Udi muvuluke anyi?

Dibala dia bibejibeji bia Tshibumba tshia Nsentedi bishale ebi divua dikusankishe anyi? Nanku, anji tangila ni udi mua kuandamuna nkonko idi ilonda eyi:

Nsuki ya Shimishona ke ivua imupesha bukole anyi?

Ki nsuki ya Shimishona ivua imupesha bukole to. Nsuki yende ivua ileja malanda a pa buawu avuaye mudie ne Nzambi bu muvuaye Munazi. Malanda au akanyanguka pavua Delila mumukungulayi.​—15/4, dibeji dia 9.

Anu bu mutubi bua mutshima wetu muena dîna, mbintu kayi bisatu bidi mua kuambuluisha mutshima wetu wa mu tshimfuanyi?

1) Biakudia. Anu mutu mutshima wetu dijinga ne biakudia bimpe, tudi dijinga ne biakudia bikumbane bimpe bia mu nyuma. 2) Kudibidija. Kuyisha ne tshisumi kudi mua kutuambuluisha bua kulama mutshima wetu wa mu tshimfuanyi bimpe. 3) Muaba utudi. Tuetu tudisangisha ne bena Kristo netu badi baditatshisha buetu nebituambuluishe bua kukepesha tunyinganyinga.​—15/4, dibeji dia 16.

Bua tshinyi ki mbimpe bua muanetu udi wenza muyuki dîba didi muena Kristo kampanda mufue aleje ne: mêyi adi mu Musambu wa 116:15 adi akumbanyina mufue eu?

Mvese eu udi wamba ne: ‘Lufu lua bansantu bende ludi ne mushinga mukole ku mêsu kua Yehowa.’ Ebi bidi biumvuija ne: Nzambi udi wangata lufu lua batendeledi bende bonso ne mushinga wa bungi, nunku kakuanyisha bua babutuke bonso to. Kakulekela bua batendeledi bende bonso mu tshibungi bafue to.​—15/5, dibeji dia 22.

Bakolportere bavua banganyi?

Kumpala kua tshidimu tshia 1931, bavua babikila bana betu batudi tubikila lelu ne: bampanda-njila ne: “bakolportere.”​—15/5, dibeji dia 31.

‘Makalenge aa onso’ adibu batele mu Danyele 2:44 mmakalenge kayi?

Mmakalenge anyi mbulamatadi idi mileja kudi bitupa bishilashilangane bia lupingu lua tshiamu luvuabu bumvuije kudi Danyele.​—15/6, dibeji dia 17.

Ndîba kayi divua bukalenge bua États-Unis ne Angleterre bulue bukalenge bua muanda mutekete bua bukole bua pa buloba bujima buvuabu balaye mu Bible?

Bukalenge bua bukole budi buenza ne makokeshi abidi ebu buakamueneka pavua Grande-Bretagne ne États-Unis badisangishe pamue mu mushindu kampanda mu Mvita ya kumpala ya buloba bujima.​—15/6, dibeji dia 19.

Mmunyi mudi muntu mua kudikuba kudi bademon?

Epuka tshintu tshionso tshidi mua kukufikisha ku didia malanda ne nyuma mibi. (Bien. 19:19, 20) Dienzeja bikole bua ‘kusemena pabuipi ne Nzambi’ mutuishibue ne: udi mua kukuambuluisha bua kuepuka malu a bademon. (Yak. 4:7, 8)​—1/7, dibeji dia 12.

Bua tshinyi bamue bena Yuda bakalenduka bua mushindu uvua Yezu mufue?

Bilondeshile mukanda kampanda, bena Yuda ba mu bidimu lukama bia kumpala bakamona mushindu uvua Yezu mufue bu wa bundu. Bavua bamona ne: mushindu uvua muntu ufua uvua uleja tshidiye. Nunku, bavua mua kuikala bamone Yezu bu muenji wa malu mabi.​—1/7, dibeji dia 13.

Mmêyi kayi a mu Bible adi mua kuambuluisha muntu bua kupeta nsombelu wa disanka mu matuku atshilualua?

Mbimpe kuanji kuela meji ku malu adi mua kutufikila kumpala kua kuangata dipangadika kampanda. (Nsu. 22:3) Konkonona malu adi akutangila wewe. Mona tshidiwu mua kukupetesha matuku atshidi alua. (Nsu. 21:5) Udienzeje bua kukumbaja bipatshila biebe. (Yone 17:3)​—1/7, dibeji dia 18-19.

Ngamue mêyi kayi manene a mu Bible adi mua kuambuluisha muntu bua kupita bimpe ne dinyanguka dia malu a mpetu?

Manya biudi nabi dijinga kumpala kua kuenza bualu. (Luka 14:28) Pepeja nsombelu webe. (Nsu. 22:3) Ikala mudiakaje bua kuitaba mudimu mupiamupia udi mua kumueneka. (Nsu. 29:25) Sanka ne biudi nabi. (Filip. 4:11, 12)​—1/7, dibeji dia 20-21.