‘Ndi nenu’

‘Ba bungi nebatambakane, dimanya nedivulangane.’​—DAN. 12:4, NW.

NEWANDAMUNE MUNYI?

‘Dimanya dilelela’ ndimanyike mu matuku etu aa mushindu kayi?

Mmushindu kayi udi bantu badi banyishe bulelela balue “ba bungi”?

Dimanya dilelela ‘ndivulangane’ mushindu kayi?

1, 2. a) Mmunyi mutudi bamanye ne: Yezu udi ne bayidi bende lelu ne neikale nabu mu matuku adi alua? b) Bilondeshile Danyele 12:4, dilonga Bible bimpe didi mua kutupetesha tshinyi?

FUANYIKIJABI ne: ukadi mu Mparadizu. Dituku dionso ubika ne makanda ne disanka bua kutuadija dituku dipiadipia. Kuyi kabidi ne ntatu anyi tunyinganyinga. Masama auvua nawu kaatshiyiku kabidi. Bitupa biebe bionso bia mubidi bu mudi: mêsu, matshi, diulu, bianza ne ludimi bienza mudimu biakane. Ukadi ne makanda a mubidi a bungi, wenza mudimu muimpe, muikale ne balunda ba bungi ne kuyi kabidi utshina tshintu. Aa ke masanka awapeta mu Bukalenge bua Nzambi. Kristo Yezu, Mukalenge udi Nzambi muteke neasankishe bantu bikalaye ulombola ne neabalongeshe dimanya dia Yehowa.

² Yehowa neikale ne bantu badi bamulamate pikalabu benza mudimu wa dilongeshangana eu pa buloba bujima. Munkatshi mua bidimu bia bungi, Nzambi ne Muanende batu anu bakuatshisha bantu badi ne lulamatu. Kumpala kua Yezu kuyaye mu diulu, wakajadikila bayidi bende bavua bamulamate ne: uvua amu ne bua kuikala nabu. (Bala Matayo 28:19, 20.) Bua tuetu kueyemena mêyi aa, tukonkononayi tshiambilu tshimue tshia mu mulayi kampanda uvua Nzambi mufundishe mu Babulona wa kale kukadi bidimu bipite pa 2 500. Muprofete Danyele wakamba bua ‘tshikondo tshia ku nshikidilu’ tshitudi etshi ne: ‘Ba bungi nebatambakane, dimanya nedivulangane.’ (Dan. 12:4, NW) Mu ngumvuilu wa mu tshimfuanyi ne mu diumvuangana ne malu adi enzeka lelu, muaku wa mu tshiena Ebelu udibu bakudimune muaba eu ne: “kutambakana” udi umvuija kukonkonona bimpe. Dikonkonona dia mushindu eu neditupeteshe masanka a bungi. Bantu badi balonga Bible bimpe nebapete dimanya dijalame dia Dîyi dia Nzambi. Mulayi eu udi uleja kabidi ne: bantu ba bungi bavua ne bua kuanyisha  ‘dimanya dilelela.’ Udi wamba kabidi ne: dimanya edi divua ne bua kuvulangana. Dimanya edi divua ne bua kumuangalaka pa buloba bujima ne muntu yonso uvua mua kudipeta. Bu mutudi tukonkonona mushindu udi mulayi eu mukumbane, netumone mudi Yezu muikale ne bayidi bende lelu ne mudi Yehowa ukumbaja malu onso adiye mulaye.

BANTU BADI BAPETA ‘DIMANYA DILELELA’

3. Panyima pa lufu lua bapostolo, tshivua tshifikile ‘dimanya dilelela’ ntshinyi?

³ Pakafua bapostolo, butontolodi bukavuabu balaye buakajuka ne kudiunda munkatshi mua bena Kristo balelela anu bu mudilu. (Bien. 20:28-30; 2 Tes. 2:1-3) Mu bidimu biakalonda, ‘dimanya dilelela’ kadiakavulangana munkatshi mua bantu bavua kabayi bamanye Bible ne mua aba bavua badiamba muvuabu bena Kristo to. Nansha muvua bamfumu ba mu Bukua-buena Kristo bamba muvuabu bitaba Bible, bavua balongesha malongesha a dishima anyi “mayisha a bademon” avua apendesha Nzambi. (1 Tim. 4:1) Bavua basokoke bantu ba bungi malu a Nzambi. Batontolodi bavua balongesha malu a dishima bu mudi: Nzambi udi Busatu bunsantu, anyima katu ufua ne batu bakengesha bamue bantu mu iferno wa kapia bua kashidi.

