Udi muvuluke anyi?

Dibala dia bibejibeji bia Tshibumba tshia Nsentedi bishale ebi divua dikusankishe anyi? Nanku, anji tangila ni udi mua kuandamuna nkonko idi ilonda eyi:

• Mmalu kayi asatu adi mua kutuambuluisha bua kukandamena dipanga bululame?

(1) Kuikala ne ditshina dimpe dia Yehowa. (1 Pet. 3:12) (2) Kuikala ne kondo ka muoyo kalongesha kudi Bible. (3) Kudienzeja bua kusanka ne bitudi nabi.​—15/4, dibeji dia 6-7.

• Bua tshinyi tudi mua kuamba ne: kuenzela Nzambi mudimu ne bunême kakuena kumvuija kuikala anu misangu yonso ne malu makole peshi kubenga kusanka pamue ne bantu bakuabu?

Tuangatabi tshilejilu tshia Yezu. Uvua udia pamue ne bantu ne disanka. Tudi bamanye ne: kavua anu ne malu makole peshi ne mpala wa mudimu dîba dionso to. Bantu bakuabu nansha bana kabidi bavua basemena kudiye ne bavua basanka bua kusomba nende.​—15/4, dibeji dia 10.

• ‘Tshia kupikula natshi’ tshidibu batele mu Yobo 33:24 tshidi tshileja tshinyi? Mmunyi muvuatshi tshiambuluishe Yobo?

Tshia kupikula natshi tshidibu batele mu mvese eu tshidi tshiumvuija tshintu tshia kubuikila natshi. Bua Yobo, milambu ya nyama ke ivua mua kuikala tshintu tshia kubuikila natshi tshivua Nzambi witaba bua kubuikila bilema biende. Kakuyi mpata, Yehowa wakitaba mulambu wa bupikudi mufila bua bualu bua Yobo uvua wambuluisha bua Nzambi amubuikidile bubi buende, amupeshe kabidi makanda a mubidi ne amufute. (Yobo 1:5; 42:12-17)​—1/7, dibeji dia 11.

• Mutshi wa olive udibu batele mu mukanda wa Lomo nshapita wa 11 udi tshimfuanyi tshia tshinyi?

Mutshi wa olive udi uleja tshitupa tshibidi tshia kankanunuina ka Abalahama, mbuena kuamba ne: Isalele wa mu nyuma. Yehowa udi tshimfuanyi tshia muji ne Yezu udi tshimfuanyi tshia tshitaku tshia mutshi wa olive wa mu tshimfuanyi eu. Pavua bena Yuda ba bungi babenge Yezu, bantu ba bisamba bia bende bavua bamuitabuje bavua balue bu ditamba dilamika ku mutshi wa olive mulelela bua kukumbaja bungi bua bantu badi benza tshitupa tshibidi tshia kankanunuina ka Abalahama.​—15/5, dibeji dia 22-25.

• Mmunyi mutudi bajadike ne: Ngena ki mmuaba udi bantu bakenga mu kapia?

Lungenyi lua kuosha bantu ne muoyo mu kapia kalutu lusankisha Yehowa nansha kakese. (Yel. 7:31) Kabidi lungenyi lua dikengesha bafue kaluena lumvuangana ne ngikadilu wa Nzambi wa dinanga ne dilongesha dia mu Bible dia ne: “Bafue kabena bamanye bualu bumue.” (Muam. 9:5, 10)​—1/7, dibeji dia 15.

• Ntshinyi tshitu Yehowa wenzela bantu “badi ne mitshima itamba kunyingalala” ne ‘badi ne mitshima ya majiya’? (Mus. 34:18)

Anu mutu muledi wa dinanga ukongoloja ne ukolesha muanende padiye ne kanyinganyinga, Yehowa udi pabuipi ne batendeledi bende badi badila kudiye bua abambuluishe. Mmusue kukolesha ne kusamba bantu bonso badi ne kanyinganyinga ne majiya mu mutshima. Udi mua kubapesha meji ne bukole budibu bakengela bua kupita bimpe ne ntatu idi mibakuate. (2 Kol. 4:7; Yak. 1:5)​—1/7, dibeji dia 23.

• Bantu bavua mua kulua bana ba Yezu muntu mupuangane bavuaku balue tshitupa tshia mulambu wa bupikudi anyi?

Tòo. Nansha muvua Yezu mua kuikala ne bana bapuangane miliyare mivule, bana aba kabavua tshitupa tshia mulambu wa bupikudi to. Anu muoyo mupuangane wa Yezu nkayawu ke uvua muakanangane ne wa Adama. (1 Tim. 2:6)​—15/6, dibeji dia 13.

• Mmunyi mudi bena Kristo mua kuleja ne: badi batumikila mubelu udi mu Bienzedi 20:29, 30 udi wakula bua balongeshi ba dishima?

Kabena bakidila balongeshi ba dishima aba mu nzubu yabu anyi babela muoyo to. (Lomo 16:17; 2 Yone 9-11) Bena Kristo kabatu babala mikanda ya batontolodi peshi balonda malongesha abu ku tshisanji, ku televizion anyi ku Enternete to.​—15/7, dibeji dia 15-16.

• Anu mudibu baleje mu Luka 10:40-42, tudi mua kusombeshangana ne bena Kristo netu bua bualu kayi bunene?

Katuena tusombeshangana ne bena Kristo netu anu bua kudia biakudia bia makuta a bungi to, kadi mbua kukoleshangana ne kusambulujilangana bipedi bia nyuma. (Lomo 1:11, 12) Nansha biakudia bikese tshianana bidi mua kuambuluisha mu tshikondo tshia nunku.​—1/7, dibeji dia 29-30.