‘Nusambe bonso badi mu madilu’

‘Yehowa wakunjidika ne manyi pa mutu panyi bua kusamba bonso badi mu madilu.’​—YESH. 61:1, 2.

1. Ntshinyi tshivua Yezu wenzela bavua badila? Bua tshinyi?

YEZU KRISTO wakamba ne: ‘Bidia bianyi bidi kuenza mudi wakuntuma musue ne kushikija mudimu wende.’ (Yone 4:34) Pavua Yezu ukumbaja mudimu uvua Nzambi mumupeshe, uvua uleja ngikadilu milenga ya Tatuende. Mu ngikadilu eyi mudi dinanga dikole didi Yehowa munange bantu. (1 Yone 4:7-10) Mupostolo Paulo wakaleja mudi Nzambi uleja dinanga diende pakambaye ne: Yehowa udi “Nzambi wa busambi buonso.” (2 Kol. 1:3) Yezu wakaleja dinanga edi pakenzaye bualu bukavua muprofete Yeshaya muambe. (Bala Yeshaya 61:1, 2.) Yezu wakabala mulayi au mu nsunagoga wa mu Nazaleta ne kulejaye muvuawu umutangila. (Luka 4:16-21) Mu mudimu wende wonso, Yezu uvua usamba bantu bavua badila ne dinanga, ubakankamika ne ubapetesha ditalala dia mu lungenyi.

2, 3. Bua tshinyi bayidi ba Kristo badi ne bua kumuidikija mu disamba bakuabu?

² Bayidi bonso ba Yezu badi ne bua kumuidikija padibu bakolesha bantu badi badila. (1 Kol. 11:1) Paulo wakamba ne:  “Nusambangane, nudiundishangane muntu ne muntu.” (1 Tes. 5:11) Tudi ne bua kusamba bakuabu nangananga bualu bantu bonso lelu badi batuilangana ne “malu makole.” (2 Tim. 3:1) Misangu ya bungi mu bulongolodi ebu, bantu ba mutshima muimpe batu batuilangana ne bantu badi bakula ne benza malu adi abanyingalaja, abasamisha mutu ne ababungamija.

³ Anu muvua mulayi wa mu Bible muleje, mu matuku a ku nshikidilu wa bulongolodi ebu bubi, bantu ba bungi mbalue ‘badisui, banangi ba biuma, baditumbishi, badileji, bapendi ba Nzambi, kabayi batumikila mêyi a baledi babu, kabayi ne kusakidila, kabayi ne tshijila, kabayi banangi ba bana babu, bashipi ba bipungidi, bena bunsonge, kabayi mua kudikanda, bena luonji, kabayi basue malu mimpe, batungidianganyi, bena lukuluku, buujibue ne diambu, banangi ba masanka, kabayi banangi ba Nzambi.’ Malu aa mmavulangane lelu bikole kupita kumpala bualu ‘bantu babi ne badingi ba bakuabu mbadiunde mu malu mabi abu.’​—2 Tim. 3:2-4, 13.

4. Ntshinyi tshidi tshifikile nsombelu wa bantu lelu pa buloba?

⁴ Malu onso aa kaena mua kutukemesha to, bualu Dîyi dia Nzambi didi dileja patoke mudi ‘bena panu bonso bikale mu bianza bia muena bubi.’ (1 Yone 5:19, MMM) Padi Bible wamba ne: ‘bena panu bonso’ udi usua kuakula bua makalenge a tshididi, bitendelelu ne malu a bungenda mushinga ne mishindu idi Satana ukuata nayi mudimu bua kutangalaja ngenyi yende. Ke bualu kayi badi babikila Satana Diabolo ne: “mukokeshi wa buloba” ne “nzambi wa tshikondo etshi.” (Yone 14:30; 2 Kol. 4:4) Malu adi enda anyanguka pa buloba bualu Satana udi ne tshiji tshikole, mumanye ne: nkushale matuku makese bua Yehowa kumubutula. (Buak. 12:12) Bidi bitukolesha patudi tumanya ne: Nzambi ukadi pa kubutula Satana ne bulongolodi buende bubi, ne tshilumbu tshidi tshitangila bumfumu bua Yehowa tshivua Satana mujule netshijike.​—Gen. nshap. 3; Yobo nshap. 2.

