Muvua nyuma wa Nzambi mulombole bena Kristo ba kumpala ne mudiye ulombola ba lelu

‘Nyuma umue muomumue udi wenzeja malu aa onso.’​—1 KOL. 12:11.

1. Mbualu kayi butuakonkonona mu tshiena-bualu etshi?

MUAKU Pentekoste udi utuvuluija malu a kukema avua menzeke mu tshidimu tshia 33. (Bien. 2:1-4) Dipesha bantu nyuma muimpe tshikondo atshi divua dileje dishintuluka dinene mu mushindu udi Nzambi wenzela bantu bende malu. Tuvua bamone mu tshiena-bualu tshishale imue mishindu ivua nyuma wa Nzambi muambuluishe bena lulamatu ba kale bua kukumbaja midimu kampanda mikole ivuaye mubapeshe. Kadi ndishilangana kayi didi pankatshi pa muvua nyuma wa Nzambi mukuate mudimu ne bantu ba kumpala kua Yezu ne muvuaye mukuate mudimu ne bena Kristo mu bidimu lukama bia kumpala? Mmunyi mudi nyuma muimpe wa Nzambi wambuluisha bena Kristo lelu? Tukonkononayi bualu ebu.

 ‘Mona, mukaji mupika wa Yehowa’

2. Mmunyi muvua Mariya mumone mudi nyuma muimpe ukuata mudimu?

² Mariya uvua mu nzubu wa kulu mu Yelushalema pavuabu bitshikijile bena Kristo nyuma muimpe uvuabu balaye. (Bien. 1:13, 14) Kadi munkatshi mua bidimu bipite pa makumi asatu kumpala kua bualu ebu kuenzekabu, Mariya uvua mumone muvua nyuma wa Yehowa ukuata mudimu mu mishindu ya dikema. Yehowa wakumbusha muoyo wa muanende mu diulu kuutuma pa buloba mu difu dia Mariya, nsongakaji utshivua kamama. Uvua muimite ku bukole bua “nyuma muimpe.”​—Mat. 1:20.

3, 4. Ndungenyi kayi luvua Mariya muleje? Mmunyi mutudi mua kumuidikija?

³ Bua tshinyi Mariya wakapeta diakalenga dia pa buadi edi? Panyima pa muanjelu mumane kumumvuija disua dia Yehowa buende yeye, Mariya wakamba ne: ‘Mona, mukaji mupika wa Mukalenge; bangenzele bu muwakuamba.’ (Luka 1:38) Pavua Mariya muambe nanku, uvua muleje muvuaye ne lungenyi luimpe lukavua Nzambi mumone kudiye. Bu muvuaye muitabe musangu umue, bidi bileja ne: uvua mudiakaje bua kulonda disua dia Nzambi mu bualu ebu. Kavua mudikonke bua kumanya tshivua bantu bakuabu mua kuamba pavuabu mua kumumona ne difu anyi tshivua bualu ebu mua kuenzela malanda ende ne mubangila wende. Pavuaye udiamba muvuaye mutambe bukese wa ku bapika, uvua uleja ne: uvua mueyemene Yehowa, Mukalenge wende ne muoyo mujima.

⁴ Ukatuku imue misangu muele meji ne: mudimu udi Nzambi mukupeshe mmupite bukole anyi? Yonso wa kutudi udi mua kudiebeja ne: ‘Ndiku ngeyemena Yehowa ne muoyo mujima bua kuenza malu mu diumvuangana ne disua diende anyi? Ndiku ndeja mundi ne lungenyi lua didifila anyi?’ Ikala mujadike ne: Nzambi udi ufila nyuma wende kudi bantu badi bamueyemena ne muoyo mujima ne balonda disua diende.​—Bien. 5:32.