4. Mmunyi muvua bena Kristo kampanda batuadije kukeba ‘dimanya dilelela’ mu bidimu bia 1870?

⁴ Kadi mu bidimu bia 1870, mmumue ne: bidimu bitue ku 40 kumpala kua ‘matuku a ku nshikidilu’ kutuadijawu, bena Kristo kampanda ba mu Pennsylvanie mu États-Unis bakadisangisha bua kulonga Bible ne muoyo mujima ne bua kukeba ‘dimanya dilelela.’ (2 Tim. 3:1) Bakangata dîna ne: Balongi ba Bible. Kabavua ‘bena meji ne bamanyi ba mukanda’ bavua Yezu muambe ne: bavua ne bua kubasokoka dimanya to. (Mat. 11:25, NW) Bavua bantu bapuekele bavua basue kuenza disua dia Nzambi ne muoyo mujima. Bavua babala Bible bimpe, bamukonkonona ne belangana meji ne muoyo mujima. Bavua kabidi bafuanyikija mvese ya mu Bible ne bakonkonona malu avua bantu bakuabu bavua benze makebulula a muomumue bapete. Ku kakese ku kakese, Balongi ba Bible aba bakafika ku dipeta bulelela buvuabu basokoke munkatshi mua bidimu bia bungi.

5. Trakte ivuabu bapatule ivua ne tshipatshila kayi?

⁵ Nansha muvua Balongi ba Bible basanka bua malu avuabu balonga, kabavua balekele dimanya divuabu bapete dibapesha lutambishi anyi kabavua baditumbisha bamba muvuabu balongesha malu mapiamapia to. (1 Kol. 8:1) Bakapatula trakte wa (The Old Theology) ivua ne tshipatshila tshia kuambuluisha bantu bua bamanye malu malelela atu mu Bible. Mu trakte wa kumpala, bavua “basakidilamu malu makuabu avua mua kuambuluisha muntu bua kulonga Bible, bua kufika ku dilekela bilele bibi bia dishima bia bantu ne kupetulula dilongesha dia Mukalenge ne dia bapostolo.”​—The Old Theology, No. 1, 4/1889, dib. 32.

6, 7. a) Mmalongesha kayi malelela adibu batuambuluishe bua kumvua katshia mu bidimu bia 1870? b) Mmalongesha kayi malelela adi akusankisha wewe bikole?

⁶ Kukadi bidimu bitue ku 100 katshia kasumbu aka katuadija ne nkafike ku dimanya malu malelela a bungi. * Malu aa ki mmakodiakane anyi makole, alomba anu bua bamanyi ba malu a Nzambi baumvuije to. Kadi mmalu malelela adi apetesha budikadidi, atuambuluisha bua kuikala ne nsombelu wa nsongo ne atupetesha disanka ne ditekemena. Adi atuambuluisha bua kumanya Yehowa, kumanya ngikadilu yende ne malu adiye mulongolole bua kuenza. Adi kabidi atuambuluisha bua kumanya mudimu udi nawu Yezu, umvuija bua tshinyi uvua mulue pa buloba ne mufue, ne atuleja tshidiye wenza mpindieu. Malu aa mimpe adi atuleja bua tshinyi Nzambi mmulekele malu mabi, bua  tshinyi tudi tufua, mushindu utudi mua kusambila ne mushindu utudi mua kuikala ne disanka dia bushuwa.

