Ditungilangana ntshimanyinu tshibi tshia mu matuku a ku nshikidilu

‘Mutuakanuenzela malu a tshijila ne makane ne adi kaayi mua kubandibua.’​—1 TES. 2:10.

ANDAMUNA NKONKO EYI:

Ntshinyi tshitudi mua kulongela ku mushindu uvua Delila, Abashaloma ne Yudasa Isakaliote batungilangane?

Tudi mua kuidikija Yonatana ne Petelo mushindu kayi?

Mmunyi mutudi mua kushala balamate Yehowa ne muena dibaka netu?

1-3. a) Ntshimanyinu kayi tshibi tshia matuku a ku nshikidilu tshitudi tuakuila? Tshidi tshiumvuija tshinyi? b) Netuandamune nkonko kayi isatu?

DELILA ne Abashaloma ne Yudasa Isakaliote bavua benze bualu kayi bua muomumue? Bonso bavua bapange kulamata bantu kampanda. Tshilejilu, Delila kavua bayende Shimishona, pende Shimishona uvua mumunange; Abashaloma kavua mulamate tatuende Mukalenge Davidi to; Yudasa kavua pende mulamate Mukalenge wende Yezu Kristo to. Malu avua bonso buabu benze avua makebele bakuabu ntatu. Bualu ebu budi bututangila bua tshinyi?

² Mufundi kampanda wa mu matuku etu aa udi uleja mudi ditungilangana dikale bumue bua ku malu mabi matambe lelu eu. Bidi ne bua kuenzeka nanku. Pavua Yezu ufila tshimanyinu tshia ‘nshikidilu wa tshikondo etshi’ wakamba ne: ‘Ba bungi nebatungilangane.’ (Mat. 24:3, 10, NW) “Kutungilangana” kudi kumvuija “kulekela anyi kuditua ku tshia muluishi mu musokoko bua dipanga kulamata muntu.” Dipanga dilamatangana dia mushindu eu didi dileja mutudi mu ‘matuku a ku nshikidilu’ bualu Paulo wakamba ne: bantu bavua ne bua kuikala ‘kabayi ne tshijila ne batungidianganyi.’ (2 Tim. 3:1, 2, 4) Nansha mudi bafundi ne benji ba filme banekesha ne balengeja dienda bundumba mu mikanda anyi filme yabu, mu bulelela dienda bundumba ne ditungilangana bitu bikebesha kanyinganyinga ne ntatu. Bushuwa, malu a mushindu eu ntshimanyinu tshibi tshia matuku a ku nshikidilu.

³ Ntshinyi tshitudi mua kulongela ku miyuki ya mu Bible ya kale idi yakula bua bantu bavua kabayi balamate bakuabu? Mbilejilu kayi bia bantu bavua baleje muvuabu balamate bantu bakuabu bitudi mua kuidikija? Tudi ne bua kushala balamate nganyi? Tukonkononayi bualu ebu.

 TULONGELE KU BILEJILU BIA KALE

4. Delila uvua mutungile Shimishona mushindu kayi? Bua tshinyi bualu ebu buvua bubi?

⁴ Tuanji tuakulayi bua tshilejilu tshia Delila muena lubombo uvua Shimishona munange. Shimishona uvua ne mudimu wa kulombola tshisamba tshia Nzambi mu mvita ivuabu ne bua kuluangana ne bena Peleshete. Bu muvua bakalenge batanu ba bena Peleshete pamuapa bamanye ne: Delila kavua munange Shimishona ne muoyo mujima, bakamukosa mishiku ne bintu bia bungi bua abaleje muaba uvua bukole bua Shimishona bua kumushipabu. Delila wakitaba bualu uvua munange bintu, kadi wakapangila misangu isatu bua kumanya muaba uvua bukole bua Shimishona. Wakatungunuka ne kumusengelela ‘ne mêyi ende ku dituku ne ku dituku, wakamutatshisha.’ Ndekelu wa bionso ‘mutshima wende wakatata too ne ku lufu.’ Nunku Shimishona wakamuambila ne: kabatu banji kukosa nsuki yende to, ne bobu mua kuyikosa bukole buende buvua bujika. * Pakamanya Delila bualu ebu wakakosa Shimishona nsuki pavuaye mulale pa bibelu biende, ne wakamufila mu bianza bia baluishi bua kumuenzelabu tshionso tshivuabu basue. (Bal. 16:4, 5, 15-21) Uvua muenze bualu bubi butambe. Anu bua lukuka, Delila wakatungila muntu uvua mumunange bikole.

