“Udiku mua kutukuata foto anyi?”

Programe wa dituku dibidi dia mpungilu wa distrike mumane kujika, muanetu Josué udi wenza mudimu ku Betele wa mu Mexique uvua wenda upita kapepa mu tshimenga tshia Querétaro. Mulume mukuabu dîna diende Javier ne mukajende Maru ba mu ditunga dia Colombie bavua baye kuendakana mu Mexique bakalomba Josué bua abakuate foto. Bu muvua Josué ne balunda bende Bantemu baluate bimpe ne bele makaron a mpungilu, Javier ne mukajende bakabebeja bikalabu bafumina mu tshibilu kampanda tshia malu a tulasa anyi tshia malu makuabu. Josué wakabambila ne: bavua mu mpungilu wa Bantemu ba Yehowa ne bakababikila bua kulua kubuela mu tshitupa tshia mu Dia lumingu.

Javier ne mukajende bakamona ne: kabivua bikumbane bua buobu kubuela mu mpungilu bualu kabavua ne bilamba bivua biakanyine to. Nansha nanku Josué wakabambila dîna diende ne kubapesha nimero ya telefone ya ku Betele kuvuaye wenza mudimu.

Bualu bua dikema, ngondo inayi mimane kupita, Josué wakapeta lumu lua Javier. Javier ne mukajende bakabuela mu mpungilu ne bavua bajinga mpindieu bua Bantemu ba Yehowa balue kubatangila mu tshimenga tshia Mexico muvuabu basombele tshikondo atshi. Javier ne Maru bakatuadija kulonga Bible diakamue ne kubuela mu bisangilu. Ngondo dikumi pashishe, bakalua bambi ba lumu luimpe. Nansha muvuabu ne bua kuya mu tshimenga tshia Toronto mu Canada, bakatunguka ne kuya kumpala mu malu a Nzambi ne bakatambula.

Pashishe Javier wakatumina Josué mukanda umumvuija tshivua tshimusake bua kuitaba bulelela wamba ne: “Kumpala kua tuetu kubuela mu mpungilu, meme ne mukajanyi tuakayukila bua dijinga dituvua nadi dia kupeta bulombodi bua kudi Nzambi. Patuakamona munuvua baluate, tuakela meji ne: nuvua nufumina mu tshisangilu kampanda tshia pa buatshi. Patuvua mu mpungilu biakatukemesha bikole bua muvuabu batuambuluishe ne dinanga bua kupeta muaba wa kusomba, bua kupeta mvese mu Bible ne bua muvua bantu bikale ne bukalanga. Nansha mutuvua ne bilamba bivua kabiyi biakanyine, kakuvua kumueneke bu kuvua bualu to.”

Bushuwa Josué wakamona mudi mêyi a mukalenge Solomo mikale malelela. Solomo wakafunda ne: ‘Kuna mamiinu ebe ne dinda, kuikishi dilolo; bualu bua kuena mumanye ne bidi bidiunda ngebi anyi mbiabia, anyi bubidi buabi nebidiunde.’ (Muam. 11:6) Kuenaku pebe mua kukuna mamiinu pa kubikila bantu bakuabu mu mpungilu unuikala mua kuenza anyi mu muyuki wa patoke padi mpunga umueneka anyi? Yehowa udi mua kukuata nebe mudimu bua kukoka bantu badi ne nzala ne nyota ya malu a Nzambi anu bu Javier ne Maru.​—Yesh. 55:1.

[Tshimfuanyi mu dibeji 32]

Kumbukila ku dia bakaji batangile ku dia balume: Alejandro Voeguelin, Maru Pineda, Alejandro Pineda, Javier Pineda, ne Josué Ramírez ku Betele mu Mexique