Bakayisha Dîyi dia Nzambi ne dikima

Anu mudibi bileja mu mukanda wa ‘Rends pleinement témoignage au sujet du Royaume de Dieu’ ne wa Les Témoins de Jéhovah: Prédicateurs du Royaume de Dieu, bena Kristo balelela ba kale bavua ne dikima ne muoyo mukole nansha pavuabu babaluisha. Anu bu bena Kristo netu ba mu bidimu lukama bia kumpala, tudi tulomba Yehowa nyuma wende mu disambila bua atuambuluishe bua kuambila bantu Dîyi diende ne dikima.​—Bien. 4:23-31.

Muanetu mukuabu wakakula bua mudimu wetu wa kuyisha uvua muenzeke mu mvita ya kumpala ya buloba bujima wamba ne: “Batendeledi ba Nzambi bavua babanya ne tshisumi tshitupa tshia muanda mutekete tshia mukanda wa Étude des Écritures tshivua ne tshiena-bualu tshia ne: Le Mystère accompli. Katshia kabavua banji kuabanya mukanda mukuabu mushindu au to pa kumbusha Bible. Bakapatula dibeji dia Ngumu ya Bukalenge No. 1 mu 1918. Pashishe kupatulabu kabidi dibeji dia Ngumu ya Bukalenge No. 2 divua diumvuija bua tshinyi mbulamatadi uvua mukandike mukanda wa Le Mystère accompli. Bakalua kupatula kabidi dibeji dia Ngumu ya Bukalenge No. 3. Bavua bambanye mabeji a ngumu aa pa buloba bujima kudi kasumbu ka bela manyi ba lulamatu. Bivua bikengela kuikala ne ditabuja ne dikima bua kuabanya mabeji a Ngumu ya Bukalenge.”

Lelu batu balongesha bamanyishi bapiabapia ba Bukalenge mua kuyisha, kadi kabivua bienzeka nanku kumpala to. Muanetu wa balume mukuabu wa mu Pologne udi musombele mu États-Unis udi wakula bua mushindu wakatuadijaye mudimu wa kuyisha mu 1922 wamba ne: “Bu mumvua tshiyi mumanye mêyi a kuakula kumpala kua kufila mikanda ne tshiyi mumanye Anglais bimpe, ngakashala muimane nkayanyi ku tshîbi tshia biro bia doktere kampanda nkokola. Munganga mukuabu wakunzulula tshîbi. Tshiena mua kupua bualu ebu muoyo to, bualu mvua ne disanka dia bungi ne buôwa kabidi. Pangakakangula tshibuta tshianyi, mikanda yonso yakamata ku makasa kua munganga au. Tshiena muvuluke tshimvua mumuambile to, kadi ngakamupesha mukanda. Pashishe ngakumbuka, meme kupeta dikima ne kudiumvua mubeneshibue kudi Yehowa. Mvua mufile mikanda ya bungi dituku adi mu njila munene uvuabu bapanyishila bintu.”

Muanetu wa bakaji mukuabu wakamba ne: “Mu bidimu bia 1933 bana betu ba bungi bavua benza mudimu ne mashinyi a bikolokolo bua kuyisha lumu luimpe lua Bukalenge miaba ya bungi.” Musangu kampanda, yeye ne muanetu wa balume mukuabu ne mukajende bavua bayisha mu mikuna ya mu Californie mu États-Unis. Udi wamba ne: “Muanetu wa balume au uvua ubandisha mashinyi a bikolokolo ku mutu kua mikuna ne tuetu tuvua tushala basombe mu musoko uvua mu tshibandabanda. Pavuaye wela mêyi a miyuki mikuata mu tshisanji, bivua biumvuika amu bu ne: avua apatukila mu diulu. Bena mu musoko bavua bakeba bua kumona muanetu wa balume au, kadi kabavua mua kumumona to. Pavua miyuki ya mêyi makuata eyi ijika tuvua tuya kutangila bantu bua kubayisha. Mvua muenze mudimu ne mashinyi makuabu a bikolokolo abidi, kadi bantu ba bungi kabavua basue kuteleja malu atuvua tubayisha to. Nansha nanku bavua anu bateleja miyuki, bualu mêyi a bikolokolo avua afika ku mbanza yabu. Tuvua anu tumona ne: Yehowa uvua utukebela mushindu muimpe wa kuyisha  mu tshikondo tshiakanyine. Bivua bilomba kuikala ne dikima bua kukuata mudimu bimpe ne mushindu uvua Yehowa utupesha, nansha nanku disua dia Yehowa divua anu dikumbana ne dîna diende divua ditumbishibua.”