5. a) Mmunyi muvua Abashaloma muleje ne: kavua mulamate Davidi? b) Bualu ebu buakaleja tshinyi pa bidi bimutangila? c) Mmunyi muvua Davidi mumvue pavua Ahitofele mumutombokele?

⁵ Tshilejilu tshikuabu ntshia Abashaloma uvua mutungilangane pende. Bu muvuaye ne lukuka, wakadisuika bua kunyenga tatuende Davidi nkuasa wa bukalenge. Tshia kumpala, Abashaloma ‘wakiba mitshima ya bena Isalele,’ wenza bua ne: bamunange, ubalaya malu a mafi ne ubaleja dinanga dia lubombo. Uvua ubakidila ne ubatua mishiku bua kuleja muvuaye uditatshisha bua bualu buabu ne majinga abu. (2 Sam. 15:2-6) Abashaloma wakakoka ku luseke luende too ne Ahitofele muntu uvua Davidi weyemena. (2 Sam. 15:31) Davidi udi uleja mu Musambu 3 ne wa 55 muvua dipanga dimulamata edi dimulenge bikole. (Mus. 3:1-8; bala Musambu wa 55:12-14.) Abashaloma wakaleja muvuaye upetula bumfumu bua Nzambi pavuaye muele tshifufu bua kutungila mukalenge uvua Yehowa muteke. (1 Kul. 28:5) Ndekelu wa bionso, wakapangila bualu, ne Davidi wakatungunuka ne kukokesha bu muela manyi wa Yehowa.

6. Mmunyi muvua Yudasa mutungile Yezu? Padibu batela Yudasa tudi tuvuluka tshinyi?

⁶ Mpindieu tuangate tshilejilu tshia Yudasa Isakaliote wakatungila Kristo. Mu Pasaka wa ndekelu uvua Yezu muenze ne bapostolo bende 12, wakabambila ne: ‘Bulelela ndi nnuambila ne: muanenu mukuabu neantungile tshitungu.’ (Mat. 26:21) Pashishe butuku abu Yezu wakambila Petelo, Yakobo ne Yone mu budimi bua Getesemane ne: ‘Tangilayi, muntungidi nyeye au.’ Diakamue Yudasa wakabuela mu budimi ne batungidianganyi nende, ‘wakaya lukasa kudi Yezu, wakamuambila ne: Labi muoyo; wakatuangana nende mishiku.’ (Mat. 26:46-50; Luka 22:47, 52) Yudasa ‘wakatungila muntu uvua kayi ne bualu tshitungu’ ne wakafila Yezu mu bianza bia baluishi. Yudasa muena lukuka wakamufila ku mushinga kayi? Wakamufila anu bua mpalata 30 tshianana. (Mat. 27:3-5) Padibu batela Yudasa tudi tumona “mutungidianganyi,” nangananga muntu udi utungila mulunda wende ne lubombo.

7. Tudi balongele tshinyi ku tshilejilu tshia a) Abashaloma ne Yudasa? b) Delila?

⁷ Ntshinyi tshitudi tulongela ku bilejilu ebi? Abashaloma ne Yudasa bubidi buabu bakafua lufu lua bundu bualu bavua batungile bantu bavua Yehowa muele manyi. (2 Sam. 18:9, 14-17; Bien. 1:18-20) Dîna dia Delila nedikale anu dituvuluija dinanga dia lubombo. (Mus. 119:158) Bidi ne mushinga bua tuetu kulekela lungenyi  luonso lubi anyi lukuka ludi mua kuenza bua Yehowa katuanyishi. Bilejilu ebi bidiku mua kutuambuluisha bua kulekela ngikadilu mubi wa dipanga kulamatangana anyi?

