Bakadifila ne muoyo mujima mu Équateur

PAVUA muanetu kampanda wa balume wa mu Italie mujikije tulasa tuende tua bikadilu ne mpue ya bungi, balela ne balongeshi bende bavua bamusaka bua yeye kutungunuka ne tulasa tubandile. Pabi muanetu Bruno ukavua mudilambule kudi Yehowa ne mulaye bua kuteka disua dia Nzambi pa muaba wa kumpala mu nsombelu wende. Muanetu eu wakasungula bua kuenza tshinyi? Udi wamba ne: “Mvua muambile Yehowa mu disambila ne: nenkumbaje mutshipu wanyi ne nemmuteke pa muaba wa kumpala mu nsombelu wanyi. Mvua mumuleje kabidi ne muoyo mujima ne: pamutu pa meme kuikala tshiyi ne bua nsongo bundi ngenza, mvua musue kuenza midimu mishilangane idi imutumbisha.”

 Bidimu ndambu pashishe, Bruno wakaya mu ditunga dia Équateur mu Amérique wa ku Sud. Udi wamba ne: “Yehowa mmuandamune disambila dianyi mu mushindu umvua tshiyi ngelela meji.” Pakafikaye mu Équateur, wakakema pavuaye mumone bansonga bakuabu ba bungi bavua bafumine miaba mishilangane balue pabu kuenzela Yehowa mudimu mu ditunga adi.

BANSONGA BADI ‘BATETA YEHOWA’

Anu bu bansonga ba bungi pa buloba bujima, Bruno uvua muitabe dilomba dia Yehowa dia ne: ‘Nuntete, numone bingikala tshiyi mununzuluile biibi bia mu diulu, munulokeshile masanka, kanuyi nukengela bintu bikuabu kabidi.’ (Mal. 3:10) Bu muvuabu banange Nzambi, bavua bele ‘Yehowa mu diteta’ pavuabu bafile dîba diabu, makanda abu ne bintu biabu ku budisuile bua kutua mudimu wa Yehowa nyama ku mikolo mu ditunga mudi dijinga dikole dia bamanyishi emu.

Pavua bena budisuile aba bafike mu ditunga edi, bavua bamone ne: “bintu bia kunowa bidi bia bungi, kadi bena mudimu badi banya-banya.” (Mat. 9:37) Tshilejilu, muanetu mukuabu wa bakaji diende Jaqueline uvua mufumine mu ditunga dia Allemagne wakafundila biro bia Betele bia mu Équateur ne: “Ndi ngenza mudimu mpindieu mu Équateur kukadi bidimu bibidi, ndi ndonga Bible ne bantu 13, banayi ba kudibu badi babuela mu bisangilu lumingu luonso. Ki mbutumbi bua Nzambi anyi?” Chantal udi mufumine mu ditunga dia Canada udi wamba ne: “Mu 2008, ngakaya kusombela mu tshimenga kampanda tshia mu Équateur tshidi kumpenga kua mbuu tshivua ne tshisumbu anu tshimue. Mpindieu,  kudi bisumbu bisatu muaba au ne bampanda-njila bapite pa 30. Kakuena tshintu tshikuabu tshidi tshifila disanka kupita kumona mudi bantu bapiabapia baya kumpala mu mudimu wa Nzambi to. Mpindieu ndi muye kusombela mu tshimenga tshikuabu tshidi mu mikuna ya Andes mu bule bua metre 2 743. Tshimenga etshi tshidi ne bantu 75 000, kadi mudi tshisumbu anu tshimue tshianana. Bantu ba muaba eu badi bitaba lumu luimpe. Ndi ne disanka dia bungi bua kuyisha muaba eu.”

