Udiku muvuije Yehowa tshitupa tshiebe anyi?

‘Diambedi kebayi bukalenge buende ne buakane buende, nunku nebanupe bintu ebi bionso.’​—MAT. 6:33.

1, 2. (a) ‘Isalele wa Nzambi’ udibu batele mu Galatia 6:16 udi uleja banganyi? (b) “Bisamba dikumi ne bibidi bia Isalele” bidibu batele mu Matayo 19:28, bidi bileja banganyi?

PAUDI ubala muaku Isalele mu Bible, ntshinyi tshidi tshikuvuila mu lungenyi? Utuku wela meji bua Yakoba muana wa Isaka wakaluabu kubikila ne: Isalele anyi? Peshi utu uvuluka bana bende bavua tshisamba tshia Isalele? Bible udi wakula kabidi bua Isalele wa mu nyuma anyi ‘Isalele wa Nzambi.’ Isalele eu mmuenza ne bantu 144 000, badibu bele manyi a nyuma muimpe bua kuikalabu bakalenge ne bakuidi mu diulu. (Gal. 6:16; Buak. 7:4; 21:12) Kadi kudi mushindu mukuabu wa pa buawu udibu bakuata mudimu ne dîna Isalele. Tudi tusangana mushindu eu mu Matayo 19:28.

² Yezu wakamba ne: ‘Mu dituku dialedibua bintu bionso tshiakabidi, pashikama Muana wa muntu mu nkuasa wa butumbi buende, nuenu kabidi bakundonda, nenushikame mu nkuasa dikumi ne ibidi, nulumbuluisha bisamba dikumi ne bibidi bia Isalele.’ Mu mvese eu, “bisamba dikumi ne bibidi bia Isalele” bidi bileja bantu bapeta muoyo wa kashidi mu Mparadizu pa buloba. Bantu 144 000 nebikale balumbuluishi ne bakuidi babu.

3, 4. Ntshilejilu kayi tshilenga tshidi bela manyi ba lulamatu bafila?

³ Anu bu bakuidi ne bena Lewi ba kale, bela  manyi lelu badi bangata mudimu udibu benzela Yehowa ne mushinga wa bungi. (Nom. 18:20) Bela manyi kabena batekemena bua kupeta tshitupa tshia buloba anyi muaba pa buloba to. Kadi Buakabuluibua 4:10, 11 udi uleja ne: nebatungunuke ne kuenzela Yehowa mudimu mu diulu muikalabu bakalenge ne bakuidi ne Yezu Kristo.​—Yeh. 44:28.

⁴ Patshidibu pa buloba, bela manyi badi ne bua kuikala ne nsombelu udi uleja ne: Yehowa udi tshitupa tshiabu. Badi bangata mudimu udibu benzela Nzambi ne mushinga wa bungi. Mupostolo Petelo wakamba ne: “Nutambe kunanukila bua kujadika dibikidibua dienu ne disungula dienu.” (2 Pet. 1:10) Bela manyi badi bakumbaja bualu ebu padibu baleja ditabuja bua mulambu wa Yezu ne batungunuka ne kumulonda. Badi ne mamanya mashilangane ne nsombelu mishilangane kabidi, nansha nanku kabena balekela malu au abapangisha bua kuenzela Nzambi mudimu to. Kadi badi badienzaja ne muoyo mujima bua kuteka mudimu udibu benzela Nzambi pa muaba wa kumpala mu nsombelu wabu. Badi tshilejilu tshimpe bua bonso badi ne ditekemena dia kupeta muoyo pa buloba.

5. Mmunyi mudi bena Kristo bonso mua kuvuija Yehowa tshitupa tshiabu? Bua tshinyi bidi mua kutukolela?

⁵ Yezu wakamba ne: muena Kristo yonso nansha yeye ne ditekemena dia kupeta muoyo mu diulu peshi pa buloba, udi ne bua ‘kudipidia ne kuambula mutshi wende wa makenga’ bua kutungunuka ne kumulonda. (Mat. 16:24) Bantu ba bungi badi ne ditekemena dia kupeta muoyo mu Mparadizu pa buloba badi batendelela Nzambi ne balonda Kristo mu mushindu eu. Kabena basanka anu bua kuenzela Nzambi mudimu mukese padibu ne mushindu wa kumuenzela mudimu wa bungi. Ba bungi mbapepeje nsombelu wabu ne mbalue bampanda-njila ba pa tshibidilu. Bakuabu badi badienzeja bua kuikala bampanda-njila mu ngondo bungi kampanda ku tshidimu tshionso. Nansha mudi bakuabu kabayi mua kulua bampanda-njila, kadi badi bayisha ne tshisumi. Mbafuane Mariya uvua muele Yezu manananshi a mushinga mukole. Yezu wakamba ne: ‘Yeye wakungenzela bimpe, mukaji eu wakuenza bu muakumanyeye mua kuenza.’ (Mâko 14:6-8) Tudi mu bulongolodi budi Satana ukokesha, nunku bidi mua kutukolela bua kuenza malu onso atudi ne bua kuenza. Tudi ne bua kudienzeja bikole ne kueyemena Yehowa. Tukonkononayi mpindieu mishindu inayi itudi mua kuenza nunku.