TUIDIKIJE BANTU BAVUA BASHALE BEYEMENE YEHOWA

8, 9. a) Yonatana wakalaya bua kulamata Davidi bua tshinyi? b) Mmunyi mutudi mua kuidikija Yonatana?

⁸ Bible udi wakula kabidi bua bantu ba bungi bavua balamate bakuabu. Tukonkonone bilejilu bia bantu babidi ne tumone tshitudi mua kulongela kudibu. Tubangishe ne tshilejilu tshia Yonatana uvua muleje muvuaye mulamate Davidi. Yonatana muanabute wa mukalenge Shaula ke uvua mua kupingana tatuende mu nkuasa wa bumfumu mu Isalele. Kadi kuvua anu bualu bumue buvua bumupangisha. Yehowa wakasungula Davidi bua kupingana Shaula mu nkuasa. Yonatana wakatumikila tshivua Nzambi muambe. Kavua mumvuile Davidi mukawu to. Kadi “mutshima wa Yonatana wakakuatakana ne mutshima wa Davidi” ne wakamulaya bua kumulamata. Wakapesha too ne Davidi bilamba, muele wa mvita, buta bua miketa ne mukaba, uleja muvuaye musue bua Davidi alue mukalenge. (1 Sam. 18:1-4) Yonatana wakenza muende muonso bua ‘kukolesha Davidi mu maboko,’ uteka too ne muoyo wende mu njiwu bua kusungila Davidi kudi Shaula. Yonatana wakambila Davidi ne muoyo mujima ne: ‘Wewe newikale mukalenge wa Isalele, ne meme nengikale muibidi.’ (1 Sam. 20:30-34; 23:16, 17) Nunku kabiena bikemesha bua muvua Davidi muleje muvuaye ne kanyinganyinga mu musambu uvuaye muimbile Yonatana panyima pa lufu luende to.​—2 Sam. 1:17, 26.

⁹ Kabivua bikolele Yonatana bua kushala mulamate bakuabu to. Uvua utumikila Yehowa ne muoyo mujima ne ukuatshisha Davidi ne muende muonso bualu uvua muela manyi wa Nzambi. Bia muomumue lelu, bobu kabayi batupeshe mudimu kampanda wa pa buawu mu tshisumbu, tudi ne bua kukuatshisha ne muoyo mujima bana betu badibu bateke bua kutulombola.​—1 Tes. 5:12, 13; Eb. 13:17, 24.

10, 11. a) Bua tshinyi Petelo wakashala mulamate Yezu? b) Tudi mua kuidikija Petelo mushindu kayi? Bualu ebu budi mua kutusaka bua kuenza tshinyi?

¹⁰ Tshilejilu tshikuabu tshimpe ntshia mupostolo Petelo uvua mulamate Yezu. Pavua Yezu muakule mu tshimfuanyi bua mushinga wa kuleja ditabuja mu mubidi ne mashi ende bikavuaye pa kulambula, bayidi bende ba bungi bakamulekela bualu bavua bamone ne: mêyi ende avua mabatonde. (Yone 6:53-60, 66) Nunku Yezu wakebeja bayidi bende 12 ne: “Nuenu kabidi, kanuena basue kuya anyi?” Petelo wakamuandamuna ne: ‘Mukalenge, netuye kudi nganyi? Wewe udi ne mêyi a muoyo wa tshiendelele. Tuakuitabuja, tudi bamanye ne: wewe udi wa Tshijila wa Nzambi.’ (Yone 6:67-69) Bivuaku bisua kumvuija ne: Petelo uvua mumvue bimpe tshivua Yezu usua kuamba  bua mulambu uvuaye ne bua kufila anyi? Tòo. Nansha nanku, Petelo uvua mudisuike bua kushala mulamate Muela manyi wa Nzambi.

