Nkonko ya babadi

Luapolo lua mudimu lua ku tshidimu lutubu bafila ludi luleja tshinyi?

Batu bapatula luapolo lua mudimu wa buambi tshidimu tshionso mu Annuaire. Bidi bituenza disanka dia bungi bua kubala malu adi Bantemu ba Yehowa benza bua kuyisha ne kulongesha bantu malu a Bukalenge bua Nzambi pa buloba bujima. Kadi bua tuetu kumvua bimpe tshidi luapolo elu lumvuija, tudi ne bua kumanya tshidi bimue biena-bualu ne nomba bitubu bafunda mu luapolo elu biumvuija. Tukonkononayi bilejilu bikese.

Tshidimu tshia mudimu. Tshidimu tshia mudimu tshitu tshituadija mu ngondo wa tshitema ne tshijika mu ngondo wa muanda mukulu wa tshidimu tshidi tshilonda. Luapolo lutu mu Annuaire lutu lutangila tshidimu tshia mudimu tshivua kumpala kua tshidibu bafunde pa Annuaire. Tshilejilu, mu Annuaire wa 2011 mudi luapolo lua tshidimu tshia mudimu tshivua tshituadije mu dia 1 ngondo wa tshitema 2009, too ne ku dia 31 ngondo wa muanda mukulu 2010.

Bungi bua bamanyishi ne muayene wa bamanyishi. “Bungi bua bamanyishi” budi buleja Bantemu ba Yehowa bakadi batambule kusangisha ne bakadibu bitabile bua kuyisha lumu luimpe badi kabayi banji kutambula. Bungi ebu mbuangatshila mu ngondo kampanda wa mu tshidimu tshia mudimu uvua bamanyishi ba bungi bafile luapolo kupita ngondo mikuabu. Mu bungi ebu mudi kabidi imue luapolo ya ngondo mushale ivuabu bafile panyima pa dîba. “Muayene wa bamanyishi” udi uleja bungi bua bamanyishi batu bafila luapolo lua mudimu wabu wa buambi ngondo yonso.

Bungi bua mêba. Mu Annuaire wa 2011 mbaleje bungi bua mêba masanga avua Bantemu ba Yehowa benze mu buambi bupite pa muliyare 1,6. Kadi mu mêba aa kamuena mêba atutu tupitshisha bua kutendelela Yehowa to. Tshilejilu, kamuena mêba atu bakulu bapitshisha bua kuambuluisha bena mu tshisumbu ne kubakankamija to. Kamuena kabidi mêba atutu tupitshisha mu bisangilu, ku didilongela ne dielangana meji pa malu atudi tulonga to.

Bungi bua makuta avuabu batule. Mu tshidimu tshia mudimu tshia 2010, Bantemu ba Yehowa bavua batule dolare mipite pa miliyo 155 bua kukumbaja majinga a bampanda-njila ba pa buabu, bamisionere ne batangidi bena ngendu. Kadi mu makuta aa, kamuena makuta avuabu batule bua kupatula Bible, mikanda ne bibejibeji to. Kamuena kabidi makuta avuabu batule bua kukumbaja majinga a bana betu bapite pa 20 000 badi benza mudimu ku budisuile mu Betele ya pa buloba bujima to.

Bungi bua badi badia diampa mu tshivulukilu. Bungi ebu mbua Bantemu bakadi batambule badi badia diampa ne banua mvinyo mu tshivulukilu. Kadi bungi ebu kabuena anu mua kuikala bungi bua bela manyi bonso badi pa buloba to. Tshilejilu, bamue badi mua kuikala ne lumvu lubi pa bidi bitangila diya dia mu diulu bua malu avuabu bitabuja kale anyi pamuapa bualu badi ne disama dia mutu. Nunku, mbikole bua kumanya bungi bujalame bua bela manyi badi pa buloba, ne katuena tukeba kubumanya to. Kasumbu kaludiki kakatu ne mêna a bantu bonso batu badia diampa ne banua mvinyo mu tshivulukilu to. *

Tudi bamanye ne: nekuikale bamue bela manyi anyi ‘bapika ba Nzambi’ pa buloba patuadija dikenga dinene. (Buak. 7:1-3) Bu mutshidibu pa buloba, bela manyi badi benza mudimu mukole bua kuyisha ne kulongesha bantu. Luapolo lua ku tshidimu ludi lutuleja mudimu wa katshia ne katshia udi Bantemu ba Yehowa benza pa buloba bujima.

[Mêyi adi kuinshi]