Utuku ulonda mudi Yehowa ukulombola ne dinanga anyi?
Utuku ulonda mudi Yehowa ukulombola ne dinanga anyi?
‘Ndi nkina njila yonso wa mashimi.’—MUS. 119:128.
1, 2. (a) Paudi ukeba bua bakuludike muaba kampanda uudi usua kuya, mmubelu kayi uudi mua kuanyisha? Bua tshinyi? (b) Mmibelu kayi idi Yehowa utupesha? Bua tshinyi?
FUANYIKIJA ne: udi musue kuenza luendu bua kuya muaba kampanda, kadi kuena mumanye njila bimpe to. Udi ulomba mulunda webe wa kueyemena udi mumanye njila au bimpe bua akuambuluishe. Udi ukuludika bimpe ne ukuleja kabidi tshia kuenza bua kuepuka njiwu. Udi ukuleja ne: kudi tshimanyinu kampanda mu njila tshidi mua kukupambuisha. Bantu ba bungi batu batshilonda batu anu bajimina. Newanyisheku mubelu wende ne kuwutumikila anyi? Mu ngumvuilu kampanda, tudi mu luendu batangile ku muoyo wa tshiendelele. Yehowa ke mulunda wetu udi utupesha mibelu ya meji idi ituambuluisha bua kufika ku muoyo wa tshiendelele, ne udi kabidi utudimuija bua njiwu idi mua kutupambuisha mu njila eu.—Dut. 5:32; Yesh. 30:21.
2 Mu tshiena-bualu etshi ne mu tshidi tshilonda netukonkonone njiwu idi Yehowa Nzambi Mulunda wetu utudimuija bua kuepuka. Tumanye ne: Yehowa udi utudimuija bualu mmutunange. Mmusue bua tufike ku muoyo wa tshiendelele. Utu unyingalala padiye umona bantu baditua mu malu mabi ne bapambuka mu njila wende. (Yeh. 33:11) Mu tshiena-bualu etshi netukonkonone malu asatu adi mua kutupambuisha. Bualu bua kumpala budi mua kutupambuisha budi bufumina kudi bantu bakuabu. Bualu buibidi budi bufumina kutudi tuetu bine. Buisatu budi bufumina ku malu a tshianana. Tudi ne bua kumanya malu aa bimpe ne mudi Yehowa utuambuluisha bua kuepuka. Mufundi wa Misambu mukuabu wakambila Yehowa ne: ‘Ndi nkina njila yonso wa mashimi.’ (Mus. 119:128) Ke muutu pebe udiumvua anyi? Tumonayi mutudi mua kukolesha dijinga dia kukina malu mabi.
Kulondi ‘tshisumbu tshinene tshia bantu’
3. (a) Tuetu katuyi bamanye njila wa kulonda, bua tshinyi kulonda bantu bakuabu kudi mua kuikala kubi? (b) Mmubelu kayi wa mushinga utudi tupeta mu Ekesode 23:2?
3 Paudi wenza luendu lule, udi mua kuenza tshinyi wewe kuyi mumanye njila wa kulonda? Udi mua kujinga kulonda bantu bakuabu badi mu njila au, nangananga wewe mumone bantu ba bungi bayilamu. Kuenza nunku kudi mua kukukebela njiwu. Kabidi bantu baudi musue kulonda abu kabena mua kuikala baya kuudi uya, anyi badi mua kuikala pabu bajimine. Tshilejilu etshi tshidi tshituambuluisha bua kumvua mukenji kampanda uvua Nzambi muelele bena Isalele. Yehowa uvua mudimuije bantu bavua benza mudimu wa kulumbuluisha, anyi bantemu ba tshilumbu kampanda bua njiwu ya ‘kulonda tshisumbu tshia bantu tshinene.’ (Bala Ekesode 23:2.) Kakuyi mpata, bitu bipepele bua bantu bapange bupuangane kulonda bakuabu ne kuangata mapangadika mabi padibu bakosa tshilumbu bua kusankisha bantu. Kadi mukenji wa kubenga kulonda tshisumbu tshia bantu udiku utangila anu balumbuluishi ne bantemu ba tshilumbu kampanda anyi? Tòo.
4, 5. Mmunyi muvuabu basue kusaka Yoshua ne Kaleba bua kulonda tshisumbu tshia bantu? Ntshinyi tshivua tshibambuluishe bua kuikala ne dikima?