⁷ Tudi mpindieu mua kumvua bimpe diumvuija dia milayi ivua mishale “misokoka” munkatshi mua bidimu bia bungi idi yenda ikumbana mu matuku a ku nshikidilu aa. (Dan. 12:9) Milayi eyi idi mu Bible nangananga mu mukanda wa Matayo, Mâko, Luka, Yone ne mu mukanda wa Buakabuluibua. Yehowa mmutuambuluishe bua kumvua malu atuvua katuyi mua kumona ne mêsu bu mudi: disomba dia Yezu mu nkuasa, mvita ivua mienzeke mu diulu ne diedibua dia Satana pa buloba. (Buak. 12:7-12) Nzambi mmutuambuluishe kabidi bua kumvua malu atudi mua kumona bu mudi: mvita, bikumina, masama, biyole bia nzala, ne bantu badi kabayi batumikila Nzambi bidi bileja mutudi mu ‘matuku makole a ku nshikidilu.’​—2 Tim. 3:1-5; Luka 21:10, 11.

8. Nnganyi utudi mua kuela tuasakidila bua malu atudi bafike ku dimona ne kumvua?

⁸ Bitu bipepele bua tuetu kuamba mêyi avua Yezu muambile bayidi bende a ne: ‘Mêsu adi amona malu anudi numona adi ne disanka; ndi nnuambila ne: baprofete ba bungi ne bamfumu bakasua kumona malu anudi numona, kabakaamona; bakasua kumvua malu anudi numvua, kabakaumvua.’ (Luka 10:23, 24) Tudi tuela Yehowa Nzambi tuasakidila bua mudiye mutuambuluishe bua kumona ne kumvua malu aa. Tudi kabidi ne dianyisha bua mudibu batume “musambi” mmumue ne: nyuma muimpe bua kulombola bayidi ba Yezu mu ‘malu malelela onso.’ (Bala Yone 16:7, 13.) Nunku, tuikalayi tuangata misangu yonso ‘dimanya dilelela’ ne mushinga ne tudimanyishe bakuabu ne muoyo mujima.

“BA BUNGI” BADI BANYISHA ‘DIMANYA DILELELA’

9. Bakenza dilomba kayi mu Tshibumba tshia Nsentedi tshia ngondo muinayi mu 1881?

⁹ Mu ngondo muinayi mu 1881, bidimu bitue ku bibidi katshia bapatula Tshibumba tshia Nsentedi tshia kumpala, tshibejibeji etshi tshiakalomba bua bantu 1 000 balue bamanyishi. Tshiakamba ne: “Tudi tulomba bonso badi ne mushindu wa kufila dîba diabu dionso anyi tshitupa bua kuenzela Mukalenge mudimu ne: Nudi mua kuya mu bimenga binene anyi bikese bilondeshile mushindu unudi nawu bua kulua bakolportere * bua kukeba bena Kristo balelela miaba yonso; ba bungi banuapeta nebikale ne tshisumi bua Nzambi kadi kabiyi bilondeshile dimanya dilelela. Nubambile bulenga bua ngasa wa Tatuetu ne buimpe bua Dîyi diende.”

10. Bantu bakenza tshinyi bua dilomba dia kupeta bamanyishi tshinunu?

¹⁰ Dilomba edi diakaleja ne: Balongi ba Bible bavua bamanye ne: mudimu munene uvuabu nawu uvua wa kuyisha lumu luimpe. Dijinga dia kupeta bampanda-njila anu 1 000 divua diakanyine bualu tshikondo atshi, bungi bua bantu bavua babuela mu bisangilu bia Balongi ba Bible buvua bushadile ku tshinunu. Pavua bantu ba bungi babala trakte anyi tshibejibeji kampanda, bavua bamona ne: malu avuabu babala avua malelela ne bakitaba ku dilomba. Tshilejilu, pavua muntu kampanda wa mu Londres mu Angleterre mubale Tshibumba tshia Nsentedi ne kakanda kavua Balongi ba Bible bapatule, wakafunda ne: “Ndi nnulomba bua nundongeshaku mushindu wa kuyisha ne tshindi mua kuyisha bua meme kukumbaja mudimu udi Nzambi mutulombe bua kuenza.”

11, 12. a) Bampanda-njila ba tshikondo atshi bavua ne tshipatshila kayi tshia buena tshitudi natshi lelu? b) Mmunyi muvua bampanda-njila aba benza bisumbu?

