BATENDELEDI ba Yehowa badi ne malu mimpe a bungi a mudibu bamuenzele mudimu. Pa kumusha dibala dia mikanda yetu, tudi mua kulonga malu a bungi ku diambuluisha dia foto, mikanda, miyuki ya mu nsombelu ne bimue bintu bidi biakula bua ntendelelu wetu, mudimu wa kuyisha ne muyuki wetu wa Bantemu. Kadi bua tshinyi mbimpe kulama bintu bia kale ne kukeba malu a mu muyuki wetu wa kale? Bushuwa, bamfumu ba mêku ba mu Isalele bavua ne bua kulongesha bana babu mikenji ya Yehowa ne malu ende a kukema ‘bua bana aba bajadike ditekemena diabu kudi Nzambi’ nkayende.​—Mus. 78:1-7.

Dikebulula bintu bia kale ndiambuluishe bikole mu dikumbana dia malu adi Yehowa mulongolole. Tshilejilu, pavua baluishi bajinga kuimanyika mudimu wa kuibaka ntempelo mu Yelushalema, muena mudimu kampanda wakakebulula mu bintu bia kale ku Akema mu buloba bua Madai ne kupetaye mukanda uvua ubanyishila bua kuibaka uvuabu bafunde kudi mukalenge Kolesha. (Eze. 6:1-4, 12) Nunku, bakibakulula ntempelo anu muvua Nzambi musue. Luka pende ‘wakafunda malu malondolola biakane,’ bualu uvua mukuate mudimu ne bintu bia kale.​—Luka 1:1-4.

 Bena mu Kasumbu kaludiki batu badifila bikole bua kumanya muyuki wetu wa Bantemu ba Yehowa bimpe. Muanetu mukuabu wa mu Kasumbu kaludiki wakaleja mudibi ne mushinga bua kulama, kufunda ne kuvuluka malu a muvua Bantemu benzele Yehowa mudimu kale wamba ne: “Bua tuetu kumanya kutudi tuya, tudi ne bua kuanji kumanya kutudi tufuma.” Bua bualu ebu, matuku mashale aa biro binene bitu bilombola midimu yetu pa buloba bujima bidi ku Brooklyn mu New York mbienze tshibambalu tshipiatshipia tshidibu babikila ne: Tshibambalu tshia dilamina bintu bia kale, tshidi ku bulombodi bua Kasumbu kadi katangila difunda.

“FOTO YA BANA BETU” NE “BINTU BIA KALE”

Mu bungi bua matuku, malu a kale adi apita, ne ba bungi ba kutudi batu bajinga kuikala ne bintu bidi bibavuluija malu avua bana betu benze kale. Bena mu Tshibambalu tshia dilamina bintu bia kale badi munkatshi mua dienza mudimu bua kulama ne kufunda malu etu a mushinga ne kuvudija bintu bia kale. Foto idibu balame bimpe mu bintu bia kale idi payi mu mulongo wa “foto ya bana betu.” Mikanda yetu ya kale, miyuki mimpe ya bantu ba kale ne bintu biabu bia mushinga bidi pabi munkatshi mua bintu bia mushinga bidi mu bintu bia kale. “Bintu bia kale” ebi bidi bituambuluisha bua kumvua muyuki wetu wa Bantemu ba Yehowa ne kutekemena ne dishindika bua kumona muikala dîku dietu dia Bantemu mu matuku adi kumpala.

Tudi tukulomba bua kumanya malu a mu Tshibambalu tshia dilamina bintu bia kale ku diambuluisha dia tshiena-bualu tshipiatshipia tshia: “Mu bintu bietu bia kale.” Netshikale tshipatuka ngondo yonso mu Tshibumba tshia Nsentedi tshia kulonga. Tshilejilu, mu tshibejibeji tshidi tshilonda tudi balongolole bua kupatula muyuki kampanda bua kuandamuna nkonko eyi: Bavua bambuila mikanda ya L’aurore du millénium mu tshinyi? Mbanganyi bavua bakuata natshi mudimu? Ntshikondo kayi tshivuabu bakuate natshi mudimu? Bua tshinyi?

Anu mudi foto itudi balame ituvuluija malu, bintu bionso bia kale bidi bitulongesha malu a bungi adi atutangila tuetu ne bena Kristo netu ba kale; adi atangila ditabuja, dikima, masanka ne ntatu ivuabu bapete mu mudimu wa Yehowa ne muvuaye mubalombole ne mubakuatshishe ne nyuma wende. (Dut. 33:27) Tudi bashindike ne: Yehowa neatubeneshe bua mutudi tudienzeja bua kulama muyuki wa bulongolodi buetu, bua kutungunuka ne kuikala anu mu buobumue ne bakoleshibue bua kuenza disua diende.

[Kazubu/​Tshimfuanyi mu dibeji 31]

Dikonkonona malu mu mushindu muimpe

Padibu balongolola mikanda ne bibejibeji, matadi a DVD ne mikanda mikuabu idi yumvuija Bible, bana betu batu bafunda, bazola, bakebulula malu batu benza mudimu ne bintu bia kale. Nunku bena mu Tshibambalu tshia dilamina bintu bia kale batu badienzeja ne muabu muonso bua kusangisha ne kulama bintu bia bungi bia kale bidi bifumina ku biro bia filiale, Betele, bisumbu, bantu ne bibambalu kampanda bia mu bulongolodi ebu. Tumonayi mu tshikoso mudibu benza mudimu eu:

Dipeta dia malu ne bintu ne dibikonkonona: Badi batungunuka ne kusakidila amue malu mu bintu bia kale bidibu basangisha. A bungi a ku malu aa mmiyuki idi bantu batu banzele Yehowa mudimu ne lulamatu bidimu bia bungi bafila. Kukonkonona ne kulongolola malu aa kudi kuambuluisha bua kumvua bimpe miyuki ya bantu badibu batelamu.

Kubilonga bilondangane: Mu Tshibambalu tshia dilamina bintu bia kale mudi bintu binunu ne binunu, ne bimue bia kudibi bikadi ne bidimu bipite pa lukama. Mudi bintu bia mishindu ya bungi, bia bunene bushilangane ne mbabilonge bimpe mu mushindu wa ne: dîba dikalabu nabi dijinga babipete kakuyi lutatu.

Dibiakajilulula ne dibilama: Badi bakajilula ne balama mikanda ne bimue bintu bikadi binyanguka ku diambuluisha dia mishindu mipiluke ya dilama nayi bintu. Batu bakajilula kabidi mikanda, foto, tutupa tua bikandakanda, filme, ne malu makuata mu bande ku diambuluisha dia ordinatere. Batu benza nunku bua bintu ebi kabinyanguki to.

Dilama ne dipetulula dia malu: Batu balama bintu bia kale bimpe ne mu bulongame bua kabijiminyi, ne bua kabinyanguki ne munya anyi tshitalela. Bintu bia kale bidibu balamina mu ordinatere ebi bidi biambuluisha bua kukebulula ne kupetulula malu a mushinga a kale.

[Bimfuanyi mu dibeji 32]

1. Tshimfuanyi tshia “Foto-drama wa bufuki.” 2. Mabeji a dilombesha nawu mikanda. 3. Mashinyi a bikolokolo. 4. Tshizubu tshia Tshibumba tshia Nsentedi tshia mu dia 15/4/1912. 5. Mukanda wa kuelesha Rutherford mu buloko. 6. Mikro ya WBBR. 7. Tshisanji tshia fono. 8. Kasheta ka dilamina mikanda. 9. Malu a mushinga. 10. Mukanda mutumina Rutherford.