Utuku umuenesha butumbi bua Yehowa anyi?

‘Tudi tumuenesha butumbi bua Yehowa bu mmuenu.’​—2 KOL. 3:18, NW.

NEWANDAMUNE MUNYI?

Nansha mutudi bena mibi, mmunyi mutudi mua kutumbisha Yehowa?

Mmunyi mudi masambila etu ne dibuela mu bisangilu bituambuluisha bua kumuenesha butumbi bua Nzambi?

Tshidi mua kutuambuluisha bua kutungunuka ne kutumbisha Yehowa ntshinyi?

1, 2. Bua tshinyi mbimpe kutekemena ne: tudi mua kuidikija ngikadilu ya Nzambi?

TUETU bonso tutu bafuane baledi betu mu mushindu kampanda anyi kansanga. Nunku kabitu bikemesha patudi tumvua muntu wambila muana wa balume kampanda ne: ‘Udi mufuane tatuebe’ anyi wa bakaji ne: ‘Udi anu bu mamuebe.’ Bana batu misangu ya bungi bidikija baledi babu. Kadi tudi mua kuamba tshinyi buetu tuetu? Tudiku mua kuidikija Tatuetu wa mu diulu Yehowa anyi? Nansha mutudi katuyi mua kumumona, tudi mua kumona ngikadilu yende patudi tulonga Dîyi diende, tubandila bintu bidiye mufuke ne tuelangana meji pa Bible nangananga pa mêyi ne bienzedi bia Muanende Yezu Kristo. (Yone 1:18; Lomo 1:20) Tudi bushuwa mua kumuenesha butumbi bua Yehowa.

² Kumpala kua Nzambi kufuka Adama ne Eva, uvua mushindike ne: bantu bavua mua kukumbaja tshivuaye musue bua benze, kumuenesha ngikadilu yende ne kumutumbisha. (Bala Genese 1:26, 27.) Bua kuleja mutudi balamate Nzambi, tudi ne bua kumuenesha ngikadilu ya Mufuki wetu. Tuetu benze nunku netuikale ne diakalenga dia pa buadi dia kuleja butumbi bua Nzambi nansha tuetu bikale ne bibidilu kayi, balonge tulasa kayi anyi bikale ba tshisamba kayi. Bua tshinyi? Bualu ‘Nzambi kena ne kansungansunga, kadi yeye udi witabuja wa mu tshisamba tshionso udi umutshina, udi wenza malu makane.’​—Bien. 10:34, 35.

3. Bena Kristo badi mua kudiumvua mushindu kayi padibu benzela Yehowa mudimu?

³ Bena Kristo bela manyi badi bamuenesha butumbi bua Yehowa. Mupostolo Paulo uvua pende muela manyi wakamba ne: ‘Tuetu bonso, patudi katuyi ne tshilamba tshibuikila pa mpala yetu, tudi tumuenesha butumbi bua Yehowa bu mmuenu, tudi tukudimuka mu tshimfuanyi  tshimue tshimue atshi ku butumbi bukese too ne ku butumbi bunene, anu mudi Yehowa udi Nyuma wenzeja menemene.’ (2 Kol. 3:18, NW) Pavua Mose ufuma ku mukuna wa Sinai muambule mabue avua ne Mikenji dikumi, mpala wende uvua ubalakana bualu Yehowa uvua muyukile nende. (Ekes. 34:29, 30) Nansha mudi bena Kristo kabayi banji kumona bualu bua nunku ne mpala yabu kayiyi mianji kubalakana, badi ne disanka bua mudibu bambila bakuabu malu a Yehowa, ngikadilu yende ne malu mimpe adiye mulongolole bua bantu. Anu bu muvua mmuenu ya kale ibalakana, bela manyi ne mikoko mikuabu badi bamuenesha butumbi bua Yehowa mu nsombelu wabu ne mu mudimu wa buambi. (2 Kol. 4:1) Udiku pebe umuenesha butumbi bua Yehowa ku bienzedi biebe bidi bileja ditshina dia Nzambi ne ku mudimu webe wa diyisha Bukalenge anyi?