¹¹ Petelo kavua wela meji ne: Yezu uvua ne meji mabi ne mu bungi bua matuku uvua mua kulua kushintulula tshivuaye muambe to. Kadi wakitaba ne budipuekeshi buonso ne: Yezu uvua ne ‘mêyi a muoyo wa tshiendelele.’ Bia muomumue lelu, ntshinyi tshitutu tuenza patudi tulonga mu mikanda ya ‘mupika wa lulamatu’ bualu kampanda butudi katuyi bumvue bimpe anyi budi kabuyi bupetangana ne ngelelu wetu wa meji? Tudi ne bua kudienzeja bikole bua kubumvua bimpe pamutu pa kuindila anu ne: balue kubushintulula bua bupetangane ne lungenyi luetu.​—Bala Luka 12:42.

USHALE MULAMATE MUENA DIBAKA NEBE

12, 13. Dipanga kulamatangana didi mua kupeta mpunga mu dibaka mushindu kayi? Bua tshinyi katuena mua kuamba ne: muntu yeye mufike bukole kampanda udi mua kupanga kulamata muena dibaka nende kakuyi bualu?

¹² Ditungilangana mu mishindu yadi yonso mbualu bubi butudi katuyi mua kulekela bunyanga ditalala ne buobumue mu dîku dia bena Kristo ne mu tshisumbu. Bikale ne bualu ebu mu mutu, tukonkononayi mutudi mua kushala balamate muena dibaka netu ne Nzambi.

¹³ Kuangata muntu udi kayi muena dibaka nebe ke umue mushindu mubi wa dipanga kueyemena kudi muena dibaka. Muntu udi wenda ne muntu mulume anyi mukaji mukuabu kena mulamate muena dibaka nende to, bualu udi utuadija kualakana muntu mukuabu. Muena dibaka udibu benzele bibi udi udiumvua nkayende kayi ne tshia kuenza. Mmushindu kayi udi bualu bua nunku mua kuenzekela bantu babidi bavua banangangane? Misangu ya bungi bitu bituadija padi dinanga dia bena dibaka dituadija kukepela. Mulongeshi kampanda wa malu a mu nsombelu diende Gabriella Turnaturi udi wamba ne: “Padi dinanga dituadija kukepela pankatshi pa bena dibaka ke padi dipanga dieyemenangana dibuelela.” Dikepela dia dinanga mu dibaka didi difikila too ne bantu bakadi bashindame. Tshilejilu, tatu mukuabu wa bidimu 50 wakashipa dibaka ne mukajende uvua mumunange ne ukavuabu basombe nende munkatshi mua bidimu 25 bua kuya kusomba ne mukaji mukuabu uvua mumusankishe. Bamue bantu badi bamba ne: ndisama dia ku bukulumpe. Kadi pamutu pa kuela meji ne: kakuena mushindu wa kuepuka bualu ebu, tumanyayi ne: bualu ebu budi buleja dipanga dieyemenangana. *

14. a) Mmunyi mutu Yehowa umona dipanga kulamatangana mu dibaka? b) Yezu wakamba tshinyi bua dilamatangana dia bena dibaka?

¹⁴ Mmunyi mudi Yehowa umona aba badi balekela bena dibaka nabu bua bualu buonso tshianana kabiyi bua tshidi Bible wamba? Nzambi wetu ‘udi ukina dishipa dia dibaka,’ ne udi uleja mudiye kayi wanyisha aba badi bakengesha ne balekela bena dibaka nabu. (Bala Malaki 2:13-16.) Anu bu Tatuende, Yezu wakaleja ne: ki mbimpe kuipata anyi kulekela muena dibaka udi kayi ne bualu ne kulengulula bualu ebu to.​—Bala Matayo 19:3-6, 9.

15. Mmunyi mudi bena dibaka mua kukolesha malanda abu?

¹⁵ Mmunyi mudi aba badi mu dibaka mua kushala balamatangane? Dîyi dia Nzambi didi diamba ne: ‘Usanke ne mukaji [anyi mulume] uwakabaka mu bunsonga buebe.’ Didi diamba kabidi ne: ‘Usanke ne mukaji [anyi mulume] webe uudi munange.’ (Nsu. 5:18; Muam. 9:9) Padi bena dibaka babidi bakola, badi ne bua kuikala balamatangane ne banangangane  bikole. Ebi bidi biumvuija kuikala kutabalelangana, kupitshisha dîba pamue ne kuikala balamatangane umue ne mukuabu. Badi ne bua kuikala baditatshisha bua kulama dibaka diabu ne kulama malanda abu ne Yehowa. Nunku bena dibaka badi ne bua kulonga Bible pamue, kuyisha pamue ne kusambila pamue bua Yehowa abambuluishe.