KUDI KABIDI NTATU

Bulelela, kuenzela Yehowa mudimu mu ditunga dienyi kudi kabidi ne imue ntatu. Bamue bansonga badi mene bapeta ntatu kumpala kua kumbuka mu matunga abu. Tshilejilu, Kayla udi mufumine mu ditunga dia États-Unis udi wamba ne: “Mmuenenu mubi uvua nende bamue bena Kristo nanyi uvua untekesha mu mikolo. Kabavua bumvua bua tshinyi mvua nya mu ditunga dikuabu bua kuenzelamu mudimu wa bumpanda-njila to. Imue misangu mvua ndiebeja ne: ‘Dipangadika dindi muangate edi ndimpe anyi?’” Nansha nanku, Kayla wakasungula anu bua kuya. Udi wamba ne: “Kusambila Yehowa bikole ne kuyukila ne bena Kristo bashindame kuvua kungambuluishe bua kumona ne: Yehowa udi ubenesha muntu udi udifila ne muoyo mujima.”

Lutatu lunene ludi nalu bantu ba bungi, nkulonga muakulu mukuabu. Tshilejilu, Siobhan udi mufumine mu ditunga dia Irlande udi wamba ne: “Bivua bintonda bikole pamvua mpanga mua kuamba imvua nayi. Bivua bikengela ngikale ne lutulu bua kulonga muakulu mukuabu ne muoyo mujima, pamvua ngakula bibi, mvua ndiseka.” Anna uvua mufumine mu ditunga dia Estonie udi wamba pende ne: “Bivua bitekete bua meme kuibidilangana ne luya, mpuishi ne dipangila dia mâyi a mudilu mu tshiowedi, kadi bivua binkolele bua kulonga tshiena Espagne. Imue misangu mvua mmona bu ne: tshiakukokesha to. Kadi ngakadienzeja bua kutamba kuimanyina pa bimvua ngenda mmanya pamutu pa kuimanyina pa bimvua mpanga.”

Lutatu lukuabu lunene ndua kujinga muaba udi muntu mufumine. Tshilejilu, Jonathan udi mufumine mu États-Unis udi uleja ne: “Katupa kakese panyima pa difika dianyi, ngakumvua bibi bua mumvua mushiyangane ne balunda ne balela banyi. Kadi ngakatantamena lutatu alu pamvua mudifile bikole mu didilongela Bible ne mu mudimu wa buambi. Pashishe, malu mimpe angakapeta mu buambi ne balunda bamvua mupete mu tshisumbu biakangambuluisha bua kupetulula disanka.”

 Lutatu lukuabu ndua nsombelu wa muaba udi muntu uya. Nsombelu eu katu anu mumue ne utu muntu muibidilangane nende to. Tshilejilu, Beau udi mufumine mu ditunga dia Canada udi wamba ne: “Mu ditunga dindi mufumine, nzembu ne mâyi kabiena bisamishangana mutu to. Kadi munemu badi babikosa tshianana tshianana.” Mu matunga a buena aa, bantu ba bungi badi mu bupele, ki mbamanye kubala ne ki mbipepele bua kuenza ngendu bu mudi ku mashinyi to. Ines udi mufumine mu ditunga dia Autriche udi utantamena ntatu ya buena eyi padiye wimanyina nangananga pa ngikadilu milenga ya bantu ba mu ditunga edi. Udi wamba ne: “Munemu bantu badi bakidilangana, benzelangana malu mimpe, bambuluishangana ne badi ne budipuekeshi. Badi kabidi ne dijinga dikole dia kulonga malu a Nzambi.”

‘MBAPETE MASANKA, KABAYI BAKENGELA KABIDI TSHINTU’

Nansha mudi bansonga bonso badi benza mudimu mu Équateur aba badipangishe amue malu, mbafike ku dimona ne: Yehowa udi ne bukole bua kubenzela “malu matambe” avuabu belele meji. (Ef. 3:20) Mbamone ne: ‘mbapete masanka, kabayi bakengela kabidi tshintu.’ (Mal. 3:10) Mona tshidibu bamba bua mudimu wabu:

Bruno: “Mu provense wa Amazone ke muaba umvua mutuadijile mudimu wanyi munemu mu Équateur. Pashishe, ngakaya kuambuluisha bua kudiundisha Betele wa mu ditunga edi. Mpindieu ndi ngenza mudimu ku Betele. Pantshivua mu Italie mvua musungule bua kuteka malu a Yehowa pa muaba wa kumpala mu nsombelu wanyi. Ndi ne disanka bua mudiye unkumbajila dijinga dianyi dia kumuenzela midimu mishilangane.”

