Bua tshinyi mbimpe bua nyuma wa Nzambi atulombole?

“Wewe udi Nzambi wanyi. Nyuma webe muimpe andombole.”​—MUS. 143:10.

1. Umvuija mudi bukole budi kabuyi bumueneka mua kuludika muntu.

KALEJI NORD nkamu katu kambuluisha bua kuleja muntu luseke lua kuyila. Kadi ne kalonda kikale ne nzembu katu kaleja ku Nord. Batu bakendesha kudi bukole butu kabuyi bumueneka butu nabu tshiamu tshia nzembu. Munkatshi mua bidimu bia bungi, bantu mbenze mudimu ne kaleji nord bua kumanya kua kuyila padibu benza ngendu ku mukuna anyi pa mâyi.

2, 3. (a) Mbukole kayi bua dikema buvua Yehowa mukuate nabu mudimu katshia ku kale? (b) Bua tshinyi tudi ne bua kutekemena bua bukole budi Nzambi wenza nabu mudimu kutulombolabu mu nsombelu wetu?

² Kudi bukole bukuabu budi kabuyi bumueneka budi ne mushinga wa bungi budi mua kutulombola. Mbukole kayi abu? Mbudibu batele mu mvese ibidi ya mbangilu ya mu Bible. Mukanda wa Genese udi wakula bua malu avua Yehowa muenze kale wamba ne: “Kale ku tshibangidilu Nzambi wakafuka diulu ne buloba.” Tudi bamanye ne: Yehowa uvua muenze mudimu ne bukole bua pa buabu bua kufuka bintu bualu Bible udi wamba kabidi ne: “Nyuma wa Nzambi wakadi unyunguluka.” (Gen. 1:1, 2) Mbukole kayi buvua Nzambi muenze nabu mudimu? Nnyuma muimpe, bukole bua dikema buvua Nzambi mufuke nabu bintu. Tudi ne dianyisha bua mudi Yehowa muenze mudimu ne nyuma wende bua kutufuka ne kufuka bintu bionso.​—Yobo 33:4; Mus. 104:30.

³ Bu mutudi ne muoyo, tudiku ne bua kutekemena bua bukole bua Nzambi kutuenzelabu bualu kampanda mu nsombelu wetu anyi? Yezu uvua mumanye ne: tudi ne bua kuenza nanku, bualu wakambila bayidi bende ne: ‘Nyuma neanulombole mu malu malelela onso.’ (Yone 16:13) Nyuma muimpe ntshinyi? Bua tshinyi tudi mua kujinga bua atulombole?

Nyuma muimpe ntshinyi?

4, 5. (a) Mmunyi mudi bena dilongesha dia Busatu bunsantu badishima bua nyuma muimpe? (b) Nyuma muimpe ntshinyi menemene?

⁴ Bidi bimueneka ne: bamue bantu batudi tupetangana nabu mu buambi batu ne mmuenenu utu ubengangana ne wa mu Bible bua nyuma muimpe. Bantu badi bitaba Busatu bunsantu batu badishima ne: nyuma muimpe mmuntu udi muomumue ne Nzambi Tatu. (1 Kol. 8:6) Mbimueneke patoke ne: dilongesha dia Busatu bunsantu ki ndia mu Bible to.

⁵ Kadi nyuma muimpe ntshinyi menemene? Batu bakudimuna misangu ya bungi muaku wa tshiena Ebelu ru’ach udi mu Genese 1:2 ne: ‘nyuma’ kadi badi mua kuukudimuna kabidi ne: ‘lupepele’ anyi mu mishindu mikuabu bua kuleja bukole kampanda budi kabuyi bumueneka. (Gen. 3:8; 8:1) Anu mutu lupepele kaluyi lumueneka kadi luikale ne bukole, ke mudi nyuma muimpe bualu katuena mua kumulenga, kumumona ne ki mmuntu to, kadi udi wenzeja malu. Nyuma mbukole bua kudi Nzambi budi busaka bantu anyi bintu bua kukumbaja disua dia Nzambi. Bidiku mua kukukolela bua kuitaba ne: bukole bua dikema ebu mbufumine kudi Nzambi wa bukole buonso anyi? Nansha kakese!​—Bala Yeshaya 40:12, 13.

6. Mbualu kayi buvua Davidi mulombe Yehowa?

⁶ Yehowa udiku mua kutungunuka ne  kutulombola ne nyuma wende mu nsombelu wetu anyi? Wakalaya Davidi ne: ‘Nenkuyishe lungenyi, nenkuleje njila uudi ne bua kuendela.’ (Mus. 32:8) Davidi uvuaku musue bua Nzambi amulombole anyi? Eyowa, bualu wakalomba Yehowa ne: “Unyishe mua kuenza bu mudi disua diebe, bualu bua wewe udi Nzambi wanyi. Nyuma webe muimpe andombole.” (Mus. 143:10) Tudi petu ne bua kujinga ne muoyo mujima bua nyuma wa Nzambi atulombole. Bua tshinyi? Tukonkononayi malu anayi.

