Mvua ntshina lufu, kadi mpindieu ndi mutekemene ‘muoyo muvule’

Muyuki mulonda kudi Piero Gatti

MUTOYI uvua mukese uvua anu wenda uvula ku kakese ku kakese. Mutantshi mukese pashishe, mpungi yakatuadija kudila imanyisha bantu bua kusokoma. Pashishe, bombe yakatuadija kukungula, itayika ne inyanga bintu eku bantu bafue ne buôwa.

Bualu ebu buvua buenzeke mu tshimenga tshia Milan mu ditunga dia Italie mu tshidimu tshia 1943 ne tshia 1944. Bu mumvua musalayi utshivua nsonga, bavua batamba kumpesha mudimu wa kusangisha bitupa bia mibidi ya bantu bavua bafua ku bombe ivua ndeke yela miaba ivuabu basokome; kakuvua mushindu wa kumanya kabidi muntu bimpe bualu mibidi ivua misunsulula. Tshivua anu mumone patupu muvua bantu bakuabu bafua to. Misangu mikuabu mvua mpanduka ku lufu mu mushindu wa dikema. Mu bikondo bia nunku, mvua ndomba Nzambi mmulaya ne: meme mupanduke ku lufu nengenze disua diende.

Ndi ndekela buôwa bumvua nabu bua lufu

Mvua mukolele mu musoko kampanda uvua mutantshi wa kilometre 10 ne tshimenga tshia Como mu ditunga dia Italie pabuipi ne mikalu ya ditunga dia Suisse. Pantshivua muana, mvua ne kanyinganyinga ne buôwa bua lufu. Bayayanyi babidi bakafua disama dia gripe wa bena Espagne. Mu tshidimu tshia 1930 pamvua ne bidimu bisambombo patupu, mamuanyi Luigia wakafua. Bu mumvua mukolele mu Katolike, mvua ntumikila mikenji ya mu Katolike ne mbuela mu Misa ku lumingu luonso. Kadi panyima pa bidimu buôwa bumvua nabu buakajikila muaba umvua nkoselangana nsuki, kadi ki mmu tshitanda to.

Mu tshidimu tshia 1944, mvita mibidi ya buloba bujima itshivua itua ipela. Mvua umue wa mu basalayi ba bungi ba mu Italie bavua banyeme mvita bua kuya muaba uvua kawuyi mvita mu ditunga dia Suisse. Patuakafika diakamue bakatuabanya mu bitudilu bishilangane bia bena tshimuangi. Bakantuma mu tshitudilu tshivua pabuipi ne musoko wa Steinach uvua ku Nord-Est kua ditunga dia Suisse. Muaba au tuvuaku ne ndambu wa budikadidi. Mukoshanganyi wa nsuki wa mu Steinach uvua dijinga ne muntu uvua mua kumuambuluisha matuku makese muaba wende wa mudimu. Ngakasomba nende ne kuenza nende mudimu munda mua ngondo umue, biakangambuluisha bua kumanya malu akalua kushintulula nsombelu wanyi.

Umue wa ku bantu bavuaye ukosa nsuki pa tshibidilu uvua Adolfo Tellini muena Italie uvua musombele mu Suisse. Uvua Ntemu wa Yehowa. Tshivua muanji kumvua musangu nansha umue bakula bua Bantemu to, bualu tshikondo atshi bungi buabu kabuvua bupite pa 150 mu ditunga dia Italie dijima to. Adolfo wakangambila malu mimpe a mu Bible bu mudi milayi idi yakula bua ditalala ne ‘muoyo muvule.’ (Yone 10:10; Buak. 21:3, 4) Mvua ne disanka dia bungi dia kumvua ne: Bible mmulaye ne: mu matuku atshilualua kakuakuikala mvita ne lufu. Pangakapingana mu tshitudilu, ngakumvuija pende Giuseppe Tubini, nsonga mukuabu wa mu Italie malu malenga aa, ne akamusankisha bikole. Adolfo ne Bantemu bakuabu  bavua balua kututangila mu tshitudilu pa tshibidilu.