¹¹ Mu 1885, kukavua Balongi ba Bible batue ku 300 bavua benza mudimu wa bumpanda-njila. Bampanda-njila aba bavua ne tshipatshila tshia buena tshitudi natshi lelu tshia kuvuija  bantu bayidi ba Yezu Kristo. Kadi mushindu uvuabu bayisha uvua mushilangane ne utudi tuetu tuyisha. Lelu, tutu tulonga Bible ne muntu pa nkayende. Pashishe tumubikila bua kulua kudisangisha ne tshisumbu tshia bena Kristo. Kadi bampanda-njila ba tshikondo atshi bavua bapesha bantu mikanda ne babasangisha kaba kamue bua kulonga Bible. Pamutu pa kulonga Bible ne muntu pa nkayende, bavua benza bisumbu.

¹² Tshilejilu, mu 1907, bamue bampanda-njila bakaya ku nzubu ne ku nzubu mu tshimenga kampanda bua kukeba bantu bakavua bapete mukanda wa L’Aurore du Millénium (uvuabu babikila kabidi ne: Études des Écritures). Tshibumba tshia Nsentedi tshiakamba ne: “Bavua basangisha bantu bavua banyishe bulelela mu nzubu wa umue wa kudibu. Mpanda-njila umue uvua ukonkonona nabu tablo wa Le divin Plan des Âges Dia lumingu dijima, ne Dia lumingu divua dilonda uvua ubalomba bua batungunuke ne kudisangisha.” Mu 1911, bana betu bakashintulula mushindu wa kuenza mudimu. Bakateka bana betu 58 bua kuikalabu benda benza miyuki mu États-Unis ne mu Canada. Bavua bangata mêna ne adrese ya bantu bavua balua kuteleja muyuki ne banyisha malu avuabu bumvue. Pashishe bavua balongolola bua bikale badisangisha muaba kampanda bua kuenza bisumbu bipiabipia. Mu 1914 kukavua bisumbu bia Balongi ba Bible 1 200 pa buloba bujima.

13. Tshidi tshikukemesha ntshinyi bua mudi ‘dimanya dilelela’ divule lelu?

¹³ Lelu, kudi bisumbu bitue ku 109 400 pa buloba bujima ne bana betu ba balume ne ba bakaji batue ku 895 800 badi benza mudimu wa bumpanda-njila. Bantu batue ku miliyo muanda mukulu badi banyisha ‘dimanya dilelela’ ne baditumikila mu nsombelu wabu. (Bala Yeshaya 60:22.) * Bualu ebu budi bukemesha bualu Yezu ukavua muambe ne: ‘bantu bonso bavua ne bua kukina’ bayidi bende bua dîna diende. Wakamba kabidi ne: bavua ne bua kukengesha bayidi bende, kubela mu maloko ne kubashipa. (Luka 21:12-17) Bantu ba Yehowa badi ne disanka bua mudibu bakumbaja mudimu wabu wa kuvuija bantu bayidi mu mushindu wa dikema nansha mudi Satana, bademon ne bantu bakuabu babaluisha. Lelu, badi bayisha ‘bantu bonso badi pa buloba’; bayisha bantu badi basombele mu mêtu, ku mikuna, mu mpata, mu bipela, mu bimenga ne mu misoko ya kule. (Mat. 24:14) Bu kabuyi bua nyuma wa Nzambi, kabavua mua kukumbaja mudimu eu to.

‘DIMANYA DILELELA’ DIDI ‘DIVULANGANA’

14. ‘Dimanya dilelela’ ndivulangane pa buloba bujima ku diambuluisha dia mikanda mushindu kayi?

