‘Malu onso anudi nuenza, nuenze ne mitshima yenu [yonso] bu munudi nuenzela Mukalenge.’​—KOLOS. 3:23.

1-3. a) Pavua Yezu mufue pa mutshi wa makenga, bivuaku bisua kuleja ne: Yehowa kena kabidi dijinga ne milambu yetu anyi? Umvuija. b) Ndukonko kayi lutudi mua kudiela pa bidi bitangila milambu?

MU BIDIMU lukama bia kumpala, Yehowa wakajadikila bantu bende ne: mulambu wa Yezu uvua mushipe mikenji ya Mose. (Kolos. 2:13, 14) Yehowa kavua kabidi ulomba bantu bua kufila milambu ya nyama ne milambu mikuabu ivua bena Yuda bafila mu bidimu bia bungi to. Mikenji ikavua mikumbaje mudimu wayi wa ‘ndeji udi utufikisha kudi Kristo.’​—Gal. 3:24.

² Ebi kabiena bisua kumvuija ne: bena Kristo kabena ne bua kufila kabidi milambu to. Kadi mupostolo Petelo wakakula bua dijinga dia ‘kufila milambu ya nyuma idi mitabujibue kudi Nzambi bualu bua Yezu Kristo.’ (1 Pet. 2:5) Mupostolo Paulo wakumvuija kabidi ne: nsombelu wa muena Kristo mudilambule kudi Nzambi ne malu onso adiye wenza bidi anu bu “mulambu.”​—Lomo 12:1.

³ Nunku muena Kristo udi upesha Yehowa milambu padiye umulambula peshi ufila bintu kampanda bua kumuenzela mudimu bimpe. Bua malu atudi bamanye pa bidi bitangila milambu ivua bena Isalele bafila, mmunyi mutudi mua kujadika ne: Yehowa udi witaba milambu yetu yonso itudi tufila lelu?

MILAMBU ITUDI TUFILA KU DITUKU NE KU DITUKU

4. Ntshinyi tshitudi ne bua kuvuluka bua midimu yetu ya ku dituku ne ku dituku?

⁴ Bidi mua kutukolela bua kumvua mudi malu atudi tuenza dituku dionso mua kuikala apetangana ne milambu itudi tufila kudi Yehowa. Bidi mua kumueneka bu ne: midimu ya ku nzubu, ya mu tulasa, midimu ya bianza ne ya kusumba bintu kayena mua kunyanga malanda etu ne Yehowa. Kadi wewe mudilambule kudi Yehowa anyi ujinga kudilambula mu matuku adi alua kumpala eku, mbimpe kuvuluka ne: mushindu uudi wenza midimu eyi udi mua kukunyangila malanda ebe ne Yehowa. Tudi bena Kristo munya ne butuku ne tudi ne bua kutumikila mikenji ya mu Bible mu malu etu onso. Ke bualu kayi Paulo wakamba ne: ‘Malu onso anudi nuenza, nuenze ne  mitshima yenu [yonso] bu munudi nuenzela Mukalenge; ki mbu munudi nuenzela bantu.’​—Bala Kolosai 3:18-24.

5, 6. Ntshinyi tshidi mua kutuambuluisha bua kumanya mutudi ne bua kuikala tuenza malu ne tuvuala?

⁵ Malu adi muena Kristo wenza dituku dionso ki mmalu adi atangila mudimu wende wa tshijila to. Kadi bu mudi Paulo mutukankamije bua kuenzela Yehowa mudimu ne ‘mutshima wetu wonso,’ bualu ebu budi butueleshisha meji bua kumona mushindu utudi tuenza malu dîba dionso. Mmunyi mutudi mua kutumikila bualu ebu? Tutuku tuenza malu makane ne tuvuala bimpe mêba onso anyi? Peshi patudi tuenza midimu yetu ya dituku dionso, tutu tuvuala bibi anyi tuenza malu mabi adi atupangisha bua kudimanyisha bu Bantemu ba Yehowa anyi? Katuikadi tuenza nanku to. Batendeledi ba Yehowa kabena ne bua kuenza bualu buonso budi mua kupendeshisha dîna diende to.​—Yesh. 43:10; 2 Kol. 6:3, 4, 9.

⁶ Tukonkononayi mudi dijinga dia kuenzela ‘Yehowa mudimu ne mutshima wetu wonso’ mua kuenzeja mushindu utudi tuela meji ne tuenza malu. Mu dilonga dietu edi tudi ne bua kuvuluka ne: milambu ivua bena Isalele bafila kudi Yehowa ivua ne bua kuikala mitambe buimpe.​—Ekes. 23:19.