USHALE MULAMATE YEHOWA

16, 17. a) Mmunyi mutudi mua kuleja mutudi balamate Nzambi mu dîku ne mu tshisumbu? b) Ntshilejilu kayi tshidi tshileja bipeta bimpe bidi mua kumueneka padi bena mu dîku batumikila mukenji wa Nzambi wa kubenga kubuelakana ne muntu udibu bipate?

¹⁶ Kudi bamue bena Kristo bavua benze bubi bunene ne bababele ‘bikole bua bikale balenga mu ditabuja.’ (Tito 1:13) Bakuabu nsombelu wabu uvua ulomba bua bipatshibue mu tshisumbu. Bua ‘aba bavua bapete dinyoka,’ ndibambuluishe bua kulengeja malanda abu ne Nzambi. (Eb. 12:11, MMM) Tudi mua kuenza tshinyi tuetu bikale ne mulela anyi mulunda udibu bipate mu tshisumbu? Dîba adi katuena mua kuleja mutudi balamate muntu au to, kadi tudi ne bua kululeja kudi Nzambi. Yehowa udi utangila bua kumona mutudi tutumikila mukenji wende wa kubenga kubuelakana ne muntu yonso udibu bipate.​—Bala 1 Kolinto 5:11-13.

¹⁷ Tuangatabi tshilejilu tshidi tshileja bipeta bimpe bidi mua kumueneka padi bena mu dîku balamata mukenji wa Yehowa wa kubenga kubuelakana ne mulela udibu bipate. Bavua bipate nsongalume kampanda munkatshi mua bidimu bipite pa dikumi. Mu bidimu bionso ebi, tatuende, mamuende ne bana babu banayi bakabenga ‘kubuelakana’ nende. Imue misangu uvua uteta bua kudibueja mu malu avuabu benza; kadi diakalenga, bena mu dîku aba bonso bavua badisuike bua kubenga kubuelakana nende nansha kakese. Pavuabu bamupingaje mu tshisumbu wakamba ne: uvua ujinga misangu yonso bua kuikala mu malanda mimpe ne bena mu dîku diabu, nangananga butuku pavuaye udishadila nkayende. Udi ujadika ne: bu bena mu dîku diabu babuelakane nende nansha kakese bivua mua kumusankisha bikole. Kadi bu muvuabu kabayi babuelekana nende nansha kakese, bakabanga kumusamina muoyo ne bualu ebu buakamusaka bua kulengeja malanda ende ne Yehowa. Ikala uvuluka bualu ebu dîba dionso diudi utetshibua bua kushipa mukenji wa Nzambi wa kubenga kubuelakana ne balela bebe badibu bipate.

18. Bu mutudi bamone buimpe bua kushala balamate bakuabu ne bubi bua kubenga kushala babalamate, udi mudisuike bua kuenza tshinyi?

¹⁸ Tudi mu bulongolodi bubi mudi bantu kabayi bamanye kulamatangana. Kadi tudi ne bilejilu bimpe bia bena Kristo bitudi mua kuidikija. Nsombelu wabu udi ujadika mêyi a mu Bible adi alonda aa: ‘Nuenu nudi bamanyi ne Nzambi udi mumanyi kabidi bu mutuakanuenzela nuenu badi bitabuja malu a tshijila [anyi, adi aleja mutudi banulamate] ne makane ne adi kaayi mua kubandibua.’ (1 Tes. 2:10) Nunku tudisuikayi bua kushala balamate Nzambi ne bantu netu.

[Mêyi adi kuinshi]

[Nkonko ya dilonga]

[Tshimfuanyi mu dibeji 10]

Petelo uvua mulamate Muana muela manyi wa Nzambi nansha muvua bantu bakuabu bamubenge