Udi muvuluke anyi?

Dibala dia bebejibeji bia Tshibumba tshia Nsentedi bishale ebi divua dikusankishe anyi? Nanku, anji tangila ni udi mua kuandamuna nkonko idi ilonda eyi:

• Pavua Nzambi muambile bena Lewi ne: ‘Meme ndi tshitupa tshienu,’ uvua usua kuamba tshinyi?

Bisamba bikuabu bia mu Isalele bivua ne tshitupa tshia buloba, kadi bua bena Lewi bobu Yehowa ke uvua ‘tshitupa’ tshiabu. (Nom. 18:20) Kabavua mua kupiana buloba, kadi bakapeta diakalenga dia kuenza mudimu wa pa buawu. Yehowa uvua kabidi utabalela majinga abu a ku mubidi. Lelu, bantu badi ne diakalenga dia kutungunuja malu a Bukalenge badi mua kuikala bashindike ne: Nzambi neabapeshe bidibu nabi dijinga.​—15/9, dibeji dia 7-8, 13.

• Nnganyi udi ne bua kulongesha bana malu a Nzambi?

Nansha mudi bantu bakuabu mua kuambuluisha tatu ne mamu, baledi ke badi ne bujitu bua kulongesha bana babu malu a Nzambi ne mudi Nzambi musue bua malu enzeke mu dîku.​—1/10, dibeji dia 7

• Bua tshinyi mbimpe kuenzela muena dibaka nebe malu ne kanemu?

Kuikala ne kanemu kudi kuambuluisha bua dibaka dikale dia disanka ne bua kunengadi. Kanemu kadi katuala disanka ne bukubi mu dibaka. Bidi ne mushinga wa bungi bua kuikala ne kanemu mu dibaka.​—1/10, dibeji dia 12

• Tudi ne bua kufuta bitadi anyi?

Pakebejabu Yezu bua kumanya ni mbimpe ku mêsu kua Nzambi bua kufuta bitadi kudi bamfumu ba mu Lomo, Yezu wakandamuna ne: ‘Nupe Kaisa bintu bia Kaisa, nupe Nzambi bintu bia Nzambi.’ (Mâko 12:13-17) Mbulamatadi ivuabu bafuanyikija ne “Kaisa” ivua ipatula makuta ne ijadika mushinga wawu. Nunku ku mêsu kua Nzambi, bavua ne bukenji bua kulomba makuta avuabu ne bua kubafuta bu bitadi.​—1/10, dibeji dia 14, 15

• Mmunyi muudi mua kumanya tshitendelelu tshilelela?

Batendeledi balelela batu bangata Bible bu Dîyi dia Nzambi. Batu banemeka dîna dia Nzambi Yehowa ne bayisha Bukalenge buende. Kabena babuelakana mu malu a mu bulongolodi ebu bubi ne mbanangangane bikole munkatshi muabu.​—1/10, dibeji dia 16, 17

• Nzambi udiku wangata bantu ba dikoba kampanda ne mushinga kupita bakuabu anyi?

Tòo. Bible udi wamba patoke ne: ‘Nzambi kena ne kansungansunga, kadi yeye udi witabuja wa mu tshisamba tshionso udi umutshina, udi wenza malu makane.’​—Bien. 10:34, 35.​—1/10, dibeji dia 26

• Ntshinyi tshidi mua kuambuluisha bena Kristo bua kumanya bikala mushindu kampanda wa dijikija lutetuku muimpe anyi mubi?

Bua kumanya bikala dijikija lutetuku kampanda dimpe ne disankisha Nzambi, mbimpe kudiebeja ne: Didi ne malu kayi? Ndi mpitshishamu dîba bungi kayi? Mbanganyi bandi njikija nabu lutetuku?​—15/10, dibeji dia 9-12.

• Mmunyi mudi bualu budi mu Nsumuinu 7:6-23 butuambuluisha bua kubenga kutangila bindidimbi bia bantu butaka?

Mvese eyi idi yakula bua nsongalume uvua wendela pabuipi ne nzubu wa mukaji wa masandi. Mukaji au wakamusesuisha. Lelu eu, tudi ne bua kubenga kutangila bindidimbi bidi bijula majinga mabi ku Enternete, ne mbimpe kusambila Nzambi kumpala mene kua kutuilangana ne bindidimbi bia nunku ku Enternete.​—15/11, dibeji dia 9-10.