¹⁴ ‘Dimanya dilelela’ ndivulangane ku diambuluisha dia bantu ba bungi badi bayisha lumu luimpe. Ndivule kabidi ku diambuluisha dia mikanda. Mu ngondo wa 7 mu 1879, Balongi ba Bible bakapatula Tshibumba tshia Nsentedi  tshia kumpala tshivuabu babikila ne: Tshibumba tshia Nsentedi tshia Siona ne Mumanyishi wa dikalaku dia Kristo. (mu Anglais.) Bakapatuisha bibejibeji abi 6 000 kudi tshiapu kampanda anu mu Anglais. Muanetu Charles Taze Russell uvua ne bidimu 27 ke wakatekabu mupatudi. Bakasungula Balongi ba Bible bashindame 5 bua kuikalabu bafunda malu a kupatula mu Tshibumba tshia Nsentedi. Badi bapatula mpindieu Tshibumba tshia Nsentedi mu miakulu 195. Tshibumba tshia Nsentedi ke tshibejibeji tshia kumpala tshidibu batamba kuabanya pa buloba bujima. Batu bapatula bua nimero yonso bibejibeji 42 182 000. Badi batshilonda kudi Réveillez–vous! utubu bapatula bibejibeji 41 042 000 bua nimero yonso mu miakulu 84. Kudi kupatuka kabidi mikanda ne Bible mitue ku miliyo 100 tshidimu tshionso.

15. Makuta adibu bapatula nawu mikanda yetu atu afuma penyi?

¹⁵ Mudimu munene eu udi wenzeka ku diambuluisha dia mapa a budisuile. (Bala Matayo 10:8.) Bualu ebu budi bukemesha bikole bangenda-mushinga batu bapatula mikanda ya kupanyisha bualu mbamanye mudi biamu bia kupatula nabi mikanda, mabeji, mâyi a mukanda ne bintu bikuabu bilomba makuta a bungi. Muanetu mukuabu udi wenza mudimu wa kusumba bintu bidi Betele nabi dijinga udi wamba ne: “Bangenda-mushinga badi balua kutangila miaba itudi tupatuila mikanda badi bakema padibu bumvua ne: biamu binene bitudi nabi, nzubu ne bintu bikuabu bidi bienda amu ne mapa a budisuile. Padibu bamona mudi bana betu badi benza mudimu ku Betele mu tshibungi bansonga ne bikale ne disanka, badi bakema bikole.”

BULOBA NEBUULE TENTE NE DIMANYA DIA NZAMBI

16. Yehowa uvua ne tshipatshila kayi padiye muenze bua ‘dimanya dilelela’ dimanyike?

¹⁶ ‘Dimanya dilelela’ ndivulangane bua tshipatshila tshimpe. Nzambi mmusue bua “bantu bonso basungidibue, bafike ku dimanya dia malu malelela.” (1 Tim. 2:3, 4) Yehowa mmusue ne: bantu bamanye bulelela, bamutendelele bimpe ne bua bapete masanka. Yehowa mmusangishe bashadile ba ku bena Kristo bela manyi padiye muenze bua ‘dimanya dilelela’ dimanyike. Mmusangishe kabidi ‘musumba munene’ wa bantu ba munkatshi mua “ditunga dionso, ne munkatshi mua bisamba bionso, ne bantu bonso ne miaku yonso” badi ne ditekemena dia kupeta muoyo wa kashidi pa buloba.​—Buak. 7:9.

17. Didiunda dia ntendelelu mulelela didi dileja tshinyi?

¹⁷ Mushindu udi ntendelelu mulelela muye kumpala mu bidimu 130 bishala ebi udi utufikisha ku diamba ne: Nzambi ne Yezu Kristo Mukalenge udiye musungule bavua ne batendeledi ba Yehowa pa buloba, babalombola, babakuba, babalongolola ne babalongesha. Didiunda diabu didi ditujadikila ne: malu adi Yehowa mulaye bua matuku atshilualua neakumbane. Bible udi wamba ne: ‘Buloba nebuikale buule tente ne kumanya kua Yehowa bu mudi mâyi a mu mâyi manene abuikila miaba yawu yonso.’ (Yesh. 11:9) Bantu nebapete masanka a bungi be.

[Mêyi adi kuinshi]

[Nkonko ya dilonga]

[Tshimfuanyi mu dibeji 6]

Balongi ba Bible bavua bantu bapuekele bavua basue kuenza disua dia Nzambi ne muoyo mujima

[Tshimfuanyi mu dibeji 7]

Yehowa udi wangata ne mushinga malu audi wenza bua ‘dimanya dilelela’ dia Nzambi divulangane