Tukebayi diambedi Bukalenge bua Nzambi

6. (a) Mmunyi mudi bantu ba bungi lelu baleja ne: anu muoyo utudi nawu ke tshiabu tshitupa? (b) Bua tshinyi mbimpe kuidikija Davidi?

⁶ Yezu wakalongesha bayidi bende bua kukeba diambedi Bukalenge bua Nzambi ne buakane buende. Bantu batu batamba kudikebela anu masanka. Bible udi ubabikila ne: ‘Bantu badi ne luseke luabu lua muoyo anu pa buloba ebu.’ (Bala Musambu wa 17:1, 13-15.) Bantu aba kabena batshuka Yehowa. Ba bungi badi baditatshisha anu bua kuikala ne nsombelu muimpe, kulela bana ne kubashila bumpianyi. Anu muoyo utudi nawu lelu ke tshiabu tshitupa. Kadi Davidi uvua yeye mushilangane nabu. Uvua musue kuikala ne ‘dîna dimpe’ ku mêsu kua Yehowa. Muanende Solomo wakalua kuamba ne: tuetu bonso tudi ne bua kudienzeja bua kuikala ne dîna dimpe. (Muam. 7:1) Anu bu Asafa, Davidi uvua mumanye ne: kuikala mulunda wa Yehowa ke bualu buvua ne mushinga wa bungi mu nsombelu. Davidi uvua ne disanka bua kuikala mulunda wa Nzambi. Lelu kabidi bena Kristo ba bungi mbaleje mudi mudimu udibu benzela Yehowa muikale ne mushinga wa bungi kupita mudimu wabu wa bianza.

7. Ndisanka kayi divua muanetu mukuabu mupete bua muvuaye muteke Bukalenge pa muaba wa kumpala?

⁷ Tuangate tshilejilu tshia muanetu mukuabu Jean-Claude wa mu ditunga dia République Centrafricaine, udi mukulu mu tshisumbu ne tatu wa bana basatu. Mbikole bua kupeta mudimu mu ditunga edi, ne bantu ba bungi batu baditatshisha bua kulama mudimu wabu. Dituku dikuabu mfumuende wa mudimu wakamuambila bua kutuadijaye kuenza mudimu butuku. Mudimu uvua ne bua kutuadija pa dîba 6:30 wa dilolo dituku dionso. Jean-Claude wakamuambila ne: kavua uditatshisha anu bua kukumbajila bena mu dîku diende majinga a ku mubidi to, kadi uvua ne bua kubambuluisha bua bikale mu malanda mimpe ne Nzambi. Wakamuambila kabidi ne: uvua ne bua kuambuluisha tshisumbu. Mfumuende  wakamuambila ne: “Bu muudi ne diakalenga dia kuikala ne mudimu, udi ne bua kupua malu makuabu onso muoyo kusangisha ne mukajebe, bana bebe ne malu ebe. Udi ne bua kudifila ne muoyo mujima ku mudimu. Sungula tshiudi musue, tshitendelelu tshiebe peshi mudimu.” Bu wewe muikale Jean-Claude ntshinyi tshiuvua mua kuenza? Jean-Claude uvua mumanye ne: yeye mujimije mudimu Nzambi uvua ne bua kumuambuluisha. Uvua mua kuikala ne malu a bungi a kuenza mu mudimu wa Nzambi ne Yehowa uvua ne bua kukumbaja majinga a dîku diende. Nunku wakanji kuya mu bisangilu. Pakajika bisangilu, wakadilongolola bua kuya ku mudimu nansha muvuaye kayi mujadika ne: mudimu wende utshivuaku. Diakamue badi bamuela nshinga bamuambila ne: mbumushe mfumuende ku mudimu, kadi yeye kabavua bamumbushe.

8, 9. Mmunyi mutudi mua kuvuija Yehowa tshitupa tshietu anu bu bakuidi ne bena Lewi?