TUDI BASUE KUMUENESHA BUTUMBI BUA YEHOWA

4, 5. a) Anu bu Paulo, ndutatu kayi lutudi nalu? b) Mmushindu kayi udi bubi butuenzeja malu?

⁴ Bu mutudi batendeledi ba Yehowa, tudi basue kutumbisha Mufuki wetu mu malu onso atudi tuenza. Kadi misangu ya bungi katutu anu tukumbaja tshitutu basue kuenza to. Paulo uvua pende uluangana ne lutatu elu. (Bala Lomo 7:21-25.) Paulo wakumvuija kudi lutatu elu lufumine wamba ne: ‘Bualu bua bonso bakenza malu mabi, ne badi bapanga kupeta butumbi kudi Nzambi.’ (Lomo 3:23) Bantu bakalua bapika ba ‘bubi budi bubakokesha’ bualu bavua babupiane kudi Adama.​—Lomo 5:12; 6:12.

⁵ Bubi ntshinyi? Mbualu buonso budi kabuyi bumvuangana ne ngikadilu, njila, mikenji ne disua bia Yehowa. Bubi budi bunyanga malanda a muntu ne Nzambi. Budi butupangisha bua kukumbaja tshipatshila anu mutu muashi wa mikete upanga mua kuasa tshintu tshidi kumpala kuende mukete. Tudi mua kuenza bubi bamanye anyi katuyi bamanye. (Nom. 15:27-31) Bubi budi munda mua bantu bonso ne budi bubakosolola ne Mufuki wabu. (Mus. 51:5; Yesh. 59:2; Kolos. 1:21) Nunku, bantu bonso mu kabujima kabena mu diumvuangana ne Yehowa ne badi bapangila mushindu wa kumuenesha butumbi bua Nzambi. Kakuyi mpata, bubi ntshintu tshibi tshitambe tshidi tshitatshisha bantu.

6. Nansha mutudi bena mibi, mmunyi mutudi mua kutumbisha Nzambi?

⁶ Nansha mutudi bena mibi, Yehowa mmuleje mudiye “Nzambi wa ditekemena.” (Lomo 15:13) Wakafila mulambu wa Yezu Kristo bua kutumbushila bubi. Patudi tuitabuja mulambu eu, katuena kabidi ‘bapika ba bubi’ to, kadi tudi tupeta mushindu wa kumuenesha butumbi bua Yehowa. (Lomo 5:19; 6:6; Yone 3:16) Tuetu balame malanda mimpe aa ne Nzambi neatubeneshe kutuadijila ku mpindieu, ne mu matuku atshilualua netulue bapuangane ne netupete muoyo wa kashidi. Nansha mututshidi bena mibi, tudi ne diakalenga bua mudi Nzambi utumona bu bantu badi mua kumuenesha butumbi buende.

TUMUENESHE BUTUMBI BUA NZAMBI

7. Tudi ne bua kumanya tshinyi pa bidi bitutangila bua kumuenesha butumbi bua Nzambi?

⁷ Bua tuetu kukumbana bua kumuenesha butumbi bua Nzambi, tudi ne bua kuitaba ne muoyo umue mutudi bena mibi. (2 Kul. 6:36) Tudi ne bua kuitaba mutudi bena mibi ne kudienzeja bua kudikanda bua tuetu kukumbana bua kutumbisha Nzambi. Tshilejilu, tuetu bakuluke mu bubi bua kutangila bindidimbi bia bantu butaka, tudi ne bua kuitaba ne: tudi dijinga ne diambuluisha dia bakulu ne kuenza bua tudipete. (Yak. 5:14, 15) Ke bualu bua kumpala butudi mua kuenza bua kuikala ne nsombelu udi utumbisha Nzambi menemene. Bu mutudi batendeledi ba Yehowa, tudi ne bua kutungunuka ne kudikonkonona bua kujadika bituikala tutumikila mikenji ya buakane ya Nzambi. (Nsu. 28:18; 1 Kol. 10:12) Nansha bubi butukoka mu mushindu kayi, tudienzeje bua kubukandamena  bua kumuenesha butumbi bua Nzambi.