Nyuma muimpe wakambuluisha Petelo

5. Mmu mishindu kayi muvua Petelo mumone muvua nyuma muimpe mukuate mudimu kumpala kua Pentekoste wa mu 33?

⁵ Anu bu Mariya, Petelo uvua pende mudimuene muvua nyuma wa Nzambi mukuate mudimu mukole kumpala kua Pentekoste wa mu 33. Yezu uvua mumupeshe pamue ne bapostolo bakuabu bukole bua kuipata bademon. (Mâko 3:14-16) Nansha mudi Mifundu kayiyi miambe malu a bungi pa bualu ebu, bidi bimueneka ne: Petelo wakakuata mudimu ne bukole abu. Bukole bua Nzambi buakamueneka kabidi pavua Yezu muambile Petelo bua kuendela pa mbuu wa Galela, ne Petelo kuenzaye nanku. (Bala Matayo 14:25-29.) Bidi bimueneka ne: Petelo wakeyemena nyuma muimpe bua amuambuluishe bua kuenza malu a kukema. Katupa kakese pashishe nyuma au wakambuluisha Petelo ne bayidi nende bakuabu mu mishindu mikuabu.

6. Ku bukole bua nyuma wa Nzambi, ntshinyi tshivua Petelo muenze mu dia Pentekoste wa mu 33 ne pashishe?

⁶ Mu tshibilu tshia Pentekoste wa mu 33, Petelo ne bantu bakuabu bakapeta tshipedi tshia dikema tshia kuakula mu miakulu ivua bantu bavua balue mu Yelushalema bakula. Pashishe, Petelo wakenza muyuki kumpala kua bantu. (Bien. 2:14-36) Bushuwa, muntu uvua ne buôwa anyi ubazuka ne malu eu wakapeta muoyo mukole wa kuyisha ne dikima nansha muvuabu babakanyina ne babakengesha. (Bien. 4:18-20, 31) Nzambi wakamubuluila malu avua mamuambuluishe bua kupeta dimanya. (Bien. 5:8, 9) Uvua mupete too ne bukole bua kubisha bafue.​—Bien. 9:40.

7. Mmalu kayi avua Yezu mulongeshe avua Petelo mulue kumvua anu pakedibuaye manyi?

⁷ Nansha kumpala kua Pentekoste, Petelo wakumvua malu malelela a bungi avua Yezu mulongeshe. (Mat. 16:16, 17; Yone 6:68) Kadi kudi amue malongesha a Yezu avuaye kayi mumvue bimpe kumpala kua Pentekoste. Tshilejilu, Petelo kavua mujingulule ne: Kristo uvua ne bua kubishibua mu dituku disatu ne mubidi wa nyuma anyi mumanye ne: Bukalenge buvua ne bua kuikala mu diulu to. (Yone 20:6-10; Bien. 1:6) Kavua mumanye ne: bantu bavua mua kupeta mubidi wa nyuma ne kukokeshabu mu Bukalenge bua mu diulu. Kadi pavuaye mutambuishibue ne nyuma muimpe ne mupete ditekemena dia kuya mu diulu, wakumvua bimpe malu avua Yezu mulongeshe au.

8. Ndimanya dia mushindu kayi didi bela manyi ne ‘mikoko mikuabu’ bapeta?

 ⁸ Pakapeta bayidi ba Yezu nyuma muimpe, bakumvua bimpe malongesha avuabu kabayi bumvua kumpala. Ku diambuluisha dia nyuma muimpe, bafundi ba Mifundu ya tshiena Greke mbumvuije bua diakalenga dietu malu a kukema adi Nzambi mulongolole. (Ef. 3:8-11, 18) Lelu, bela manyi a nyuma ne ‘mikoko mikuabu’ badi badia biakudia bia mu nyuma bia muomumue, mbuena kuamba ne: balonga malu malelela amue. (Yone 10:16) Utuku umvua disanka bua mudi nyuma muimpe ukuambuluisha bua kumanya ne kumvua Dîyi dia Nzambi anyi?