Adolfo wakaya nanyi mu tshimenga tshia Arbon tshivua mutantshi wa kilometre 10 ne musoko wa Steinach muaba uvua kasumbu kakese ka Bantemu kenzela bisangilu mu tshiena Italie. Mvua ne disanka dia bungi bua malu amvua mumvuamu, ke meme kuyamu kabidi lumingu luakalonda. Pashishe ngakabuela mu mpuilu wa Bantemu ba Yehowa uvuabu benzele mu Nzubu wa mpungilu wa mu tshimenga tshia Zurich. Bindidimbi bia muvuabu bashipa bantu mishiki ne mishiki mu tumponya bivuabu baleje mu mpuilu biakandenga ku muoyo bikole. Ngakamanya ne: bavua bashipe Bantemu ba Yehowa ba bungi ba mu Allemagne bua ditabuja diabu. Ngakapetangana ne Maria Pizzato mu mpuilu au. Bavua bamukosele pende tshibawu tshia bidimu 11 bia buloko kudi mbulamatadi wa tshikokesha nkaya wa mu Italie bualu uvua Ntemu.

Pakajika mvita, ngakapingana mu Italie ne meme kutuadija kudisangisha ne tshisumbu tshikese tshia mu musoko wa Como. Tshivua mulonge Bible mudibi bikengela to, kadi mvua mumanye malongesha a nshindamenu a mu Bible bimpe. Maria Pizzato uvua pende wa mu tshisumbu atshi. Wakandeja muvuabi ne mushinga bua kutambula bua kulua muena Kristo ne kungambilaye bua kuya kutangila Marcello Martinelli uvua musombele mu tshimenga tshia Castione Andevenno mu provense wa Sondrio. Marcello uvua muena Kristo muela manyi uvua ne lulamatu uvuabu bakosele tshibawu tshia bidimu dikumi ne tshimue bia buloko kudi mbulamatadi wa tshikokesha nkaya. Ngakenda ne dikalu kilometre 80 bua kuya kumutangila.

Marcello wakangumvuija ne Bible tshidi tshikengela bua kutambula, pashishe kuenzaye disambila ne tuetu kuya ku musulu wa Adda kungakatambuila. Tuvua mu ngondo wa tshitema mu tshidimu tshia 1946. Edi divua dituku dia pa buadi mu nsombelu wanyi. Bu mumvua ne disanka dia bungi bua dipangadika dimvua muangate dia kuenzela Yehowa mudimu ne bua ditekemena dikole bua matuku atshilualua, dituku adi tshivua mumone bu ne: mvua muenze kilometre 160 ne dikalu to.

Mu ngondo muitanu mu 1947 tuakenza mpuilu wa kumpala panyima pa mvita mu Italie mu tshimenga tshia Milan. Bantu batue ku 700 bavua babuelamu kusangisha ne ba bungi ba ku bantu bavuabu bakengeshe kudi mbulamatadi bua ditabuja diabu. Bualu bua dikema buakenzeka mu mpuilu amu. Giuseppe Tubini umvua muyishe mu tshitudilu tshia bena tshimuanyi wakenza muyuki wa batismo, pashishe kutambulaye pende.

Mu mpuilu au mvua ne diakalenga dia kutuilangana ne muanetu Nathan Knorr wa ku Betele wa ku Brooklyn. Wakatukankamija meme ne Giuseppe bua kuenzela Nzambi mudimu mu nsombelu wetu. Ngakangata dipangadika dia kutuadija mudimu wa ku dîba ne ku dîba mu ngondo umue. Pangakafika kumbelu, ngakaleja bena mu dîku dietu dipangadika dimvua muangate kadi kabavua basue to. Kadi mvua anu mudisuike bua kukumbaja dipangadika dianyi. Panyima pa ngondo umue, ngakatuadija kuenza mudimu ku Betele wa mu tshimenga tshia Milan. Ba misionere banayi bavua benzaku mudimu, kuvua Giuseppe (Joseph) Romano ne mukajende Angelina; Carlo Benanti ne mukajende Costanza. Muntu muitanu utshivua ufikilaku uvua Giuseppe Tubini ne meme mvua muntu muisambombo.

Panyima pa ngondo umue bakanteka mutangidi wa tshijengu wa kumpala mu ditunga dia Italie. Muanetu George Fredianelli misionere wa kumpala wakalua mu Italie ufumina ku États-Unis mu tshidimu tshia 1946, ukavua yeye mutangidi muena ngendu. Wakandongesha mudimu mu mbingu mikese, ne ngakatungunuka nkayanyi. Ntshidi muvuluke tshisumbu tshia Faenza tshimvua mukumbule bua musangu wa kumpala. Elabi meji, katshia tshivua muanji kuenza muyuki nansha umue mu tshisumbu to. Nansha nanku, ngakakankamija bantu bavua babuele mu tshisangilu kusangisha ne bansonga bua kuenza mudimu wa ku dîba ne ku dîba. Pashishe bamue ba ku bansonga abu bakalua kupeta majitu manene mu bulongolodi mu ditunga dia Italie.

