Utuku umvua disanka bua ‘diakalenga dia kufila ne muoyo mujima’ anyi?

BENA KRISTO ba kumpala ba mu Filipoi bavua bamanyike bua muvuabu bakuatshisha ntendelelu mulelela ne disanka. Mu mukanda uvua mupostolo Paulo mubafundile wakamba ne: ‘Ndi nsakidila Nzambi wanyi bua dinuvuluka dianyi dionso; ntu nganulombela Nzambi ne disanka misangu yonso mu disengelela dianyi dionso bua bualu buenu, bualu bua buobumue buenu nanyi mu kutangalaja kua lumu luimpe ku dituku dia kumudilu dinuakalumvua too ne katataka.’ (Filip. 1:3-5) Paulo uvua muvuluke bimpe tshikondo tshivua Ludia ne bena mu nzubu muende batambule ne muvuaye mumusengelele yeye ne bantu bavuaye uyisha nabu bua kushalabu kuende.​—Bien. 16:14, 15.

Matuku makese pashishe, bena mu tshisumbu tshipiatshipia tshia mu Filipoi bakatumina Paulo biakudia misangu ibidi pavuaye muye bua mbingu ya bungi kukumbula bena Kristo ba mu Tesalonike mutantshi wa kilometre 160  ne Filipoi. (Filip. 4:15, 16) Bidimu bikese pashishe, pavua bena Filipoi ne bena Makedonia bakuabu bapete makenga ne ‘bupele bua bungi,’ bakumvua lumu lua bena Kristo ba mu Yelushalema bavua bakengeshibua ne bakajinga bua kubambuluisha. Paulo wakajadika ne: nsombelu eu uvua bushuwa ‘mupite bukole buabu.’ Wakafunda ne: ‘Bavua batusengelela anu kutusengelela bua diakalenga dia kufila ne muoyo mujima.’​—2 Kol. 8:1-4, NW; Lomo 15:26.

Bidimu bitue ku dikumi panyima pa bena Filipoi ba kumpala bamane kulua bena Kristo, bavua amu ne lungenyi lua kupa. Pakumvuabu ne: Paulo udi mu buloko ku Lomo, bakatuma Epafodito bua kuenza luendu lua kilometre 1 287 pa mâyi ne ku mukuna bua kutuadila mupostolo biakudia. Bidi bimueneka patoke ne: bena Filipoi bavua bajinga kuambuluisha Paulo bua atungunuke ne kukolesha bena Kristo nende ne kuyisha nansha muvuaye mu buloko.​—Filip. 1:12-14; 2:25-30; 4:18.

Lelu bena Kristo balelela badi bamona kutua mudimu wa kuyisha Bukalenge ne kuvuija bantu bayidi nyama ku mikolo bu diakalenga. (Mat. 28:19, 20) Badi batungunuja malu a Bukalenge padibu bafila dîba diabu, makanda abu ne bintu bidibu nabi. Kazubu kadi kuinshi aka kadi kaleja imue mishindu iudi mua kukuatshisha mudimu wa kuyisha.

[Kazubu mu mabeji 22, 23]

MISHINDU IDI BAMUE BAFILA

MAPA BUA MUDIMU WA PA BULOBA BUJIMA

Bantu bavule batu balama makuta bungi kampanda bua kuela mu tushete tua mapa a “Mudimu wa pa buloba bujima.”

Ku ngondo yonso, bisumbu bitu bituma makuta aa ku biro bia Bantemu ba Yehowa bidi bitangila mudimu wa ditunga diabu. Bantu badi mua kutuma kabidi makuta aa buludiludi ku Watchtower Bible and Tract Society of New York, Inc., Attention Treasurer’s Office, 25 Columbia Heights, Brooklyn, New York 11201-2483, anyi ku biro bia Bantemu ba Yehowa bidi bitangila mudimu mu ditunga diabu. Sheke ya makuta idibu batuma mu adrese udi kulu eu idi ne bua kuikala mu dîna dia “Watchtower.” Nudi mua kufila nansha bilengejilu bu mudi mpeta ne bikanu bia or peshi bintu bikuabu bia mushinga mukole. Nutume mapa enu aa ne mukanda muipi udi uleja ne: nudi baatume bua kashidi.