MUDI MILAMBU ITANGILA NSOMBELU WETU

7. Kudilambula kudi Yehowa kudi kumvuija tshinyi?

⁷ Pauvua mudilambule kudi Yehowa, uvua muangate dipangadika dia kumuenzela mudimu matuku ebe onso a muoyo. Bushuwa uvua mulaye Yehowa ne: neumuteke kumpala kua malu onso audi wenza mu nsombelu webe. (Bala Ebelu 10:7.) Uvua muangate dipangadika dimpe ditambe. Kakuyi mpata udi mudimuene ne: paudi udienzeja bua kumanya mmuenenu wa Yehowa mu bualu kampanda ne udienzeja bua kuenza disua diende, udi upeta disanka. (Yesh. 48:17, 18) Batendeledi ba Yehowa mba tshijila ne badi ne disanka bualu badi bidikija ngikadilu ya Yehowa Mulongeshi wabu.​—Lew. 11:44; 1 Tim. 1:11.

8. Mushindu uvua Yehowa umona milambu ya bena Isalele bu ya tshijila udi ne mushinga kayi kutudi?

⁸ Yehowa uvua wangata milambu ivua bena Isalele bamulambula bu ya tshijila. (Lew. 6:25; 7:1) Muaku wa mu tshiena Ebelu udibu bakudimune ne: “tshijila” udi umvuija kuikala mutapuluke anyi kulamata anu Yehowa. Bua Yehowa kuitabaye milambu yetu, tudi ne bua kubenga kubuelakana mu malu mabi a mu bulongolodi ebu. Katuena ne bua kunanga malu adi Yehowa mukine to. (Bala 1 Yone 2:15-17.) Bushuwa, ebi bidi bisua kuleja ne: tudi ne bua kuepuka muntu yonso anyi bualu bonso budi mua kutuvuija bantu babi ku mêsu kua Yehowa. (Yesh. 2:4; Buak. 18:4) Bidi kabidi bileja ne: katuena ne bua kutungunuka ne kutangila anyi  kuela meji ku malu mabi peshi a tshiendenda to.​—Kolos. 3:5, 6.

9. Bua tshinyi mushindu utudi tuenzela bakuabu malu udi ne mushinga?

⁹ Paulo wakabela bena Kristo nende ne: ‘Kanupu muoyo bua kuenzelangana bimpe ne bua kukuatshishangana; bua Nzambi udi usanka ne milambu ya nunku.’ (Eb. 13:16) Nunku tuetu tuenze malu mimpe ne tuambuluisha bakuabu misangu yonso, Yehowa neamone malu atudi tuenza aa bu mulambu muimpe. Kuditatshisha bua bakuabu ne dinanga ntshimanyinu tshia bena Kristo balelela.​—Yone 13:34, 35; Kolos. 1:10.

MILAMBU ITUDI TUFILA PATUDI TUTENDELELA YEHOWA

10, 11. Mmunyi mudi Yehowa umona mudimu utudi tumuenzela ne ntendelelu wetu? Bualu ebu budi mua kutusaka bua kuenza tshinyi?

¹⁰ Umue mushindu utudi mua kuenzela bakuabu malu mimpe mpatudi ‘tujikula ditekemena dietu.’ Utuku uyisha dîba dionso ditu mpunga umueneka anyi? Paulo uvua mubikile mudimu wa mushinga wa bena Kristo eu ne: ‘Mulambu wa kutumbisha nawu [Nzambi], udi biawu mamuma a mishiku idi ijukula ditabuja dia dîna diende.’ (Eb. 10:23; 13:15; Hosh. 14:2) Mbimpe tuetu kuela meji bua mushindu utudi tuenza mudimu ne dîba dietu bua kuyisha lumu luimpe lua Bukalenge ne mushindu utudi mua kulongolola nyishilu wetu. Bisangilu bia mudimu bia bungi bidi mua kutuambuluisha bua kuenza bualu ebu. Kadi bualu butudi mua kuepuka mbua ne: mudimu wetu wa kuyisha mu teritware padi mpunga umueneka ‘mmulambu wa kutumbisha nawu’ udi tshitupa tshia ntendelelu wetu, nunku mulambu wetu utudi tufila udi ne bua kuikala mutambe buimpe. Nansha mutudi ne nsombelu mishilangane, bungi bua mêba atudi tuenza mu mudimu wa kuyisha lumu luimpe budi buleja dianyisha ditudi nadi bua malu a mu nyuma.

¹¹ Bena Kristo batu batendelela Yehowa pa nkayabu kumbelu nansha mu tshisumbu tshia bena Kristo. Ke tshidi Yehowa utulomba bua kuenza. Nansha mutudi katuyi mua kutumikila mukenji wa Nsabatu anyi wa kuya ku Yelushalema bua mafesto, tudi anu mua kulongela amue malu ku mikenji eyi. Dituku dionso tudi ne malu a bungi a kuenza, kadi Nzambi udi utulomba bua kuenza mudimu ne dîba ditudi nadi bua kulonga Dîyi diende, kusambila ne kubuela mu bisangilu. Bamfumu ba mêku badi ne bujitu bua kuenza ntendelelu wa mu dîku ne bena mu mêku abu. (1 Tes. 5:17; Eb. 10:24, 25) Mbimpe tudiebeje bua midimu itudi tuenzela  Nzambi ne: ‘Ndiku mua kuakaja mushindu wanyi wa kutendelela Yehowa anyi?’