Katuena mua kudilombola nkayetu

7, 8. (a) Bua tshinyi katuena mua kudilombola nkayetu? (b) Fila tshilejilu tshidi tshileja bua tshinyi katuena mua kujinga bua kudilombola mu bulongolodi bubi ebu.

⁷ Bualu bua kumpala butudi ne bua kujinga bua nyuma wa Nzambi atulombole budi ne: katuena bakumbane bua kudilombola nkayetu to. Kulombola muntu kudi kumvuija kumuleja njila udiye ne bua kuendela. Yehowa ki mmutufuke ne bukole bua tuetu kudilombola to, nangananga mutudi bapange bupuangane. Muprofete Yelemiya wakafunda ne: ‘Yehowa, ndi mumanye ne: njila wa muntu kena munda muende; muntu kena ne bukole munda muende bua kuendesha nabu biendedi biende bimpe.’ (Yel. 10:23) Bua tshinyi? Nzambi uvua muleje Yelemiya bua tshinyi katuena mua kujinga bua kudilombola. Yehowa wakamba bua tshitudi ne: ‘Mutshima udi upita bintu bionso kudinga muntu ne udi utamba kunyanguka; muntu kayi udi mua kuumanya?’​—Yel. 17:9; Mat. 15:19.

⁸ Fuanyikijabi ne: muntu udi wenza luendu muaba udi ne njiwu udiye kayi mumanye bimpe bu mudi mu tshipela. Bidiku mua kuikala bimpe bua yeye kuya nkayende kayi ne muntu anyi kaleji nord kadi mua kumuludika anyi? Bikala muntu kayi muibidilangane ne muaba wa nunku anyi kayi mumanye njila muimpe wa kuyila, muoyo wende newikale mu njiwu. Bia muomumue, muntu udi wela meji ne: udi mua kudilombola nkayende mu bulongolodi bubi ebu kayi ulekela bua Nzambi amulombole, udi mu njiwu minene. Bua tuetu kupanduka bimpe mu bulongolodi ebu, mbimpe tulombe Yehowa anu bu Davidi wakamba ne: ‘Bienzedi bianyi biakulamata njila yebe bikole, makasa anyi kaakuselemuka.’ (Mus. 17:5; 23:3) Mmunyi mudi Nzambi mua kutulombola mushindu eu?

9. Anu mudibi bileja mu dibeji dia 17, mmunyi mudi nyuma wa Nzambi mua kutulombola?

⁹ Tuetu tudipuekesha ne basue bua Yehowa atulombole, neatupeshe nyuma wende bua atulombole mu malu etu onso. Nyuma muimpe neatuambuluishe bishi? Yezu wakambila bayidi bende ne: ‘Musambi, nyuma muimpe mene, watumabu kudi Tatu mu dîna dianyi, yeye neanuyishe malu onso, neanuvuluije mêyi onso angakunuambila.’ (Yone 14:26) Tuetu bikale ne tshibidilu tshia kusambila bua kulonga Dîyi dia Nzambi kusangisha ne mêyi a Yezu, nyuma muimpe neatuambuluishe bikole bua kumvua meji a  Yehowa bua tuetu kuenza disua diende bimpe. (1 Kol. 2:10) Bu biobi mua kuenzeka kabidi ne: malu atudi katuyi batekemene atukuate, nyuma muimpe neatuambuluishe bua kumanya tshia kuenza. Neatuvuluije mikenji ya mu Bible itukadi balonge ne neatuambuluishe bua kumanya mutudi mua kuyitumikila bua kuangata mapangadika mimpe.

Nyuma wa Nzambi uvua ulombola Yezu

10, 11. Mmalu kayi avua Muana mulela umue wa Nzambi mutekemene kudi nyuma muimpe? Mmunyi muvua nyuma eu mumuambuluishe?

¹⁰ Bualu buibidi butudi tujingila bua nyuma muimpe atulombole budi ne: Nzambi uvua mulombole nende Muanende. Patshivua Muana umuepele mulela wa Nzambi mu diulu, uvua mumanye mulayi wa tshiprofete eu: ‘Nyuma wa Yehowa neashikame pambidi pende, nyuma wa meji ne wa kujingulula kua malu, nyuma udi umukuatshisha ne meji ne bukole, nyuma wa kumanya Yehowa ne wa kumunemeka.’ (Yesh. 11:2) Elabi meji muvua Yezu ujinga ne muoyo mujima bua kupeta diambuluisha dia nyuma wa Nzambi eu mu nsombelu ivuaye mupetangane nayi pa buloba.