Badi bayisha lumu luimpe pa buloba bujima

5. Mmunyi mudi mulayi udi utangila mudimu wa diyisha wenda ukumbana mu matuku a ku nshikidilu aa?

⁵ Mu tshikondo etshi tshikole, malu avua Yezu muambe adi enda akumbana. Wakamba ne: ‘Nebambile bantu bonso ba pa buloba lumu luimpe elu lua bukalenge buanyi, neluikale tshimanyishilu ku bisamba bionso; pashishe nshikidilu nealue.’ (Mat. 24:14) Mudimu eu wa kuyisha lumu luimpe lua Bukalenge bua Nzambi pa buloba udi anu wenda uvula. Lelu eu kudi Bantemu ba Yehowa bapite pa 7 500 000 badi badisangisha mu bisumbu bipite pa 107 000 badi bayisha bua Bukalenge bua Nzambi pa buloba bujima anu muvua Yezu uyisha ne ulongesha. (Mat. 4:17) Mudimu wa kuyisha utudi tuenza lelu udi utuambuluisha bua kusamba bantu badi badila. Bidi bituenza disanka bua kumanya ne: mu bidimu  bibidi bishale ebi, bantu 570 601 mbatambule ne balue Bantemu ba Yehowa.

6. Udi mua kuamba tshinyi bua didiunda dia mudimu wetu wa buambi?

⁶ Tudi tumona bunene bua mudimu eu patudi tumona mudi Bantemu ba Yehowa bakudimuna ne babanya mikanda ya malu a mu Bible mu miakulu mipite pa 500. Katshia, mudimu wa mushindu eu kawutu muanji kuenzeka to. Dikalaku dia tshitupa tshia bulongolodi bua Yehowa tshia pa buloba, mudimu udi wenzekamu ne didiunda diatshi bidi bikemesha bikole. Bu kabiyi bua bulombodi bua Nzambi ne diambuluisha dia nyuma wende, kabivua mua kuikala bitekete bua mudimu kudiundawu nunku mu bulongolodi budi Satana ukokesha ebu to. Bu mudibu bayisha lumu luimpe elu mu buloba bujima, ki nganu bena Kristo netu badi bapeta busambi bua mu Bible kadi badi babupeta kabidi kudi bantu badi badila badi bitaba mukenji wa Bukalenge.

Tukoleshayi bena Kristo netu

7. (a) Bua tshinyi katuena mua kutekemena bua Yehowa atumbushile malu onso adi akebesha tunyinganyinga lelu eu? (b) Mmunyi mutudi bajadike ne: tudi mua kutantamena buluishi ne ntatu?

⁷ Mu bulongolodi ebu budi buwule ne bubi ne makenga, tudi batekemene anu ne: netutuilangane ne malu adi akebesha tunyinganyinga. Katuena mua kutekemena bua Nzambi atumbushile malu onso adi akebesha tunyinganyinga kumpala kua kubutulaye bulongolodi ebu to. Bu mutudi tutuilangana ne ntatu ikavuabu balaye, tudi ne bua kuleja mutudi balamate bumfumu bua Yehowa. (2 Tim. 3:12) Kadi, bu mudi Tatuetu wa mu diulu utuambuluisha ne utusamba, tudi mua kuikala bu bena Kristo bela manyi ba mu Tesalonike bavua baleje ditantamana ne ditabuja pavuabu batuilangana ne buluishi ne ntatu.​—Bala 2 Tesalonike 1:3-5.