Beau: “Ndi musemene pabuipi menemene ne Yehowa bualu munemu mu Équateur ndi mfila dîba dianyi dionso anu ku malu a Nzambi. Ndi kabidi ne diakalenga dia kuendakana miaba mimpe kumona. Mbualu buntu musue bikole.”

Anna: “Tshivua ngela meji ne: kuvua mushindu wa muanetu wa bakaji utshidi mujike kuenzaye mudimu wa bumisionere ku babende to. Mpindieu ndi mumanye ne: kudi mushindu. Ndi ne disanka bua kuvuija bantu bayidi, kuibaka Nzubu ya Bukalenge ne kupeta balunda bapiabapia bualu Yehowa mmumbeneshe.”

Elke: “Muetu mu Autriche mvua ndomba Yehowa bua angambuluishe bua kupeta muntu nansha umue wa kulonga nende Bible. Kadi munemu ndi ndonga Bible ne bantu 15. Pandi mmona disanka didi nadi balongi ba Bible badi baya kumpala, ndi ngumvua bimpe be.”

Joel: “Kuya bua kuenzela Yehowa mudimu muaba uudi kuyi mumanye, mbualu buimpe be. Udi umanya mua kumueyemena bikole ne upeta disanka bua kumona mudiye ubenesha malu audi wenza. Tshidimu tshia kumpala pantshivua ngumbukilaku mu États-Unis, bamanyishi ba muaba umvua ngenzela mudimu bakavula; bavua 6, mpindieu bakadi 21. Bantu 110 bavua babuele mu Tshivulukilu.”

NETUAMBE TSHINYI BUEBE WEWE?

Nuenu bansonga, nsombelu wenu udiku unuambuluisha bua kuenza mudimu muaba udibu dijinga ne bamanyishi ba bungi anyi? Bushuwa, bua kuangata dipangadika dia nunku bidi bikengela kudilongolola bimpe. Bidi bikengela kabidi kunanga Yehowa ne muntu nebe bikole. Wewe muikale ne dinanga dia buena edi ne mukumbane bua kuya kuenza mudimu ku babende, sambila Yehowa ne muoyo mujima bua bualu ebu. Uleje kabidi baledi bebe bikalabu bena Kristo ne bakulu ba mu tshisumbu tshienu dijinga diebe edi. Udi mua kulua kumona ne: wewe pebe udi mua kuenza mudimu wa tshijila udi upetesha disanka eu.

[Lungenyi lunene lua mu dibeji 3]

“Kusambila Yehowa bikole ne kuyukila ne bena Kristo bashindame kuvua kungambuluishe bua kumona ne: Yehowa udi ubenesha muntu udi udifila ne muoyo mujima.”​—Kayla udi mufumine mu États-Unis

[Kazubu/​Tshimfuanyi mu dibeji 6]

Muudi mua kudilongolola bua kuya kuenzela mudimu ku babende

• Ikala udilongela Bible bikole

• Bala Mudimu wetu wa Bukalenge wa ngondo wa 8/2011 dibeji 4-6

• Uyukile ne bamue bantu bakadi benze mudimu mu ditunga dikuabu

• Bala malu adi atangila bibidilu ne malu a kale bia mu ditunga diudi usua kuya

• Banga kulonga muakulu wa mu ditunga adi

[Kazubu/​Tshimfuanyi mu dibeji 6]

Bamue bantu badi benza mudimu mu matunga makuabu badi badiambuila bujitu buabu padibu . . .

• banji kupingana mu ditunga diabu ngondo mikese tshidimu tshionso bua kuenza mudimu

• bateka nzubu yabu mu difutshila anyi bashiya bantu bakuabu babenzela midimu yabu

• benzela mudimu ku Enternete

[Bimfuanyi mu mabeji 4, 5]

1 Jaqueline mufumine mu Allemagne

2 Bruno mufumine mu Italie

3 Beau mufumine mu Canada

4 Siobhan mufumine mu Irlande

5 Joel mufumine mu États-Unis

6 Jonathan mufumine mu États-Unis

7 Anna mufumine mu Estonie

8 Elke mufumine mu Autriche

9 Chantal mufumine mu Canada

10 Ines mufumine mu Autriche