¹¹ Mêyi avua Yehowa muambe akakumbana. Mukanda wa Luka udi umvuija tshiakenzeka diakamue panyima pa ditambula dia Yezu ne: ‘Yezu wakadi muule tente ne nyuma muimpe, wakafuma ku Yadene, nyuma wakamulombola mu tshipela too matuku makumi anayi.’ (Luka 4:1) Bidi bimueneka ne: pavua Yezu mu tshipela kayi udia, usambila ne welangana meji, Yehowa wakamuleja tshia kuenza ne kumulongolola bua malu avua mamuindile. Nyuma wa Nzambi uvua wenza mudimu mu meji ne mu muoyo wa Yezu, ulombola lungenyi luende ne mapangadika ende. Ke bualu kayi, Yezu uvua mumanye tshia kuenza mu nsombelu yonso ne wakenza anu tshivua Tatuende musue bua yeye kuenza.

12. Bua tshinyi mbimpe tulombe Nzambi nyuma wende bua atulombole?

¹² Bu muvua Yezu mumanye mushinga udi nawu nyuma muimpe mu nsombelu wende, wakaleja bayidi bende bua tshinyi bidi ne mushinga bua kulomba nyuma eu bua abalombole. (Bala Luka 11:9-13.) Bua tshinyi mbimpe tulombe Nzambi nyuma wende bua atulombole? Bualu udi mua kushintulula meji etu bua apetangane ne a Kristo. (Lomo 12:2; 1 Kol. 2:16) Patudi tulekela nyuma wa Nzambi ulombola nsombelu wetu, tudi mua kutuadija kuela meji anu bu Kristo ne kuidikija tshilejilu tshiende.​—1 Pet. 2:21.

Nyuma wa pa buloba udi mua kutupambuisha

13. Nyuma wa pa buloba ntshinyi? Udi mua kusaka muntu ku tshinyi?

¹³ Bualu buisatu butudi mua kujinga bua nyuma wa Nzambi atulombole budi ne: tuetu katuyi nende, badi mua kutupambuisha kudi nyuma wa pa buloba udi ulombola bantu ba bungi lelu eu. Bena panu badi ne wabu nyuma udi pende ne bukole bua bungi udi usaka bantu bua kuenza malu adi abengangana ne nyuma wa Nzambi. Nyuma wa pa buloba eu  kena wambuluisha bantu bua kuikala ne meji a Kristo to, udi ubasaka bua kuikala ne meji ne bienzedi bia buena bia Satana mukokeshi wa buloba ebu. (Bala Efeso 2:1-3; Tito 3:3.) Padi muntu ulekela bua nyuma wa pa buloba amulombole ne utuadija kuenza malu a mubidi, udi upeta ntatu mikole idi mua kumupangisha bua kupiana Bukalenge bua Nzambi.​—Gal. 5:19-21.

14, 15. Mmunyi mutudi mua kukandamena nyuma wa pa buloba?

¹⁴ Yehowa mmutuambuluishe bua kukandamena nyuma wa pa buloba. Mupostolo Paulo udi utuambila bua ‘tudikoleshe mu Mukalenge ne mu bukole buende bunene bua tumanye mua kudimanyika bimpe palua dituku dibi.’ (Ef. 6:10, 13) Ku diambuluisha dia nyuma muimpe, Yehowa udi utukolesha bua kutantamena bionso bidi Satana wenza bua kutupambuisha. (Buak. 12:9) Nyuma wa pa buloba udi ne bukole bua bungi, katuena mua kumuepuka menemene to. Kadi, tudi mua kumukandamena. Nyuma muimpe udi yeye ne bukole bupite ne neatuambuluishe.

¹⁵ Mupostolo Petelo wakakula bua bantu bavua balekele bulelela mu bidimu lukama bia kumpala wamba ne: ‘Pakalekelabu njila mululame, bakapambuka.’ (2 Pet. 2:15) Tuetu tudi ne disanka dia bungi bua mutudi bapete ‘nyuma, ki ngua pa buloba, kadi nyuma wa kudi Nzambi.’ (1 Kol. 2:12) Patudi tulekela nyuma eu utulombola ne tuenza mudimu ne bintu bionso bidi Yehowa mutupeshe bua kukolesha malanda etu nende, tudi mua kuenza malu adi mimpe ne kukandamena nyuma wa pa buloba ebu.​—Gal. 5:16.