8. Mbilejilu kayi bia mu Bible bidi bileja ne: Yehowa udi usamba batendeledi bende?

⁸ Kabiena bitukemesha bua mudi Yehowa usamba batendeledi bende mu mushindu udibi bikengela. Tshilejilu, pavua mukalenge mukaji mubi Yezabele musue kushipesha muprofete Eliya, muprofete eu wakapangila dikima, kunyema ne uvua wamba muvuaye musue kufua. Kadi pamutu pa Yehowa kumukanyina, wakamusamba ne kumukankamija bua atungunuke ne kuenza mudimu wa buprofete. (1 Bak. 19:1-21) Tudi tumona kabidi mushindu udi Yehowa usamba bantu bende patudi tukonkonona nsombelu uvua mufikile bena Kristo ba mu bidimu lukama bia kumpala. Tshilejilu, mu Bible badi bakula bua tshikondo tshivua ‘bena ekeleziya ba mu Yudaya yonso ne ba mu Galela ne ba mu Samalea ne ditalala, badiunda mu bualu bua Nzambi; benda mu ditshina dia Mukalenge ne mu disamba dia nyuma muimpe ne bavulangana ba bungi.’ (Bien. 9:31) Bidi bituenza disanka bualu tudi petu ne ‘busambi bua nyuma muimpe.’

9. Kulonga malu adi atangila Yezu kudi mua kutukolesha bua tshinyi?

⁹ Bu mutudi bena Kristo, tudi tukoleshibua patudi tulonga malu adi atangila Yezu Kristo ne tuenda mu makasa ende. Yezu wakamba ne: ‘Luayi kundi, bonso badi ne mudimu mukole, badi ne bujitu bunene, meme nennupe dikisha. Angatayi mutshi wanyi wa tshikokedi pa nshingu yenu, nuyile malu kundi; bualu bua meme ndi ne kalolo ne kanemu mu mutshima wanyi; nunku nenusangane dikisha mu mitshima yenu. Bualu bua mutshi wanyi wa tshikokedi udi muakane ne bujitu buanyi budi bupepele.’ (Mat. 11:28-30) Kulonga mushindu muimpe uvua Yezu wenzelangana malu ne kulonda tshilejilu tshiende tshilenga kudi kutuambuluisha bua kumbusha tunyinganyinga.

10, 11. Mbanganyi badi mua kukolesha bakuabu mu tshisumbu?

¹⁰ Bena Kristo netu badi kabidi mua kutukolesha. Tshilejilu, tukonkonone mudi bakulu mu tshisumbu bambuluisha bantu badi mu ntatu mikole. Yakobo wakafunda ne: ‘Muntu udi ne disama [mu malanda ende ne Nzambi] munkatshi muenu, anyi? Abikile biende bakulu ba ekeleziya; bobu bamulombele  Nzambi.’ Ntshinyi tshidi mua kuenzeka pashishe? ‘Kulomba kudi ne ditabuja nekusungile muena disama, ne Mukalenge neamubishe; ne bikalaye muenze bualu bubi, Nzambi neamubuikidile bubi buende.’ (Yak. 5:14, 15) Bena Kristo bakuabu badi mu tshisumbu badi pabu mua kufila diambuluisha.

¹¹ Bitu bipepele bua bantu bakaji kukuatshila bantu bakaji nabu malu mashilashilangane adi mabatonde. Nangananga bakaji bakulumpe bakadi bamonemone mianda badi mua kupesha bansongakaji mibelu mimpe. Bakaji bashindame aba badi mua kuikala bakadi batuilangane ne nsombelu ya muomumue. Luse ne ngikadilu yabu ya buntu bukaji bidi mua kuambuluisha bikole. (Bala Tito 2:3-5.) Bushuwa, bakulu ne bantu bakuabu badi ne bua ‘kukolesha badi ne mitshima yamba kupanga’ badi munkatshi muetu. (1 Tes. 5:14, 15) Mbimpe tuvuluke ne: Nzambi ‘utu utusamba mu makenga etu onso, bua tuetu tumanye mua kusamba bakuabu mu makenga abu onso.’​—2 Kol. 1:4.