Mu bidimu bia 1930 ne ku ntuadijilu kua bidimu bia 1940, bavua benza mudimu ne bisanji bia fono ne miyuki ya mu Bible mikuata mu ditadi bua kuyisha bantu. Muanetu wa bakaji mukuabu udi wamba ne: “Nsongakaji kampanda uvua wenda uya ku tshîbi ne ku tshîbi ne tshisanji tshia fono. Pakafikaye ku nzubu kua tatu mukuabu ne kumuelelaye ditadi mu tshisanji, tatu au wakafika munda ne kutua tshisanji museba, tshiotshi kudituta ku tshibumba tshia lutanda lua nzubu. Kadi tshintu nansha tshimue katshivua tshinyanguke mu tshisanji to. Kuvua bantu balume bakuabu basatu bavua badila biakudia mu mashinyi avua mimane bavua bamone pabu tshivua tshienzeke, ke kubikilabu muanetu wa bakaji eu bua kubelelaye ditadi, pashishe kubapeshaye mikanda. Bualu abu buakamumusha bundu bua tshivua tatu au mumuenzele.” Bivua bilomba dikima bua kutantamena ntatu ya mushindu au.

Muanetu wa bakaji eu udi wamba kabidi ne: “Ndi mvuluka mushindu wakatuadija mudimu wa diabanya bibejibeji mu njila mu tshidimu tshia 1940. Ku ntuadijilu, tuvua tuenda ngendu ya mindololotshi bua kufila bumanyishi. Bana betu ba balume ne ba bakaji bavua benda mu mulongo umue mu njila bakuate mabeji avua ne biena-bualu ebi: ‘Bitendelelu mbuteyi ne didinga’ ne ‘Sadilayi Nzambi ne Kristo Mukalenge.’ Bavua benda bapesha kabidi bantu trakte tshianana. Bivua bilomba kuikala ne dikima bua kuenza mudimu mu mishindu eyi, kadi bivua biambuluisha bua kuleja bantu dîna dia Yehowa ne bantu bende.”

Muanetu wa bakaji mukuabu wakamba ne: “Kuabanya bibejibeji mu tubimenga tukese kuvua ne lutatu lua bungi. Bivua bienzeka nunku nangananga pavuabu baluisha Bantemu ba Yehowa bikole. . . . Bivua bikengela kuikala ne dikima dia bungi bua kuimana ne bibejibeji mu masangu a njila ne kuela mbila bua kubikila bantu. Kadi tuvua tupumbisha mu disambombo ku mpukapuka. Imue misangu bantu bavua bitaba. Minga misangu bantu ba muoyo mubi bavua badisangisha bua kutuluisha, ne tuvua tusokoma bua kabatuenzedi bibi.”

Nansha muvuabu batuilangane ne ntatu mu mvita mibidi ya buloba bujima, Bantemu ba Yehowa bavua anu bayisha ne dikima. Mu kampanye ka matuku 43 kavuabu benze kubangila mu dituku dia 1 ngondo wa dikumi ne muibidi mu 1940 too ne mu dia 12 ngondo wa kumpala mu 1941, bamanyishi batue ku 50 000 ba mu États-Unis bakabanya mikanda mitue ku miliyo muanda mukulu mu kampanye kavuabu babikile ne: Tshikondo tshia kuleja “dikima.”

Bantu bakadi ne matuku a bungi mu bulongolodi bua Nzambi badi bavuluka ne disanka ntatu ivuabu bapete ku kale ivua ibalomba bua kuikala ne dikima dikole. Bamue badi bavuluka ne: bakaleja muvuabu ne dikima mu bidimu bia bungi pavuabu batungunuka ne kuambulula tshiambilu tshia ne: Ndaku ne mvita too ne ku ndekelu. Katuena bamanye mushindu mukuabu utuikala mua kuenza mudimu udi Nzambi mutupeshe eu kumpala kua kubutulabu bulongolodi bubi ebu. Nunku ku diambuluisha dia Yehowa netutungunuke ne kuyisha dîyi diende ne ditabuja ne dikima.

[Lungenyi lunene lua mu dibeji 9]

Bitu bilomba anu kuikala ne dikima bua kuenza mudimu wa kuyisha Bukalenge bua Nzambi