Nkonko ya babadi

Lufu lua bantu badi balamate Nzambi ludi ne “mushinga mukole ku mêsu kua Yehowa” mushindu kayi?

▪ Mufundi wa Misambu kampanda wakafunda ku bukole bua nyuma muimpe ne: ‘Lufu lua bansantu bende ludi ne mushinga mukole ku mêsu kua Yehowa.’ (Mus. 116:15) Muoyo wa mutendeledi wa Yehowa yonso udi ne mushinga wa bungi ku mêsu kuende. Kadi mêyi adi mu Musambu wa 116 aa adi aleja bualu bukuabu bua mushinga kupita lufu lua mutendeledi wa Yehowa.

Padi muntu wenza muyuki dîba didi muena Kristo kampanda mufue, ki mbimpe aleje ne: mêyi adi mu Musambu wa 116:15 adi akumbanyina muntu udi mufue au to, nansha yeye muikale mutendeledi mulelela wa Yehowa. Bua tshinyi? Bualu mêyi a mufundi wa Misambu aa adi ne diumvuija dialabale. Adi umvuija ne: Yehowa kakuanyisha bua batendeledi bende bonso babutuke to bualu udi ubangata ne mushinga wa bungi.​—Bala Musambu wa 72:14; 116:8.

Musambu wa 116:15 udi utujadikila ne: Yehowa kakuanyisha bua batendeledi bende bonso mu tshibungi bafue to. Bushuwa, malu adi matufikile matuku etu aa adi aleja mutudi batantamene ntatu ne dikengeshibua, bileja patoke ne: Nzambi kakuitaba bua batubutule to.

Bu mudi Yehowa ne bukole bua bungi ne ukumbaja malu onso adiye ulaya, kakuitaba bua batubutule bonso to. Bu yeye mua kulekela bualu bua nunku buenzeka, nebileje ne: baluishi bende badi ne bukole bupite buende. Kakuenza nanku nansha kakese. Batendeledi ba Yehowa bonso bobu babutuke, dijinga diende dia ne: bantu bakane basombe pa buloba kadiakukumbana to. Pabi bualu bua nunku kabuena mua kuenzeka nansha kakese. (Yesh. 45:18; 55:10, 11) Koku kakuyi kabidi muntu udi utendelela Yehowa mu lubanza lua ntempelo wende wa mu nyuma pa buloba, mudimu munsantu udi bantu bamuenzela kawakuenzeka kabidi to. Kakuakuikala bantu benza ‘buloba bupiabupia’ mmumue ne: bantu bakane basomba pa buloba mu bukokeshi bua ‘diulu dipiadipia.’ (Buak. 21:1) Dîba adi, bukokeshi bua bidimu tshinunu bua Kristo kabuakuikalaku koku kakuyi bantu bakokeshabu pa buloba.​—Buak. 20:4, 5.

Bu Yehowa mua kuitaba bua baluishi bende babutule bantu bende bonso pa buloba, bukokeshi ne lumu luende nebikale mua kuedibua mpata. Biobi mua kuenzeka nanku, nebileje ne: Yehowa kena Mukalenge wa diulu ne buloba to. Kabidi, Yehowa kakuitaba bua batendeledi bende bonso babutuke to bualu udi unemeka bumuntu buende ne dîna diende dinsantu bikole. Tumanye ne: bu mudi Nzambi “kayi ne bubi,” kakupanga mua kulama bantu bonso badi bamuenzela mudimu ne lulamatu to. (Dut. 32:4; Gen. 18:25) Kabidi, kulekela bua batendeledi bende bonso babutuke kakuena kupetangana ne mêyi a mu Bible a ne: ‘Yehowa kena ulekela bantu bende bualu bua dîna diende dinene.’ (1 Sam. 12:22) Bulelela, ‘Yehowa kena wipata bantu bende, kena ulekela ba mu bumpianyi buende.’​—Mus. 94:14.

Bidi bitukolesha bua kumanya ne: bantu ba Yehowa kabakujika pa buloba to. Mu mishindu yonso, tuikale ne lulamatu kudi Nzambi batekemene mêyi ende a ne: ‘Kakuena tshielelu tshia mvita tshidibu batula bua kukuluisha natshi tshidi mua kuikala ne diakalengele; wewe neutuishe ludimi luonso ludibu babandisha bua kukubanda nalu mu tshilumbu. Ebu mbumpianyi bua badi bakuatshila Yehowa mudimu ne eku nkubingishibua kuabu kudi kufuma kundi.’​—Yesh. 54:17.

[Lungenyi lunene lua mu dibeji 22]

Nzambi kakuitaba bua babutule bantu bende to