12. Bua tshinyi kubuela mu bisangilu bia bena Kristo kudi ne mushinga?

¹² Mushindu mutambe buimpe wa kukoleshibua nkubuela mu bisangilu bia bena Kristo mutudi mua kukoleshibua ne mêyi a mu Bible. Tudi tubala ne: Yuda ne Sila ‘bakambila bantu mêyi a bungi, bakakolesha mitshima yabu.’ (Bien. 15:32) Kumpala ne ku ndekelu kua bisangilu bietu, bena mu tshisumbu batu bayukila malu adi akolesha. Nunku nansha tuetu bikale ne lutatu kampanda lukole, katuena ne bua kuditola to, bualu kuenza nunku kakuena mua kujikija lutatu luetu nansha. (Nsu. 18:1) Kadi tudi ne bua kutumikila mubelu wa mupostolo Paulo wa ne: ‘Tudielelangane meji muntu ne muntu bua kuenzejangana ku dinanga ne ku dienza dia bienzedi bimpe, katuyi tulekela bietu disangisha dietu pamue, bu mudi tshilele tshia bakuabu, kadi tukoleshangana mitshima, tutamba kuenza nunku bualu bua nudi numona dituku dia Mukalenge disemena pabuipi.’​—Eb. 10:24, 25.

Tupetele busambi mu Dîyi dia Nzambi

13, 14. Leja mudi Bible mua kutukolesha.

¹³ Nansha tuetu tukadi batambule anyi tutshituadijilaku kulonga Dîyi dia Nzambi ne malu adiye mulaye, tudi mua kupeta busambi mu Bible. Paulo wakafunda ne: ‘Bua malu onso akafundabu diambedi akafundibua bua kutuyisha, bua tuetu tuikale ne ditekemena bua ditantamana dietu ne bua busambi bua mu Mukanda wa Nzambi.’ (Lomo 15:4) Mifundu minsantu idi mua kutusamba ne kutuvuija ‘bakumbane ne balongolola tshishiki bua midimu yonso mimpe.’ (2 Tim. 3:16, 17) Kumanya bulelela pa bidi bitangila malu adi Nzambi mulongolole ne kuikala ne ditekemena dilelela bua matuku atshilualua bidi mua kutukolesha bikole. Nunku kukuata mudimu bikole ne Bible ne mikanda idi imumvuija kudi mua kutukolesha ne kutuambuluisha mu mishindu ya bungi.

 ¹⁴ Yezu mmutushile tshilejilu tshimpe bua kukolesha bantu bakuabu, kubambuluisha ne kubalongesha ne Bible. Tshilejilu, pavuaye mumuenekele bayidi bende babidi musangu kampanda panyima pa dibika diende, ‘wakabajinguluila Mukanda wa Nzambi.’ Pavuaye uyukila nabu, malu avuaye wamba akabalenga ku muoyo. (Luka 24:32) Mupostolo Paulo wakalonda tshilejilu tshimpe tshia Yezu pavuaye ‘welangana nabu meji pa Mukanda wa Nzambi.’ Bantu bavuaye muyishe mu Beloya ‘bakitabuja dîyi ne mitshima mimana kulongolola; bakadi badikebela mu Mukanda wa Nzambi ku dituku ku dituku.’ (Bien. 17:2, 10, 11) Nunku mbimpe bua tuikale tubala Bible dituku dionso bualu malu atudi tupetamu ne adi mu mikanda yetu ya bena Kristo adi atusamba ne atupesha ditekemena mu tshikondo etshi tshia ntatu mikole.

Mishindu mikuabu itudi mua kukolesha bakuabu

15, 16. Mmalu kayi atudi mua kuenza bua kuambuluisha ne kukolesha bena Kristo netu?