Paulo ‘wakuujibua ne nyuma muimpe’

9. Paulo wakenza malu kayi ku diambuluisha nyuma muimpe?

⁹ Tshidimu bu tshimue panyima pa Pentekoste wa mu 33, muntu mukuabu wakapeta pende dipa dia Nzambi dia nyuma muimpe. Muntu au uvua Shaula wakalua kubikidibua ne: Paulo. Nyuma muimpe wakakuata nende mudimu mu mishindu idi ituambuluisha lelu. Nyuma muimpe wakasaka mupostolo Paulo bua kufunda mikanda 14 ya mu Bible. Anu muvuabi bua Petelo, nyuma muimpe wakambuluisha Paulo bua kumvua ne kufunda malu mumvuike avua atangila ditekemena dia kuikala ne muoyo udi kawuyi ufua ne mubidi udi kawuyi ubola mu diulu. Ku diambuluisha dia nyuma muimpe Paulo wakondapa babedi, kuipata bademon ne kujula too ne bafue. Kadi, bukole buvuaye mupete kudi nyuma muimpe buvua ne mudimu wa mushinga udi bantu ba Nzambi bonso lelu bapeta nansha mudibi kabiyi mu tshishima.

10. Mmunyi muvua nyuma muimpe mupeshe Paulo bukole bua kuakula?

¹⁰ Paulo uvua ‘muujibue tente ne nyuma muimpe’ wakakula ne dikima kumpala kua mutempi wa mbuku. Bualu ebu buakalenga munene wa mu Kupulio uvua uteleja muyuki wabu mujima. Mulopo eu wakitaba bulelela bualu ‘diyisha dia Mukalenge diakamukemesha.’ (Bien. 13:8-12) Bushuwa, Paulo uvua mumanye mushinga uvua nawu nyuma muimpe wa Nzambi pavuaye uyisha bulelela. (Mat. 10:20) Wakalua kusengelela bena mu tshisumbu tshia Efeso bua kumulombelabu kudi Nzambi bua apeshibue ‘bukole bua kuakula.’​—Ef. 6:18-20.

11. Mmunyi muvua nyuma wa Nzambi mulombole Paulo?

¹¹ Nyuma muimpe kavua muambuluishe Paulo anu bua kuakula to, kadi kudi imue misangu ivuaye umukandika bua kuakula miaba kampanda. Pavua Paulo wenza ngendu yende ya bumisionere, nyuma wa Nzambi uvua umulombola. (Bien. 13:2; bala Bienzedi 16:6-10.) Yehowa utshitu ulombola mudimu wa kuyisha ku diambuluisha dia nyuma muimpe. Anu bu Paulo, batendeledi bonso ba Yehowa badi bamutumikila badi badienzeja bua kuyisha bulelela ne dikima ne tshisumi. Nansha mudi buludiki bua kudi Nzambi kabuyi bumueneka lelu patoke bu muvuabi mu tshikondo tshia Paulo, tuikale bashindike ne: Yehowa udi ukuata mudimu ne nyuma muimpe bua kufikisha bantu bimpe ku diumvua bulelela.​—Yone 6:44.

‘Midimu mishilangane’

12-14. Nyuma wa Nzambi udi ukuata mudimu mushindu umue ne batendeledi ba Nzambi bonso anyi? Umvuija.

¹² Miyuki ya muvua Yehowa mubeneshe tshisumbu tshia bela manyi mu bidimu lukama bia kumpala idiku ikolesha batendeledi ba Nzambi lelu anyi? Eyowa. Tuvulukayi mêyi a Paulo avuaye mufundile bena Kristo ba mu Kolinto  adi akula bua bipedi bia nyuma mu matuku ende adi amba ne: ‘Mishindu ya bipedi idiku, kadi nyuma udi anu muomumue. Mishindu ya midimu idiku kabidi, kadi Mukalenge udi anu muomumue. Midimu idi mishilangane, kadi Nzambi udi muomumue, udi wenzeja malu onso mu bantu bonso.’ (1 Kol. 12:4-6, 11) Bushuwa, nyuma muimpe udi mua kukuata mudimu mu mishindu mishilangane ne bantu ba Nzambi bashilangane bua kukumbaja bualu kampanda. Kakuyi mpata, bena Kristo ba mu “tshisumbu tshikese tshia mikoko” ne ba mu ‘mikoko mikuabu’ badi mua kupeta bonso nyuma muimpe. (Luka 12:32; Yone 10:16) Kadi nyuma muimpe katu ukuata mudimu mu mushindu umue misangu yonso ne muntu yonso wa mu tshisumbu to.