⁸ Bamue ba kutudi bavua mua kuikala batuilangane ne nsombelu wa nunku. Uvua mua kuikala uditatshisha bua tshiuvua mua kuenza bua kukuatshisha bena mu dîku diebe bu wewe mua kujimija mudimu. (1 Tim. 5:8) Nansha wewe mutuilangane ne nsombelu wa buena eu anyi kuyi muanji kutuilangana nende, udi mua kuikala mumanye ku diambuluisha dia malu akatu makufikile ne: Nzambi katu wela bonso batu bamuangata bu tshitupa tshiabu ne bateka mudimu wende pa muaba wa kumpala mu nsombelu wabu mâyi ku makasa to. Pavua Yezu muambile bayidi bende bua kukeba diambedi Bukalenge uvua mubalaye ne: Nzambi uvua ne bua kubapesha bintu bikuabu bivuabu nabi dijinga bu mudi biakudia, biakunua ne bia kuvuala.​—Mat. 6:33.

⁹ Vuluka bena Lewi bavua kabayi bapete bumpianyi bua tshitupa tshia buloba. Bu muvuabu ne mudimu wa kulombola tshisamba tshia Isalele mu ntendelelu mulelela, bavua ne bua kueyemena Yehowa bualu yeye ke uvua tshitupa tshiabu ne uvua mua kubakumbajila majinga a ku mubidi. (Nom. 18:20) Nansha mutudi katuyi tuenza mudimu ku ntempelo bu bakuidi ne bena Lewi, tudi petu mua kueyemena Yehowa anu bu buobu. Bu mudi nshikidilu musemene pabuipi, bidi ne mushinga wa bungi bua kueyemena Nzambi bua atuambuluishe.​—Buak. 13:17.

Tukebayi diambedi buakane bua Nzambi

10, 11. Mmunyi muvua bamue baleje muvuabu beyemena Yehowa pavuabu basungula mudimu wa bianza? Fila tshilejilu.

¹⁰ Yezu wakambila kabidi bayidi bende bua kukeba diambedi buakane bua Nzambi. (Mat. 6:33) Bivua bisua kumvuija ne: tudi tulonda lungenyi lua Yehowa pa bidi bitangila tshidi tshimpe ne tshidi tshibi, kadi katuena tulonda lungenyi lua bantu to. (Bala Yeshaya 55:8, 9.) Kumpala bamue bantu bavua badima mfuanka anyi bamusumbisha, balongesha bakuabu bua kuluangana mvita anyi benza bingoma bia mvita ne babipanyisha. Kadi pakalongabu bulelela, ba bungi bakapangadija bua kushintulula mudimu wabu ne kukumbaja malu malomba bua kutambula.​—Yesh. 2:4; 2 Kol. 7:1; Gal. 5:14.

¹¹ Tuangatayi tshilejilu tshia Andrew uvua pende muangate dipangadika dia nunku. Pavuaye yeye ne mukajende balonge bulelela pa bidi bitangila Yehowa, bakapangadija bua kumuenzela mudimu. Andrew uvua munange bikole mudimu wende wa bianza, kadi wakawulekela. Bua tshinyi? Bualu uvua wenza mudimu mu tshisumbu kampanda tshivua tshibuelakana mu mvita, ne uvua musue kuenza tshivua tshiakane ku mêsu kua Yehowa. Pavua Andrew mulekele mudimu, uvua ne bana babidi ne uvua ne makuta avua mua kumuambuluisha anu mu ngondo mikese. Bivua bimueneka ne: anu bu bena Lewi, kavua ne bumpianyi to. Uvua mueyemene Yehowa eku ukeba mudimu mukuabu. Mpindieu padibu bavuluka malu avua mamufikile tshikondo atshi, Andrew ne dîku diende badi mua kuamba mudi mêyi adi alonda aa mikale malelela: ‘Tshianza tshia Yehowa katshiena tshitamba buipi.’ (Yesh. 59:1) Bu muvuabu ne nsombelu mupepele, Andrew ne mukajende bavua bapete mushindu wa kuangata bumpanda-njila. Andrew udi  wamba ne: “Imue misangu tutu tuditatshisha bua kupeta mfranga, muaba wa kulala, makanda a mudibi ne bua mutukadi bakulakaje. Kadi Yehowa udi anu utuambuluisha. Tudi mua kuamba kakuyi mpata ne: kuenzela Yehowa mudimu kudi kupetesha masanka ne ke bualu bua mushinga budi muntu mua kuenza.” *​—Muam. 12:13.