¹⁵ Tudi mua kuambuluisha ne kusamba bena Kristo netu mu mishindu mishilangane. Tshilejilu, tudi mua kuambuluisha bena Kristo bakadi bakulakaje anyi badi basama patudi tubayila mu tshisalu. Tudi mua kuambuluisha bakuabu patudi tubenzela midimu ya kumbelu bua kuleja mutudi tuditatshisha bua bualu buabu. (Filip. 2:4) Tudi kabidi mua kuela bena Kristo netu kalumbandi bua ngikadilu yabu mimpe bu mudi dinanga, mushindu udibu bapita ne malu, dikima ne ditabuja.

¹⁶ Patudi tujinga kusamba bakulakaje, tudi mua kuya kubakumbula ne kuteleja malu a mu nsombelu wabu adibu batuambila ne masanka adibu bapete mu mudimu wa Yehowa. Tuetu tuenza nunku, bidi mua kutukolesha. Tudi mua kubala Bible anyi mikanda idi imumvuija pamue ne bantu batudi tuya kukumbula. Tudi mua kulongolola nabu tshiena-bualu tshia kulonga tshia Tshibumba tshia Nsentedi peshi kulongolola nabu mukanda utualonga mu Dilonga dia Bible dia Tshisumbu. Tudi mua kutangila nabu ditadi kampanda didi diakula bua malu a mu Bible. Pashishe tudi mua kubabadila anyi kubalondela amue malu a mu nsombelu atudi babale mu mikanda yetu.

17, 18. Bu mutudi tuenzela Yehowa mudimu ne lulamatu, bua tshinyi tudi mua kuikala bashindike ne: neatukuatshishe ne neatusambe?

¹⁷ Tuetu bamone ne: muena Kristo netu kampanda udi dijinga ne kumusamba, tudi mua kumutela mu masambila atudi tuenza pa nkayetu. (Lomo 15:30; Kolos. 4:12) Patudi tudienzeja bua kupita ne ntatu ne bua kusamba bakuabu, tudi petu mua kuikala ne dishindika dia buena dia mufundi wa Misambu wakamba ne: ‘Teka bujitu buebe pambidi pa Yehowa, ne yeye neakukoleshe; kena witabuja tshiendelele bua bantu bakane banyungishibue.’ (Mus. 55:22) Bushuwa, Yehowa neikale anu usamba ne ukuatshisha batendeledi bende ba lulamatu.

¹⁸ Nzambi wakambila batendeledi bende ba kale ne: “Meme, meme mene, nyeye udi unusamba.” (Yesh. 51:12) Yehowa neatuenzele bia muomumue ne neabeneshe malu atudi tuenza ne atudi tuamba bua kusamba bantu badi badila. Nansha tuetu ne ditekemena dia kupeta muoyo mu diulu anyi pa buloba, mêyi avua Paulo mufundile bena Kristo bela manyi aa adi mua kutukolesha: ‘Mukalenge wetu Yezu Kristo muine ne Nzambi Tatu wetu, wakatunanga ne wakatupa busambi bua tshiendelele ne ditekemena dimpe bua ngasa, asambe mitshima yenu, ayijadike mu mudimu muimpe wonso ne mu dîyi dimpe dionso.’​—2 Tes. 2:16, 17.

Udi muvuluke anyi?

• Mmunyi mudi mudimu wetu wa kusamba badi badila muvule?

• Ngamue malu kayi atudi mua kuenza bua kusamba bakuabu?

• Ntshilejilu kayi tshia mu Bible tshidi tshileja ne: Yehowa utu usamba bantu bende?

[Nkonko ya dilonga]

[Tshimfuanyi mu dibeji 28]

Utuku usamba pebe badi badila anyi?

[Tshimfuanyi mu dibeji 30]

Bana ne bakulumpe badi mua kuikala bakolesha bakuabu