¹³ Tshilejilu, bakulu mbatekibue ku bukole bua nyuma muimpe. (Bien. 20:28) Kadi bena Kristo bela manyi bonso kabatu bakulu mu tshisumbu to. Tudi mua kuamba tshinyi bua bualu ebu? Bidi bileja ne: nyuma wa Nzambi udi ukuata mudimu ne bena mu tshisumbu mu mishindu mishilangane.

¹⁴ Nyuma udi upesha bela manyi ‘nyuma wa bumpianyi’ anyi udi ubafikisha ku didiumvua bu bana ba Nzambi, nyeye umue uvua Yehowa mujule nende muanende umuepele mulela ku lufu ne mumupeshe muoyo ukena ufua mu diulu. (Bala Lomo 8:11, 15.) Nyuma umue eu ke uvua Yehowa mufuke nende bintu bionso. (Gen. 1:1-3) Ku bukole bua nyuma eu, Yehowa wakambuluisha Besalele bua kukumbaja mudimu wa ntenta wa kusambakena, kupesha Shimishona bukole bua kuenza malu avua alomba bukole bua pa buabu, ne kuambuluisha Petelo bua kuendela pa mâyi. Kadi katubuejakaji kuikala ne nyuma wa Nzambi ne kuikala bedibue manyi a nyuma wa Nzambi; bualu kuedibua manyi a nyuma kudi anu mushindu umue wa pa buawu udi nyuma wa Nzambi wenza mudimu. Nzambi ke udi usungula bela manyi a nyuma.

15. Ditambuisha bantu ne nyuma muimpe neditungunuke bua kashidi anyi? Umvuija.

¹⁵ Nyuma wa Nzambi mmuambuluishe batendeledi ba Nzambi ba lulamatu mu mishindu mishilangane katshia ku kale, bidimu bia bungi kumpala mene kua diedibua manyi a nyuma kutuadijadi. Mu Pentekoste wa mu 33, mudimu eu mupiamupia wa nyuma wakatuadija, kadi kawakutungunuka kashidi to. Dibatijibua ne nyuma nedijike, kadi nyuma muimpe neatungunuke ne kukuata mudimu ne batendeledi ba Nzambi bua kubambuluisha bua kuenza disua diende bua kashidi.

16. Ntshinyi tshidi bantu ba Nzambi benza lelu ku diambuluisha dia nyuma wende?

¹⁶ Ntshinyi tshidi tshienzeka mpindieu pa buloba ku diambuluisha dia nyuma muimpe wa Yehowa? Buakabuluibua 22:17 udi wandamuna ne: ‘Nyuma ne mukaji musela badi bamba ne: Lua. Udi umvua ambe biende ne: Lua. Ne udi ne nyota, alue biende; udi musue angate mâyi a muoyo tshianana.’ Nyuma wa Nzambi udi usaka bena Kristo lelu bua kufikisha dibikila dia kudi Yehowa dia kupeta muoyo kudi ‘muntu yonso udi musue’ kuangata mâyi a muoyo. Bena Kristo bela manyi ke badi balombola mudimu eu. Kadi mikoko mikuabu idi payi iwenza. Bela manyi ne mikoko mikuabu badi benza mudimu ne nyuma muimpe umue au bua kukumbaja mudimu wa dibikila eu. Bonso buabu mbadilambule kudi Yehowa ne mbabatijibue ‘mu dîna dia Tatu ne mu dia Muana ne mu dia nyuma muimpe.’ (Mat. 28:19) Bonso badi balekela nyuma muimpe ukuata mudimu mu nsombelu wabu bua bakuame dimuma dia nyuma. (Gal. 5:22, 23) Anu bu bela manyi, mikoko mikuabu idi ilekela nyuma wa Nzambi bua abambuluishe. Ku diambuluisha dia nyuma, badi benza muabu muonso bua kuenda mu diumvuangana ne mikenji ya Yehowa idi itangila bunsantu.​—2 Kol. 7:1; Buak. 7:9, 14.