Ngakapeta nsombelu wa disanka mu mudimu wanyi wa mutangidi muena ngendu. Mvua mpeta malu amvua tshiyi ngelela meji, mvua ne bua kushintulula amue malu mu nsombelu, mvua mpeta ntatu ne masanka ne mvua mudimuene muvua bana betu bena Kristo bannange.

Malu avua enzeka mu bitendelelu panyima pa mvita mu Italie

Ndi musue kunulondela malu avua enzeka mu bitendelelu mu Italie tshikondo atshi.  Tshitendelelu tshia Katolike ke tshivua ne buenzeji bua bungi. Nansha muvuabu bele mikenji ya ditunga mipiamipia mu 1948, kadi too ne mu 1956 mikenji ya mbulamatadi wa tshikokesha nkaya itshivua anu ikandika Bantemu bua kuyisha. Bu muvua bamfumu ba bitendelelu batukengesha bikole, bavua batupangisha bua kuenza mpuilu ya tshijengu bimpe. Kadi imue misangu bamfumu abu kabavua bakokesha bua kutupangisha mua kuenza mpuilu to. Ke tshivua tshienzeke mu 1948 mu tshimenga tshikese tshia Sulmona tshidi mu ditunga dia Italie.

Tuvua benzele mpuilu muaba uvuabu benzela manaya a teyatre. Mu Dia lumingu mu dinda meme ke uvua ulombola mpuilu ne Giuseppe Romano wakenza muyuki wa patoke. Bua tshikondo atshi bantu bavua babuelamu bavua bapite bungi. Musangu au bamanyishi kabavua nansha batue ku 500 mu ditunga dijima to, kadi bantu 2 000 bavua babuele mu mpuilu au. Ku ndekelu kua muyuki ba mumpele babidi bavua mu mpuilu amu, bakasaka nsongalume mukuabu bua kubanda kumpala. Bu muvuaye musue kunyangakaja malu, wakatuadija kuela mbila ne dîyi dikole. Ke meme kumuambila diakamue ne: “Wewe ne bualu bua kuamba, udi mua kufutshila pebe muaba eu bua kuamba tshionso tshiudi musue.” Bantu bavua mu mpuilu kabavua batume ntema kudiye to ne bakamuela bibingu. Pakamonaye nanku, wakumbuka kumpala ne kuyaye.

Kabivua bipepele bua kuenza ngendu tshikondo atshi to. Imue misangu bua kumbuka mu tshisumbu ne kuya mu tshikuabu, mvua nya ne dikalu, bise ya kale ivua miuwule tente ne bantu anyi ne kawulu. Misangu mikuabu, mvua ndala mu tshikumbi tshia tubalu anyi mu tuzubu tua dilamina biamu bia kuenza nabi mudimu. Mvita itshivua ifuma ku dijika ne bena Italie ba bungi bavua bashale bianza bitupu. Bantemu ba Yehowa batshivua anu bakese, kabavua ne bintu bia ku mubidi bia bungi to. Kadi mudimu wa Yehowa wowu kauvua mushintuluke to.

Ndi mbuela mu kalasa ku Gilada

Mu tshidimu tshia 1950, bakatubikila ne Giuseppe Tubini bua kubuela mu kalasa ka 16 ka Gilada. Ku ntuadijilu bivua binkolele bua kulonga Anglais. Ngakadienzeja bikole kadi kabivua anu bipepele to. Tuvua ne bua kubala Bible mujima mu Anglais. Bua kumubala bimpe mvua imue misangu mbenga bua kuya kudia, nshala bua kudibadila ne dîyi dikole. Ndekelu wa bionso, dîba dia meme kuenza muyuki diakakumbana. Ntshidi anu muvuluke mêyi avua mulongeshi mungambile pangakajikija kuenza muyuki a ne: “Udi muenze mudimu ne musangelu ne unyungisha mubidi bimpe, kadi Anglais yebe kayivua yumvuika to.” Nansha nanku, ngakadienzeja anu bua kulonga bimpe. Pashishe bavua batutume meme ne Giuseppe mu Italie bua kuenzelamu mudimu. Kalasa ka Gilada kakatuambuluisha bua kukuatshisha bana betu bimpe.