4 Bushuwa bantu badi anu mua kuteta kutusaka bua ‘kulonda tshisumbu tshinene tshia bantu’ mu mishindu mishilangane. Bualu ebu budi mua kufika mu mushindu utudi katuyi belele meji ne bidi mua kutukolela bua kubukandamena. Tshilejilu, elabi meji ku tshivua tshienzekele Yoshua ne Kaleba. Bavua munkatshi mua bantu 12 bavua baye kutentekela Buloba bulaya. Pakapinganabu, bantu 10 bakambila bena Isalele malu mabi avua mabatekeshe mu mikolo. Bavua bamba ne: bantu ba mu buloba abu bavua ndelanganyi ya bantu ba mfiondo bavua banjelu bakatombokela Nzambi balele ne bakaji mu tshikondo tshia Noa. (Gen. 6:4) Bualu abu kabuvua bumvuika to. Bantu ba mfiondo bakavua babutuke ku mvula wa kabutu bidimu nkama ya bungi kumpala, kabavua nansha bashiye ndelanganyi yabu to. Kadi bena Isalele bakitaba malu avua batentekedi dikumi babambile bualu bavua ne ditabuja dikese. Padi muntu ne ditabuja dikese, kena weyemena kabidi Yehowa to, udi utuadija kuitaba malu a dishima. Bena Isalele ba bungi bakatuadija kuela meji ne: kabivua bimpe bua kulonda dîyi divua Yehowa mubambile bua kubuela mu Buloba bulaya to. Mu nsombelu mukole au, ntshinyi tshiakenza Yoshua ne Kaleba?—Nom. 13:25-33.
5 Kabavua ‘balonde tshisumbu tshinene tshia bantu’ to. Nansha muvua tshisamba tshijima katshiyi tshisue kubateleja, Yoshua ne Kaleba bakamba anu bulelela ne kushala anu babulamate nansha muvuabu bakeba kubashipa ne mabue. Ntshinyi tshivua tshibambuluishe bua kuikala ne dikima edi? Kakuyi mpata, bavua ne ditabuja dikole. Muntu yeye muikale ne ditabuja dikole neitabe tshidi Yehowa wamba pamutu pa kulonda ngenyi ya dishima ya bantu. Yoshua ne Kaleba bakaleja pashishe muvuabu beyemene Yehowa bualu udi ukumbaja malu onso adiye ulaya. (Bala Yoshua 14:6, 8; 23:2, 14.) Bavua balamate Nzambi wabu utu kayi udinga ne kabavua basue kulonda tshisumbu tshia bantu bavua kabayi ne ditabuja bua kumunyingalaja to. Nunku bakashala anu balamate Yehowa ne kutushilabu tshilejilu tshia tuetu kulonda.—Nom. 14:1-10.
6. Mmu mishindu kayi mutudi mua kudimona basakibue bua kulonda tshisumbu tshia bantu?
6 Utuku udiumvua musakibue bua ‘kulonda tshisumbu tshinene tshia bantu’ anyi? Lelu eu bantu ba bungi kabena banemeka Yehowa ne badi bapetula mikenji yende. Bantu aba badi bamuangalaja ngenyi mibi ne basaka bantu bua kuyitaba. Tshilejilu badi bamba ne: ki mbibi bua kutangila programe ya ku televizion, filme ne manaya a ku ordinatere adi aleja malu a tshiendenda, a tshikisu ne malu a mîdima to. (2 Tim. 3:1-5) Paudi usungula mushindu wa kujikija lutetuku buebe wewe anyi bua dîku diebe, utuku ulekela bantu badi ne kondo ka muoyo kapape bakuleja tshia kuenza peshi bakudimuna kondo kebe ka muoyo anyi? Wewe muenze nanku, kabiakulejaku ne: udi ‘ulonda tshisumbu tshinene tshia bantu’ anyi?
7, 8. (a) Mmunyi mutudi mua kuibidija ‘biumvuilu’ bietu? Bua tshinyi kuenza nunku nkupite kulonda mikenji mitusunguila? (b) Bua tshinyi tshilejilu tshia bansonga ba bungi bena Kristo tshidi tshitusankisha?
