Nkonko ya babadi

Tudiku mua kuamba ne dishindika dionso bungi bua milayi idi itangila Masiya idi mu mifundu ya tshiena Ebelu anyi?

Dikonkonona mifundu ya tshiena Ebelu didi dituambuluisha bua kumanya milayi mipite bungi ivua mikumbanyine Yezu Kristo. Milayi eyi ivua yakula bua nsombelu wa Masiya, dîba divuaye ne bua kumueneka, malu avuaye ne bua kuenza, malu avua bantu bakuabu mua kumuenzela ne muaba uvuaye ne bua kuikala nawu mu malu adi Yehowa Nzambi mulongolole. Malu onso aa masanga adi atuambuluisha bua kumanya ne: Yezu ke Masiya. Kadi tudi ne bua kuikala ne budimu bituikale basue kujadika bungi bua milayi idi yakula bua Masiya idi mu mifundu ya tshiena Ebelu.

Ki mmuntu yonso udi witabuja milayi idi itangila Masiya anyi idi kayiyi imutangila to. Mu mukanda wende kampanda, Alfred Edersheim wakamba ne: bamfumu ba bitendelelu bena Yuda bavua basungule mvese mitue ku 456 ya mu mifundu ya tshiena Ebelu bu milayi ivua itangila Masiya, nansha muvua ya bungi ya kudiyi kayiyi yakula bua Masiya buludiludi. Dikonkonona mvese 456 eyi didi dijula nkonko bua kumanya bikala imue ya kudiyi itangila Yezu Kristo. (The Life and Times of Jesus the Messiah) Tshilejilu, Edersheim wakamba ne: bena Yuda bavua bela meji ne: mêyi adi mu Genese 8:11 adi atangila Masiya. Bavua bamba ne: “Katamba ka mutshi wa oleve kavua nyunyi wa nkutshi mulue naku uvua mukatule ku mukuna wa Masiya.” Wakatela kabidi Ekesode 12:42. Wakumvuija muvua bena Yuda kabayi bumvue bimpe mvese eu wamba ne: “Bu muvua Mose mupatuke mu tshipela, ke muvua Masiya ne bua kupatuka mu Lomo.” Kabiyi mpata bivua mua kukolela balongi ba bungi ba Bible ne bantu bakuabu bua kumvua diumvuangana didi pankatshi pa mvese eyi ibidi ne mudibu bayumvuija bibi ne: ivua itangila Yezu Kristo.

Nansha tuetu bimanyine anu pa milayi ivua mikumbanyine Yezu Kristo nkayayi, katuena anu mua kujadika bungi buayi to. Tshilejilu, mukanda wa Yeshaya nshapita 53 udi wakula bua malu mashilangane adi atangila Masiya. Yeshaya 53:2-7 udi wamba ne: ‘Kakadi ne tshifuanyikiji, bakamulengulula, bakamulekela kudi bantu; wakututuadila makenga etu, bakamutapa mputa bua mibi yetu, bakaya nende bu mukoko udibu baya nawu ku tshishipelu.’ Tudiku mua kuangata Yeshaya 53:2-7 bu mulayi umue udi utangila Masiya anyi, peshi tudi ne bua kuangata bualu ne bualu buonso budibu bakula bua Masiya mu mvese eyi bu mulayi musunguluke anyi?

Tukonkonone kabidi Yeshaya 11:1 udi wamba ne: ‘Lutonga nelutoloke ku tshikuku tshia Yishai, ne ditamba dia ku miji yende nedikuame mamuma.’ Mulayi wa muomumue eu udi kabidi mu mvese wa 10. Tudiku ne bua kumona mvese ibidi eyi bu milayi ibidi mishilangane anyi, peshi bu mulayi umue muambulula misangu ibidi? Mushindu udi muntu mua kubala bungi bua milayi idi mu Yeshaya nshapita wa 53 ne wa 11 udi mua kuenza bua bungi bua milayi yonso idi itangila Masiya bushilangane.

Nunku, katuena anu mua kukeba bua kumanya bungi busunguluke bua milayi idi yakula bua Masiya idi mu mifundu ya tshiena Ebelu to. Bulongolodi bua Yehowa mbupatule mikanda idi yakula bua milayi ya bungi idi itangila Yezu ne muvuayi mikumbane. * Milayi idi mu mikanda eyi idi mua kutuambuluisha patudi tudilongela pa nkayetu anyi mu dîku ne patudi tuyisha. Idi kabidi ikolesha ditabuja dietu mu milayi yonso idi Yehowa mulaye. Kabidi, milayi yonso idi itangila Masiya nansha yoyi mikale bungi kayi, idi itujadikila ne: Yezu ke Kristo anyi Masiya.

[Mêyi adi kuinshi]