12. Nngikadilu kayi utudi ne bua kuikala nende bua kukeba diambedi buakane bua Nzambi? Fila bilejilu bia muaba uudi musombele.

¹² Yezu wakambila bayidi bende ne: ‘Binuikala ne ditabuja bunene bua lutete lua mutada, nenuambile mukuna eu ne: umuka aku, ya kuaka, neumuke; kakuena bualu budi mua kunukolela.’ (Mat. 17:20) Udiku mua kutungunuka ne kukeba buakane bua Nzambi nansha biobi bikukebele ntatu anyi? Wewe muikale ne dielekana, udi mua kuebeja bena Kristo bakuabu mu tshisumbu. Malu a mu nsombelu wabu adi aleja muvua Yehowa mubambuluishe, neakoleshe ditabuja diebe.

Tuikalayi ne dianyisha bua malu adi Yehowa utuenzela

13. Patudi tudifila mu mudimu wa Yehowa, ntshinyi tshitudi mua kutekemena?

¹³ Wewe wangata mudimu uudi wenzela Yehowa ne mushinga, udi mua kuikala mushindike ne: neakupeshe tshionso tshiudi natshi dijinga anu muvuaye muenzele bena Lewi. Tuangate tshilejilu tshia Davidi. Nansha muvuaye musokome mu lubuebue, uvua mujadike ne: Yehowa uvua mua kumuambuluisha. Tudi petu mua kueyemena Yehowa nansha padibi bimueneka ne: katuena ne muntu wa kutuambuluisha. Vuluka ne: pavua Asafa mubuele “mu muaba wa tshijila wa Nzambi,” uvua mupete mushindu wa kujingulula tshivua tshimutatshisha. (Mus. 73:17) Bia muomumue, tudi ne bua kueyemena Yehowa bua atupeshe bitudi nabi dijinga bua kulama bulunda buetu nende. Ebi nebileje ne: tudi tuangata mudimu utudi tumuenzela ne mushinga nansha tuetu bikale mu nsombelu kayi. Nunku, netuvuije Yehowa tshitupa tshietu.

14, 15. Ntshinyi tshitudi ne bua kuenza padibu bashintulula mushindu utuvua tumvua imue mvese? Bua tshinyi?

¹⁴ Utuku weyemena Yehowa padiye utuambuluisha bua kumvua bimpe “malu male a Nzambi” adi mu Bible anyi? (1 Kol. 2:10-13) Mupostolo Petelo mmutushile tshilejilu tshimpe mu bualu ebu. Yezu wakambila bena Yuda ne: ‘Binuikala kanuyi nudia mubidi wa Muana wa muntu, binuikala kanuyi nunua mashi ende, kanuena ne muoyo munda muenu.’ Bayidi ba bungi bavua bela meji ne: Yezu uvua wakula bua mubidi ne mashi etu mena dina aa, bamba ne: ‘Dîyi edi didi dikole, udi mumanye mua kuditabuja nnganyi? Bayidi bakapingana ku malu a diambedi.’ Kadi Petelo wakamba ne: ‘Mukalenge, netuye kudi nganyi? Wewe udi ne mêyi a muoyo wa tshiendelele.’​—Yone 6:53, 60, 66, 68.

¹⁵ Petelo kavua mumvue bimpe tshivua Yezu musue kuamba to. Kadi uvua mushindike ne: Yehowa uvua ukuata mudimu ne Yezu bua kuambuluisha bantu bua bumvue bulelela bimpe. Padibu bashintulula mushindu utudi tumvua dilongesha kampanda dia mu Bible lelu, utuku udienzeja bua kumvua bua tshinyi mbadishintulule anyi? (Nsu. 4:18) Bena Beloya ba mu bidimu lukama bia kumpala ‘bakitabuja dîyi ne mitshima mimana kulongolola; bakadi badikebela mu Mukanda wa Nzambi ku dituku ku dituku.’ (Bien. 17:11) Wewe mulonde tshilejilu tshiabu, newangate mudimu uudi wenzela Yehowa ne mushinga wa bungi. Newikale bushuwa ne dianyisha bua mudi Yehowa muikale tshitupa tshiebe.