Mu tshidimu tshia 1955 ngakasela Lidia, umue wa mu bantu bamvua muenzele muyuki wa batismo  kukadi bidimu muanda mutekete. Tatuende Domenico uvua muena Kristo muimpe uvua mudienzeje bua kuambuluisha bana bende bonso bua kuitaba bulelela nansha muvuabu bamukengeshe kudi mbulamatadi wa tshikokesha nkaya uvua mumukosele tshibawu tshia bidimu bisatu bia bupika mu ditunga dikuabu. Lidia pende uvua muluangane bikole bua bulelela. Uvua mulumbulule ku kabadi misangu isatu kumpala kua mbulamatadi kutuitabila bua kuyisha ku nzubu ne ku nzubu. Kunyima kua bidimu bisambombo tuetu bamane kuselangana, tuakalela Beniamino muanetu wa balume wa kumpala. Mu tshidimu tshia 1972 tuakalela Marco muanetu muibidi. Ndi ne disanka dia bungi bualu buonso buabu babidi badi benzela Yehowa mudimu ne tshisumi ne mêku abu.

Ntshidi anu ngenzela Yehowa mudimu ne tshisumi

Mu bidimu bionso bindi muambuluishe bakuabu ne disanka ebi, ndi mupete malu a bungi adi kaayi kupua muoyo. Tshilejilu, ku ntuadijilu kua bidimu bia 1980, tatuanyi muenu wakafundila mfumu wa ditunga dia Italie wa tshikondo atshi Sandro Pertini mukanda. Mu tshikondo tshivua mbulamatadi wa tshikokesha nkaya ukokesha, bavua babatume bonso babidi ku bupika mu tshidîla tshia Ventotene, muaba uvuabu balamina bantu bonso bavua mbulamatadi au wangata bu baluishi bende. Tatuanyi muenu wakalomba bua kuyukila ne mfumu wa ditunga mu meji a kumuyisha. Pavuabu bamuanyishile ngakaya nende, bakatuakidila bimpe mu mushindu uvuabi kabiyi bienzeka to. Mfumu wa ditunga wakela tatuanyi muenu muoyo wa disanka ne kumuela mu tshitupa. Pashishe tuetu kuyukila nende malu a mu Bible ne kumupesha imue mikanda yetu.

Mu 1991 panyima pa bidimu 44 bindi muenze mu mudimu wa mutangidi muena ngendu, ngakalekela mudimu eu wa dikumbula bisumbu mu ditunga dia Italie. Mu bidimu binayi biakalonda, ngakashala mutangidi wa Nzubu wa Mpuilu too ne pangakakepesha mudimu wanyi bua disama dikole. Kadi bua luse lua Yehowa, ntshidi anu mu mudimu wa ku dîba ne ku dîba. Mvua ndienzeja bua kuyisha ne kulongesha bantu lumu luimpe, mpindieu ndi ndongesha bantu ndambu Bible. Bana betu batshitu anu bamba pandi ngenza miyuki ne: ndi ngenza miyuki ne musangelu wa “dikema.” Ndi ngela Yehowa tuasakidila bua muntshidi ne makanda nansha munkadi mukulakaje.

Pantshivua nsonga, mvua ne buôwa bua bungi bua lufu, kadi dimanya dijalame dia mu Bible dindi mupete ndipeshe ditekemena dia muoyo wa tshiendelele udi Yezu ubikila ne: muoyo “muvule.” (Yone 10:10) Mpindieu ndi mutekemene muoyo muvule mu ditalala, bukubi, disanka ne mabenesha a bungi a kudi Yehowa. Mufuki wetu wa dinanga muena dîna ditudi bangate atumbishibue.​—Mus. 83:18.

[Karte mu mabeji 22, 23]

(Bua kumona malu bimpe, tangila mu mukanda)

SUISSE

BERN

Zurich

Arbon

Steinach

ITALIE

ROME

Como

Milan

Musulu wa Adda

Castione Andevenno

Faenza

Sulmona

Ventotene

[Tshimfuanyi mu dibeji 22]

Mu njila batangile ku Gilada

[Tshimfuanyi mu dibeji 22]

Meme ne Giuseppe ku Gilada

[Tshimfuanyi mu dibeji 23]

Dituku dituvua baselangane

[Tshimfuanyi mu dibeji 23]

Mukajanyi munanga utudi benze nende mudimu munkatshi mua bidimu 55