12. a) Tudi mua kufuanyikija musenga wa manananshi uvuabu bafila mu Isalele wa kale ne tshinyi lelu? b) Mmunyi mudi bualu ebu butangila masambila etu?

¹² Mukalenge Davidi wakambila Yehowa ne: ‘Kulomba kuanyi kuikale kumpala kuebe bu mupuya wa musenga wa manananshi.’ (Mus. 141:2) Tudi ne bua kuelangana meji bua bungi bua misangu itudi tusambila ne tshitudi tusambidila. Mukanda wa Buakabuluibua udi ufuanyikija ‘mitendelelu ya bansantu’ ne musenga wa manananshi mu ngumvuilu wa ne: masambila adi Yehowa wanyisha adi abanda kudiye bu mupuya wa dipembu dimpe. (Buak. 5:8) Mu Isalele wa kale bavua ne bua kulongolola bimpe musenga wa manananshi uvuabu balambula Yehowa pa tshioshelu misangu yonso. Yehowa uvua wanyisha mulambu eu anu pavuabu bawulambula bilondeshile mikenji ivuaye muele. (Ekes. 30:34-37; Lew. 10:1, 2) Tuetu benze petu masambila mu mushindu wa muomumue udi Yehowa wanyisha, dîba adi tudi mua kutekemena bua Yehowa kututelejaye.

KUFILA NE KUANGATA

13, 14. a) Mbualu kayi buvua Epafodito ne bena mu tshisumbu tshia mu Filipoi benzele Paulo? Mmunyi muvuaye mudiumvue? b) Mmunyi mutudi mua kuidikija tshilejilu tshia Epafodito ne bena Filipoi?

¹³ Tudi mua kufuanyikija makuta atudi tufila bua kukuatshisha mudimu wa pa buloba bujima ne mulambu, nansha tuetu tufila a bungi anyi makese. (Mâko 12:41-44) Mu bidimu lukama bia kumpala tshisumbu tshia mu Filipoi tshiakatuma Epafodito ku Lomo bua kuambuluisha Paulo. Epafodito wakatuadila Paulo makuta avua bena mu tshisumbu bafile. Eu kauvua musangu wa kumpala uvua bena Filipoi benzele Paulo malu ne muoyo mulenga to. Bua muoyo wabu mulenga, bavua batumine Paulo makuta bualu kabavua basue bua ikale uditatshisha bua majinga a ku mubidi to, kadi bavua basue bua adifile bikole mu mudimu wende wa diyisha. Mmunyi muvua Paulo mumone dipa diabu edi? Wakabikila dipa edi ne: ‘Mupuya wa dipembu dimpe, mulambu muitabujibue ne udi usankisha Nzambi.’ (Bala Filipoi 4:15-19.) Paulo uvua muanyishe bikole tshivua bena Filipoi bamuenzele ne muoyo mulenga, ne Yehowa pende uvua musanke bikole.

¹⁴ Bia muomumue lelu, Yehowa udi wanyisha ne muoyo mujima mapa atudi tufila bua mudimu udi wenzeka pa buloba bujima. Yehowa udi ulaya ne: tuetu tutungunuka ne kuteka malu a Bukalenge kumpala, neatupeshe bitudi nabi dijinga bua kulama ditabuja dietu dikole ne bua kuikala ne muoyo dituku dionso.​—Mat. 6:33; Luka 6:38.

LEJA DIANYISHA

15. Ngamue malu kayi adi akusaka bua kuleja Yehowa dianyisha?

¹⁵ Tudi ne malu a bungi adi atusaka bua kuleja Yehowa dianyisha. Katuenaku mua kuikala tumuela tuasakidila dituku dionso bua dipa dia muoyo didiye mutupeshe anyi? Yehowa udi utupesha bionso bitudi nabi dijinga bua kuikala ne muoyo bu mudi biakudia, bilamba, muaba wa kulala ne kapepa ka kueyela. Tudi kabidi ne dianyisha kudi Yehowa bua dimanya dijalame dia malu malelela a mu Bible didi ditupesha ditabuja ne ditekemena bua matuku atshilualua. Nunku tudi ne bua kutendelela Yehowa ne kumulambula milambu ya kumutumbisha nayi bua tshidiye ne malu adiye mutuenzele.​—Bala Buakabuluibua 4:11.