8. Nansha mutudi bena mibi, tudi ne bua kuenza tshinyi?

⁸ Yezu ke muntu umuepele uvua ne muoyo ne mufue kayi mupangile bua kusankisha Nzambi ne kumuenesha butumbi buende. Nansha mutudi bena mibi bishilangane ne Yezu, tudi mua kudienzeja bua kumuidikija. (1 Pet. 2:21) Yehowa udi utangila mutudi tudienzeja ne malu atudi tukumbaja, nunku udi utubenesha patudi tudienzeja ne muoyo mujima bua kumutumbisha.

9. Bible udi ne mushinga kayi mu nsombelu wa bena Kristo badi basue kutumikila mikenji ya Nzambi?

⁹ Dîyi dia Yehowa didi mua kutukenkeshila njila wa tuetu kulonda. Kulonga bikole Dîyi dia Nzambi ne kuelangana meji pa bitudi tubalamu kudi ne mushinga. (Mus. 1:1-3) Tuetu tubala Bible dituku dionso, nebituambuluishe bua kudilengeja. (Bala Yakobo 1:22-25.) Ditabuja dietu ndiashila pa dimanya malu adi mu Bible, didi dikolesha dipangadika dietu dia kuepuka malu mabi ne dia kusankisha Yehowa.​—Mus. 119:11, 47, 48.

10. Mmunyi mudi disambila mua kutuambuluisha bua kuenzela Yehowa mudimu bikole?

¹⁰ Tuetu basue kumuenesha butumbi bua Nzambi, tudi kabidi ne bua ‘kunanukila mu kutendelela.’ (Lomo 12:12) Tudi ne bua kusambila bua Yehowa atuambuluishe bua tumuenzele mudimu mu mushindu udiye wanyisha. Nanku, tudi ne bua kumulomba nyuma muimpe, ditabuja dikole, bukole bua kutantamena mateta ne mushindu wa ‘kuludikila bantu njila mululame mu dîyi dia Nzambi dia bushuwa.’ (2 Tim. 2:15; Mat. 6:13; Luka 11:13; 17:5) Anu mutu muana weyemena tatuende mu malu onso, ke mutudi petu ne bua kueyemena Yehowa Tatuetu wa mu diulu. Tuetu bamulombe bua atuambuluishe bua kumuenzela mudimu bikole, tudi ne bua kuikala bashindike ne: neatuambuluishe. Katuena mua kuela meji ne: tudi tumutatshisha to. Kadi patudi tusambila tudi ne bua kumutumbisha, kumuela tuasakidila, kukeba bua atulombole nangananga patudi mu ntatu ne kumulomba bua atuambuluishe bua tumuenzele mudimu mu mushindu udi utumbisha dîna diende dinsantu.​—Mus. 86:12; Yak. 1:5-7.

11. Bisangilu bidi bituambuluisha mushindu kayi bua kumuenesha butumbi bua Nzambi?

¹¹ Nzambi mmupeshe ‘mupika wa lulamatu ne wa budimu’ mudimu wa kumulamina mikoko yende ya mushinga mukole. (Mat. 24:45-47, NW; Mus. 100:3) Mupika udi uditatshisha bikole bua mushindu udi bena Kristo mua kumuenesha butumbi bua Yehowa. Bisangilu bidi bituambuluisha bua kulengeja ngikadilu yetu ya buena Kristo anu bu mutu mutedi ulengeja tshilamba kampanda. (Eb. 10:24, 25) Nunku, tuikale tufika kumpala kua dîba, bualu tuetu bikale ne tshilele tshia kufika bisangilu bimane kubangisha, tudi tupangila amue malu atudi nawu bualu adi mua ‘kulengeja’ ngikadilu yetu ya buena Kristo.