7 Yehowa mmutupeshe dipa dia mushinga mukole didi dituambuluisha bua kuangata mapangadika, dipa adi ‘mbiumvuilu’ bietu. Nunku tudi ne bua kuibidija biumvuilu ebi ‘patudi tuenza nabi mudimu.’ (Eb. 5:14, NW) Tuetu tulonda anu tshidi bantu bamba katuakuibidija biumvuilu bietu to, tudi ne bua kukuata mudimu ne kondo ketu ka muoyo bua kudiangatshila mapangadika. Ke bualu kayi batendeledi ba Yehowa kabena mua kutekemena bua mukuabu muntu kubangatshilaye mapangadika ne kubasunguila filme ya kumona, mikanda ya kubalabu ne malu a kutangilabu ku Enternete to. Bu mudi malu a mu bulongolodi ebu enda ashintuluka bikole, bivua mua kulomba bua kuikalabu batusunguila dîba dionso tshia kuenza. (1 Kol. 7:31) Bu biobi bikale nanku, bivua mua kutupangisha bua kuelangana meji bikole pa mikenji ya mu Bible ne kusambila bua kuangata mapangadika adi asankisha Yehowa.—Ef. 5:10.
8 Patudi tuangata mapangadika adi umvuangana ne tshidi Bible wamba, kabiakusankisha bamue bantu to. Badi mua kusaka bansonga bena Kristo mu tulasa bua kuenza malu bu mudi bantu bonso benza. (1 Pet. 4:4) Nunku bidi bienza disanka patudi tumona bena Kristo bakulumpe ne bana bidikija ditabuja dia Yoshua ne Kaleba padibu babenga bua ‘kulonda tshisumbu tshinene tshia bantu.’
Kanulondi ‘mitshima yenu ne mêsu enu’
9. (a) Patudi tuenza luendu, bua tshinyi ki mbimpe kulonda anu njila utudi basue? (b) Bua tshinyi mukenji udi mu Nomba 15:37-39 uvua ne mushinga bua bena Isalele?
9 Bualu buibidi budi mua kutupambuisha butuakonkonona budi bufumina kutudi tuetu bine. Fuanyikija ne: udi wenza luendu mutangile muaba kampanda, wewe mubenge kulonda karte ne mutuadije kulonda njila yonso uudi musue, ntshinyi tshidi mua kukufikila? Wewe muenze nunku kuakufika muaba uudi uya to. Tshilejilu etshi tshidi mua kutuambuluisha bua kumvua mukenji mukuabu uvua Yehowa muelele bena Isalele. Bantu ba bungi lelu kabena mua kumvua bua tshinyi Yehowa uvua muambile bena Isalele bua kuela malenda ku mibangubangu ya bilamba biabu ne muonji wa bulé to. (Bala Nomba 15:37-39.) Udiku mumvue bua tshinyi mukenji eu uvua ne mushinga anyi? Pavua batendeledi ba Nzambi batumikila mukenji eu bavua bashilangana ne bantu ba bisamba bikuabu bivua bibanyunguluke. Bivua bikengela bikale bashilangane ne bisamba bikuabu bua Yehowa kubanyishaye. (Lew. 18:24, 25) Mukenji eu uvua uleja kabidi bualu bukuabu budi bufumina kutudi tuetu bine budi mua kutupangisha muoyo wa tshiendelele. Mushindu kayi?
10. Mmunyi muvua Yehowa muleje ne: mmumanye tshidi bantu menemene?
10 Bua kuleja tshivua Yehowa mupeshile bena Isalele mukenji eu, udi wamba ne: ‘Kanulondi mitshima yenu ne mêsu enu adi anuenzeja malu a masandi.’ Yehowa uvua muele mukenji eu bualu mmumanye tshidi bantu menemene. Mmumanye ne: mbipepele bua mutshima wetu kusesuka bua malu atudi tumona. Bible udi wamba ne: ‘Mutshima udi upita bintu bionso kudinga muntu, ne udi utamba kunyanguka; mmuntu kayi udi mua kuwumanya?’ (Yel. 17:9) Udiku mumone bua tshinyi Yehowa uvua muelele bena Isalele mukenji au anyi? Uvua mumanye ne: pavua bena Isalele batangila bisamba bikuabu bivua kabiyi bitendelela Yehowa bavua mua kusesuka. Muoyo uvua mua kubasaka bua kubidikija ne kutuadija kuela meji ne kuenza malu bu muvuabu benza.—Nsu. 13:20.