Tuselangane anu mu Mukalenge

16. Mmunyi mudi bena Kristo bajike mua kuvuija Yehowa tshitupa tshiabu bilondeshile 1 Kolinto 7:39?

¹⁶ Mushindu mukuabu udi bena Kristo ne bua kuvuluka malu adi Nzambi mulaye mpadibu batumikila mukenji wa mu Bible wa kuselangana ‘anu mu Mukalenge.’ (1 Kol. 7:39) Bena Kristo ba bungi mbasungule bua kushala bajike pamutu pa kushipa mukenji eu. Nzambi udi wambuluisha bana betu badi batumikila mukenji eu. Ntshinyi tshiakenza Davidi pavuaye mudimone nkayende muenze bu ne: kavua ne muntu wa kumuambuluisha? Wakalomba Yehowa diambuluisha. Wakamba ne: ‘Ndi mpumuna mêyi a kuabakana kuanyi kumpala kuende, ndi mmulondela ntatu yanyi kumpala kuende. Papanga nyuma wanyi munda muanyi.’ (Mus. 142:1-3) Yelemiya uvua muenzele Yehowa mudimu munkatshi mua bidimu bia bungi ne lulamatu pavuaye mujike. Yeye  pende uvua mua kuikala udimona nkayende. Udi mua kukonkonona tshilejilu tshiende mu nshapita wa 8 wa mukanda wa Dîyi dia Nzambi didi Yelemiya utuambila.

17. Ntshinyi tshidi muanetu kampanda wa bakaji wenza padiye udiumvua nkayende?

¹⁷ Muanetu wa bakaji mukuabu wa mu États-Unis udi wamba ne: “Katshia tshitu muanji kuangata dipangadika dia kushala mujike to. Ndi musue kubuela mu dibaka kadi anu pandi mpeta muntu udi mukumbane. Mamuanyi udi kayi Ntemu uvua ungenzeja bua ngitabe muntu yonso uvua ulua bua kunsela. Ngakamuebeja bikalaye uvua musue kuambula bujitu bua tshionso tshivua mua kunduila bu meme mutute diakabi mu dibaka.” Kadi pakamona mamu eu ne: muanende uvua wenza mudimu muimpe, udikumbajila majinga ende nkayende ne muikale ne disanka, wakalekela kumutatshisha. Muanende utu udiumvua nkayende imue misangu. Udi wamba ne: “Ntu ndienzeja bua kuvuija Yehowa tshieyemenu tshianyi. Katu muanji kundekela nansha kakese.” Ntshinyi tshivua tshimuambuluishe bua kueyemena Yehowa? Muanetu wa bakaji eu udi wamba ne: “Disambila ndingambuluishe bua kumona Nzambi bu muntu wa bushuwa ne kumvua ne: tshiena nkayanyi. Mutambe Bunene wa mu diulu udi unteleja, mmunyi mundi tshiyi mua kudiumvua ne mushinga ne kuikala ne disanka?” Muanetu eu mmueyemene tshidi Bible wamba ne: ‘Kupa kudi kutamba kuangata kusankisha muntu.’ Nunku udi udienzeja bua kuambuluisha bantu bakuabu kayi utekemena difutu. Udi wamba ne: “Pandi ngela meji bua tshindi mua kuenza bua kuambuluisha muntu kampanda, bidi bimpetesha disanka.” (Bien. 20:35) Muanetu eu mmuvuije Yehowa tshitupa tshiende ne udi ne disanka dia kumuenzela mudimu.

18. Mmunyi muudi mua kulua tshitupa tshia Yehowa?

¹⁸ Nansha wewe muikale mu nsombelu kayi, udi anu mua kuvuija Nzambi tshitupa tshiebe. Wewe muenze nunku, udi mua kuikala munkatshi mua bantu badi bamutendelela ne disanka. (2 Kol. 6:16, 17) Nunku udi mua kulua tshitupa tshia Yehowa anu muvua batendeledi ba Nzambi ba kale benze. (Bala Dutelonome 32:9, 10.) Anu bu muvua tshisamba tshia Isalele tshilue tshitupa tshia Nzambi munkatshi mua bisamba bikuabu, Nzambi udi mua kukusungula bua wikale tshitupa tshiende ne kukutabalela ne dinanga.​—Mus. 17:8.

[Mêyi adi kuinshi]

Newandamune munyi?

Mmunyi muudi mua kuvuija Yehowa tshitupa tshiebe

• paudi ukeba bangabanga Bukalenge bua Nzambi ne buakane buende?

• paudi ne dianyisha bua bidiye ukupesha?

• paudi utumikila mukenji wende wa kuselangana anu mu Mukalenge?

[Nkonko ya dilonga]

[Lungenyi lunene lua mu dibeji 13]

Yehowa udi ulua tshitupa tshietu patudi tuteka mudimu wende pa muaba wa kumpala mu nsombelu wetu

[Tshimfuanyi mu dibeji 15]

Tshilejilu tshia Yelemiya tshiakankolesha