TUIDIKIJAYI NZAMBI

12. Mmunyi mutudi mua kuidikija Nzambi?

¹² Tuetu basue kumuenesha butumbi bua Nzambi, tudi ne bua ‘kuidikija kuenza mudi Nzambi wenza.’ (Ef. 5:1) Umue mushindu utudi mua kuidikija Yehowa nkumona malu mu mushindu udiye uamona. Kuenza malu mu mushindu udi kawuyi umusankisha kudi kumupendesha ne kutukebela ntatu. Bu mudi bantu badi batunyunguluke bikale ku bukokeshi bua mubi Satana Diabolo, tudi ne bua kudienzeja bikole bua kukina malu adi Yehowa mukine ne kunanga bikole malu adiye munange. (Mus. 97:10; 1 Yone 5:19) Tudi ne bua kuikala batuishibue ne: mushindu umue muimpe utudi mua kuenzela Nzambi mudimu nkuenza malu onso bua kumutumbisha.​—Bala 1 Kolinto 10:31.

13. Bua tshinyi tudi ne bua kukina bubi? Kuenza nunku kudi mua kutusaka ku dienza tshinyi?

¹³ Yehowa mmukine bubi nunku tudi ne bua kubukina petu. Bushuwa, tudi ne bua kuepuka bubi mu mishindu yonso ne katuena mua  kudibueja mu diteta bua kumanya mutudi mua kudikanda kumpala kua bubi to. Tshilejilu, tudi ne bua kuepuka butontolodi bualu mbubi budi mua kutupangisha bua kutumbisha Nzambi. (Dut. 13:6-9) Nunku katubuelakanyi nansha kakese ne batontolodi anyi ne muntu yonso udi udiamba mudiye muena Kristo kadi muikale upendesha Nzambi. Tudi ne bua kuenza nunku nansha muntu wa nunku yeye muikale muena mu dîku dietu. (1 Kol. 5:11) Kuteta bua kuleja mudi batontolodi anyi bantu badi badiombola bulongolodi bua Yehowa bamba malu a dishima kakuena mua kutuambuluisha to. Mu kuamba kuimpe, kubala malu a batontolodi mu mikanda nansha kuateleja ku televizion nansha ku tshisanji anyi ku Enternete kudi kunyanga malanda etu ne Yehowa.​—Bala Yeshaya 5:20; Matayo 7:6.

14. Patudi tudienzeja bua kumuenesha butumbi bua Nzambi, tudi ne bua kuikala ne ngikadilu kayi? Bua tshinyi?

¹⁴ Kuleja dinanga mmushindu munene utudi tuleja mutudi tuidikija Tatuetu wa mu diulu. Tudi ne bua kuikala ne dinanga anu bu yeye. (1 Yone 4:16-19) Dinanga ditudi nadi munkatshi muetu didi dileja mutudi bayidi ba Yezu ne batendeledi ba Yehowa. (Yone 13:34, 35) Nansha mudi bubi mua kutupangisha imue misangu bua kuleja dinanga, tudi mua kudienzeja bua kubukandamena ne kuleja mutudi banangangane misangu yonso. Tuetu bikale ne dinanga ne ngikadilu mikuabu kabidi ya buena ya Nzambi, nebituambuluishe bua kubenga kuenza malu mabi.​—2 Pet. 1:5-7.

15. Dinanga didi mua kutusaka bua kuenzela bantu bakuabu malu mushindu kayi?

¹⁵ Dinanga didi ditusaka bua kuenzela bantu bakuabu malu mimpe. (Lomo 13:8-10) Tshilejilu, tuetu banange muena dibaka netu katuakuitaba bua kuenda masandi to. Tuetu banange bakulu ne tubanemeka bua mudimu udibu benza, nebituambuluishe bua kubatumikila ne kubakokela. Bana badi banange baledi babu badi babatumikila, babanemeka ne kabatu bakula bibi bua bualu buabu to. Tuetu banange bantu netu, katuakubamona bu bashadile kutudi anyi kuakula nabu mu mushindu udi kawuyi uleja kanemu to. (Yak. 3:9) Bakulu badi banange mikoko ya Nzambi badi bayenzela malu ne dinanga.​—Bien. 20:28, 29.

