“Bualu bumvua njinga mbukumbane”

Muanetu wa bakaji mukuabu diende Emilia uvua mpanda-njila wa pa tshibidilu kukadi bidimu bitue ku 15. Kadi wakalua kulekela mudimu wende eu. Mu bidimu biashadi ebi, uvua anu uvuluka malu mimpe avuaye mupete pavuaye mpanda-njila, ne uvua musue kuangatulula mudimu eu.

Mudimu wa Emilia wa bianza uvua umuangata dîba dia bungi, ne bualu ebu buvua bumupangisha bua kuikala ne disanka. Umue musangu pavuaye ne bena mudimu babu, wakadiabakena ne: “Bu meme ngenza mudimu anu mêba makese bivua mua kuikala bimpe be.” Mfumuende wakumvua bualu ebu ne kumuebeja ni uvua wambilamu. Emilia wakamujadikila ne: bivua nanku. Kadi, bua bualu ebu kukumbanabu bivua bikengela ayukile ne mutangidi wa kumpanyi bualu mikenji ya mudimu ivua ilomba bua bena mudimu bikale benza mudimu mêba a bungi. Emilia wakadilongolola bua kumonangana nende ne wakalomba Yehowa bua amupeshe ditalala ne dikima.

Mu diyukila diabu nende, Emilia wakaleja ne kanemu ne dikima muvuaye ujinga bua bamukepeshile mêba a mudimu. Wakaleja muvuaye musue kuambuluisha bantu bakuabu mêba avuaye kayi ku mudimu wamba ne: “Ndi Ntemu wa Yehowa, ne ntu ngambuluisha bantu bua kumanya malu a Nzambi. Lelu eu bikadilu bia bantu ba bungi bidi bienda binyanguka. Bantu badi dijinga ne mibelu milenga, ne malu a mu Bible andi mbambila adi mua kubambuluisha bikole. Tshiena musue bua malu andi ngenza pandi tshiyi ku mudimu anyange mudimu wanyi wa bianza to, kadi ndi musue kuikala ne dîba dia bungi bua kuambuluisha bantu. Ke bualu kayi ndi musue kuenza mudimu mêba makese.”

Mutangidi wa kumpanyi eu wakamuteleja ne ntema yonso ne kumuambilaye ne: yeye pende uvua musangu kampanda musue kuenza mudimu wa kuambuluisha bantu bakuabu. Pashishe wakamuambila ne: “Ndi ngitaba dilomba diebe bua malu audi muambe. Kadi udi mumanye ne: netukepeshe difutu diebe anyi?” Emilia wakamba ne: uvua mumanye, ne koku mushindu, uvua ne bua kupepeja nsombelu wende. Wakamba kabidi ne: “Tshipatshila tshianyi tshinene ntshia kuenzela bantu bualu kampanda bua mushinga.” Mutangidi wa kumpanyi wakamuambila ne: “Ntu musue bantu batu bafila dîba diabu bua kuambuluisha bakuabu.”

Kabavua banji kuitabila muena mudimu nansha umue wa mu kumpanyi eu bualu bua nunku to. Emilia udi mpindieu wenza mudimu matuku anayi ku lumingu. Bualu bua dikema, bakamubandishila too ne difutu. Udi wamba ne: “Bualu bumvua njinga mbukumbane, ndi mua kulua kabidi mpanda-njila wa pa tshibidilu.”

Ukadiku muele meji bua kuakajilula nsombelu webe bua kuangata anyi kuangatulula mudimu wa bumpanda-njila anyi?

[Lungenyi lunene lua mu dibeji 32]

Mutangidi wa kumpanyi wakamuambila ne: “Ntu musue bantu batu bafila dîba diabu bua kuambuluisha bakuabu”