11. Mmunyi mudi mêsu etu mua kutusesuisha?
11 Mu matuku etu aa, bitu bipepele bua mutshima wetu kujinga malu atudi tumona ne mêsu etu. Tudi tusanganyibua mu bulongolodi mudi bantu ba bungi balonda anu majinga abu a mubidi. Kadi mmunyi mutudi mua kutumikila mubelu udi mu Nomba 15:39? Elabi meji ne: bantu baudi upetangana nabu mu kalasa, ku mudimu nansha muaba uudi musombele badi ne mvuadilu udi ujulangana majinga mabi, bidiku mua kukunyanga anyi? Muoyo udiku mua kukusaka bua ‘kulonda mutshima webe ne mêsu ebe’ ne kusesuka bua biudi umona anyi? Neubenge kutumikila mikenji ya Yehowa ne kutuadija pebe kuvuala bu buobu anyi?—Lomo 12:1, 2.
12, 13. (a) Ntshinyi tshitudi mua kuenza bikala mêsu etu asua kutusesuisha? (b) Bua tshinyi katuena ne bua kuenza malu adi mua kujula bakuabu majinga mabi?
12 Tudi ne bua kudienzeja bua tuetu kuikala tudikanda. Tudi ne bua kukanda mêsu etu bua kaatangidi bintu bibi anu bu Yobo uvua mudie tshipungidi ne mêsu ende ne muangate dipangadika dia kubenga kutangila mukaji mukuabu ne dijinga dia kuenda nende masandi. (Yobo 31:1) Mukalenge Davidi uvua muangate pende dipangadika dia muomumue wakamba ne: ‘Tshiena nteka tshintu tshibi ku mêsu kuanyi.’ (Mus. 101:3) Tshintu tshionso tshidi mua kunyanga kondo ketu ka muoyo kimpe ne malanda etu ne Yehowa ‘ntshintu tshibi.’ Tshintu etshi tshidi mua kuikala bintu bitudi tumona ne mêsu bidi mua kusaka mutshima wetu ku dienza malu mabi.
13 Tuetu bikale tusaka bakuabu ku dienza malu mabi, tudi mua kuikala mu ‘tshintu tshibi’ kudibu mu mushindu kampanda. Nunku tudi ne bua kutumikila ne muoyo umue tshidi Bible utuambila bua kuikala ne mvuadilu muakanyine ne wa kanemu. (1 Tim. 2:9) Mvuadilu wa kanemu kena umvuija kuvuala anu bintu bitudi basue to. Tudi ne bua kuikala tuditeka pa muaba wa bakuabu, tubanemeka ne tubasankisha pamutu pa kuikala tudisankisha nkayetu. (Lomo 15:1, 2) Diakalenga, lelu mu tshisumbu tshia bena Kristo mudi bansonga ba bungi badi ne mvuadilu wa tshitembu. Bidi bituenza disanka bua mudibu babenga ‘kulonda mitshima yabu ne mêsu abu’ ne mudibu basungule bua kusankisha Yehowa mu malu onso adibu benza.
Kanulondi “bintu bia tshianana”
14. Mmubelu kayi uvua Samuele mufile udi utangila “bintu bia tshianana”?
14 Fuanyikija ne: mu luendu luudi wenza udi upitshila mu tshipela tshinene. Paudi wenda uya udi ufika muaba mukuabu umona bu padi mâyi, pabi kapayi mâyi to. Wewe mulekele njila uuvua ulonda bua kuya muaba uudi wela meji ne: mâyi adipu, udi mua kujimina ne kufuila mu tshipela. Bia muomumue, Yehowa mmumanye ne: tuetu beyemene tshintu tshia tshianana nebitukebele njiwu. Tshilejilu, bena Isalele bakajinga bua kuikala ne mfumu wa bamona ne mêsu anu bu bisamba bikuabu bivua bibanyunguluke. Bualu ebu buvua bubi bualu bakabenga bua Yehowa kuikalaye Mukalenge wabu. Nansha muvua Yehowa mubanyishile bua kuikala ne mukalenge uvuabu bamona, uvua muteke muprofete wende Samuele bua kubadimuija bua ‘kabalondi bintu bia tshianana.’—Bala 1 Samuele 12:21.