16. Dinanga didi dituambuluisha mu mushindu kayi mu mudimu wa buambi?

¹⁶ Tudi kabidi ne bua kuleja dinanga patudi mu buambi. Bu mutudi banange Yehowa bikole, katuakuteketa mu mikolo padi bamue bantu babenga kututeleja anyi batuandamuna bibi to. Kadi netutungunuke anu ne kuyisha lumu luimpe. Dinanga neditusake bua kudilongolola bimpe ne kudienzeja bua kuyisha bimpe. Tuetu banange ne muoyo mujima Nzambi ne bantu netu, katuakumona mudimu wa buambi bu bujitu to. Kadi, netuwumone bu diakalenga dinene ne netuwenze ne disanka.​—Mat. 10:7.

TUTUNGUNUKE NE KUTUMBISHA YEHOWA

17. Kumanya ne: katuena anu mua kumuenesha butumbi bua Nzambi mudibi bikengela kudi mua kutuambuluisha mushindu kayi?

¹⁷ Bantu ba bungi lelu kabena bamona bubi bu bualu bunene to, kadi kabiena nanku buetu tuetu to. Bualu ebu budi butusaka bua kumona mudibi ne mushinga bua kuluisha majinga etu mabi. Kuitaba mutudi bena mibi kudi kutuambuluisha bua kulongesha kondo ketu ka muoyo bua kikale katusaka ku dienza malu mimpe padi lungenyi ne mutshima wetu bitusaka ku dienza malu mabi. (Lomo 7:22, 23) Imue misangu tudi mua kuikala batekete, kadi Nzambi udi mua kutupesha bukole bua kuenza malu mimpe mu nsombelu ya mishindu yonso.​—2 Kol. 12:10.

18, 19. a) Tshidi mua kutuambuluisha bua kutshimuna mvita yetu ne nyuma mibi ntshinyi? b) Tudi ne bua kudisuika bua kuenza tshinyi?

¹⁸ Tuetu basue kutumbisha Yehowa tudi ne bua kukandamena nyuma mibi. Bia mvita bia Nzambi bidi bituambuluisha bua kuyitshimuna. (Ef. 6:11-13) Satana udi udienzeja  ne muende muonso bua kuiba butumbi budi buakanyine anu Yehowa nkayende. Udi kabidi udienzeja bua kunyanga malanda etu ne Yehowa. Satana udi umvua bibi menemene padiye utumona tuetu ne bantu bakuabu bena mibi ba bungi balume, bakaji ne bana tushala ne lulamatu kudi Nzambi ne tumutumbisha. Ke bualu kayi, tutungunukayi ne kutumbisha Yehowa anu bu mudi bifukibua bia mu diulu bimutumbisha biamba ne: ‘Wewe Mukalenge wetu ne Nzambi wetu, udi muakane bua kuangata butumbi ne bunême ne bukole; bualu bua wewe wakafuka bintu bionso, ne bualu bua disua diebe biakadiku, ne biakafukibua.’​—Buak. 4:11.

¹⁹ Tuikalayi badisuike bua kutungunuka ne kutumbisha Yehowa nansha bualu kayi mua kutufikila. Udi bushuwa umvua disanka padiye umona bantu ba lulamatu badienzeja ne muabu muonso bua kumuidikija ne kumuenesha butumbi buende. (Nsu. 27:11) Tuikalayi ne disanka anu bu Davidi wakamba ne: ‘Mukalenge Nzambi wanyi, nenkuele tuasakidila ne mutshima wanyi wonso, nentumbishe dîna diebe tshiendelele.’ (Mus. 86:12) Tudi bindile ne muoyo kulu kulu dîba dituikala mua kumuenesha butumbi bua Yehowa mu mushindu mupuangane ne kumutumbisha bua kashidi. Bantu badi batumikila Yehowa nebikale ne disanka dia kukumbaja bualu ebu. Utuku pebe umuenesha butumbi bua Yehowa Nzambi mpindieu mutekemene bua kulua kubumuenesha bua kashidi ne tshiendelele anyi?

[Nkonko ya dilonga]

[Bimfuanyi mu dibeji 27]

Utuku umuenesha butumbi bua Yehowa mu mishindu eyi anyi?