16. Mmunyi mutudi ne bua kuleja dianyisha bua mulambu wa Yezu?

¹⁶ Tshiena-bualu tshishale tshivua tshileje ne: mulambu wa Yezu ke dipa dia mushinga didi Yehowa mupeshe bantu. Dipa edi didi dileja mudi Yehowa mutunange. (1 Yone 4:10) Mmunyi mutudi mua kuleja  dianyisha bua dipa edi? Paulo wakamba ne: ‘Dinanga dia Kristo didi dituenzeja; bua tuakujingulula bualu ebu ne: bualu bua umue wakafuila bonso, ne yeye wakafuila bonso bua badi ne muoyo kabikadi nawu bua bualu buabu nkayabu, kadi bikale nawu kudi yeye wakafua ne wakabika ku lufu kabidi bua bualu buabu.’ (2 Kol. 5:14, 15) Paulo uvua usua kuamba ne: bua kuleja bushuwa mutudi ne dianyisha kudi Yehowa bua bulenga buende, tudi ne bua kumunemeka Yeye ne Muanende. Tudi tuleja mutudi banange ne tuanyisha Nzambi ne Kristo patudi tubatumikila, tuyisha ne tuvuija bantu bayidi.​—1 Tim. 2:3, 4; 1 Yone 5:3.

17, 18. Mmu mishindu kayi mudi bamue bavudije milambu yabu ya kutumbisha nayi Yehowa? Fila tshilejilu.

¹⁷ Udiku mua kulengeja mulambu wa ditumbisha nawu uudi upesha Nzambi anyi? Panyima pa tuetu bamane kuela meji bua malu mimpe adi Yehowa mutuenzele, ba bungi mbafike ku dishintulula amue malu bua kupeta dîba dia bungi dia kuyisha lumu luimpe ne bua kuenza midimu mikuabu mu bulongolodi bua Yehowa. Bamue batu bangata bumpanda-njila buambuluishi bua ngondo umue anyi ya bungi tshidimu tshionso, bakuabu mbangate bumpanda-njila bua pa tshibidilu. Bakuabu pabu mbadifile bua kuenza mudimu wa dibaka nzubu ya Bukalenge. Eyi ke mishindu mimpe mitambe itudi mua kuleja Yehowa dianyisha. Tuetu tuenzela Nzambi mudimu ne lungenyi luimpe, mmumue ne: kumuleja dianyisha ne kumuela tuasakidila, neitabe malu atudi tumuenzela.

¹⁸ Bena Kristo ba bungi badi badiumvua benzejibue bua kuleja Yehowa dianyisha. Tuangate tshilejilu tshia Morena. Uvua ukeba mandamuna a nkonko ya malu a mu Bible mu tshitendelelu tshia Katolike tshivuaye mukolele ne mu malu a nkindi ya bena Asie. Kadi kavua mupete diandamuna dimpe nansha dimue dia nkonko yende. Anu pakatuadijaye kulonga Bible ne Bantemu ba Yehowa ke pakapetaye mandamuna a nkonko yende. Morena uvua ne dianyisha divule kudi Yehowa bua mandamuna avuaye mupete aa ne muvuawu mashintulule nsombelu wende, ke kuangataye dipangadika dia kumuela tuasakidila pa kumuenzela mudimu ne makanda ende onso. Wakangata bumpanda-njila buambuluishi diakamue pakatambulaye ne bu muvuaye ne mushindu wa kutungunuka ne kuenza mudimu eu, wakashala mpanda-njila wa pa tshibidilu. Kukadi mpindieu bidimu 30 bidi Morena wenza mudimu eu.

19. Mmunyi muudi mua kuvudija milambu yebe kudi Yehowa?

¹⁹ Bushuwa kudi batendeledi ba Yehowa ba bungi ba lulamatu badi kabayi ne mushindu wa kuangata bumpanda-njila to. Muntu yonso wa kutudi udi mua kufila milambu mimpe kudi Yehowa mu mudimu utudi tumuenzela. Mu bikadilu bietu, tudi ne bua kutumikila mikenji ya mu Bible ne muoyo mujima, tuvuluka ne: tudi baleji mpala ba Yehowa dîba dionso. Mu ditabuja, tudi ne bua kuikala bashindike ne: Nzambi neakumbaje malu adiye mulongolole. Mu midimu mimpe, tudi tuambuluisha bua lumu luimpe luye kumpala. Bua kuleja mutudi ne dianyisha bua malu onso adi Yehowa mutuenzele, tutungunukayi ne kumupesha milambu ne muoyo wetu mujima.

[Nkonko ya dilonga]

[Lungenyi lunene lua mu dibeji 25]

Bulenga bua Yehowa budiku bukusaka bua kuakaja mulambu webe wa kumutumbisha nawu anyi?

[Tshimfuanyi mu dibeji 23]

Utuku uyisha dîba dionso ditu mpunga umueneka anyi?