DILAMISHA MAKUTA

Muntu udi mua kusombesha Watch Tower Bible and Tract Society of Pennsylvania makuta bua enza nawu mudimu miaba yonso idiye musue. Kadi padi muntu au nawu dijinga badi bamupingajilawu musangu umue. Wewe musue kumanya malu makuabu, udi mua kufundila biro bia Treasurer’s Office mu adrese udi kulu eku anyi kubikila ku nimero eyi: (718) 560-7500.

MAPA MALONGOLOLA

Pa kumusha mapa a makuta mafila bua kashidi, kudi mishindu mikuabu ya kufila bintu bua mudimu wa Bukalenge udi wenzeka pa buloba bujima. Tudi mua kutela bu mudi:

Makuta a tshieya: Muntu udi mua kushila Watch Tower bukenji bua kuangata makuta ende a tshieya anyi a pansio.

Konte ya ku banke: Muntu udi mua kufundisha konte yende ya ku banke, mikanda ya makuta matekesha ku banke anyi konte yende ya makuta a pansio mu dîna dia Watch Tower anyi kufunda bua kuafutabu Watch Tower padiye ufua, bilondeshile mikenji ya banke ya muaba udiye.

Bukenji bua kupeta bintu ne makuta masombesha: Badi mua kupesha Watch Tower bukenji bua kupeta bintu ne makuta masombesha bu dipa dia kashidi.

Mpangu ne nzubu: Muntu udi mua kufila lupangu anyi nzubu wende bua kashidi, kadi utungunuka ne kusombelamu patshidiye ne muoyo. Manyisha Betele wa ditunga dienu kumpala kua kumupesha lupangu anyi nzubu webe.

Dipa dia kufuta ku tshidimu: Edi ndipa dia muntu wangata makuta anyi mikanda ubifila ku biro bia Bantemu ba Yehowa. Pashishe muntu eu (anyi mukuabu udiye musungule) udi utuadija kupeta makuta bungi kampanda tshidimu tshionso patshidiye ne muoyo. Tshidimu tshidi muntu ufila dipa edi badi bamupuekeshila mushinga wa bitadi bituye ufuta.

Testama ne bintu bilamisha: Muntu udi mua kushila Watch Tower bintu anyi makuta ende, peshi kumupa bukenji bua kuangata bintu bidiye mulamisha. Badi mua kukepesha mushinga wa bitadi padi bintu bitekesha mu dîna dia tshitendelelu.

Anu mudi miaku eyi: “mapa malongolola” ileja, mapa a mushindu eu atu alomba bua muntu adianjile kudilongolola. Bua kuambuluisha bantu badi bajinga kukuatshisha mudimu udi Bantemu ba Yehowa benza pa buloba bujima ne mapa malongolola, mbapatule kakanda ka mu Anglais ne mu tshiena Espagne kadi ne tshiena-bualu tshia ne: Charitable Planning to Benefit Kingdom Service Worldwide. (Mapa malongolola bua kukuatshisha mudimu wa Bukalenge wa pa buloba bujima) Mbenze kakanda aka bua kuleja mishindu mishilangane idi bantu mua kufila mapa ne bintu bia bumpianyi. Bantu ba bungi bamane kukabala ne bayukile ne aba batu babapesha mibelu mu malu a mikenji anyi a bitadi, mbafike ku dikuatshisha mudimu wa Nzambi ne wa kuambuluisha bantu udi Bantemu ba Yehowa benza pa buloba bujima, ne mbabakepeshile bungi bua makuta a bitadi avuabu bafuta. Udi mua kulomba kakanda aka ku Charitable Planning Office (Biro bia mapa malongolola).

Bua kumanya malu makuabu, udi mua kubikila biro bia mapa malongolola anyi kubifundila ku adrese udi kuinshi eku, peshi udi mua kubikila anyi kufundila Bethel udi utangila mudimu mu ditunga dienu.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telefone: (845) 306-0707