Nyuma muimpe udi utuambuluisha bua kuikala ne ngikadilu mimpe

16. Nngikadilu mimpe kayi itudi mua kupeta ku diambuluisha dia nyuma muimpe?

¹⁶ Bualu buinayi butudi mua kujinga bua nyuma wa Nzambi atulombole budi ne: udi wambuluisha badi bitaba bua abalombole bua kukuamabu ngikadilu mimpe. (Bala Galatia 5:22, 23.) Nnganyi wa kutudi udi kayi musue kuikala ne dinanga, disanka ne ditalala? Nnganyi wa kutudi udi kayi musue kuvudija lutulu, luse ne buimpe? Nnganyi wa kutudi udi kayi musue kupeta masanka adi afumina ku dikala ne ditabuja dikole, budipuekeshi ne didikanda? Nyuma wa Nzambi udi mua kutuambuluisha bua kupeta ngikadilu mimpe idi ituambuluisha tuetu, bena mu dîku dietu ne bena mu tshisumbu. Tudi ne bua kutungunuka ne kudienzeja bua kuleja ngikadilu eyi. Ki mbatuelele mukenji bua bungi bua ngikadilu ya dimuma dia nyuma iditu mua kuikala nayi to.

17. Mmunyi mutudi mua kudienzeja bikole bua kuleja ngikadilu kampanda wa dimuma dia nyuma?

¹⁷ Mbimpe tudikonke ne: mêyi etu ne malu atudi tuenza adiku aleja ne: nyuma muimpe udi utulombola ne tudi ne ngikadilu ya dimuma dia nyuma anyi? (2 Kol. 13:5a; Gal. 5:25) Tuetu bamone ne: tudi ne bua kukuama imue ngikadilu ya dimuma dia nyuma, tudi ne bua kudienzeja bikole bua nyuma eu atulombole bua tupete ngikadilu ayi. Tudi mua kuenza nunku patudi tulonga ngikadilu yonso wa dimuma dia nyuma, mudibu bamuleje mu Bible ne bamumvuije mu mikanda yetu. Nunku tudi mua kufika ku dijingulula mutudi mua kuleja dimuma dia nyuma mu nsombelu wetu ne kudienzeja bua kudikuama bikole. * Patudi tumona mudi nyuma wa Nzambi utuambuluisha mu nsombelu wetu ne wa bena Kristo netu, tudi tumona bua tshinyi bidi bikengela bua nyuma eu atulombole.

Utuku witaba bua nyuma wa Nzambi akulombole anyi?

18. Ntshinyi tshitudi mua kulongela ku mushindu uvua Yezu ulekela nyuma muimpe umulombola?

¹⁸ Pavua Nzambi ufuka diulu ne buloba, Yezu uvua “muena mudimu” wende. Nanku, mmumanye bimpe bukole budi nabu buloba bua kukoka bintu bu tshiamu tshia nzembu  budi buambuluisha bantu padibu benza mudimu ne kaleji nord. (Nsu. 8:30; Yone 1:3) Bible kena uleja ne: Yezu uvua muenze mudimu ne bukole ebu bua kumanya njila wa kuyila pavuaye pa buloba to. Kadi udi uleja ne: nyuma muimpe ke bukole bua dikema buvua bumuambuluisha mu nsombelu wende. Uvua musue bua amulombole. Pavua nyuma umulombola bua kuenza bualu kampanda, uvua witaba ne ubuenza. (Mâko 1:12, 13; Luka 4:14) Ke muutu wenza pebe anyi?

19. Tudi ne bua kuenza tshinyi bua nyuma wa Nzambi ikale utulombola mu nsombelu wetu?

¹⁹ Nyuma wa Nzambi utshidi wambuluisha bantu badi basue bua abalombole. Mmunyi muudi mua kulekela nyuma eu bua akulombole mu njila muimpe? Ikala usambila Yehowa bua akupeshe nyuma wende ne akuambuluishe bua witabe bulombodi buende. (Bala Efeso 3:14-16.) Enza malu adi umvuangana ne masambila ebe, ukeba mibelu mu Bible udibu bafunde ku diambuluisha dia nyuma muimpe. (2 Tim. 3:16, 17) Tumikila mibelu ya meji idimu ne itaba ne muoyo mujima mushindu udi nyuma eu ukulombola. Wewe wenza nunku, udi uleja ne: udi witaba bukole budi nabu Yehowa bua kukulombola bimpe ku diambuluisha dia nyuma wende mu bulongolodi ebu bubi.

[Mêyi adi kuinshi]

Udi muvuluke anyi?

• Mmunyi mudi nyuma muimpe mua kutuambuluisha mu nsombelu wetu?

• Tela malu anayi adi ne bua kutusaka bua kujinga bua nyuma wa Nzambi atulombole?

• Ntshinyi tshitudi mua kuenza bua nyuma muimpe ikale utulombola mu njila muimpe?

[Nkonko ya dilonga]

[Tshimfuanyi mu dibeji 15]

Nyuma wa Nzambi ke bukole buvua buambuluisha Yezu mu nsombelu wende

[Tshimfuanyi mu dibeji 17]

Nyuma wa Nzambi udi wambuluisha bantu badi basue bua abalombole