Tungunuka ne kulomba nyuma muimpe

17. Mmunyi mutudi mua kujadika ne: tudi ne nyuma wa Nzambi?

¹⁷ Nunku nansha wewe muikale ne ditekemena dia kupeta muoyo mu diulu anyi pa buloba, Yehowa udi mua kukupesha ‘bukole budi bupite bua pa tshibidilu’ bua wewe kulama muoyo webe mutoke ne kupete difutu.  (2 Kol. 4:7, NW) Bantu badi mua kukuseka paudi utungunuka ne kuyisha lumu luimpe lua bukalenge. Kadi uvuluke ne: ‘Bianupendabu bua dîna dia Kristo, nudi ne disanka; bualu bua nyuma wa butumbi ne nyuma wa Nzambi udi unuikila pambidi penu.’​—1 Pet. 4:14.

18, 19. Mmunyi muikala Yehowa mua kukuambuluisha ku butuangaji bua nyuma wende? Ntshinyi tshiudi mudisuike bua kuenza mu bualu ebu?

¹⁸ Nyuma muimpe ndipa didi Yehowa ufila tshianana kudi aba bonso badi badikeba ne muoyo mujima. Nyuma eu kena ukuambuluisha anu mu malu audi wenza to, kadi udi ukolesha dijinga diebe dia kuenzela Yehowa mudimu ne muoyo mujima. Bible udi wamba ne: ‘Bualu bua Nzambi ngudi wenzeja munda muenu bua kusua ne bua kuenza kabidi bualu bua disua diende dimpe.’ Dipa dia mushinga mukole dia nyuma muimpe ne madikolela atudi tuenza ne muoyo mujima bua kulama bikole ‘dîyi dia muoyo,’ nebituambuluishe bua ‘kudienzeja bua kushikija lupandu luetu ne ditshina ne dizakala.’​—Filip. 2:12, 13, 16.

¹⁹ Wewe mueyemene nyuma wa Nzambi ne muoyo mujima neumanye mua kudifila ne muoyo umue mu mudimu udibu bakupesha, neulue mukumbane bua kuukumbaja ne neutekemene bua Yehowa akuambuluishe. (Yak. 1:5) Neakuambuluishe bua kumvua Dîyi diende bimpe, kupita ne ntatu ya mu nsombelu ne kuyisha lumu luimpe. Bible udi wamba ne: ‘Nulombe, nebanupe; nukebe, nenumone; nukokole, nebanunzuluile.’ Bualu ebu budi butangila kabidi kulomba nyuma muimpe. (Luka 11:9, 13) Bushuwa, utungunuke ne kusengelela Yehowa bua wikale bu bena lulamatu ba kale anyi ba lelu bavua nyuma wa Nzambi ulombola.

Newandamune munyi?

• Anu bu Mariya, ndungenyi kayi lutudi mua kuikala nalu ludi mua kutupetesha masanka?

• Mmu mushindu kayi muvua nyuma wa Nzambi ulombola Paulo?

• Mmunyi mudi nyuma wa Nzambi ulombola batendeledi bende lelu?

[Nkonko ya dilonga]

[Tshimfuanyi mu dibeji 24]

Nyuma wa Nzambi wakambuluisha Paulo bua kutshimuna buenzeji bua nyuma mibi

[Tshimfuanyi mu dibeji 26]

Lelu nyuma muimpe udi mua kuambuluisha bena Kristo bonso nansha buobu bikale ne ditekemena dia kupeta muoyo mu diulu anyi pa buloba.