15. Mmunyi muvua bena Isalele balonde malu a tshianana?
15 Bena Isalele bavua mua kuikala pamuapa bela meji ne: bavua mua kueyemena mukalenge uvuabu bamona ne mêsu kupita Yehowa. Pikalabi ne: bavua bela meji nanku, mmumue ne: bavua balonda bintu bia tshianana. Bivua kabidi bipepele bua kutuadijabu kulonda mashimi a Satana. Bakalenge bavuabu bakeba bavua mua kubafikisha ku ditendelela mpingu. Bantu bavua batendelela mpingu bavua bela meji ne: bavua mua kuyeyemena bualu ke nzambi ivuabu bamona ne mêsu ne balenga pamutu pa kueyemenabu Yehowa Nzambi mufuki wa bintu bionso udi kayi umueneka. Kadi mupostolo Paulo wakamba ne: mpingu idi ‘bintu bia patupu.’ (1 Kol. 8:4, MMM) Mpingu kayena mua kumona, kumvua anyi kuenza bualu kampanda to. Udi mua kuyimona ne kuyilenga, kadi wewe uyitendelela udi ulonda malu a tshianana adi mua kukufikisha ku kabutu.—Mus. 115:4-8.
16. (a) Mmunyi mudi Satana usaka bantu ba bungi lelu bua kulonda malu a pa buloba? (b) Patudi tufuanyikija bintu bia ku mubidi ne Yehowa Nzambi, bua tshinyi tudi mua kuamba ne: mbintu bia patupu?
16 Satana utshidi anu usaka bantu bua kulonda malu a patupu. Tshilejilu, udi usaka bantu ba bungi ku dikeba bintu bia ku mubidi bua kuikala ne disanka. Bantu badi bela meji ne: kuikala ne makuta, bintu bia bungi, ne mudimu muimpe kudi mua kubapetesha disanka. Mmunyi mudi bintu bia ku mubidi mua kuambuluisha bantu padibu basama, padi malu a mpetu anyanguka anyi padi bipupu bibakuata? Mmunyi mudi bintu ebi mua kubambuluisha padibu badimona ne: nsombelu wabu kena ne tshipatshila? Bintu ebi bidiku mua kubapetesha mandamuna a nkonko ya mushinga ya mu nsombelu anyi? Bidiku mua kubambuluisha padibu bamona lufu ne mêsu anyi? Tuetu beyemene bintu bia ku mubidi tuela meji ne: nebitusemeje pabuipi ne Yehowa, tudi tudidinga. Bintu bia ku mubidi kabiena mua kusungila muntu to, bualu mbintu bia patupu. Kabiena nansha mua kutukuba, bualu kabiena mua kutupetesha disanka ne kutuepula ku masama ne lufu to. (Nsu. 23:4, 5) Kadi Yehowa yeye ki mmuntu wa patupu to, n’Nzambi mulelela. Nunku bua tuetu kupeta disanka ne kuikala mu bukubi, tudi ne bua kuikala nende mu malanda mimpe. Bidi bituenza disanka bua kuikala balunda bende ne katuena basue kumulekela bua kulonda malu a tshianana.
17. Bua malu adi mua kutunyanga atudi balonge aa, ntshinyi tshiudi mudisuike bua kuenza?
17 Tudi ne disanka bua mudi Yehowa muikale mulunda wetu ne utulombola mu njila wa ku muoyo wa tshiendelele. Tuetu batungunuke ne kutumikila mibelu yende idi itangila malu asatu adi mua kutunyanga bu mudi kulonda tshisumbu tshinene tshia bantu, mutshima wetu ne malu a patupu, netupete muoyo wa tshiendelele. Mu tshiena-bualu tshidi tshilonda netumone mibelu mikuabu isatu ya kudi Yehowa idi mua kutuambuluisha bua kukina ne kuepuka njila idi ipambuisha bantu ba bungi.—Mus. 119:128.
Udi muvuluke anyi?
Mmunyi muudi mua kutumikila mibelu idi mu mvese idi ilonda eyi?
[Nkonko ya dilonga]
[Tshimfuanyi mu dibeji 11]
Bikatuku bikufikile bua kujinga kulonda tshisumbu tshinene tshia bantu anyi?
[Tshimfuanyi mu dibeji 13]
Bua tshinyi kulonda mutshima webe ne mêsu ebe nkubi?
[Tshimfuanyi mu dibeji 14]
Udiku ulonda malu a tshianana anyi?
