu bua wakamana kubuela mu dikisha diende, yeye muine wakikisha kabidi ku midimu yende bu muakikisha Nzambi ku midimu yende yeye.’ (Eb. 4:8-10) Bena Kristo bena Ebelu bavua mua kulekela diela meji ne: Yehowa neabanyishe bualu bavua benza malu a mu mikenji ya Mose. Katshia ku Pentekoste wa mu tshidimu tshia 33 Yehowa udi wanyisha ne muoyo umue bantu bonso badi bitabuja Yezu Kristo.
15. Tuetu basue kubuela mu dikisha dia Yehowa, bua tshinyi mbimpe kumutumikila?
15 Bua tshinyi bena Isalele ba mu tshikondo tshia Mose kabavua babuele mu Buloba bulaya? Bualu kabavua batumikile Yehowa to. Bua tshinyi bamue bena Kristo ba mu tshikondo tshia Mose kabavua babuele mu dikisha dia Nzambi? Anu bualu kabavua batumikile Yehowa. Kabavua bitaba ne: Yehowa uvua musue bua bantu bende bamutendelele mu mushindu mukuabu ne balekele kutumikila mikenji ya Mose to.
Mutudi mua kubuela mu dikisha dia Nzambi
16, 17. (a) Mmunyi mudi bena Kristo mua kubuela mu dikisha dia Nzambi lelu? (b) Netuakuile pa tshinyi mu tshiena-bualu tshidi tshilonda?
16 Lelu katuena tuitaba ne: bena Kristo badi ne bua kutumikila mikenji ya Mose bua kupanduka to. Mupostolo Paulo wakamba ne: ‘Bualu bua nudi basungidibue ku ngasa bua ditabuja; ne diodi kadiena difuma kunudi, ndipa dia Nzambi; kadiena difuma ku midimu, bua muntu kaditumbishi.’ (Ef. 2:8, 9) Nunku mmunyi mudi bena Kristo mua kubuela mu dikisha dia Nzambi lelu? Tuvuluke ne: Yehowa uvua musungule dituku edi bua dikale dituku didiye ukumbaja malu avuaye mulongolole bua kukumbaja bua buloba ne bua bantu badi bamutumikila. Yehowa udi utuleja malu adiye mulongolole ne adiye musue bua tuetu kuenza ku diambuluisha dia bulongolodi buende. Tudi mua kubuela mu dikisha dia Yehowa anu tuetu tumutumikila ne tuenda pamue ne bulongolodi buende.
17 Kadi tuetu katuyi tutumikila mupika wa lulamatu ne wa budimu anyi tusungula bua kutumikila anu malu adi atusankisha, katuena tuenda mu diumvuangana ne malu adi Yehowa mulongolole to. Tuetu tuenza malu adi abengangana ne tshidi Yehowa mulongolole, katuena mua kulua balunda bende to. Mu tshiena-bualu tshidi tshilonda netuakule bua imue nsombelu idi ituambuluisha bua kuleja ni tudi tutumikila Nzambi. Mapangadika atudi tuangata mu nsombelu eyi nealeje ni tukadi babuele mu dikisha dia Nzambi.
[Mêyi adi kuinshi]
^ tshik. 3 Bakuidi ne bena Lewi bavua benza midimu ya ku ntempelo dituku dia Nsabatu ne ‘kabayi ne dipila.’ Bu mudi Yezu muikale muakuidi munene wa ntempelo munene wa Nzambi wa mu nyuma, uvua mua kuenza pende mudimu uvua Nzambi mumupeshe kayi utshina bua kushipa mukenji wa Nsabatu.—Mat. 12:5, 6.
^ tshik. 13 Katuena bamanye ni kuvua muena Kristo muena Ebelu kampanda uvua mufile milambu dituku dia dibuikidila mibi panyima pa Pentekoste wa mu tshidimu tshia 33 to. Kuenza nunku kuvua mua kuleja ne: kabavua banemeka mulambu wa Yezu to. Kadi bamue bena Kristo bena Ebelu batshivua anu batungunuke ne kulonda bilele bia mu mikenji ya Mose.—Gal. 4:9-11.
Diambulula
• Ntshinyi tshivua Yehowa musue kuenza mu dituku dia muanda mutekete?
• Bua tshinyi tudi tuamba ne: dituku dia muanda mutekete ditshidi ditungunuka too ne lelu?
• Bua tshinyi bena Isalele ba mu tshikondo tshia Mose ne bamue bena Kristo ba mu tshikondo tshia Paulo kabakabuela mu dikisha dia Nzambi?
• Mmunyi mutudi mua kubuela mu dikisha dia Nzambi lelu?
[Nkonko ya dilonga]
[Lungenyi lunene lua mu dibeji 27]
Tudi mua kubuela mu dikisha dia Yehowa anu tuetu tumutumikila ne tuenda pamue ne bulongolodi buende
[Bimfuanyi mu mabeji 26, 27]
Bena Kristo badi ne bua kuenza tshinyi lelu bua kubuela mu dikisha dia Nzambi?
