Nkonko ya babadi

Ndi mua kuenza tshinyi meme muikale ne lukonko pa bualu kampanda bumvua mubale mu Bible anyi pandi nkeba mibelu pa bualu kampanda budi buntangila?

Nsumuinu 2:1-5 udi ulomba yonso wa kutudi bua ‘kukeba’ dimanya ne dijingulula dia mianda bu mutu muntu ukeba “biuma bisokoka.” Ebi bidi biumvuija ne: tudi ne bua kudienzeja bua kukeba mandamuna mu Bible a nkonko itudi mua kuikala tudiela ne bua kumanya tshitudi mua kuenza patudi ne malu adi atutangila. Mmunyi mutudi mua kuenza nunku?

Mu mukanda wa Kalasa ka Mudimu wa Nzambi kadi kakuambuluisha, mu dibeji dia 33 too ne dia 38 mudi tshiena-bualu tshia ne: “Mua kukebulula malu” tshidi tshileja mua kuenza makebulula ku diambuluisha dia bintu bidi ‘mupika wa lulamatu ne wa budimu’ mupatule. (Mat. 24:45, NW) Mu dibeji dia 36 badi bumvuija mushindu utudi mua kukuata mudimu ne Index des publications Watch Tower. Mukanda eu udi ne tshitupa tshidi tshitangila biena-bualu bishilangane ne tshikuabu tshidi tshitangila anu mvese mishilangane. Ebi bidi biambuluisha bua kuenza makebulula bilondeshile miaku minene idi mu lukonko anyi bilondeshile mvese iudi ukeba kumvua, nunku neusangane mikanda mishilangane iudi mua kubala bua kupeta diandamuna. Ikala ne lutulu paudi ukeba diandamuna disunguluke anyi mubelu pa bualu kampanda buudi ujinga kumanya. Vuluka ne: udi ukeba “biuma bisokoka” bidi bilomba dîba ne bukole bua kubipeta.

Bushuwa, kudi bimue biena-bualu ne mvese bidi mikanda yetu kayiyi miakuile buludiludi. Nansha muaba utudi bumvuije mvese kampanda musunguluke, katuena mua kuikala bumvuije menemene lukonko luudi nalu mu meji to. Kudi kabidi imue miyuki ya mu Bible idi ijula nkonko bualu ki mbumvuije malu onso too ne mu katoba to. Nunku, katuena mua kupeta diakamue diandamuna ku lukonko luonso ludi lujuka to. Mu nsombelu eu, katuena ne bua kukeba bua kufila mandamuna a mu mutu ku nkonko itudi katuyi mua kuandamuna, bua katulu kubuelakana mu ‘malu adi avuija dikokangana pamutu pa kutupetesha bualu bua kudi Nzambi budi bupetangana ne ditabuja dietu.’ (1 Tim. 1:4; 2 Tim. 2:23; Tito 3:9) Betele anyi biro bidi bilombola mudimu wetu pa buloba bujima kabiena mua kukonkonona anyi kuandamuna nkonko ya nunku idibu kabayi bakuile mu mikanda yetu. Tudi ne bua kuikala ne disanka bua mudi Bible utuleja malu adi mua kutufikisha ku muoyo wa tshiendelele kadi kayi wamba malu onso too ne mu katoba bua tuikale ne ditabuja dikole kudi Nzambi udi mumufundishe.​—Tangila mukanda wa Semena pabuipi ne Yehowa dibeji dia 185 too ne dia 187.

Ntshinyi tshiudi mua kuenza wewe mudienzeje bua kukeba diandamuna pa bualu budi bukutonde kadi kuyi mudipete? Udi mua kuebeja muena Kristo mushindame, bu mudi bakulu ba mu tshisumbu tshienu. Bana betu aba badi ne dimanya dia mu Bible dia bungi ne dimona dia mianda mu nsombelu wa bena Kristo. Diambuluisha diabu dia meji didi mua kukukuatshisha wewe muikale dijinga ne mibelu pa tshilumbu tshidi tshikutangila anyi musue kuangata dipangadika kampanda, bualu mbakumanye bimpe, badi nebe pabuipi ne mbamanye nsombelu webe bimpe. Kupu muoyo bua kuleja Yehowa mu disambila malu adi akutatshisha ne kumulomba bua alombole meji ebe ku diambuluisha dia nyuma wende muimpe ‘bualu bua Yehowa udi upa bantu meji ne dijingulula dia mianda.’​—Nsu. 2:6; Luka 11:13.